“Lesona 197: Fiomanana amin’ireo fitsapam-pahaizana sy tetikasa sarotra: –Raha efa miomana ianareo dia tsy hatahotra,–” Fotopampianarana sy Fanekempihavanana: Boky torolalana ho an’ny mpampianatra seminera (2025)
“Fiomanana amin’ireo fitsapam-pahaizana sy tetikasa sarotra,” Fotopampianarana sy Fanekempihavanana: Boky torolalana ho an’ny mpampianatra seminera
Lesona 197: Fahombiazana any an-tsekoly
Fiomanana amin’ireo fitsapam-pahaizana sy tetikasa sarotra
“Raha efa miomana ianareo dia tsy hatahotra”
Amin’ny ezaka ataontsika mba handranto fianarana dia matetika isika no tendrena hanao asa sarotra mba hovitaina. Rehefa mitodika any amin’i Jesoa Kristy ny zatovo ary manao ny anjarany mba hiomanana sy haharetana any an-tsekoly dia afaka manampy azy ireo ho lasa mahay ireo zavatra ampanaovina azy amin’ny fianarany ny Mpamonjy. Ity lesona ity dia afaka manampy ny mpianatra hahatakatra ireo fomba hiomanana amim-pahombiazana amin’ireo fitsapam-pahaizana sy tetikasa sarotra.
Sahanasa fianarana azo atao
Sahirana amin’ireo fitsapam-pahaizana na tetikasa any an-tsekoly
Hevero ny hanomboka ny lesona amin’ny alalan’ny fizarana ireto rafi-tantara manaraka ireto. Zarao mba hasolo ny fizarana ireo rafi-tantara iray manontolo ny fehezan-teny voalohany amin’ny tsirairay amin’izy ireo ary avy eo dia angataho ny mpianatra mba hilaza antony mety mahatonga an’i Sam sy i Emma hahatsapa ny zavatra tsapany.
Tsy tia manao fitsapam-pahaizana any an-tsekoly i Sam satria matetika izy no tsy mahay izany tsara. Matetika izy no mitebiteby rehefa manao ilay fitsapam-pahaizana sady toa manadino ny ankamaroan’ny zavatra nianarany.
Sahirana be i Emma rehefa omena tetikasa lehibe na taratasim-panadinana ao amin’ny kilasiny any an-tsekoly. Mahatsapa ho tototra izy satria betsaka ny asa izay tsy maintsy ataony ary manana fironana izy hanemotra ny fotoana hanaovana izany mandra-pahatongan’ny iray na roa andro alohan’ny handefasana ilay tetikasa na taratasim-panadinana. Vokatr’izany dia matetika no tsy vita na zara fa vita ny fitsapam-pahaizana averiny amin’ny mpampianatra.
Asao ny mpianatra mba hieritreritra ireo fotoana izay mety ho nahatsapany toa an’i Sam na Emma. Hazavao fa mahazatra ny mahita mpianatra tsy matoky tena any an-tsekoly, indrindra fa amin’ny fanadinana sy tetikasa sarotra. Mety hanampy ny mampahatsiahy azy ireo fa dingana mitohy mandritra ny androm-piainana ny fianarana. Tonga eto an-tany isika mba hianatra sy hivoatra.
Asao ny mpianatra rehefa mandalina mba hifantoka amin’ireo fahamarinana sy fahatsapana ara-panahy izay afaka manampy azy ireo hahomby amin’ny fitsapam-pahaizana na tetikasa any an-tsekoly.
Mianatra avy amin’ny soratra masina
Hazavao fa ny soratra masina dia tsy mampianatra manokana ny fomba hiomanana amin’ireo fitsapam-pahaizana na tetikasa any an-tsekoly. Kanefa rehefa mampihatra ny soratra masina amin’ny tenantsika isika (jereo ny 1 Nefia 19:23), dia afaka mahita fahamarinana izay afaka manampy antsika amin’ny fomba isan-karazany, anisan’izany rehefa miatrika olana eo amin’ny fianarantsika isika.
