“8: Aoao,” Mauaina o le Malosi i le Alii: Faafoisia Faalelagona (2020)
“8: Aoao,” Mauaina o le Malosi i le Alii: Faafoisia Faalelagona
Aoao—Taimi Aofai: 60 Minute
1. E Tāua Sootaga
Faitau:
A o tatou atiina ae ni sootaga alofa ma isi, e faamalosia lo tatou soifua maloloina faaletino, faalelagona, ma faaleagaga. E finagalo le Tama Faalelagi ia tatou alolofa ia te Ia ma i latou o siomia i tatou. E alolofa o tatou aiga ma uo ia i tatou ma e mafai ona tuuina mai le lagolago, faamalosiauga, ma manatu faaalia faamaoni e manaomia ona tatou taulimaina ai ma le manuia ia luitau o le olaga. E manao le fili e faaesea i tatou mai isi ma manao ia tatou lagona le aveesea o faamanuiaga e maua mai i sootaga.
“Na aoao mai le Perofeta o Iosefa Samita e faapea ‘o le faauooga o se tasi lea o mataupu faavae autu o le “FaaMamona”’ [Aoaoga a Peresitene o le Ekalesia: Iosefa Samita (2007),463]. O lena manatu e tatau ona musuia ma faaosofia ai i tatou uma auā ou te lagonaina o le faauo o se manaoga tāua o lo tatou lalolagi. Ou te manatu ia i tatou uma o loo i ai se lagona loloto mo se faauoga, o se faananauga loloto mo le faamalieina ma le saogalemu lea e mafai ona tuuina mai e sootaga vavalalata ma tumau” (Marlin K. Jensen, “Friendship: A Gospel Principle,” Ensign, May 1999, 64).
Talanoa:
O a ni faamanuiaga ua e vaaia mai sootaga vavalalata ma alofa?
2. Fausiaina o Sootaga
Faitau:
Pe a fausia ni sootaga, e tatau ona tatou faia le taimua e aapa atu ai i isi ma ia talia ni eseesega. E mafai ona tatou fausia sootaga e ala i mea “laiti ma faatauvaa” (Alema 37:6). O le faaaluina o le taimi e fatu ai ni sootaga lelei e sili atu ona tāua nai lo le tele. O le a tatou iloa ai tatou te maua le olioli sili atu i le olaga a o tatou atiina ae ni sootaga vavalalata ma ni nai tagata tatou te faatuatuaina nai lo le mauaina o le tele o sootaga lē faamaoni. E leai se mea e leaga ai le i ai o ni uo se tele, ae e lē tatau ona tatou manatu o le tele o uo e tutusa ai le fiafia.
Faitau le lisi o loo i lalo o auala faaopoopo e fatu ai ma fausia ai sootaga ma isi.
Ia fiafia moni i isi tagata. Aoao po o a mea e fiafia pe oliolii ai isi tagata. E lē faapea e tatau ona tutusa mea tou te fiafia i ai, ae e mafai ona e aoao e popole i mea latou te fiafia i ai.
Ataata. O le fiafia e lē faalagolago i mea o loo tutupu i ou autafa ae o le auala e te tali atu ai i ou tulaga. O foliga ataata e foaifua atu ma e mafai ona avea o se auala sili e maua ai e isi ni lagona sili atu.
Manatua igoa o tagata. O le igoa o se tagata o le leo aupito sili lea ona tāua ia te ia, pe o iloa e le tagata pe leai. O le aoaoina o se igoa o se tasi e mafai ona fesoasoani i lena tagata ia lagona le faatāuaina ma le tāua.
Ia avea ma se tagata e faalogo lelei. Uunaia isi e talanoa e uiga ia i latou lava. E lagona e tagata le talisapaia pe a faalogo atu se tasi ia i latou. O le auala sili ona faigofie e talanoa atu ai se tasi ia te oe o le avea lea ma se tagata e faalogo lelei. Ina ia avea ma se tagata e faalogo lelei, e tatau ona e popole ma le faamaoni i mea e fai mai ai isi.
