“3: Aoao,” Mauaina o le Malosi i le Alii: Faafoisia Faalelagona (2020)
“3: Aoao,” Mauaina o le Malosi i le Alii: Faafoisia Faalelagona
Aoao—Taimi Aofai: 60 Minute
1: O o tatou tino o se meaalofa mai le Atua.
Faitau:
Na tuuina mai e lou Tama Faalelagi alofa ia te oe le meaalofa o se tino e faaofu ai lou agaga (tagai Mataupu Faavae ma Feagaiga 88:15; Aperaamo 5:7). O se tino maloloina e tāua i le faafoisia faalelagona. A o e tausia lelei lou soifua maloloina faaletino, o le a faaleleia foi lou soifua maloloina faalelagona, ma faapena foi i le isi itu. O nisi auala e mafai ona e tausia lelei ai le tino ua tuuina mai e le Tama Faalelagi ia te oe e aofia ai le faamalositino e lē aunoa, tele o le malologa, tumamā faaletagata lava ia, ma le taumafa maloloina.
2. Faamalositino Masani
Faitau:
O le faamalositino soo e mafai ona aogā tele i lou soifua maloloina faalelagona. O gaoioiga faaletino e faaosofia ai lou faiai ma maua mai ai vailaau e fesoasoani i ou lagona ma le tomai e vaai manino ai i tulaga. O le faaaluina o le taimi e te gaoioi ai e mafai ona tuua ai oe ia lagona le fiafia sili atu, sili atu ona toafilemu, ma faaitiitia le popole. O gaoioiga faaletino e mafai foi ona avea o se avanoa e faaaoga ai lou tino ma fesootai ai ma aiga ma uo i se nofoaga mālie ma faaagafesootai.
Faitau:
Afai e te lei faamalositino mo se taimi umi; o i ai faafitauli faaumiumi o le soifua maloloina e pei o faama’i o le fatu, ma’i suka, po o ponaivi; pe i ai nisi atugaluga, siaki i se fomai faapitoa a o lei amataina se fuafuaga fou o le faamalositino.
3. Moe ma Malolo
Faitau:
O le manaomia o le moe ma le malologa e masani ona galo. Na saunoa elder Jeffrey R. Holland, “O le vaivai o le fili masani lea o i tatou uma—o lea ia faatelegese, malolo, toe faafou, ma toe faatumu. Ua folafola mai e fomai ia i tatou afai tatou te lē faaaluina se taimi ia maua ai le malosi, o le a mautinoa lava lo tatou faaaluina o se taimi mulimuli ane e ma’i ai” (“Faapei o se Ipu ua Nutililii,” Liahona, Nov. 2013, 41). O le moe lelei e mafai ona fesoasoani e puipuia lou soifua maloloina faalemafaufau, soifua maloloina faaletino, tulaga lelei o le olaga, ma le saogalemu. A e lelavā, atonu e faigata ona e faia ni faaiuga, foia faafitauli, pulea ou lagona ma amioga, ma taulimaina suiga.
Faitau:
O le malologa e sili atu nai lo le lava o le moe. Ua aoao mai le Tusi a Mamona, “E le tatau i se tagata ona momoe televave atu nai lo le malosi ua ia te ia” (Mosaea 4:27). Atonu e te lagonaina le uunaiga malosi ia ogatusa ma le lalolagi ua televave le saoasaoa. Atonu o loo e i ai i se vaega o le olaga e foliga mai e lofituina, e pei o le tausiaina o fanau laiti po o le tausia o se tasi e pele ia i latou ua mai. E mafai foi ona aafia oe i luitau faalelagona lea e mafua ai ona e lagona le vaivai ma le manao e moe umi atu nai lo le mea e manaomia. O le nofo umi i le moega e mafai ona afaina ai lou soifua maloloina faalemafaufau ma faalelagona. E alofa le Alii ia te oe ma silafia ou tulaga uiga ese. E mafai ona Ia taitai oe i manatu ma punaoa o le a aogā mo lou tulaga.
Talanoa:
E faapefea e le vaivai ona aafia ai lo tatou manuia faaleagaga, faaletino, faaleagafesootai, ma faalelagona?
