Lesona 190—Soifua Maloloina Faaletino ma Faalelagona

Fausiaina o Mafutaga Maloloina

Fatuina o Sootaga Malolosi ma Aiga ma Uo

E finagalo le Tama Faalelagi ia tatou alolofa ia te Ia ma i latou o siomia i tatou. A o tatou atiina ae ni sootaga vavalalata ma aiga ma uo, e mafai ona faamanuiaina i tatou i le mafanafana e manaomia, malosi, ma le lagolago i taimi uma o le toafimalie ma faigata. O lenei lesona e mafai ona fesoasoani i tagata aoga e saili le fesoasoani a le Alii e faavae ai mafutaga e iai saofaga i lo latou soifua maloloina atoa ma le soifua manuia.

Gaoioiga E Ono Mafai Ona Aoao Ai

O le a le mea e sili ona taua?

Mafaufau e valaaulia tagata aoga e lisi i luga o le laupapa mea latou te lagona e sili ona taua i le olaga.

Faaali atu le fuaitau lenei ma valaaulia se tagata aoga e faitau.

Na aoao mai e Peresitene Dieter F. Uchtdorf, a o i ai i le Au Peresitene Sili, le mea e sili ona taua:

A o tatou liliu atu i lo tatou Tama Faalelagi ma saili atu mo Lona atamai e uiga i mea e sili atu ona taua, tatou te aoaoina pea lava pea le taua o mafutaga autu e fa: ma lo tatou Atua, ma o tatou aiga, ma o tatou uso a tagata, ma i tatou lava. (Dieter F. Uchtdorf, “E Uiga i Mea e Sili Ona Taua,” Liahona, Nov. 2010, 21.)

• O le a se mea na e aoaoina mai le faamatalaga a Peresitene Uchtdorf?

Valaaulia tagata aoga e li’o fasifuaitau na latou tusia i luga o le laupapa e faaalia ai a tatou mafutaga ma le Atua ma isi o mea e sili ona taua i le olaga. Afai e tatau ai, faaopoopo i ai “o a tatou mafutaga ma le Atua ma isi” i le lisi o i luga o le laupapa.

Faamalamalama atu o lenei lesona o le a taulai atu i a tatou mafutaga ma isi. Valaaulia tagata aoga e mafaufau e uiga i nisi o a latou mafutaga o i ai nei ma pe o nei mafutaga e aumaia faalatalata atili ai i latou i le Atua ma tuuina atu ia i latou le malosi ma le lagolago latou te manaomia i o latou olaga. E mafai foi ona latou mafaufau loloto pe faapefea ona finagalo le Alii ia i latou e faamalolosi atili mafutaga o loo i ai pe atiina ae ni mafutaga fou.

O a tatou mafutaga

Tufa atu le pepa e tufa atu ua faaautu “O Faataitaiga o Mafutaga Anoa i le Talafaasolopito o le Ekalesia ma le Mataupu Faavae ma Feagaiga,” ma valaaulia tagata aoga e vaavaai mo faamaoniga o le upumoni lenei: O se tasi o auala e mafai ai e le Atua ona faamanuiaina o tatou olaga ma faamalosia lo tatou faatuatua e ala lea i sootaga anoa ma isi. (Atonu e te manao e tusi lenei upumoni i luga o le laupapa.)

Mafaufau i ni auala e fesoasoani ai i tagata aoga e faaaoga le pepa na tufa atu. O se tasi auala o le faatulagaina lea o i latou i ni vaega taitoatolu ma tofi tagata taitasi o le vaega e suesue se tasi o faataitaiga o loo i le pepa na tufa atu. A uma ona suesue e tagata aoga a latou faataitaiga, faamalosiau i latou e feauauai e faasoa atu i a latou vaega mea na latou aoaoina e uiga i le ala e mafai ai e le Atua ona faamanuiaina i tatou e ala i a tatou mafutaga ma isi.

