Seminera
Lesona 195: Mampandray anjara ny Tompo amin’ny fianaranao: “Homba anao Aho”

“Lesona 195: Mampandray anjara ny Tompo amin’ny fianaranao: –Homba anao Aho,–” Fotopampianarana sy Fanekempihavanana: Boky torolalana ho an’ny mpampianatra seminera (2025)

“Mampandray anjara ny Tompo amin’ny fianaranao,” Fotopampianarana sy Fanekempihavanana: Boky torolalana ho an’ny mpampianatra seminera

Lesona 195: Fahombiazana any an-tsekoly

Mampandray anjara ny Tompo amin’ny fianaranao

“Homba anao Aho”

zatovo mivavaka

Te hanampy antsika amin’ny lafiny rehetra amin’ny fiainantsika ny Ray any An-danitra sy i Jesoa Kristy, anisan’izany ny ezaka ataontsika mba hianatra sy hahazo fanabeazana ara-dalàna. Ity lesona ity dia afaka manampy ny mpianatra hampandray anjara ny Tompo amin’ny lafiny rehetra amin’ny fianarany rehefa mikatsaka fianarana amin’ny alalan’ny fandalinana sy amin’ny alalan’ny finoana izy ireo.

Sahanasa fianarana azo atao

Toe-javatra sarotra

Azonao atao ny manomboka ny fotoam-pianarana amin’ny alalan’ny fizarana ireto toe-javatra iainana manaraka ireto sy ny fifanakalozan-kevitra momba izany miaraka amin’ny iray kilasy. Raha ilaina dia amboamboary ireo toe-javatra mba hifanaraka kokoa amin’ny zavatra ilain’ny mpianatrao.

Alaivo sary an-tsaina ny tenanao ao anatin’ny iray na ny maromaro amin’ireto toe-javatra manaraka ireto:

  • Kivy ianao amin’ny taranja iray any am-pianarana ary te hilavo lefona.

  • Manana fanontaniana mikasika ny fanohizana ny fianaranao ianao ao anatin’ireo taona maha-tanora anao. Tsy fantatrao hoe aiza no tokony hanohizanao ny fianaranao, na hoe tokony hanao izany ve ianao.

  • Ao anatin’ny herinandro voalohany amin’ny asanao vaovao ianao ary tsapanao fa tsy mahay ilay asa na ny andraikitra omena anao ianao.

Inona no hataonao raha ao anatin’ny iray amin’ireo toe-javatra iainana ireo ianao? Iza no hitodihanao mba hahazoana fanampiana?

Hevero ny hanontany ireo mpianatra raha toa ka efa niaina toe-javatra mitovy amin’izany izy ireo na ny olona fantany. Azonao atao ny manasa azy ireo hizara ny zavatra nataony na nataon’ny hafa mba hahazoana fanampiana.

Hazavao fa ato amin’ity lesona ity ny mpianatra dia hianatra momba ny maha-zava-dehibe ny fampandraisana anjara ny Tompo amin’ny lafiny rehetra amin’ny fiainan’izy ireo, ka tafiditra ao anatin’izany ny fianarany. Mba hanampiana azy ireo hiomana handalina ity lohahevitra ity dia asehoy ireto fanontaniana manaraka ireto ary asao ny mpianatra hamaly izany ao anatin’ny diary fandalinany.

Makà fotoana hisaintsainana ireto teny nambara manaraka ireto amin’ny alalan’ny fampiasana mari-drefy 1 (tsy manao mihitsy) hatramin’ny 5 (matetika be):

  1. Mivavaka amin’ny Ray any An-danitra aho mba hahazo fanampiana alohan’ny handalinako na hanombohako tetikasa iray ho an’ny fianarako.

  2. Maneho faniriana amin’ny Raiko any An-danitra aho ao anatin’ny vavaka ataoko manokana mba hanana ny Fanahy miaraka amiko rehefa mianatra any an-tsekoly.

  3. Miezaka tsy tapaka ny hivoatra aho amin’ny ezaka ataoko mba hianatra miaraka amin’ny fanampian’i Jesoa Kristy.

  4. Miantehitra amin’ny fanampian’ny Fanahy aho ary mahafantatra ny fiasan’izany ao anatin’ny fandalinako sy ny fianarako.

Asao ny mpianatra hitady ireo fampianarana izay afaka manampy azy ireo hampandray anjara feno kokoa ny Tompo eo amin’ny fandalinany sy ny fianarany.

Fianarana avy amin’ireo mpianatra ao amin’ny soratra masina

Hazavao fa ny soratra masina dia mirakitra ohatra maro momba ny olona izay nampandray anjara ny Tompo mba hanampy azy ireo hahazo fahatakarana sy handresy ireo olana. Zarao ho vondrona maromaro ny mpianatra mba hamitana ity sahanasa fandalinana manaraka ity. Omeo ny iray amin’ireto ohatra manaraka ireto ny vondrona tsirairay mba hohalalinina, ary avy eo dia ifanakalozy hevitra ireo fanontaniana roa aorian’izany.

Halalino ireto soratra masina manaraka mikasika ny olona izay niatrika toe-javatra sarotra sy mampiahiahy ireto. Mitadiava ohatra mikasika ny fomba nampandraisan’ireo olona ireo anjara ny Tompo rehefa nikatsaka fahatakarana izy ireo.

  • Tamin’ny fomba ahoana no nampandraisan’ireo olona ireo anjara ny Tompo tamin’ny fianaran’izy ireo?

