“10: O Lo’u Faavae: Maua Sauniga o le Malumalu,” Mauaina o le Malosi i le Alii: Faafoisia Faalelagona (2020)
“10: O Lo’u Faavae: Maua Sauniga o le Malumalu,” Mauaina o le Malosi i le Alii: Faafoisia Faalelagona
O Lo’u Faavae: Maua Sauniga o le Malumalu—Taimi Aofai: 20 Minute
Mafaufau Loloto:
O a nisi o mea e sili ona tāua ia te oe?
Maimoa:
“Doing What Matters Most,” maua i le https://churchofjesuschrist.org/study/video/self-reliance-videos. (E lē maua le vitiō? Faitau le tusitusiga mo le “Faia o Mea e Sili Ona Taua.”)
Faia o Mea e Sili ona Taua
Afai e lē mafai ona e matamata i le vitiō, faitau le tusitusiga lenei.
Faamatala:
I se tasi po pogisa ia Tesema sa pa’ū ai se vaalele i Florida. E silia ma le 100 tagata sa maliliu ai. Sa na o le 20 maila le mamao mai le saogalemu.
Peresitene Dieter F. Uchtdorf:
Ina ua mavae le faalavelave, sa taumafai tagata suesue e saili le mafuaaga. Sa lelei lava ona tuu i lalo le kia e tulaueleele ai. Sa matuā lelei atoatoa le tulaga tau masini o le vaalele. Sa galulue lelei totoga uma—mea uma lava sei vagana ai se mea se tasi: o se tamai matauila ua pe. O lena tamai matauila—pe na o le 20 sene lona tau—na amataina le filifili o mea na tutupu ma iu ai i le oti matautia o le silia ma le 100 tagata.
O le mea moni, o le matauila na lē ola e lei mafua ai le faalavelave; na tupu ona ua tuu e le auvaa lana taulaiga i se mea sa foliga mai e tāua i lena lava minute ae galo ai le mea e aupito sili atu ona tāua.
O le lilifa atu e taulai i mea e lē tāua a o faatuatuanai mea e aupito sili ona tāua, e lē na o pailate e tutupu ai ae o tagata uma lava. E lamatia uma lava i tatou.
Pe o taulai ea ou mafaufauga ma lou loto i mea ua na o sina taimi e tāua ai, po o mea e aupito sili ona tāua?
(Tagai “O Loo Tatou Faia le Galuega Tele ma ua Le Mafai ona Tatou o Ifo i Lalo,” Liahona, Me 2009, 59, 60.)
Talanoa:
O a ni mea e lē tāua e taofia ai i tatou mai le alualu i luma? E mafai faapefea ona fesoasoani sauniga o le talalelei ia i tatou?
Faitau:
O fuaitau nei o mau ma saunoaga a taitai o le Ekalesia:
“O lea, o ona sauniga, ua faaalia ai le mana o le faale-atua” (Mataupu Faavae ma Feagaiga 84:20
“O le a lelei ona tatou faia pe a suesueina le vaega e 109 o le Mataupu Faavae ma Feagaiga ma mulimuli i le apoapoaiga a Peresitene [Howard W.] Hunter “e faatuina le malumalu o le Alii e fai ma faailoga sili o lo [tatou] auai i le ekalesia.’”(Quentin L. Cook, “Vaai ia Oe Lava ia i Totonu o le Malumalu,” Liahona, Me 2016, 99).
“I le taunuuga lea tatou te tauivi uma i ai ina ia faaeeina i le mana i totonu o se maota o le Alii, faamauina o ni aiga, faamaoni i feagaiga e osia i totonu o se malumalu lea e agavaa ai i tatou mo le meaalofa silisili a le Atua—le ola e faavavau. O sauniga o le malumalu ma feagaiga tou te faia iina o le ki lea i le faamalosia o lou olaga, lau faaipoipoga ma le aiga, ma lou tomai e tetee atu ai i osofaiga a le fili. O lou tapuai ai i totonu o le malumalu ma lau auaunaga iina mo ou tuaa o le a faamanuiaina ai oe i le faateleina o faaaliga faaletagata lava ia ma le filemu, ma o le a faamalosia ai lou tuuto e tumau i luga o le ala o feagaiga” (Russel M. Nelson, “A’o Tatou Agai Faatasi Atu i Luma,” Liahona, Ape. 2018, 7).
Talanoa:
E mafai faapefea e tapuaiga i le malumalu ma galuega o talafaasolopito o aiga ona faateleina lo tatou faafoisia faalelagona?
Tautino:
O le a ou setiina se aso e auai ai i le malumalu pe afai e i ai sa’u pepa faataga o le malumalu. Afai e leai sa’u pepa faataga o le malumalu, o le a ou faatulagaina se fonotaga ma lo’u epikopo po o le peresitene o le paranesi e faafou ai lau pepa faataga pe talanoaina pe mafai faapefea ona ou saunia e maua o’u sauniga o le malumalu.