Faataitaiga o Mafutaga Anoa i le Talafaasolopito o le Ekalesia ma le Mataupu Faavae ma Feagaiga

Faataitaiga 1

Ina ua mavae lana asiasiga i le Mauga o Kumora ia Setema 1823, na faasoa mai e Iosefa Samita ni faamatalaga e uiga i le mea na tupu ma asiasiga a le agelu o Moronae i lona aiga. Sa faaauau pea ona faasoa atu e Iosefa mea na tutupu ma faaaliga ia i latou e sili ona latalata ia te ia. O le toe manatuaina o nei fetaiaiga paia, na tusia ai e le tina o le Perofeta, o Lusi Maka Samita le mea lenei:

O afiafi uma lava matou te faapotopotoina faatasi ai le ma fanau. Ou te manatu sa matou tuuina atu se vaega sili ona tulaga ese o soo se aiga sa ola i luga o le fogaeleele, o loo nonofo uma i se lio, tama, tina, atalii, ma afafine o loo faalogologo ma le popole tele i aoaoga faalelotu a se tamaitiiti. …

… O le tuufaatasiga sili ona matagofie ma le fiafia na faatumulia ai lo matou fale. E leai se siā po o se feeseeseaiga na faalavelaveina lo matou filemu, ma sa nofotupu le filemu i lo matou lotolotoi. (Lusi Maka Samita, i le A’oa’oga a Peresitene o le Ekalesia: Iosefa Samita [2007], 486)

• O le a se mea e tulaga ese mai ia te oe e uiga i le aiga o Samita mai lenei tala?

• Mata na faapefea ona fesoasoani le alofa na lagona e Iosefa i le aiga ia te ia e faataunuu ai lona valaauga taua?

• O le a se mea ua e aoao mai i lenei faataitaiga e uiga i le ala e mafai ai e le Atua ona faamanuiaina oe, pe mafai faapefea ona e fesoasoani i isi ia faamanuiaina, e ala i mafutaga anoa?

Faataitaiga 2

A o nofo ai i Navu, Ilinoi, na manatunatu Iosefa Samita i faamanuiaga o mafutaga anoa:

O le a ou manatu i ai o se tasi o faamanuiaga silisili, pe afai ou te puapuagatia i lenei lalolagi, ina ia fai sa’u vili i le mea e mafai ona ou maua ai ni uso ma ni uo eo siomia ai a’u. (Aoaoga: Iosefa Samita, 466)

• E mafai faapefea e aiga ma uo ona fesoasoani ia i tatou pe a tatou feagai ma luitau faigata?

• O a nisi o auala e mafai e aiga ma uo ona faamanuiaina ai o tatou olaga?

Faataitaiga 3

Faitau le Mataupu Faavae ma Feagaiga 108:7, ma vaavaai mo fautuaga faaopoopo na tuuina mai e le Alii ia Laimani Sherman o le Fitugafulu.

• Aisea e ono faigata ai i nisi taimi ona mulimuli i lenei fautuaga?

• O anafea na e lagonaina ai le faamalosia po o le siitiaina i se fegalegaleaiga ma se isi tagata?

Valaaulia tagata aoga e faasoa mai i le vasega mea na latou aoaoina ma le ala e mafai ai e le Atua ona faamanuiaina i tatou e ala i a tatou mafutaga.

• O le a se mea ua e aoaoina e uiga i le taua o le atiina ae o mafutaga anoa ma isi i lou olaga?

• E mafai faapefea e le fausiaina ma le faamalolosiina o mafutaga ma isi ona aafia ai la tatou sootaga ma le Atua faapea foi lo tatou soifua maloloina ma le soifua manuia atoa?

Fauisiaina o mafutaga

Atonu e te manao e faaalu se taimi e talanoaina ai tomai i le fausiaina ai o mafutaga. Mafaufau e tuuina atu se fasipepa avanoa mo tagata aoga uma. Faamalosiau i latou e tusi ia le itiiti ifo ma le tasi se mea e mafai ona fesoasoani i se tasi e atiae pe faamalosiina ai se mafutaga ma se isi tagata. Ao mai fasipepa ma faitau leotele i le vasega. A manaomia, faasoa atu nisi po o manatu uma i tagata aoga.

• Vaavaai mo mea masani e fiafia uma i ai.

• Aoao ma faaaoga igoa o tagata.

• Ataata.

• Faalogo ma le toto’a a o tautala isi.

• Ia viia ma faamalo atu ma le faamaoni i tagata.

• Aloese mai le faamasinoina po o le saili masei.

• Faaali atu le fiafia moni.

