Aoao—Taimi Aofai: 60 Minute

1. Auauna atu e Pei o le Faaola

Faitau:

Ua poloaiina i tatou e le Alii e auauna atu ia i latou o siomia i tatou. O le tala ia Alema ma Amoleka o se lesona aogā. Na iloa e Alema sa mafatia moni lava Amoleka faalelagona, ma sa ia aveina atu o ia lava “i lona lava fale, ma tausi ia te ia i ona puapuaga, ma faamalosi o ia i la le Alii” (Alema 15:18).

Mafaufau loloto:

Na faapefea ona fesoasoani tagata ia te oe ina ia “faamalosia … i le Alii”?

Talanoa:

O a ni auala e mafai ona tatou faamalolosia ai isi i le Alii?

2. Talatuu e uiga i le Fesoasoani i Isi

Faitau:

E tele ni talatuu masani atonu e te talitonu i ai e uiga i le fesoasoani atu i isi. A o e faitau i talatuu nei, iloilo pe na e lagonaina pe leai foi nei auala.

Talatuu #1:

E 100% Lou Nafa mo le Tuuina Atu i Isi o le Fesoasoani Latou te Manaomia.

O Le Mea Moni:

O le Faaola ua na o le pau lea o le faamalologa moni o agaga, ae e mafai ona avea oe ma se vaega o se nuu faamalolo e faamanuia ai isi. O le a avea oe ma se vaega o lenei nuu faamalolo a o e ofoina atu ou malosiaga ma vaaiga tulaga ese ma tuuina atu pe a e mafaia.

Talatuu #2:

E Tatau ona Avea Au ma Tagata Tomai Faapitoa i le Foiaina o Faafitauli o Isi.

O Le Mea Moni:

E oo lava i faufautua faapolofesa e talitonu o la latou matafaioi o le fesoasoani lea i se tagata e faia ana lava suiga nai lo le tuuina atu o se tusi lesona o faatonuga. O lau matafaioi o le alofa ma auauna atu i tagata, ma o le a faia e le Faaola le faamalologa.

Talatuu #3:

E i ai Fofo Vave i Faafitauli o le Olaga.

O Le Mea Moni:

O la tatou aganuu o se tasi lea o faamaliega vave, ma o vaifofo vave ua folafola mai mo le toetoe lava o soo se mea. Ae e seasea lava ona i ai ni fofo vave i faafitauli o le olaga. O le galue e ala i suiga o se faagasologa ma e toetoe lava o taimi uma e umi atu ai nai lo le mea e te manatu o le a faia ai. O le suiga moni o se faagasologa o le faaleleia lea e tatau ona oo i ai oe po o e pele ia te oe.

Talatuu #4:

Ou te Lē Iloa le Mea Sao e Fai Atu, o lea e Sili Ai Lou Lē Tautala i Se Mea.

O Le Mea Moni:

O le tala fiafia e faapea, e masani lava ona lē tele ni au tala e tatau ona fai atu. O le meaalofa silisili e mafai ona e tuuina atu i isi o le faaali atu lea o le fiafia ia i latou, fai fesili, faalogo ma le alofa, ma fesoasoani ia latou lagona le saogalemu e faasoa atu ia te oe.

Talatuu #5:

Afai Ou te Fesoasoani Atu, o le a Latou Faalagolago Mai Pea ia te Au.

O Le Mea Moni:

A o e auauna atu, e mafai ona e faatuina ni tuaoi maloloina ina ia mautinoa o loo e tausia oe lava ma lou aiga. E mafai e le Alii ona taiala oe ina ia e auauna atu i auala e faamalosia ai le ola tutoatasi o le isi tagata. Aua lava nei manatu faatauvaa i le mana e mafai ona maua i faatinoga laiti ma faatauvaa o le alofa i olaga o tagata, ma aua le fefe i le faaaogaina o le taimi ma le alofa i se tasi.

Talanoa:

Ia talanoaina ma se paga se tasi o nei talatuu atonu o loo e tauivi ai ma pe mafai faapefea ona e faatoilaloina.

