“1: Aoao,” Mauaina o le Malosi i le Alii: Faafoisa Faalelagona (2020)
“1: Aoao,” Mauaina o le Malosi i le Alii: Faafoisia Faalelagona
Aoao—Taimi Aofai: 60 Minute
1. O le a le Faafoisia Faalelagona?
Faitau:
Ina ia avea e faapei o le Faaola, o le a manaomia e tagata uma ona feagai ma luitau ma faigata i lenei olaga. O le taulimaina ma le manuia o luitau o le olaga e manaomia ai le faatuatua ia Iesu Keriso ma le faafoisia faalelagona. O le faafoisia faalelagona o le:
-
O le tomai e fetuunai ai i luitau faalelagona ma le lototele ma le faatuatua e totonugalemu ia Iesu Keriso.
-
Fesoasoani ia te oe lava ma isi i le mea sili e te mafaia.
-
Aapa atu mo se fesoasoani faaopoopo pe a manaomia.
O lenei kosi ua mamanuina e faamalosia ai oe faaleagaga ma aoao ai oe i nisi o tomai autu mo le taulimaina o luitau ma faanoanoaga o le olaga. O le a e aoao foi mai aafiaga ma fesoasoani a isi tagata o le vaega.
Mafaufau loloto:
Fesili ifo ia te oe lava, aisea e te manao ai ia faateleina lou faafoisia faalelagona? Tusi lau tali i lalo.
2. Taliaina o Luitau o se Vaega o le Fuafuaga a le Atua mo i Tatou
Faitau:
I le avea ai ma Tamā o o tatou agaga, e atoatoa le Atua, ua i ai le mana uma, ma silafia mea uma. E alofa o Ia ia i tatou taitoatasi, ma o lo tatou alualu i luma o Lana galuega ma Lona mamalu lea. O Lana fuafuaga mo i tatou o le tuputupu ae lea ma suia seia tatou avea e faapei o Ia. Na te faatagaina i tatou ina ia luitauina, ma afai tatou te tali atu i le faatuatua, o le a faamalosia i tatou e le Alii ma fesoasoani ia tatou tuputupu ae ia avea atili e faapei o ia. O le faafoisia faalelagona e fesoasoani tatou te onosai ai ma tuputupu ae mai nei luitau.
“E leai se tiga tatou te feagai, leai se tofotofoga tatou te oo i ai e maumau. E aogā mo lo tatou a’otauina, i le atinaega o na uiga auaumamā e pei o le onosai, faatuatua, lototoa ma le lotomaulalo. O mea uma tatou te mafatia ai, ma mea uma tatou te onosaia, ae maise lava pe a tatou onosaia ma le faapalepale, e atiina ae ai o tatou tagata, faamama ai o tatou loto, faalautele ai o tatou agaga, ma faia ai i tatou ia sili atu ona agamalu ma agaalofa … ma e ala mai i faanoanoaga ma mafatiaga, o le galulue punouai ma puapuaga, tatou te maua ai le aoaoina lea ua tatou o mai ai iinei ina ia maua” (Elder Orson F. Whitney, e pei ona tusia i le Spencer W. Kimball Faith Precedes the Miracle [1972], 98).
Maimoa:
“O Loo Ia Fausia se Maota,” o loo maua https://churchofjesuschrist.org/study/video/self-reliance-videos [1:19].
Talanoa:
Na faapefea ona fesoasoani aafiaga faigata ia te oe e tuputupu ae ai i lou olaga?
3. Faaaogaina o le Faitalia e Faatino Ai Ma le Talafeagai
Faitau:
E tusa lava pe tutupu mea leaga o siomia ai i tatou, tatou te filifili lava pe faapefea ona tatou tali atu. O le tauaveina o le tiutetauave mo le auala tatou te tali atu ai, e tusa lava pe feagai ma luitau, e aumaia ai le filemu ma le mana.
“Ona o i tatou o atalii ma afafine o lo tatou Tama Faalelagi, ua faamanuiaina i tatou i le meaalofa o le faitalia, o le mana e fai au lava taga ma filifiliga. Ina ua faamanuiaina i le faitalia, o lea o oe ma au o sui, o lona uiga o oe ma au e tatau ona tatou galulue ae lē tau galueaina. Ia talitonu e mafai e se tasi po o se mea ona faia i tatou ia le fiafia, ita, tiga, pe matua faaitiitia ai lo tatou faitalia ma faaliliuina ai i tatou i ni mea faitino ina ia galueaina ai. Peitai, o le avea ai ma sui, ua i ai ia te oe ma au le mana e galulue ai ma filifili pe faapefea ona tatou tali atu” (David A. Bednar, “E Leai Foi se Mea e Tausuai ai i Latou,” Liahona, Nov. 2006, 90).