Taumafai ma le faamaoni ia lagona e isi lo latou tāua. O le tulafono auro o le taulimaina lea o isi tagata i le auala e te manao e taulimaina ai oe. E fiafia tagata ia lagona lo latou tāua—e pei o le tāua i isi o mea latou te tautatala ai pe faia foi. E mafai ona e faia le mea sili e fesoasoani ai i tagata ia lagona le tāua e ala i le faataitaia o manatu o loo lisi atu i i.
Faitau:
“Tatou te fausia lenei sootaga [ma isi] i le toatasi le tagata i le taimi—i le nofouta i manaoga o isi, auauna atu ia te i latou, ma le tuuina atu o o tatou taimi ma taleni. Sa faagaeetia au i se tasi tuafafine o lē sa feagai ma luitau o le soifua matua ma gasegase ae sa filifili e ui lava e lē mafai ona ia faia le tele o mea, e mafai ona ia faalogo. Ma sa ia tulimatai atu i vaiaso taitasi mo tagata o foliga mafatia pe lotovaivai, ma sa ia faaaluina le taimi ma i latou, e faalogo ai. Oka se faamanuiaga o ia i olaga o le toatele o tagata” (Dieter F. Uchtdorf, “E Uiga i Mea e Sili Ona Taua,” Liahona, Nov. 2010, 22).
Mafaufau loloto:
Mafaufau i se tasi e mafai ona e fausiaina se sootaga malosi atu. Mafaufau i manatu i le amataga o lenei vaega ma le fautuaga i upu a Peresitene Uchtdorf, ma tusi i lalo ni auala e mafai ona e faaaogaina ai mea ua e aoaoina e fausia ai lenei sootaga.
3. Ia Malamalama ma Ia Lē Faamasino Atu
Faitau:
E faia e tagata uma faamasinoga e uiga i tulaga ma tagata, e aofia ai faatinoga a tagata o le aiga. Na faamatala mai e Peresitene Uchtdorf, “Pe a tatou lagonaina le tiga, ita, po o le lotoleaga, e faigofie lava le faamasino o isi tagata, e tele lava ina tuuaia i latou i uunaiga leaga o amioga ina ia ta’uamiotonu ai o tatou lava lagona o le ita” (“O le e Alofa Atu e Alofaina Mai,” Liahona, Me 2012, 70). Ae ua tau mai e le Tusi a Mamona, “Ina ua vaai ua outou iloa le malamalama tou te faamasino ai, o le malamalama lea o Keriso, vaai ia outou le faamasino sese; aua o le faamasinoga lava lea tou te faamasino atu ai o le a faamasino ai foi outou” (Moronae 7:18
Talanoa:
E faapefea e le malamalama ma faaitiitia le faamasinosino ona tosina ai lo tatou fiafia?
Faitau:
Vaai faalemafaufau e faapea ua e vaai i se matua ma se fanau laiti e toafa. E leotetele tamaiti ma o loo faatiga ia te oe ma i latou o siomia i latou. E foliga mai e lē o ano mai le matua ma faalavelaveina, e lē iloa le telē o le aafiaga o amioga a fanau o loo siomia ai i latou. Ua mavae sina taimi, ona tautala malosi atu lea o le matua i tamaiti, ma fai atu ia i latou ia filemu.
Talanoa:
I le avea ai o se vaega, talanoaina po o le a se tali faamasinosino. Aumai ni faamalamalamaga agaalofa pe aisea e mafai ai e le matua ona amio faapea. O le a se mea e mafai ona e faia ina ia malamalama atili ai ma faaitiitia le faamasinosino?
4. Fesootai ma Sāvali “Ou te”
Faitau:
O feeseeseaiga ma eseesega ma isi o se vaega masani o sootaga. E mafai ona tupu lenei mea ona o eseesega i tulaga faatāuaina, lagona, vaaiga, uunaiga, manaoga, ma manatu. O le aoao e talanoaina nei eseesega i se auala maloloina e mafai ona faamalosia ai au sootaga ma isi ma fesoasoani ai ia te oe e atiina ae le alofa ma le onosai. O le foiaina o feteenaiga maloloina e ono tupu pe a lagona e tagata le saogalemu ma le faatāuaina. E ui o eseesega e masani ai, ae e lē tatau ona taitai atu i finauga. O le fefinauai i le taimi o se feteenaiga e mafua ai se faafitauli.