3. Tali Atu ma le Talafeagai i Isi

Faitau:

Po o a lava ou faamoemoega sili, e faigofie lava ona fai atu ni mea e lē aogā tele a o taumafai e fesoasoani i se tasi i taimi faigata. Ae e lē tatau ona faafefe oe i lenei mea mai le taumafai pea ia fesoasoani. E finagalo le Atua ia e alofa ma fesoasoani i Ana fanau. Ia nofouta i lagona o i latou o loo e taumafai e fesoasoani i ai, ia faaeteete e aua nei tautala pe faia soo se mea e faaitiitia ai o latou tiga ma faigata.

Gaoioiga (15 minute)

Faitau faatasi o se vaega ia faamatalaga o loo mulimuli mai. O faamatalaga o ni faataitaiga o mea e mafai ona e fai atu ai pe afai sa e taumafai e fesoasoani i se tasi o loo feagai ma se taimi faigata. Iloilo faamatalaga taitasi e iloa ai pe tuuitiitia ai le mea o loo feagai ma le tagata pe ofoina atu le alofa ma le lagolago. Tusi se “X” i le koluma “Aogā” po o le koluma “E Le Aoga” e faailoa mai ai lau tali.

Faamatalaga	Fesoasoani	Le Fesoaoani
Faamatalaga Faataitaiga “O le mea sili ua e …”		Le Fesoaoani X
Faamatalaga Faataitaiga “Atonu e faigata tele lenei mea.”	Fesoasoani X
Faamatalaga “E tutupu mea uma mo se mafuaaga.”	Fesoasoani	Le Fesoaoani
Faamatalaga “Tau lava o le vaai i le itu lelei.”	Fesoasoani	Le Fesoaoani
Faamatalaga “E lē mafai ona ou vaai faalemafuafau i le tulaga o loo e i ai.”	Fesoasoani	Le Fesoaoani
Faamatalaga “Ua ou fiafia na e tau mai ia te au e uiga i lenei mea.”	Fesoasoani	Le Fesoaoani
Faamatalaga “O se meaai suamalie lea na ou faia mo oe.”	Fesoasoani	Le Fesoaoani
Faamatalaga “O le a mavae atu foi lenei mea.”	Fesoasoani	Le Fesoaoani
Faamatalaga “Ou te fiafia e faalogo i soo se taimi.”	Fesoasoani	Le Fesoaoani
Faamatalaga “O loo i ai o ia i se nofoaga e sili atu i le taimi nei.”	Fesoasoani	Le Fesoaoani
Faamatalaga “Ou te fia mautinoa ua ou malamalama.”	Fesoasoani	Le Fesoaoani
Faamatalaga “E faapei lenei mea ia te oe?”	Fesoasoani	Le Fesoaoani
Faamatalaga “Atonu e faigata ona talanoa i ai.”	Fesoasoani	Le Fesoaoani
Faamatalaga “E iai le fuafuaga a le Atua.”	Fesoasoani	Le Fesoaoani
Faamatalaga “O le a le mea e te manaomia i le taimi nei?”	Fesoasoani	Le Fesoaoani
Faamatalaga “O le mea e tatau ona e faia o le na o le …”	Fesoasoani	Le Fesoaoani
Faamatalaga “Ou te iloa tonu lava o outou lagona.”	Fesoasoani	Le Fesoaoani
Faamatalaga “O le a se mea o fesoasoani ia te oe e te oo ai i lenei mea?”	Fesoasoani	Le Fesoaoani
Faamatalaga “E mafai ona ou tuuina atu se fautuaga e mafai ona fesoasoani?”	Fesoasoani	Le Fesoaoani

Talanoa:

O a isi fasifuaitau ua e faalogo i ai e aogā pe lē aogā?

4. Faamaoniaina o Isi

Faitau:

Na aoao mai Sister Reyna I. Aburto, “E tusa lava pe tatou te le iloa pe faapefea ona fesootai atu i mea o loo feagai ma isi, o le faamaoniaina o o latou tiga e moni e mafai ona avea o se laasaga taua muamua i le sailia o le malamalama ma le faamalologa” (“I Mala i Manu, Iesu Afio Mai!” Liahona, Nov. 2019, 58). Ina ia faamaonia lagona o tagata o lona uiga ia talia muamua o latou lagona ona malamalama ai lea ia i latou.