Faitau:
Afai e masani ona e moe tele pe laitiiti tele, mafaufau e saili se fesoasoani mai se fomai.
4. Tumamā Faaletagata Lava Ia
Faitau:
Tatou te faaalia le faaaloalo mo o tatou tino pe a tatou taulimaina ma talanoa lelei e uiga i ai. O le faamuamuaina o mea iti e pei o le fufuluina o o tatou lima, taele e lē aunoa, fufuluina o o tatou nifo, ma le tausia o le mamā o o tatou lavalava o le a faaleleia ai lo tatou soifua maloloina ma mafai ai ona fesoasoani ia i tatou ia lagona lelei e uiga ia i tatou lava.
Talanoa:
O a ni suiga ua e matauina ia te oe lava pe a e faataitaia le tumamā lelei faaletagata lava ia?
5. Taumafa Maloloina
Faitau:
Sa aoao atu e le Faaola le Perofeta o Iosefa Samita e uiga i le ola maloloina i le 1833 i se faaaliga na taua o le Upu o le Poto (tagai Mataupu Faavae ma Feagaiga 89). O lenei faaaliga ua tuuina mai ai le taitaiga e faatatau i mea e tatau ona tatou aai ma feinu ai ma mea e tatau ona tatou aloese mai ai. Ua folafola mai e le Alii le ola maloloina, malosi, ma le puipuiga ia i latou o e usitai i le Upu o le Poto
I se tasi o ana saunoaga faaiu o le konafesi aoao, na saunoa ai Peresitene Thomas S. Monson: “Tau ina ia tatou tausia o tatou tino ma o tatou mafaufau e ala i le matauina o mataupu faavae ua tuuina mai i le Upu o le Poto, o se fuafuaga paia ua saunia. Faatasi ai ma lou loto ma lou agaga atoa, ou te molimau atu ai i faamanuiaga mamalu o loo faatalitali mai mo i tatou a o tatou faia” (“Mataupu Faavae ma Folafolaga,” Liahona, Nov. 2016, 79).
Talanoa:
O a nisi o auala e mafai ona tatou tausia lelei ai le tino ua tuuina mai e le Tama Faalelagi ia i tatou?
Faitau:
Ia mautinoa e inu le tele o vai mamā i le aso atoa. Ai ia lava meaai sao e faamalosi ai lou tino ina ia e maua ai le malosi e te manaomia e faataunuu ai au galuega i aso taitasi. I se tulaga lautele, mafaufau e ai tele fualaau faisua, fualaau aina, fatu atoa, fatulaau, ma nati. Ia mafaufau foi e faaitiitia le suka faamamāina, masima, vaiinu suamalie, ma le tele o le gao.
Atonu foi e te manao e talanoa i se tasi e te iloa e uiga i au masani tau taumafa. Ia talanoaina nisi o auala e mafai ai ona e faamalosia lelei lou tino. A o e galue e ola i se olaga maloloina, atonu e te lē o vaaia ni taunuuga i le taimi lava lena. Ae e mafai ona e iloa o loo e faia le mea sili e tausia ai le tino ua tuuina atu e le Atua ia te oe.
Faitau:
O se tasi āuga o se faaletonu o le taumafa o le taulai atu lea i meaai ma faamalositino i le tulaga e lē mafai ai ona e taulai atu i isi vaega o lou olaga.
Afai e te maua au masani o le taumafa e faatapulaa ai au gaoioiga pe faaletonu ai lou soifua maloloina, faamolemole saili se fesoasoani faafomai.
6. Malamalama i o Tatou Lagona
Faitau:
E oo lou tino i lagona malolosi. O le malosi faalelagona e manaomia ai lou faailoaina, talia, ma tali atu i ou lagona i se auala maloloina. O lagona o se vaega masani o lo tatou aafiaga i le olaga nei. O nisi taimi atonu e malosi ou lagona, ma e mafai ona luitauina le tali atu ia i latou. Pe a e faatagaina ou lagona e filifili ai au amioga, e te lolo atu i ou lagona nai lo le faaaogaina o lou faitalia e tali atu ai i ou lagona.
Talanoa:
E faapefea e le taumafai e pulea o tatou lagona ona fesoasoani ia i tatou ia avea atili e faapei o Keriso?
