Punaoa

Manatu mo le Auaunaga

Musika	O loo i ai se faamaoniga e mafai ona fesoasoani musika e faaitiitia ai le atuatuvale ma le popole. Pe a e lagonaina le atuatuvale po o le lotovaivai, pese ia te oe lava pe faalogologo i se musika e sili ona e fiafia i ai. “E mafai e viiga ona sii ae o tatou agaga, tuuina mai ia i tatou le lototele, ma uunaia i tatou e fai mea tonu. E mafai ona latou faatumuina o tatou agaga i mafaufauga faalelagi ma aumai ia i tatou le agaga o le filemu” (“Tuleiga Tomua a le Au Peresitene Sili i Viiga,” Viiga, 1985, x).
Faamalositino e Faatoafilemu ai le Mafaufau	O le lava o le malolo e fesoasoani lea i lou tino ia toe faaleleia mai le atuatuvale. Ia faataitai lenei mea i le po ae e te lei moe e toleni ai lou tino ia to’amalie. Fai se isi faiga puupuu o le faamalositino lenei i soo se taimi lava o le aso e te lagonaina ai le atuatuvale. Taoto i lalo pe saofai lelei ma le toafimalie ma moeiini ou mata. Vaavaai mo soo se feteenaiga o loo e tauaveina, taulai atu i se vaega se tasi o lou tino i le taimi: o lou ulu ma foliga, mata, auvae, ua, tauau ma le tua, lima, lima ma tamatamailima, fatafata ma le manava, vae, ma alofivae ma tamatamaivae. Ia faavaivai ma le naunau vaega taitasi o lou tino. Ia lagonaina le matafi ese uma o vaega malō, e pei o se oneone e toulu ifo i le va o ou tamatamailima. Afai o loo e lagonaina pea le faavauvau, faamalō le vaega malō o lou tino mo le 10 sekone ona faamalolo lea mo le 10 sekone. Faifai mālie. Siaki faalemafaufau lou tino mo soo se vaega o totoe o loo malō, ona faavaivai atoa lea. Taulai atu i se manatuaga po o se faatulagaga mafaufauina lea e aumaia ia te oe le filemu ma le olioli. Taumafai e vaai faalemafaufau i le vaaiga i le manino e mafai ai seia oo ina e lagona ua e saunia e toe pupula ou mata.
Manatunatu e Faaaoga Ai Sane e Lima	O le taulai atu i ou sane e mafai ona fesoasoani ia te oe e faataitai ai le manatunatu. Mo ni nai minute, ia mātau lemu lou siosiomaga. A o e faia, taumafai e fai mea nei: Mātau mea e lima e mafai ona e vaai i ai. Vaavaai solo ma aumai lou mafaufau i mea e lima e mafai ona e vaai i ai. Filifili se mea e lē masani ona e mātauina, e pei o se ataata po o se tamai taetaei. Mātau ni mea se fa e mafai ona e lagonaina. Ia gauai atu i mea e fa o loo e lagonaina i le taimi nei, e pei o le vaivai o ou lavalava, o le lagona o le savili i luga o lou pa’u, po o le lamolemole o se laulau o loo e tuuina ai i luga ou lima. Mātau ni mea se tolu e mafai ona e faalogo i ai. Faaalu sina taimi e faalogo ai, ma mātau ni mea se tolu e te faalogo i ai i tua atu. E mafai ona avea lenei mea o se tagi a se manulele, o le pa’ō mai o se pusaaisa, po o le leo mamao mai o taavale mai se auala lata ane. Mātau ni mea se lua e mafai ona e sosogia. Ia nofouta i ni manogi se lua e masani ona e faamamāina, pe manaia pe lē manaia. Atonu e te matauina se manogi o laau paina pe afai o e i fafo po o ofu o loo e ofuina. Mātau se mea se tasi e mafai ona e tofoina. Taulai atu i se mea se tasi e mafai ona e tofo i ai i le taimi nei, i le taimi nei lava. E mafai ona e faia se inumaga o se meainu, lamu se fasi pulukamu, ai se meaai, pe mātau le tofo o i ai nei i lou gutu.
Vaai faalemafaufau	I lenei auala malolo, o le a e fatuina ai ni ata faalemafaufau e alu ai se malaga vaaia i se nofoaga po o se tulaga, filemu ma toafimalie. Amata i le mafaufauina o se nofoaga e te maua ai le fiafia. E mafai ona avea lenei mea o se nofoaga moni po o se nofoaga e mafaufauina. I le taimi o le vaaiga faalemafaufau, taumafai e faaaoga le tele o sane e te mafaia, e aofia ai le manogi, vaaiga, leo, ma le pa’i i ai. Afai o e vaai faalemafaufau i le malologa i le vasa, atonu e te mafaufau e uiga i le manogi o le vai o le sami, le leo o galu fafati, ma le mafanafana o le la i lou tino. Atonu e te manao e moeiini ou mata, nofo i se nofoaga filemu, ma ia mautinoa e lagolelei ou laei.

Manatua: E mafai foi ona e faaaogaina le gaoioiga o le manatunatu mai lenei mataupu.

Faamatalaga