“1: O Le Amataina,” Mauaina o le Malosi i le Alii: Faafoisia Faalelagona (2020)
“1: O Le Amataina,” Mauaina o le Malosi i le Alii: Faafoisia Faalelagona
O Le Amataina—Taimi Aofai: 20 Minute
Fai se tatalo amata.
Faailoa atu outou lava. Ia faaaoga e outou taitoatasi se minute se tasi e faasoa atu ai lou igoa ma se mea e uiga ia te oe.
Susu Mai i le Tatou Vaega o le Ola Tutoatasi!
Faitau:
Ona e alofa lou Tama Faalelagi ia te oe, na Ia auina mai ai Lona Alo o Iesu Keriso e faamalosia oe i soo se tulaga e te feagai ai i le olaga.
O le a fesoasoani lenei vaega ia te oe e aoao tomai faaleagaga ma aogā e fesoasoani ai ia i tatou taitoatasi ia tausia lelei atili o tatou tino, mafaufau, lagona, ma sootaga. A o e auai i lenei kosi, galulue faatasi ma le Tama Faalelagi ma Iesu Keriso ia iloa pe faapefea ona faaaoga mea ua e aoaoina i lou olaga ma olaga o i latou e te alofa i ai. O nei fonotaga o le a avea o se nofoaga saogalemu mo le faasoaina atu ma le faamaoni a o mulimuli lenei vaega i le mataupu faavae o le lē faalauaiteleina ma faaaoga le gagana ma amioga e valaaulia ai le Agaga. Ua valaaulia oe e faasoa atu ni aafiaga patino; nai lo le taulai atu i faafitauli, faasoa atu ni vaifofo na e maua pe e te manao e faataitai.
Faitau:
O lenei vaega e mo na o faamoemoega faaleaoaoga. E lē o se togafitiga faavaega po o se togafitiga faapolofesa mo faafitauli o le soifua maloloina faalemafaufau. Afai e te talitonu o loo e i ai i ni faafitauli tumau ma le atuatuvale, mamafatatu ma le popole, ita, vaisu, po o isi faafitauli tau le soifua maloloina faalemafaufau, e tatau ona e sailia se fesoasoani faapolofesa.
E faapefea ona Galue le Vaega?
Faitau:
O vaega o le ola tutoatasi e galulue e faapei o se aufono. E leai se faiaoga po o se tagata atamai faapitoa. Nai lo o lena, e te mulimuli tonu i anomea e pei ona tusiaina. O fonotaga taitasi a vaega e mai le 90 i le 120 minute. O lou tomai e fesootai ai ma le tasi ma le isi o le a fesoasoani ia te oe e lagona ai le Agaga ma faateleina ai le malosi faafoisia faalelagona. Faatasi ai ma le taitaiga a le Agaga, o le a outou fesoasoani ai i le tasi ma le isi:
-
Ia saofagā tutusa i talanoaga ma gaoioiga. E leai se tasi, ae maise lava o le tagata e faagaoioia, e tatau ona pule i le talanoaga.
-
Ia tumau i totonu o le taimi atofaina e tuuina atu mo le faasoaina atu.
-
Alofa ma lagolago le tasi i le isi. Faaali atu le fiafia, fai fesili, ma ia nofouta i lagona o isi.
-
Faasoa atu ni manatu faaalia lelei ma talafeagai; aloese mai le faasoaina atu o ni mau faamatalaga.
-
Fai ma tausia tautinoga.
Maimoa:
“My Self-Reliance Group,” e maua i le https://churchofjesuschrist.org/study/video/self-reliance-videos [4:01]. (E lē maua le vitiō? Faitau le vaega lenei, “A Aunoa ma se Faiaoga, E Faapefea Ona Tatou Iloa le Mea e Fai?”)
Talanoa:
O le a le mea na matuai faamanuiaina ai le vaega o loo i le vitiō? O a ni mea e mafai ona tatou faia o se vaega ia maua ai se aafiaga e suia ai le olaga?
A Aunoa ma se Faiaoga, O Le A Faapefea Ona Tatou Iloa le Mea e Fai?
Faitau:
E faigofie. Tau lava o le mulimuli i anomea. O mataupu taitasi o le tusigaluega ua i ai ni vaega se lima:
Lipoti: Talanoa i le alualu i luma na e faia i le āluga o le vaiaso i au tautinoga.
O Lou Faavae: Toe iloilo se mataupu faavae o le talalelei o le a taitai atu ai i se ola tutoatasi faaleagaga sili atu.
Aoao: Aoao ni tomai moni o le a taitai atu ai i le ola tutoatasi faaletino sili atu.
Mafaufau Loloto: Faalogo mo musumusuga mai le Agaga Paia i le ala e faatino ai mea ua e aoaoina.
Tautino: Folafola atu e faatino tautinoga i le āluga o le vaiaso, o le a fesoasoani i lou alualu i luma. O le a e faasoa atu foi mea ua e aoaoina i fonotaga taitasi a vaega ma aiga po o uo.
Auala e Faaaoga ai le Tusigaluega Lenei
A E Vaaia Faamanatu Nei, Mulimuli i Faatonuga Nei
Faitau |
Maimoa |
Talanoa |
Mafaufau Loloto |
Gaoioiga |
---|---|---|---|---|
Faitau E toatasi le tagata e faitau leotele mo le vaega atoa. | Maimoa E maimoa le vaega atoa i le vitiō. | Talanoa E faasoa atu e tagata o le vaega o latou manatu mo le lua i le fa minute. | Mafaufau Loloto E mafaufau, manatunatu, ma tusitusi filemu tagata taitoatasi mo le lua i le tolu minute. | Gaoioiga E galulue taitoatasi tagata o le vaega pe faatasi foi ma isi mo le taimi atofaina. |
Faitau:
E ui o lenei tusi lesona e masani ona faaaoga i vaega o le ola tutoatasi ua faatulagaina e se siteki po o se uarota, ae e mafai foi ona faaaoga i soo se taimi ma aiga, uo, po o tuaoi o e mananao e toeiloilo faatasi.
Faitau:
Manatua o mea e faasoa atu i le taimi o fonotaga faalevaega e lē faalauaiteleina. O manatu o loo faaalia i la tatou vaega o manatu na o tagata taitoatasi ma e lē suitulaga i manatu po o aoaoga faavae O Le Ekalesia a Iesu Keriso o le Au Paia o Aso e Gata Ai.