O luitau po o suiga e lei faamoemoeina atonu e foliga mai e lē talafeagai. Atonu e faaosoosoina i tatou e tali atu i auala e lē talafeagai ma e lē faapei o Keriso:
-
Tuuaia isi
-
Fai ni alofaga
-
Fouvale
-
Faitio
-
Saili masei
-
Masalosalo
-
Fiu
-
Faatuai
-
Ita
-
Manatu Faatauvaa o le tagata lava ia
-
Faataga le fefe e pulea
-
Tauamiotonuina o le tagata lava ia
O le faafoisia faalelagona e aofia ai le iloaina o nei tali ia i tatou lava ma le faaaogaina o lo tatou faitalia e filifili ai se tali e sili atu ona talafeagai.
Talanoa:
O anafea na e faaaogaina ai lou faitalia e faatino ai ma le talafeagai? Na faapefea ona fesoasoani ia te oe?
Maimoa:
“Mountains to Climb,” o loo maua i le https://churchofjesuschrist.org/study/video/self-reliance-videos i le [5:05].
Talanoa:
E ui i o latou luitau, o a mea na fai e tagata taitoatasi i le vitiō e faataga ai le Alii e fesoasoani ia i latou?
Faitau:
“O le i ai o le faatuatua ia Iesu Keriso o le faalagolago lea ona o Lana taulaga togiola o le a Ia faasa’oina ai amioletonu uma, toefuatai mea uma ua leiloloa, ma faaleleia mea uma ua nutimomoia, e aofia ai loto. O le a Ia faasaoina mea uma, ae lē tuua ai soo se faamatalaga e lei fuafuaina” (Lynn G. Robbins, “Be 100 Persent Responsible” [Brigham Young University devotional, Aug. 22, 2017], speeches.byu.edu).
Talanoa:
E faapefea ona fesoasoani ia i tatou le faatuatua ia Iesu Keriso e onosaia ai luitau?
4. O Faamanuiaga o Suiga
Faitau:
“E i ai se taimi na tatou faalogo uma ai i nisi o ituaiga o upu masani: ‘E leai se mea e tumau e pei o se suiga.’ I o tatou olaga atoa, e tatau ona tatou taulimaina suiga. O nisi suiga e taliaina; o nisi e leai. O loo i ai suiga i o tatou olaga ia e faafuasei, e pei o le maliu faafuasei o se tasi e pele, o se gasegase e lei mafaufauina, o le leiloa o se mea ua tatou faapelepele i ai. Ae o le tele o suiga e faifai malie ma le lemu” (Thomas S. Monson, “Mauaina o le Olioli i le Faigamalaga,” Liahona, Nov. 2008, 84).
Ua faamautinoa mai e le Alii ia i tatou afai tatou te faalotomaualaloina i tatou lava i Ona luma, e mafai ona Ia fesoasoani ia i tatou ia suia mo le lelei sili atu. “Ma afai e o mai tagata ia te au o le a ou faaali atu ia te i latou o latou vaivaiga. Ou te avatu i tagata ia vaivaiga, ina ia faalotomaualalo ai i latou; ma ua lava lo’u alofa tunoa mo tagata uma o e e latou te faalotomaualaloina i latou lava i o’u luma; aua afai latou te faalotomaualaloina i latou lava i o’u luma, ma faatuatua mai ia te au, ona ou faia lea o mea vaivai ia avea ma mea malolosi ia te i latou” (Eteru 12:27).
5. Faaalia o le Lotofaafetai i Aso Taitasi
Faitau:
I le taimi o nei fonotaga faalevaega, o se tasi o au tautinoga i vaiaso taitasi o le a aofia ai le tusia i lalo o se mea se tasi e te faafetai ai mo aso taitasi. O le faaalia o le lotofaafetai e lē faapea ua e faafitia pe lē amanaiaina lagona o le tiga po o le lotovaivai. O lona uiga e te faailoa atu faamanuiaga ua tuuina mai e le Tama Faalelagi ia te oe. Mo se faataitaiga, e mafai pe a agalelei atu se tasi ia te oe pe ina ua e talisapaia se mea na e vaaia, sosogia, faalogo i ai, pa’i i ai, pe tofo i ai.
Maimoa:
“Ia Lotofaafetai i Soo Se Tulaga,” o loo maua i le https://churchofjesuschrist.org/study/video/self-reliance-videos [1:06].
Talanoa:
O anafea na fesoasoani ai le lotofaafetai ia te oe po o isi ia maua le fiafia?