Faitau:
O le laasaga muamua i le puleaina o lagona o le nofouta lea i ai. O se tasi o meafaigaluega e mafai ona fesoasoani o se api talaaga o lagona, lea e mafai ona e tomanatu ai i lagona na e lagonaina. I se api talaaga o lagona, e te faamaumauina lagona e te lagonaina, le tulaga sa e i ai, ma amioga na e faia ona o le lagona. Mafaufau loloto i nei lagona ma tulaga ona tusi lea i lalo ou manatu. A o e mataituina ou lagona, vaavaai mo mamanu ma faiga. Mafaufau e tusi i lau api talaaga o lagona i aso taitasi. Mulimuli i faataitaiga o i lalo.
|
Lagona |
Tulaga |
O Faatinoga e Faia Ona o le Lagona |
Mafaufau Loloto |
|---|---|---|---|
Lagona Faataitaiga O le asō, sa ou lagona le ita ma le tiga. | Tulaga Sa ou i ai i se finauga tele ma lou tamā. | O Faatinoga e Faia Ona o le Lagona Sa ou matuā lē fiafia lava ma ee atu ia te ia ma sola atu i au uo. Sa ou lagona ai le faanoanoa. | Mafaufau Loloto E tatau ona ou talanoa i lou tamā e uiga i ou lagona nai lo le ita ia te ia. |
Lagona Faataitaiga Sa ou lagonaina le olioli ma le filemu ananei. | Tulaga Sa ou faalogoina se tatalo mai le loto lea na ootia ai au. | O Faatinoga e Faia Ona o le Lagona Sa ou faafetai i le Tama Faalelagi mo Lona alofa, ma sa ou mafaufau i le auala ou te tatalo ai. | Mafaufau Loloto Ou te toe fia lagonaina lenei auala e ala i le taumafai e fesootai lelei atu i le Tama Faalelagi e ala i le tatalo. |
Faitau:
Na aoao mai Elder Richard G. Scott, “O le gauai atu i lagona e pei o le ita po o le tiga po o le faatautee o le a tuliesea ai le Agaga Paia” (“Auala e Maua ai Faaaliga ma Musumusuga mo Lou Olaga Patino,” Liahona, Me 2012, 45). Ioe, o le a tatou lagonaina uma le ita ma le tiga i nisi taimi. O nisi taimi e oo ina tauamiotonuina i tatou i le lagonaina o nei lagona. Peitai, e tāua mo i tatou le foia o nei lagona pe afai tatou te mananao e fesootai lelei ma le Alii ma lagonaina le Agaga.
Sa fautuaina mai foi e Elder Scott se auala e mafai ai e lagona ona fesoasoani ia i tatou ia lagonaina le Agaga ma faateleina ai le faafoisia: “O se lagona lelei o le mālie e fesoasoani i faaaliga. … O se uiga mālie o se ki lea e faasopoloa ai atugaluga o le olaga” (“Auala e Maua ai Faaaliga,” 46).
Talanoa:
E mafai faapefea e le aoao e pulea ou lagona ona fesoasoani ia te oe ia faigofie atili ai ona lagonaina le Agaga?
7. Tausiga o le Tagata Lava Ia
Faitau:
Pe a e feagai ma luitau, e manaomia ona e faia mea uma e te mafaia e tausia ai oe lava. O le faia o mea uma e mafai ona e faia o lona uiga o le faaaogaina lea o punaoa o loo ia te oe i lou olaga e lagolago ai oe i soo se luitau o loo e feagai ai. O loo i lalo se lisi o manatu mo le tausiga o le tagata lava ia.
-
Fai sina moe
-
Asiasi ma se uo
-
Faalemu
-
Faamālū pe taele i se tapu
-
Faamalositino
-
Faitau se tusi
-
Faalogologo i musika
-
Fatu se mea fou
-
Tatalo
-
Fai se savaliga
-
Fai se lisi o ni mea e te faafetai ai
-
Fiafia i se taumafataga manaia
-
Siva
-
Pese
-
Faaaoga auala e malolo ai (tagai i le gaoioiga i le aitema 3 i le vaega o le “Aoao” o le mataupu 4 male vaega o “Punaoa” o le mataupu 4)