Hevero ny hizara ny kilasy ho vondrona maromaro mba hamita ity sahanasa fandalinana manaraka ity.
Karohy ao amin’ny soratra masina ireo fahamarinana izay afaka manampy anao amin’ny ezaka ataonao mba hahomby amin’ny fanadinana sy ny tetikasa any an-tsekoly. Afaka mitady andinin-tsoratra masina samihafa ianao, na afaka mandalina ny sasany amin’ireto andinin-tsoratra masina manaraka ireto na izy rehetra:
-
Inona avy ireo fahamarinana hitanao ka afaka manampy anao hahomby amin’ireo fitsapam-pahaizana na tetikasa any an-tsekoly?
Mba hanampiana ny mpianatra hifampianatra dia hevero ny hanasa azy ireo hitanisa eny amin’ny solaitrabe ireo fahamarinana hitan’izy ireo.
Tokony ho afaka hamantatra fahamarinana maro avy ao amin’ny soratra masina nohalalinin’izy ireo ny mpianatra. Ireto misy ohatra vitsivitsy: afaka manazava ny saiko ny Fanahy Masina (jereo ny Fotopampianarana sy Fanekempihavanana 6:15); raha vonona aho dia tsy mila matahotra (jereo ny Fotopampianarana sy Fanekempihavanana 38:9, 30); rehefa mivavaka mandrakariva aho dia hanamasina ny asako ho an’ny fiadanan’ny fanahiko Andriamanitra (jereo ny 2 Nefia 32:8–9); afaka manao ny zava-drehetra aho amin’ny alalan’i Jesoa Kristy (jereo ny Filipiana 4:13).
Hevero ny hanasa mpianatra maromaro hamaly ny voalohany amin’ireto fanontaniana manaraka ireto. Azonao atao ny manondro fahamarinana sasantsasany eny amin’ny solaitrabe ary manasa ireo mpianatra izay nanoratra izany mba hamaly ilay fanontaniana miaraka amin’izany fahamarinana izany ao an-tsaina.
-
Ahoana araka ny eritreritrao no ahafahan’ireo fahamarinana hitanao manampy anao amin’ireo fitsapam-pahaizana na tetikasa any an-tsekoly?
-
Inona avy ireo fomba sasantsasany ahafahan’ny Tompo manampy anao amin’ny enti-modinao rehefa mampihatra ireo fahamarinana ireo amin’ny fianaranao ianao?
Hevero ny hangataka mpianatra vitsivitsy, ao anatin’ny fifanakalozan-kevitra ataonareo momba ireo fanontaniana teo aloha, hizara ohatra mikasika ny fomba nandraisan’izy ireo ny fanampian’ny Tompo tamin’ny enti-modin’izy ireo. Asao izy ireo hizara ny fiantraikan’ireo zavatra niainany ireo teo amin’ny zavatra tsapan’izy ireo ho an’ny Mpamonjy.
Manomeza torohevitra
Ity ampahany amin’ny lesona ity dia natao hanampiana ny mpianatra hieritreritra fomba manokana ahafahan’izy ireo miomana ny hahomby amin’ny fitsapam-pahaizana na tetikasa sarotra. Mba hanaovana izany dia azonao atao ny mampiseho ireto toromarika manaraka ireto ary manome fotoana ny mpianatra hamoronana valinteny miaraka amin’ny namana iray na vondrona kely iray.
Alaivo sary an-tsaina hoe nanana fahafahana ianao hanome torohevitra olona iray tahaka an’i Sam na i Emma mikasika ny fomba hahombiazana amin’ny fitsapam-pahaizana na amin’ireo tetikasa sarotra ao an-tsekoly. Soraty izay torohevitra homenao. Ampidiro ao anatin’izany ireo andian-teny avy ao amin’ny soratra masina izay heverinao fa mety hanampy. Ireto fanontaniana manaraka ireto dia afaka manampy mba hitarihana ny valinteninao:
-
Inona no afaka manampy anao hitadidy sy hampiasa ny zavatra efa nianaranao?
