“8: O Lo’u Faavae: Fesootai,” Mauaina o le Malosi i le Alii: Faafoisia Faalelagona (2020)
“8: O Lo’u Faavae: Fesootai,” Mauaina o le Malosi i le Alii: Faafoisia Faalelagona
O Lo’u Faavae: Fesootai—Taimi Aofai: 20 Minute
Mafaufau loloto:
O le a se taimi na tali mai ai e le Tama Faalelagi a’u tatalo?
Maimoa:
“Creating Lift,” maua i le https://churchofjesuschrist.org/study/video/self-reliance-videos. (E lē maua le vitiō? Faitau le tusitusiga mo le “Fatuina o le Masii i Luga”)
Fatuina o le Masii i Luga
Afai e lē mafai ona e matamata i le vitiō, faitau le tusiga lenei.
Peresitene Dieter F. Uchtdorf:
Ina ia mafai ona aluese mai se vaalele mai le eleele, e tatau ona e fatuina se tulaga e masii ai i luga. I aoaoga i mea tau feoaiga i le ea, e tupu le masii i luga pe a pasi ae le ea i luga ae o apaapa o se vaalele i se auala o le a avea ai le ea i lalo ifo o le apaapa e malosi atu nai lo le ea i luga ae o le apaapa. A sili atu le malosi o le uuna’i i luga e le savili nai lo le malosi o le toso i lalo e le kalave, ona masii lea i luga o le vaalele mai le laueleele ma mafai ai ona lele.
I se auala e talitutusa lava, e mafai ona tatou faia ni mea e sii ae ai i luga i o tatou olaga faaleagaga. Afai e malosi atu le malosiaga lea e tuleiina i tatou agai i le lagi nai lo faaosoosoga ma faanoanoaga lea e tosoina i tatou i lalo, o le a mafai ona tatou o a’e ma felelei atu i le malo o le Agaga.
E ui i le tele o mataupu faavae o le talalelei e fesoasoani ia i tatou i le mauaina o le masii i luga, ae ou te fia taulai faapitoa atu i se mataupu faavae e tasi.
Tatalo!
O le tatalo o se tasi lea o mataupu faavae o le talalelei e maua ai lena masii i luga. O le tatalo ua i ai le mana e siitia ai i tatou mai o tatou popolega faalelalolagi. E mafai e le tatalo ona sii ae ai i tatou mai ao o le faanoanoa po o le pogisa ma avatu ai i se tafāilagi susulu ma le manino.
O se tasi o faamanuiaga aupito maoae ma avanoa ua tatou maua o ni fanau a lo tatou Tama Faalelagi o le mafai lea ona tatou fesootai ma Ia e ala i le tatalo. E mafai ona tatou talanoa ma Ia e uiga i mea e tutupu i o tatou olaga, tofotofoga, ma faamanuiaga. E mafai ona tatou faalogo atu ma maua le taitaiga faaselesitila mai le Agaga Paia i soo se taimi ma i soo se nofoaga.
(Tagai “Tatalo ma le Tafailagi Lanumoana,” Liahona, Iuni 2009, 5–6.)
Talanoa:
Aisea e avea ai le faalogo ma se vaega tāua o le tatalo?
Faitau:
O le fuaitau lenei o le mau ma le saunoaga a Peresitene Nelson:
“O le a ou tau atu ia te oe i lou mafaufau ma lou loto, e ala i le Agaga Paia, lea o le a oo atu i ou luga ma lea o le a mau i lou loto” (Mataupu Faavae ma Feagaiga 8:2
“O le a faamanuiaina o outou agaga pe a outou faalogo, ona faalogo lea e aoao mai fanau, mātua, soa, tuaoi, ma taitai o le Ekalesia, e faateleina ai le malosi e faalogo i fautuaga mai lugā” (Russell M. Nelson, “Listen to Learn,” Ensign, May 1991, 24).
Talanoa:
E mafai faapefea ona tatou iloaina lelei tali i a tatou tatalo?
Faitau:
O faamatalaga nei mai i taitai o le Ekalesia:
“E faafofogina e lo tatou Tama Faalelagi tatalo a Lana fanau i le lalolagi atoa o loo augani atu mo mea e aai ai, o lavalava e ufiufi ai o latou tino, ma le mamalu o le a oo mai ona ua mafai ona tausia i latou lava” (Henry B.Eyring, “O Avanoa e Fai ai Mea Lelei,” Liahona, Me 2011, 22
“E tatau ona tatou ole atu mo se fesoasoani mai lo tatou Tama Faalelagi ma saili le malosi e ala i le Togiola a Lona Alo o Iesu Keriso. I mea faaletino ma faaleagaga, [o lenei] ua mafai ai e i tatou ona avea ma e tuuina atu ma le faautauta mea e manaomia mo i tatou lava ma isi” (Robert D. Hales, “Avea ma E Tuuina Atu ma le Faautauta Mea e Manaomia Faaletino ma le Faaleagaga,” Liahona, Me 2009, 7–8).
Tautino:
O le a ou tatalo toatasi ma faatasi ma lou aiga i taeao ma po taitasi. O le a ou faaalu le taimi pe a maea tatalo taitasi ma le migao e faalogo ai mo le taitaiga.