“Lesona 198: Fomba fisainana tia fivoarana: Miezaka manana toe-tsaina sy manao asa izay manatsara ny fomba fisainantsika,” Fotopampianarana sy Fanekempihavanana: Boky torolalana ho an’ny mpampianatra seminera (2025)
“Fomba fisainana tia fivoarana,” Fotopampianarana sy Fanekempihavanana: Boky torolalana ho an’ny mpampianatra seminera
Lesona 198: Fahombiazana any an-tsekoly
Fomba fisainana tia fivoarana
Miezaka manana toe-tsaina sy manao asa izay manatsara ny fomba fisainantsika
Isika tsirairay avy dia hiatrika sakana eo amin’ny fianarantsika sy ny fanabeazana antsika. Miankina amin’ny fomba fisainantsika, isika dia afaka mijery ireo sakana ireo ho toy ny zavatra izay hanakana antsika na ho toy ny fahafahana hianatra sy hivoatra. Mampiseho ny finoantsika an’i Jesoa Kristy ny fisafidianana ny hiatrika ireo sakana amin’ny fomba fisainana tia fivoarana. Ity lesona ity dia afaka manampy ireo mpianatra hanana fomba fisainana tia fivoarana mba handresena ireo sakana eo amin’ny fianarana.
Sahanasa fianarana azo atao
Sakana eo amin’ny fianarana
Hevero ny hanomboka ny lesona amin’ny alalan’ny fizarana ity rafi-tantara manaraka ity. Na azonao atao ihany koa ho solon’izany ny manasa ny mpianatra hamorona rafi-tantara iray izay ahitana zatovo iray nahatsikaritra sakana teo amin’ny fianarany. Avy eo dia azonao atao ny mampifanaraka ireo fanontaniana mba hifandray kokoa amin’ilay rafi-tantara nosafidina.
Rehefa fantatr’i Caden ny momba ireo taranja izay hataony amin’ny taom-pianarana ho avy, dia tsikariny fa mila mianatra ny taranja matematika izy. Tsaroan’i Caden hoe tsy nahay matematika mihitsy izy tany aloha tany. Mihevitra izy fa tsy hahomby raha hanao io taranja matematika io.
-
Inona no zavatra manan-danja taminao tamin’ny fomba fisainan’i Caden?
-
Inona no torohevitra azonao zaraina aminy?
Fomba fisainana tia fivoarana
Hazavao fa rehefa mandalo fanamby na sakana isika eo amin’ny fianarana sy eo amin’ny lafiny hafa eo amin’ny fiainantsika dia afaka mijery azy ireny amin’ny fomba fisainana tia fivoarana na amin’ny fomba fisainana tery.
Asehoy ireto teny famaritana ireto ary mangataha mpianatra roa hamaky izany amin’ny iray kilasy.
Fomba fisainana tia fivoarana: Ny olona manana fomba fisainana tia fivoarana dia mino fa afaka mianatra sy mahazo tanjaka avy amin’i Jesoa Kristy izy ireo. Mailaka ny hiova izy ireo rehefa mianatra. Manosika ny tenany izy ireo na dia sarotra aza ny zavatra atao amin’ny alalan’ny fianteherana amin’i Jesoa Kristy.
Fomba fisainana tery: Misalasala ny amin’ny fahafahan’izy ireo mianatra ny olona manana fomba fisainana tery. Matahotra ny tsy hahomby izy ireo, ary mino izy ireo fa tsy afaka mianatra zavatra sasantsasany.