A tulai mai ni eseesega faaletagata lava ia, atonu e faigata ona e fesootai manino atu lau pito e aunoa ma le faateleina o le feteenaiga. O le faaaogaina o sāvali “Ou te” e mafai ona fesoasoani ia te oe e faaupu ai ou atugaluga, lagona, ma manaoga i se auala e faigofie atu mo le tagata faalogologo ona faalogo ma malamalama i ai. O se sāvali “Ou te” e taulai atu i ou lava lagona ma aafiaga nai lo lau vaaiga i le mea na faia pe lei faia e le isi tagata.
O le vaega muamua o se sāvali o le “Ou te” faailoa mai ai ma faaalia ou lava lagona, lea e tāua tele i le taulimaina o feteenaiga po o feeseeseaiga. E fesoasoani e faaitiitia lagona faatautee ma faafaigofie ai ona faalogo le tasi i le isi. Faitau faataitaiga o loo i lalo o le auala e faaliliu ai se faamatalaga “oe” i se sāvali “Ou te”.
|
Faataitaiga o Sāvali “E te” |
Faataitaiga o Sāvali “Ou te” |
|---|---|
Faataitaiga o Sāvali “E te” “E te lē faalogo lava i se tasi, ma e te lē o faalogo moni mai ia te au i le taimi nei.” | Faataitaiga o Sāvali “Ou te” “Ou te lagona le lotovaivai pe a ou lē manatu ua malamalama ia te au. O le faatumauina o le fesootaiga o mata e fesoasoani ou te lagona ai pei e te popole. |
Faataitaiga o Sāvali “E te” “E matuai lē magafagafa lava oe ma e lē mafaufau i le misi o le taumafataga o le afiafi ae lē valaau mai.” | Faataitaiga o Sāvali “Ou te” “Ou te lagona le lē ano mai pe a e misia le taumafataga o le afiafi e aunoa ma le valaau mai. Ou te lagona foi le popole atonu na tupu se mea ia te oe.” |
Talanoa:
O a eseesega i le va o sāvali “E te” ma le “Ou te”?
Faitau:
Pe a e faaaluina se taimi e fesootai atu ai ou lagona i se tasi, atonu e te manatu o le tiutetauave o le isi tagata le mulimuli i le faataunuuina o ou manaoga. Ae tusa lava pe e te fesootai atu ou lagona i isi, o ou lagona ma manaoga o loo avea pea ma ou tiutetauave. A lē maua e lau sāvali “Ou te” le taunuuga e manaomia, e mafai ona e galue ma le alofa e fatu le taunuuga e te manao ai nai lo le ita.
5. Ia Agaalofa
Faitau:
“Po o a lava ni faafitauli o loo feagai ma lou aiga, po o le a lava le mea e tatau ona e faia e foia ai, o le amataga ma le faaiuga o le vaifofo o le alofa mama, le alofa le pona o Keriso. A aunoa ma lenei alofa, e oo lava i aiga e foliga mai e atoatoa, e tauivi lava. Faatasi ai ma lena mea, e oo lava i aiga e i ai luitau tetele e manuia” (Dieter F. Uchtdorf, “I Le Viia o i Latou o E Laveai,” Liahona, Me 2016, 80).
Maimoa:
“Alofa Tumau,” o loo maua i le https://churchofjesuschrist.org/study/video/self-reliance-videos [4:16].
Mafaufau loloto:
O ai e te iloa e mafai ona manuia mai lou alofa mama? Aisea?
Faitau:
Ua tuuina mai e le Alii ia i tatou le fautuaga e uiga i le atiina ae o sootaga e ala i le pepa o faamatalaga musuia “O Le Aiga: O Se Folafolaga i le Lalolagi.” Ua aoao mai o sootaga manuia e “faavae ma tumau i mataupu faavae o le faatuatua, tatalo, salamo, faamagaloga, faaaloalo, alofa, agalelei, galuega, ma gaoioiga faafiafia tuufaatasi” (“O Le Aiga: O Se Folafolaga i le Lalolagi,” ChurchofJesusChrist.org).