• Tatalo mo tagata i o latou igoa.

• Saili le alofa mama.

• Ia onosai.

• Vaavaai mo avanoa faaleauaunaga.

Mafaufau e tuu atu i tagata aoga se taimi i le vasega e faataitai ai nisi o nei tomai e fausia ai mafutaga. E mafai ona fesoasoani le faataitaiga lenei pe afai e le iloa lelei e tagata aoga ia igoa o le tasi ma le isi. Afai ua iloa e au tagata aoga igoa o le tasi ma le isi, mafaufau e filifili se isi tomai e faataitai ai.

Faamatala: Faamalamalama atu o le faaaogaina o igoa o tagata o se tomai aoga mo le fausiaina o mafutaga maloloina. Faamalamalama atu e valaauina i tatou e le Alii i o tatou igoa (tagai Kenese 35:10; Luka 19:5; Enosa 1:5; Iosefa Samita—Talafaasolopito 1:17). Mafaufau e fesili i tagata aoga pe o a ni o latou lagona pe a iloa ma ta’u e isi i latou i o latou igoa.

Faataitaiga: Faailoa atu i tagata aoga o le a lu’iina i latou e aoao igoa o le tasi ma le isi ma valaau e le tasi le isi i o latou igoa. Faamalamalama atu o se tasi o auala e manatua ai igoa o tagata o le tusi lea i lalo ma toe faamanatu. A o e ta’uina mai igoa o tagata taitasi o le vasega, valaaulia tagata aoga e tusi i lalo soo se igoa latou te lei iloaina.

E mafai foi ona fesoasoani le fesili i tagata aoga po o a mea e maua i le ala e manatua ai igoa o tagata ma pe faapefea ona latou faatoilaloina nei faafitauli.

Faataitai: Tuu atu i tagata aoga ni nai minute e iloilo ai igoa na latou tusia. Ona faataga lea o i latou e faataitai. E mafai ona e tuuina i ni paga ma vaai pe mafai ona latou galulue faatasi e faaigoa tagata uma i le vasega. Fesili atu po o ai e mafai ona faaigoa tagata uma i le vasega, ma afai e mafai e se tasi, valaaulia i latou ia faia. Afai e talafeagai se isi luitau faaopoopo, valaaulia tagata aoga e sui le mea o loo latou nonofo ai, ona vaai lea pe mafai lava ona faaigoa mai e tagata aoga ia tagata uma.

Afai e lava le taimi, filifili se tomai faaopoopo. Mo se faataitaiga, valaaulia tagata aoga e sue ni mea e tutusa ai i latou ma isi. E mafai ona latou galulue faatasi ma se tasi i totonu o le potu e le masani ona latou galulue faatasi ma fai atu i le tasi ma le isi ni fesili e iloa ai mea masani e fiafia i ai. Ona mafai lea ona latou tuu atu i se isi tagata aoga e toe fai le faiga. (Ina ia tuufaatasi tomai uma e lua, fautuaina tagata aoga e valaau e le tasi le isi i o latou igoa i le faagasologa.)

Faaaogaina patino

Mafaufau e molimau atu i le alofa o le Tama Faalelagi ma Iesu Keriso mo tagata aoga taitasi. Molimau atu e mafai e le Atua ona faamanuia ma faamalosia o latou olaga e ala i sootaga anoa latou te saili e atiina ae ma faafailele. E mafai foi ona e faasoa atu se faataitaiga o le faamanuiaina ma le faamalosia e se sootaga i lou lava olaga.

Valaaulia tagata aoga e saili le taitaiga a le Agaga Paia e fai mea nei:

Mafaufau pe faapefea ona finagalo le Alii e fesoasoani ia te oe e faamalosia se sootaga o loo i ai pe atiina ae se mafutaga fou. I le faaaogaina o mea ua e aoaoina i le asō, fai se fuafuaga e faaloloto ai lou sootaga ma lenei tagata. Ia aofia ai le auala o le a e liliu atu ai i le Alii mo se fesoasoani i lenei faagasologa.

Punaoa Faaopoopo

E mafai faapefea ona ou fausia ni sootaga lelei ma isi?