  • Tamin’ny fomba ahoana no nanampian’ny Tompo azy ireo?

    Rehefa avy nomena fotoana ampy nandalinana sy nifanakalozan-kevitra ny mpianatra dia asao ny mpikambana ao amin’ny vondrona tsirairay hanao tatitra momba ny zavatra nifanakalozan’izy ireo hevitra amin’ny alalan’ny fizarana ny valintenin’izy ireo tamin’ireo fanontaniana teo aloha.

  • Araka ny zavatra nianaranao dia ahoana no hamenoanao ity fehezan-teny manaraka ity? Rehefa mampandray anjara ny Tompo amin’ny fianarantsika isika dia afaka …Izy.

    Afaka mameno io fehezan-teny io amin’ny fomba mitovy amin’ity manaraka ity ny mpianatra: Rehefa mampandray anjara ny Tompo amin’ny fianarantsika isika dia afaka manome antsika fahatakarana izay tsy ho azontsika amin’ny ezaka ataontsika irery Izy.

  • Inona no fantatrao momba ny Tompo ka manome toky anao fa hanampy anao amin’ny fianaranao Izy?

Fomba ampandraisana anjara ny Tompo amin’ny fianaranao

  • Raha ny enti-modinao no resahina dia amin’ny fotoana manao ahoana no mety hanampy ny fampandraisana anjara ny Tompo?

Raha ilaina dia ampio ny mpianatra hieritreritra ny valin’ilay fanontaniana teo aloha. Anisan’ireo ohatra amin’izany ny fanaovana enti-mody, ny fanaovana fitsapam-pahaizana, ny fianarana ao an-dakilasy, ary ny fanaovana asa ampiandraiketina na tetikasa ao an-dakilasy. Hevero ny hanao lisitra eny amin’ny solaitrabe ny hevitry ny mpianatra.

Avy eo dia omeo ireto torolalana manaraka ireto ny mpianatra mba hanampiana azy ireo hieritreritra fomba ahafahan’izy ireo mampandray anjara ny Tompo amin’ireo ohatra hitan’izy ireo. Afaka manao izany tsirairay ny mpianatra, na miaraka amina namana iray, na ao anatina vondrona kely.

Soraty ao amin’ny pejy iray ao amin’ny diary fandalinanao ny andian-teny hoe Afaka mampandray anjara ny Tompo amin’ny fianarako aho amin’ny alalan’ny …. Mitanisà hevitra maro araka izay azonao eritreretina momba ny fampandraisana anjara ny Tompo amin’ireo zavatra atao mifandray amin’ny fianarana izay hitanao.

Rehefa avy namorona ny lisitr’izy ireo ny mpianatra dia asao izy ireo hizara ny heviny amin’ny iray kilasy. Azonao atao ny mamorona lisitra eny amin’ny solaitrabe ary manampy ny hevitr’ireo mpianatra ao anatin’izany.

Raha ilaina dia afaka manolotra ohatrana hevitra vitsivitsy ianao: mivavaka mba hahazoana fanampiana amin’ny fitadidiana ny zavatra nianaranao alohan’ny fitsapam-pahaizana, tetikasa, na asa ampiandraiketina; maneho fankasitrahana noho ny fanampian’ Andriamanitra sy ireo fahafahana nomeny anao mba hianatra; mirakitra an-tsoratra ireo zavatra niainanao rehefa nampandray anjara ny Tompo tamin’ny fianaranao ianao; mifady hanina sy mivavaka mba hanana faniriana lehibe kokoa hianatra; mametraka an’ Andriamanitra ho lohalaharana amin’ny alalan’ny fanokanana fotoana hanaovana vavaka sy fandalinana soratra masina isan’andro.

  • Inona no zavatra niainanao rehefa nampandray anjara ny Tompo tamin’ny fianaranao ianao?

Hevero ny handefa mandritra ny fifanakalozan-kevitra ny “Lasa mahomby kokoa ao amin’i Kristy: Fanoharana momba ny solampy” manomboka eo amin’ny mari-potoana 0:00 hatramin’ny 1:05. Hita ao amin’ny ChurchofJesusChrist.org io horonan-tsary io. Ao amin’ilay horonan-tsary ny Loholona Clark G. Gilbert ao amin’ny Fitopololahy dia mamariparitra ny zavatra niainany tamin’ny fampandraisana anjara ny Tompo tamin’ny fianarany.

10:1

Misaintsaina sy manao asa araka ireo fahamarinana

Hevero ny hanasa ny mpianatra hisaintsaina ireo fomba ahafahan’izy ireo mampihatra ny zavatra nianarany momba ny fomba hampandraisana anjara ny Tompo amin’ny fianarany. Afaka mamaly an’izao manaraka izao ao amin’ny diary fandalinany izy ireo.

  • Inona no nianaranao na tsapanao momba ny Tompo ka mahatonga anao te hampandray anjara Azy amin’ny fianaranao?

  • Inona no zavatra iray na roa azonao atao mba hampandraisana anjara ny Tompo amin’ny fianaranao?

Hevero ny hanasa ny mpianatra hizara ny zavatra tsapany sy nianarany. Mijoroa ho vavolombelona momba ireo fahamarinana noresahinareo, ary amporisiho ny mpianatra hanao ezaka hanatontosa ny drafiny sy hanao zavatra araka ireo fahatsapana azony avy amin’ny Fanahy.