-
Ahoana no ahafahanao manao izay tsy hahavariana anao rehefa mandalina ianao?
-
Inona no afaka manampy anao hisoroka ny fangatahana andro?
-
Inona no afaka manampy anao hanatsara ny fahafahanao mieritreritra mazava tsara?
-
Inona no azonao atao mba hampandraisana anjara ny Tompo amin’ny fiomananao?
Rehefa avy nomena fotoana ampy hamoronana ny valinteniny ny mpianatra dia asao izy ireo hizara izany amin’ny iray kilasy. Azonao soratana eny amin’ny solaitrabe ireo hevi-baovao izay zaraina ary amporisiho ny mpianatra mba hirakitra an-tsoratra ao amin’ny diary fandalinany izay torohevitra tsy mbola neritreretin’izy ireo. Azonao atao ihany koa ny manasa ny mpianatra hizara ohatra mikasika ny fomba nanampian’ny sasany amin’ireo sosokevitra ireo azy ireo.
Raha mila fanampiana amin’ny fieritreretana hevitra ny mpianatra dia hevero ny hanolotra sosokevitra vitsivitsy, anisan’izany ny sasany amin’ireto manaraka ireto:
-
Raiso an-tsoratra ny zavatra ianaranao ao an-dakilasy ary avereno jerena matetika izany. Hazavao amin’ny mpiara-mianatra iray ny zavatra ianaranao, na amin’ny olona iray ao amin’ny fianakaviana, na namana iray.
-
Apetraho ny findainao ary sakano tsy hipoitra ireo tranonkala mahavariana ao amin’ny internet rehefa mandalina ianao.
-
Zarazarao hatao mandritra ny andro na herinandro maro ny fandalinanao. Manaova fandaharam-potoana dia araho tsara izany. Raha taraiky ianao amin’ny fanarahana izany, dia aza miandry hatramin’ny farany vao hanenjika.
-
Mitadiava toerana mangina mba handalinana, ary ataovy mandritra ireo fotoana izay tsy maha-reraka loatra anao mandritra ny andro ny fandalinana. Karakarao ny vatanao amin’ny alalan’ny fihinanana sakafo ara-pahasalamana, ny fahazoana torimaso ampy tsara, ary ny fanaovana fanatanjahan-tena tsy tapaka.
-
Makà fotoana hianarana sy hanomanana ny fanahinao amin’ny alalan’ny fandalinana soratra masina. Mivavaha sy mifadia hanina indraindray mba hahazoana fanampiana sy fitarihana.
Ireo hevitra hafa hanampiana amin’ny fanadinana any an-tsekoly dia azo jerena ao amin’ny fizarana “Sahanasa fianarana fanampiny.”
Eritrereto ny zavatra nianaranao
Asao ny mpianatra hisaintsaina ny zavatra nianarany sy tsapany tao amin’ny lesona izay afaka manampy azy ireo eo amin’ny fiainany. Fomba iray hanaovana izany ny fanasana ireo mpianatra hamaly ity fanontaniana manaraka ity ao amin’ny diary fandalinan’izy ireo.
-
Inona no nianaranao na tsapanao momba an’i Jesoa Kristy androany ka tianao hotadidina?
-
Inona avy ireo paikady sasantsasany izay nianaranao androany ka tianao hampidirina ao amin’ny fandalinanao?
Ampahatsiahivo ny mpianatra fa mitaky fotoana, fiomanana, faharetana ary fanazaran-tena ny fahatongavana ho mpianatra mahomby. Amporisiho izy ireo hanohy hiantehitra amin’ny Mpamonjy mba hahazo fanampiana sy fitarihana.