O le vaega o le “Aoao” o le mataupu e 8 i le tusi lesona Mauaina o le Malosi i le Alii: Maufetuunai Faalelagona (2021) e maua ai manatu ma fautuaga mo le faamalolosiina o mafutaga.

O le vitio “Enduring Love” (4:16) o loo faapupula mai ai le taua o le alofa mama ma le onosai i a tatou mafutaga faaleaiga.

O le tusiga “Fausiaina o Mafutaga Anoa” mai le Ensign o Aokuso 2018 (itulau 6–9) o loo faamamafa mai ai ni auala aoga e fatu ai ni fesootaiga malolosi atu ma tagata i lou olaga.

O tusiga “O Le Faataitaiga a le Faaola o le Faia o Uo” ma le “Aisea e Tatau Ai Ona Tatou Taofi le Taumafai e Alofia le Tasi ma le Isi” mai ia Tesema 2019 Ensign (itulau 74–79) ua tuuina mai ai le fesoasoani mo le faamalolosiina o mafutaga ma isi ma faatoilaloina le tuua toatasi.

Sa faamatala mai e Peresitene Dieter F. Uchtdorf, a o i ai i le Au Peresitene Sili:

Tatou te fausia lenei mafutaga [ma isi] i le toatasi le tagata i le taimi—i le nofouta i manaoga o isi, auauna atu ia te i latou, ma le tuuina atu o o tatou taimi ma taleni. Sa faagaeetia au i se tasi tuafafine o lē sa feagai ma luitau o le soifua matua ma gasegase ae sa filifili e ui lava e lē mafai ona ia faia le tele o mea, e mafai ona ia faalogo. Ma sa ia tulimatai atu i vaiaso taitasi mo tagata o foliga mafatia pe lotovaivai, ma sa ia faaaluina le taimi ma i latou, e faalogo ai. Oka se faamanuiaga tele sa ia faia i olaga o ni tagata se toatele. (Dieter F. Uchtdorf, “E Uiga i Mea e Sili Ona Taua,” Liahona, Nov. 2010, 22.)

E mafai faapefea ona ou vaai atu i isi i se auala e sili atu ona agamalu?

Sa aoao mai Peresitene Henry B. Eyring o le Au Peresitene Sili:

I le tele o tausaga ua mavae, sa avea ai a’u ma se fesoasoani muamua i se peresitene o le itu i sasae o le Iunaite Setete. Na sili atu ma le faatasi, ao matou tietie atu i la matou tamai paranesi, na ia fai mai ai ia te a’u: “Hal, pe a feiloai i se tagata, taulimaina i latou e peiseai ua latou i ai i se faafitauli ogaoga, ma o le a sili atu ona e sa’o nai lo le afa o le taimi.” E le gata na sa’o o ia, ae sa ou aoaoina i le aluga o tausaga ua maualalo tele lana fua faatatau. (Henry B. Eyring, “Taumafai, Taumafai, Taumafai,” Liahona, Nov. 2018, 90).

Gaoioiga Faaopoopo e Aoao Ai

Faataitaiga i le vitio

A o talanoaina e tagata aoga manatu ma tomai e fesoasoani ai ia i latou e fausia ni mafutaga anoa ma isi, mafaufau e faaali le vitio “Improve Family Relationships by Being More Pleasant, Urged President Nelson” (2:45). A maea le vitio, valaaulia tagata aoga e faasoa mai mea na latou aoaoina mai ia Peresitene Russell M. Nelson ma le autalavou i Palamaira, Niu Ioka, nofoaga autu mo tagata asiasi mai.

Aloese mai le faamasino atu

O se tasi auala e fatu ai ni fesootaiga malolosi atu o le aloese lea mai le faamasinosino. Afai e mafai ona manuia tagata aoga mai le faataitaia o tomai e fesoasoani ai ia i latou e aloese mai le faamasino atu, mafaufau i le gaoioiga lenei:

Faatulaga tagata aoga i ni vaega toalaiti ma fautuaina i latou e mafaufau i manatu sese po o faamasinoga e ono faia e talavou e uiga i isi. Lapataia tagata aoga e aua nei faasino i ni tagata patino latou te iloa po o ni tulaga atonu latou te iloaina. Faaali atu faamatalaga nei ma valaaulia vaega taitasi e talanoaina pe mafai faapefea e se tasi pe sili atu o nei faamatalaga ona fesoasoani i tupulaga talavou e faatoilalo le faaosoosoga e faamasino isi.