Mba hanampiana ireo mpianatra hahatakatra bebe kokoa ireo fomba fisainana ireo dia zarao ny sasany amin’ireto teny ambara manaraka ireto. Azonao atao ny mampiseho ny teny ambara voalohany avy amin’ny tsanganana tsirairay mba hanampiana ireo mpianatra hahita ohatra nampiarahana tsiroaroa. Avy eo dia azonao atao ny manome ny mpianatra ny ambiny amin’ireo teny ambara avy amin’ny fomba fisainana tery. Asao izy ireo mba hiasa ao anaty vondrona kely maromaro hanoratra teny ambara iray izay mety holazain’ny olona manana fomba fisainana tia fivoarana izay maneho ny finoan’izy ireo ny Mpamonjy.
|
Fomba fisainana tery |
Fomba fisainana tia fivoarana |
|---|---|
Fomba fisainana tery “Ny fahadisoako dia mampiseho fa tsy marani-tsaina aho.” | Fomba fisainana tia fivoarana “Noho ny Mpamonjy dia afaka mianatra avy amin’ireo fahadisoako aho ary ho lasa tsaratsara kokoa.” |
Fomba fisainana tery “Tsy te hanandrana zavatra vaovao aho satria tsy maintsy hoe tsy hahomby.” | Fomba fisainana tia fivoarana “Noho ny fahafantarako fa faly amin’ny ezaka rehetra ataoko mba hivoarana i Jesoa Kristy dia afaka manandrana zavatra vaovao aho ary mankafy miatrika fanamby.” |
Fomba fisainana tery “Tsy afaka mianatra zavatra aho.” | Fomba fisainana tia fivoarana “Raha te hianatra zavatra aho dia afaka mianatra izany miaraka amin’ny fanampian’ny Tompo.” |
Fomba fisainana tery “Rehefa mahatsiaro hoe tsy hahavita aho dia milavo lefona.” | Fomba fisainana tia fivoarana “Ny fiezahana ao anatin’ny fahasarotana dia manampy ahy hivoatra sy ho tonga tahaka an’i Jesoa Kristy kokoa.” |
Asao ny mpianatra hieritreritra raha toa ka mazàna izy ireo no mijery ireo fanamby amin’ny fomba fisainana tia fivoarana na amin’ny fomba fisainana tery. Asao izy ireo rehefa manohy mandalina mba hitady ireo fahamarinana mahasoa sy hifantoka amin’ny fitaomana avy amin’ny Fanahy Masina izay afaka manampy azy ireo hanana fomba fisainana tia fivoarana.
Fahamarinana mandrakizay izay afaka manampy antsika hanana fomba fisainana tia fivoarana
Rahalahy Devin G. Durrant, izay tao amin’ny Fiadidian’ny Sekoly Alahady maneran-tany teo aloha, dia nanazava ny antony tokony hiezahan’ny mpianatr’i Jesoa Kristy manana fomba fisainana tia fivoarana:.
Mamporisika antsika ny Ray any An-danitra mba hikatsaka ny hanana fanomezam-pahasoavana sy hampivoatra ny tenantsika satria Izy, amin’ny maha-ray aman-dreny be fitiavana Azy, dia mino fa afaka manatontosa zavatra lehibe isika, anisan’izany ny fisandratana amin’ny farany. Ray aman-dreny manana fomba fisainana tia fivoarana izy. Raha te ho tonga tahaka Azy isika dia mila miezaka manana izany toe-tsaina izany ary mianatra mitombo amin’ny fomba rehetra izay andrandrainy. (Devin G. Durrant, “Helping Children and Youth Develop a Growth Mind-Set,” Ensign, Feb. 2020)
-
Manampy anao hahatakatra inona momba ny mety ho fiantraikan’ny fisainana tia fivoarana eo amin’ny fiainanao io teny nambara io?
-
Inona araka ny eritreritrao no afaka manampy anao hanana fomba fisainana tia fivoarana?
Raha ilaina dia hazavao fa ny fahatakarana sy ny fitadidiana ireo fahamarinana momba ny Raintsika any An-danitra sy i Jesoa Kristy dia afaka manampy ireo mpianatra hanana fomba fisainana tia fivoarana rehefa miatrika sakana izy ireo, anisan’izany ireo sakana amin’ny fianarany.
Asao ny mpianatra hitady ny sasany amin’ireo fahamarinana ireo ao amin’ny soratra masin’izy ireo. Azonao atao ny manasa azy ireo hitady soratra masina fantatr’izy ireo na handalina ny sasany amin’ireto andininy manaraka ireto.