O nisi nei o laasaga e fesoasoani ia te oe e faamaonia ai se tasi o loo feagai ma se luitau:

1. Faalogo. Ia auai ma faalogo ma le totoa i le mea o loo tau atu e le tagata ia te oe. Aua e te puipuia oe lava pe afai na e saofagā i le faafitauli o le tagata.

2. Taumafai ia malamalama. Atonu e manaomia ona e fai atu ni fesili agaalofa ina ia malamalama atili ai i le mea o loo lagonaina e lenei tagata. Fai le mea sili e te mafaia ia malamalama ai i lagona o le tagata.

3. Talia lagona o le tagata. Aua e te taumafai e sui le tagata pe fai atu e sese o ia ona o le lagona faapea. A o e faia lenei mea, ia faaeteete ia aua nei uunaia ni mamanu o mafaufauga lē lelei pe leaga.

4. Faaali atu le agaalofa. Faailoa atu e te popole i lagona o le tagata. E tusa lava pe lē mafai ona e fesootai i le tulaga po o le mafuaaga o le lagona, e mafai ona e faamaonia lagona o le tagata e ala i le fai atu o mea e pei o le “E te lagona le le faaaloalo [po o le popole, leai o se faamoemoe, leai se aoga, ita, ma isi mea faapena]. E faigata ona lagona faapena.”

5. Faaali atu le alofa. Tau atu i lenei tagata e te alofa ia i latou ma ua e talitonu i lona tomai e foia ai pe faatoilalo ai le faafitauli.

Faitau:

O se faataitaiga lenei o le auala e mafai ona e faamaonia ai se tasi o feagai ma se taimi faigata:

O Jill o se tina nofotoatasi sa maliu talu ai nei lona atalii mai le ova o fualaau faasaina. E nofo na o ia ma e leai se aiga e lata ane. Na sau Maria e talanoa ia te ia ma fesili atu ia te ia pe o a mai o ia. Sa faaosoosoina Maria e faalavelave ia Jill, ae na te lei faia. Sa na ona ia faalogo lava. Ina ua ia lagonaina ua talafeagai, sa ia fesili atu i ni fesili e pei o le “O a mai oe i le taimi nei?” ma le “O le a le mea e sili ona faigata mo oe?” Nai lo le faapea atu, “O le mea sili ua faatasi nei o ia ma le Atua,” sa ia malamalama na o le misia lava e Jill o lana tama tama. Na filifili Maria e faailoa atu le tigaalofa i le faapea atu, “E mafai ona ou iloa ua e misia tele o ia, ma ua nutimomoia lo’u loto faatasi ma oe.” Ona ia faaali atu lea o le alofa e ala i le saofai ma tagi faatasi ma ia.

Motugaafa:

O le uepisaite a le Ekalesia i auaunaga e aofia ai nisi manatu e mafai ona fesoasoani ia te oe e malamalama ai i le auala e faaali atu ai le agaalofa. Tagai ministering.ChurchofJesusChrist.org.

Gaoioiga (10 minute)

Laasaga 1: I le avea ai o se vaega, faitau tulaga o loo i lalo o tagata taitoatasi o loo feagai ma taimi faigata.

• O se tasi sa saili mo se galuega mo le silia ma le ono masina.

• O se matua fou o loo tauivi ma le atuatuvale.

• O se tagata sa feagai ma se gasegase faaumiumi mo le silia ma le 20 tausaga.

• O se tuaoi e lē ioe i le tagata o lona aiga.

• O se matua nofotoatasi o se fanau e toatolu e lei leva ona tatala le faaipoipoga.

• O se faifeautalai ua maea lana misiona o loo tauivi nei ma lona faatuatua.

Laasaga 2: Ia talanoaina nisi o mea e mafai ona e fai atu atonu e aogā i nei tagata taitoatasi.

Laasaga 3: Faataitai le faamaonia o lagona o se isi tagata i tulaga taitoatasi e ala i le talanoa ma se paga e uiga i se mea o loo feagai ma ia. Vaavaai mo ni auala e faamaonia ai lagona o lena tagata. Ona fesuiai lea o mea e fai. A uma, ona talanoa lea po o fea o faamatalaga faamaonia na fesoasoani ia te oe ma pe aisea foi.

