“7: O Lou Faavae: Faaali Le Amio sao,” Mauaina o le Malosi i le Alii: Faafoisia Faalelagona (2020)
“7: O Lou Faavae: Faaali le Amio sao,” Mauaina o le Malosi i le Alii: Faafoisia Faalelagona
O Lo’u Faavae: Faaali le Amio Sao—Taimi Aofai: 20 Minute
Mafaufau loloto:
Aisea e alofa ai le Alii ia i latou e i ai le “faamaoni o le loto” (Mataupu Faavae ma Feagaiga124:15)?
Maimoa:
“What Shall a Man Give in Exchange for His Soul?” maua i le https://churchofjesuschrist.org/study/video/self-reliance-videos. (E lē maua le vitiō? Faitau le tusiga mo le “Se a Foi Se Mea e Avatu e le Tagata e Togiola A’i Lona Ola?”)
Se a Foi Se Mea e Avatu e le Tagata e Togiola A’i Lona Ola?
Afai e lē mafai ona e matamata i le vitiō, faitau le tusiga lenei.
Elder Robert C. Gay:
Na fesili le Faaola i Ona soo i le fesili lenei: “Se a foi se mea e avatu e le tagata e togiola a’i lona ola?”
O se fesili lenei na aoao mai e lo’u tamā ou te mafaufau i ai ma le faaeteete i tausaga ua mavae. A o ou tuputupu a’e, sa tofi mai e o’u matua a’u feau e fai i le fale ma totogi mai se alauni ia te au mo lena galuega. Sa masani ona ou faaaogaina lena tupe, e sili laitiiti atu i le 50 sene i le vaiaso, ou te alu ai i le tifaga. O aso nā o le tau o se pepa mo le tifaga sa na o le 25 sene mo se tamaitiiti e 11 tausaga. Ona totoe ai lea o le 25 sene e faaalu i lole, lea sa 5 sene i le lole. O se tifaga ma ni lole laau se lima! E leai se mea na sili atu nai lo lena mea.
Sa lelei mea uma sei oo ina atoa lou 12. O le tutu ai i le laina i se tasi aoauli, sa ou iloa ai o le tau o le pepa tifaga mo se tagata e 12 tausaga ua 35 sene, o lona uiga la, o le a leai isi lole laau e lua. O le lē saunia lelei e fai lena ositaulaga, sa ou faapea ifo ai ia te a’u lava, “E tutusa lava ou foliga e pei o le vaiaso na te’a nei.” Na ou laalaa atu ma fai atu mo se pepa tifaga e 25-sene. Sa le’i emo le tali tupe ma sa ou faatauina au lole laau masani e lima ae lē tolu.
O lo’u fiafia ai i lena mea na ausia, sa ou telea’i atu ai i le fale e faamatala i lo’u tamā lo’u laki tele. A o o’u talatala atu i ai faamatalaga, sa leai sana tala na fai mai. Ina ua uma la’u faamatalaga, sa na ona tilotilo mai lava ia te a’u ma fai mai, “Atalii, e te faatauina atu lou agaga mo se limasene?” O ana upu sa tuia ai lo’u fatu o se sefululua tausaga le matua. O se lesona sa lē mafai ona galo ia te a’u.
(“Se a Foi Se Mea e Avatu e le Tagata e Togiola A’i Lona Ola?” Liahona, Nov. 2012, 7.
Talanoa:
O le a le uiga o le mauaina o le amio sao? O a nisi o auala laiti e tuuese ai e tagata o latou agaga ina ia maua ai mea o lenei olaga?
Faitau:
“Matou te talitonu i le faamaoni” (Mataupu Faavae o le Faatuatua 1:13).
“Seia oo lava i lou oti, ou te lē faateaina lava la’u amio sa’o” (Iopu 27:5).
Faitau:
O le fuaitau lenei o le mau ma le saunoaga a Elder Wirthlin:
“Ma ou te manao ia outou manatua, soo se tasi o outou na te nonō se mea mai lē la te tuaoi e tatau ia te ia ona toe faafoi atu le mea na nonō mai e ia, e tusa ma lana ioega, a lē o lea ua e faia le agasala; ma atonu o le a e faia ai ia fai ai foi e lē lua te tuaoi le agasala” (Mosaea 4:28).
“O le amiosa’o o lona uiga o le faia o le mea sa’o ma lelei e tusa lava po o a taunuuga e vave oo mai. O lona uiga o le amiotonu mai le taele o o tatou agaga, e lē gata i a tatou amioga ae, o le mea sili atu ona tāua, i o tatou mafaufauga ma i o tatou loto. … O sina pepelo laitiiti, o sina faimamago, po o le faia o sina mea e lē lelei e lē taliaina e le Alii. … O le taui silisili o le amiosao o le mafutaga faifai pea ma le Agaga Paia. … A tatou faia le mea sao, e mafai ona ia mau faatasi ma i tatou ma taiala i tatou i mea uma tatou te faia” (Joseph B. Wirthlin, “Personal Integrity,” Ensign, May 1990, 30, 32–33).
Talanoa:
Aisea e tatau ai ona faamaoni ina ia faateleina le faafoisia faalelagona?
Tautino:
O le a sili atu ona ou faamaoni i se tasi o eria e iva ua ou fuaina i luga.