O Lo’u Faavae: Faatino le Faatuatua ia Iesu Keriso—Taimi Aofai: 20 Minute

Mafaufau loloto:

Fesili ifo ia te oe lava, “E faapefea ona fesoasoani lo’u faatuatua ia Iesu Keriso ou te taulimaina ai taimi faigata?”

Maimoa:

“Exercise Faith in Jesus Christ,” maua i le https://churchofjesuschrist.org/study/video/self-reliance-videos [1:43]. (E lē maua le vitiō? Faitau le tusitusiga mo le “Faatino le Faatuatua ia Iesu Keriso.”)

Faatino le Faatuatua ia Iesu Keriso

Afai e lē mafai ona e matamata i le vitiō, faitau le tusitusiga lenei.

o se alii o loo tauaveina le atolaau o le feagaiga

Elder David A. Bednar:

O le faia o se faatinoga o le faaaogaina lea o le faatuatua. O loo tauaveina e le fanauga a Isaraelu le ato laau o le feagaiga. Ua latou tau atu i le Vaitafe o Ioritana. O le folafolaga, o le a latou sopo i le eleele matutu. O le a le taimi e vaeluaina ai le vai? Ina ua susū o latou vae. Latou te savavali atu i le vai—faatino. E mulimuli mai le mana—ua vaeluaina le vai.

E tele taimi tatou te talitonu ai, “O le a ou maua lenei malamalama atoa, ona ou faaliliua lea i mea ou te faia.” Ou te fautua atu ua lava mea tatou te amata ai. Ua tatou maua se lagona i le itu sa’o e agai i ai. O le faatuatua o se mataupu faavae—o le mataupu faavae—o le faatino ma le mana. O le faatuatua moni e taulai atu i le Alii o Iesu Keriso ma e tau atu e lē aunoa i faatinoga.

(Tagai “Seek Learning by Faith” [lauga na tuuina atu i faiaoga faalelotu o le Ofisa o Aoaoga a le Ekalesia, 3 o Feb., 2006], ChurchofJesusChrist.org/media-library.)

Faitau:

O fuaitau nei o mau ma saunoaga a taitai o le Ekalesia:

“Ma pe sa i ai se taimi na faia ai e se tasi ni vavega seia mavae ona latou faatuatua muamua; o le mea lea sa muamua ona latou talitonu i le Alo o le Atua” (Eteru 12:18).

“O le faatuatua i le Atua e aofia ai le faatuatua i Ona faamoemoega faapea foi i Lana taimi. E le mafai ona tatou taliaina atoatoa o Ia a o teenaina Lana faatulagaga” (Neal A. Maxwell, That Ye May Believe [Salt Lake City: Bookcraft, 1992], 84).

“O le faatuatua ia Iesu Keriso e faaosofiaina i tatou e faia ni mea semanū tatou te lē faia. O le faatuatua e uunaia i tatou i faatinoga tatou te maua atili ai Lona mana. Tatou te faateleina foi le mana o le Faaola i o tatou olaga pe a tatou osia feagaiga paia ma tausia na feagaiga i le saolele. O a tatou feagaiga e fusia ai i tatou ia te Ia ma aumaia ia i tatou le mana faaleatua” (Russell M. Nelson, “Mauaina o le Mana o Iesu Keriso i o Tatou Olaga,” Liahona, Me 2017, 41).

“E mafai ona tatou lagona le olioli e tusa lava pe le o lelei le aso, se vaiaso, po o se tausaga!

“O o’u uso e ma tuafafine pele, o le olioli o tatou lagonaina e itiiti lava se mea e faatatau i tulaga o o tatou olaga a o mea uma o loo faatatau i le taulaiga o o tatou olaga.

“Afai o le taulaiga o o tatou olaga e i le fuafuaga o le faaolataga a le Atua … ma ia Iesu Keriso ma Lana talalelei, e mafai ona tatou lagona le olioli e tusa lava po o a mea o tutupu—pe le o tutupu foi—i o tatou olaga. O le olioli e sau mai [ia te Ia] ma ona o Ia. O Ia o le puna o le olioli uma” (Russell M. Nelson,“Olioli ma le Ola ai Faaleagaga,” Liahona, Nov. 2016, 82).

Talanoa:

Aisea e manaomia ai le faatuatua mo le Atua ina ia faamalosia ai i tatou i le faaletino, faalelagona, ma le faalegaga?

Gaoioiga

Laasaga 1: I le avea ai o se vaega, faitau leotele upusii nei.

Laasaga 2: Ia talanoaina pe mafai faapefea e le faatinoina o nei faamuamua faaperofeta ona fesoasoani ia te oe ia faatuatua atili ia Iesu Keriso.

Faamuamua Faaperofeta ma Folafolaga

“O le faateleina o lo tatou iloa e uiga i le galuega ma le misiona a le Faaola—o le faateleina lea o lo tatou malamalama i Lana aoaoga faavae ma le mea na Ia faia mo i tatou—o le faateleina foi lena o lo tatou iloaina e mafai ona Ia auina mai le mana lea tatou te manaomiaina mo o tatou olaga” (Russel M. Nelson, “Mauaina o le Mana o Iesu Keriso i o Tatou Olaga,” Liahona Me 2017, 39–41).

“O le a lē faafuasei ona tuputupu ae lo outou faatuatua, ae e ala i le filifiliga. … O anafea na gata ai lou faitauina o le Tusi a Mamona mai le tasi faavaa i le isi? Toe faitau i ai. O le a faateleina lou faatuatua” (Neil L. Andersen, “O Le Faatuatua E Le Tupu Faafuasei, ae e ala i Filifiliga,” Liahona Nov. 2015, 66.

“O sauniga e taliaina ma le agavaa ma manatuaina e le aunoa, e tatala ai auala faalelagi e mafai ai ona tafe mai le mana o le amio atua i o tatou olaga. O le aso Sapati ma le malumalu paia o punavai patino ia e lua o le fesoasoani faalelagi na saunia e le Atua e fesoasoani ai ia i tatou ia tulai ae i luga mai le amioleaga o le lalolagi” (David A. Bednar, “O Mea Silisili ese ma le Taua,” Liahona, Nov. 2017, 91–92).

Tautino:

O le a ou filifili se mea se tasi e fai i lenei vaiaso e faamalosia ai lo’u faatuatua ia Iesu Keriso.