5. Faamamaluina o le Faitalia o Isi

Faitau:

Ua tuuina mai e le Tama Faalelagi i tagata uma le meaalofa o le faitalia, ma o tagata taitoatasi e nafa ma a latou lava filifiliga e tusa lava po o le a le fesoasoani e te ofoina atu. A o e aapa atu i isi, ia manatua e lē o nafa oe ma le foiaina o o latou faafitauli po o le puleaina o filifiliga latou te faia. E tāua le faatulaga o ou lava tuaoi maloloina a o fesoasoani atu i isi.

E finagalo le Faaola ia te oe e faamamaluina le faitalia a ē pele ia te oe, ae e lē faapea o lona uiga o le tu ae lē fesoasoani. Saili le Agaga i le fesoasoani atu ia te oe ia malamalama i auala e mafai ona e auauna atu ai i isi i auala e faamamaluina ai pea lo latou faitalia ma aua nei faia ia latou faapea ai ua lē lagonaina i latou.

O manatu nei mo mea e mafai ona e faia e faaopoopo atu i le faamaoniaina o lagona ma le faalogo:

• Anapogi ma tatalo mo i latou.

• Faapaia lou taimi i le malumalu mo i latou.

• Saili le fesoasoani ma fautuaga faapolofesa.

• Sailiili i le soifua maloloina faalelagona.

• Auina atu ni faamatalaga o le faamalosiauga, pe faasoa atu ni sāvali malie ina ia latou mata ataata ai.

• Saili faamanuiaga ma fautuaga faaleperisitua.

• Auai i se vaega lagolago mo aiga ma uo.

• Ia faaavanoa oe lava ia i latou a o faatumauina ni tuaoi maloloina.

• Auauna atu ia i latou i auala latou te ole atu ai pe malilie i ai—o auala e lē solia ai lo latou faitalia pe latou te lagona ai e lē o faalogo atu nisi ia i latou.

Talanoa:

Faasoa atu se aafiaga faagaeetia na e oo i ai a o faamalosia oe pe a o tuuina atu lau faamalosi i isi.

6. Tumau ma le Onosai i Isi

Faitau:

O le tausiga o e pele e mafai ona faigata ma lofituina. A o e saili e tausia i latou e lē tagolima, taumafai ia malamalama ma aloese mai le faamasino atu. E mafai ona e maua fautuaga mai tusitusiga paia ma “tatalo atu i le Tama ma le malosi atoa o le loto, ina ia faatumuina [outou] i lenei alofa,” o le alofa mama lea, po o le alofa o Keriso (Moronae 7:48).

Afai e i ai se tasi e pele ia te oe e i ai ni faafitauli tau le soifua maloloina faalelagona, atonu e masani ona e taulai atu i le tausiga o lena tagata lea e galo ai ia te oe ona tausia oe lava ia. O loo avanoa le fesoasoani ma le lagolago mo oe. O vaega lagolago e mafai ona fesoasoani i tagata o le aiga e aoao e uiga i faafitauli o le soifua maloloina, auala e fesoasoani ai, ma auala mo le taulimaina o āuga. Aapa atu i uo faatuatuaina ma tagata tomai faapitoa mo le tausiga o le soifua maloloina mo se fesoasoani mo oe lava ma lē e pele ia te oe. O le lagolago a aiga ma uo e mafai ona i ai se aafiaga lelei i le taulimaina o faafitauli ogaoga o le soifua maloloina faaagafesootai ma faalelagona.

Na fautua mai Elder Jeffrey R. Holland: “Mo tagata o loo tausia isi, ia outou taumafaiga tuuto e fesoasoani atu i le soifua maloloina o le isi tagata, aua nei e faatamaia ai lou oe lava ia soifua maloloina. I nei mea uma ia atamai ai. Aua nei e tamoe e sili atu i lou malosi [Mosaea 4:27]. Po o le a lava se isi mea e mafai pe lē mafai foi ona e tuuina atu, e mafai ona e ofoina atu au tatalo ma e mafai ona e tuuina atu le ‘alofa faamaoni’ [Mataupu Faavae ma Feagaiga 121:41]” (“Peiseai o se Ipu ua Nutililii,” Liahona, Nov. 2013, 41).

Talanoa:

O le a se mea na fesoasoani ia te oe e faapaleni ai le tausiga o isi ma oe lava?