• “O i latou foi o se atalii po o se afafine o le Tama Faalelagi.”

• “Atonu o loo latou faia le mea sili latou te mafaia.”

• “Atonu o loo latou feagai ma mea ou te le iloa.”

• “E sili atu lo tatou tutusa nai lo le eseese.”

• “E tofu tagata uma ma malosiaga ma vaivaiga.”

• “E alofa le Faaola ia i latou ma e finagalo i le mea sili mo i latou.”

A uma ona talanoaina e tagata aoga ia faamatalaga, mafaufau e fai atu nisi o fesili e pei o nei:

• E mafai faapefea e le aloese mai le faaosoosoga e faamasino isi ona fesoasoani ia i tatou ia avea atili e faapei o Iesu Keriso?

• E mafai faapefea e le mafaufau lelei e uiga i isi ma aloese mai le faamasinoga ona faamalosia a tatou mafutaga?

Foiaina o feteenaiga: fesootaiga ma le feau “O au”

Afai e mafai ona manuia tagata aoga mai le aoao e uiga i le foiaina lelei o feteenaiga, mafaufau e faaali atu pe aotele ia faamatalaga nei:

O feeseeseaiga ma eseesega ma isi o se vaega masani o sootaga. E mafai ona tupu lenei mea ona o eseesega i tulaga faatāuaina, lagona, vaaiga, uunaiga, manaoga, ma manatu. O le aoao e talanoaina nei eseesega i se auala lelei e mafai ona faamalosia ai au mafutaga ma isi. …

A tulai mai ni eseesega faaletagata lava ia, atonu e faigata ona e fesootai manino atu lau pito e aunoa ma le faateleina o le feteenaiga. O le faaaogaina o sāvali “Ou te” e mafai ona fesoasoani ia te oe e faaupu ai ou atugaluga, lagona, ma manaoga i se auala e faigofie atu mo le tagata faalogologo ona faalogo ma malamalama i ai. O se sāvali “Ou te” e taulai atu i ou lava lagona ma aafiaga nai lo lau vaaiga i le mea na faia pe lei faia e le isi tagata.

O le vaega muamua o se sāvali o le “Ou te” faailoa mai ai ma faaalia ou lava lagona, lea e tāua tele i le taulimaina o feteenaiga po o feeseeseaiga. E fesoasoani e faaitiitia lagona faatautee ma faafaigofie ai ona faalogo le tasi i le isi. (Mauaina o le Malosi i le Alii: Maufetuuai Faalelagona [2021], 136)

Ina ia faapupula lenei mataupu faavae, mafaufau e faasoa atu faataitaiga nei po o le valaaulia o tagata aoga e mafaufau i o latou lava faataitaiga:

Faataitaiga o Sāvali “E te”	Faataitaiga o Sāvali “Ou te”
“E te le faalogo lava pe taumafai e malamalama ia te au.”	“Ou te lagona e pei ou te le o lagonaina pe malamalama foi i ai.”
“E te le tuuina lava se manatu po o se lagona i au meaalofa po o taga.”	“Ou te lagona le le taua ma le tuulafoaiina.”

Faatulaga tagata aoga i ni paga ma faaali atu le gaoioiga lenei:

• Laasaga 1: Filifili po o ai o le a avea ma paga 1 ma po o ai o le a avea ma paga 2. O le paga 1 o le a amata i le mafaufau i ni nai sāvali masani “e te” ua ia faalogo i ai. O le paga 2 o le a tali atu e ala i le faaliliuina o nā sāvali “e te” i sāvali o le “Ou te”.

• Laasaga 2: Fesuiai paga 1 ma le 2, ma toe fai le Laasaga 1.

• Laasaga 3: Mafaufau faatasi i nisi o faatinoga alofa e fai pe a lē taliaina se sāvali “Ou te” e pei ona faamoemoeina.

Ina ia faaiu, valaaulia tagata aoga e faasoa mai mea na latou aoaoina mai le gaoioiga ma pe faapefea ona latou faaaogaina nisi o nei tomai i a latou uo ma tagata o le aiga.