Rehefa avy nomena fotoana ampy ireo mpianatra mba hahitana ireo fahamarinana dia asao izy ireo hizara amin’ny iray kilasy ny zavatra hitany. Azon’izy ireo atao koa ny manoratra eny amin’ny solaitrabe ireo fahamarinana hitany. Mety hahita fahamarinana mitovy amin’ireto manaraka ireto izy ireo: Afaka manao ny zava-drehetra ao amin’ny herin’ Andriamanitra isika.
-
Ahoana no ahafahan’ny fahatsiarovana ireo fahamarinana momba ny Ray any An-danitra sy i Jesoa Kristy ireo manampy anao hanana fomba fisainana tia fivoarana eo amin’ny fianaranao?
-
Inona avy ireo ohatra sasantsasany ahitana olona ao amin’ny soratra masina izay nampiasa ny finoan’izy ireo an’ Andriamanitra mba hiatrehana ny olan’izy ireo tamin’ny fomba fisainana tia fivoarana?
Azonao atao mandritra ny fifanakalozan-kevitra ataonareo momba ilay fanontaniana teo aloha ny manasa ny mpianatra hitady ohatra avy amin’ny fiainan’i Nefia. Azonao atao ihany koa ny manasa ny mpianatra hijery ny ohatra nasehon’i Lamàna sy i Lemoela izay maneho fomba fisainana tery.
Ireto misy ohatra vitsivitsy azonao asaina jeren’ny mpianatra: ny fihetsika nanoloana ilay didy hiverina tany Jerosalema mba haka ireo takela-barahina tany amin’i Labàna (jereo ny 1 Nefia 3:4–7); ny fikasana haka ireo takela-barahina (jereo ny 1 Nefia 3:24–31; 4:1–6); ny zavatra nataon’ireo rahalahiny taorian’ny nizaran’i Lehia ny fahitany ny hazon’aina (jereo ny 1 Nefia 10:17–19; 11:1–6; 15:1–3, 8–9); i Nefia nahatapaka ny tsipikany (jereo ny 1 Nefia 16:18–23, 30–32); ary i Nefia nodidina hanamboatra sambo (jereo ny 1 Nefia 17:7–11, 17–18).
-
Ahoana no nanampian’ny Tompo anao, na ahoana araka ny eritreritrao no ahafahan’ny Tompo manampy anao, hanana fomba fisainana tia fivoarana sy handresy ireo sakana eo amin’ny fianaranao?
Hevero ny hizara ohatra iray avy amin’ny fiainanao.
Ny fomba fisainana tia fivoarana ananako
Asao ny mpianatra hieritreritra ny sasany amin’ireo sakana izay atrehiny amin’ny fianarany na ny fandalinany izay azon’ny fomba fisainana tia fivoarana anampiana azy ireo. Azon’izy ireo atao ny manoratra ireo sakana ireo ao amin’ny diary fandalinany. Mety holazain’izy ireo amin’izany ny fahasahiranana amin’ny famakian-teny, ny fahasahiranana amin’ny taranja iray any am-pianarana, na ny tsy fahampian’ny fahafahana mianatra. Avy eo dia amporisiho hanao ireto manaraka ireto izy ireo.
Misafidiana sakana roa na telo izay mety ho hita eo amin’ny fianaranao sy ny fanabeazana anao. Ho an’ny sedra tsirairay dia manorata fehezan-teny mifono fomba fisainana tia fivoarana izay maneho ny finoanao ny fahafahan’ny Mpamonjy manampy anao hahomby.
Hevero ny hanasa mpianatra hizara fehezan-teny iray izay nosoratan’izy ireo. Azon’izy ireo atao ny mizara izany amin’izay eo akaikiny na mandehandeha manerana ny efitrano dia mizara amin’ny hafa.
Rehefa avy nizara ny mpianatra dia amporisiho izy ireo hamantatra ny fomba hanarahany ireo fehezan-teny izay noforonin’izy ireo. Mijoroa ho vavolombelona momba ireo fahamarinana noresahinareo androany. Amporisiho ny mpianatra hiezaka handresy ireo sakana amin’ny fianarany amin’ny fomba fisainana tia fivoarana.