198-р хичээл: Хичээл сургуульдаа амжилттай сурах

Өсөж хөгжих сэтгэлгээ

Бидний бодол санааны хэв маягийг сайжруулах хандлага, үйлдлийг хөгжүүлэх

Аз жаргалтай өсвөр насны хүүхэд

Бид бүхэн суралцах, боловсрол эзэмших явцдаа саад бэрхшээлтэй тулгарах болно. Бид сэтгэлгээнээсээ хамааран эдгээр саад бэрхшээлийг биднийг зогсонги байлгах зүйл эсвэл сурч, хөгжих боломж гэж харж болно. Өсөж хөгжих сэтгэлгээгээр саад бэрхшээлийг даван туулахыг сонгох нь бидний Есүс Христэд итгэх итгэлийг харуулдаг. Энэ хичээл суралцахад саад болдог бэрхшээлийг даван туулах өсөж хөгжих сэтгэлгээг хөгжүүлэхэд суралцагчдад тусална.

Боломжит суралцах үйл ажиллагаа

Суралцахад тулгарах саад бэрхшээл

Суралцагчидтай дараах жишээг хуваалцсанаар хичээлийг эхлүүл. Эсвэл та өсвөр үеийнхэнд суралцахад тулгардаг саад бэрхшээлийн жишээг суралцагчдаар зохиолгож болно. Дараа нь та сонгосон жишээг илүү хамаатай болгохын тулд асуултуудыг өөрчилж болно.

Каден ирэх хичээлийн жилд үзэх хичээлүүдээ хараад, математикийн хичээл үзэхээ мэдэв. Каден өмнө нь математикийн хичээлдээ тааруу байснаа саналаа. Тэрээр энэ математикийн хичээл дээр гарцаагүй унана гэж бодов.

• Кадены энэ жишээнээс юу таны анхаарлыг илүү их татаж байна вэ?

• Та түүнд ямар зөвлөгөө өгөх вэ?

Өсөж хөгжих сэтгэлгээ

Бидний сурч боловсрох явцад болон амьдралд хүнд хэцүү нөхцөл байдал тулгарвал тэдгээрийг бид нэг бол өсөж хөгжих сэтгэлгээ эсвэл хэвшмэл сэтгэлгээгээр харж болно гэдгийг тайлбарла.

Дараах тодорхойлолтуудыг үзүүлээд, ангийнхандаа уншиж өгөхөд хоёр суралцагчийг урь.

Өсөж хөгжих сэтгэлгээ: Өсөж хөгжих сэтгэлгээтэй хүмүүс Есүс Христээс суралцаж, хүч чадал авч чадна гэдэгт итгэдэг. Тэд суралцахдаа маш хурдан өөрчлөгдөж чаддаг. Тэд Есүс Христэд найдаж, аливаа зүйлс хэцүү байсан ч өөрсдийгөө шахаж чаддаг.

Хэвшмэл сэтгэлгээ: Хэвшмэл сэтгэлгээтэй хүмүүс суралцах чадвартаа эргэлздэг. Тэд бүтэлгүйтэхээс айдаг бөгөөд зарим зүйлийг сурч чадахгүй гэж итгэдэг.

Эдгээр сэтгэлгээг илүү сайн ойлгоход нь суралцагчдад туслахын тулд дараах мэдэгдлийг хуваалцахыг бод. Хосолсон жишээг харахад суралцагчдад туслахын тулд та багана бүрийн эхний мэдэгдлийг үзүүлж болно. Дараа нь та суралцагчдад хэвшмэл сэтгэлгээний талаарх бусад мэдэгдлийг өгч болно. Жижиг бүлгүүдэд хуваарилагдан, Аврагчид итгэх итгэлээ харуулсан өсөж хөгжих сэтгэлгээтэй хэн нэгний хэлж болох мэдэгдлийг бичихэд тэднийг урь.

Хэвшмэл сэтгэлгээ	Өсөж хөгжих сэтгэлгээ
Хэвшмэл сэтгэлгээ “Миний алдаанууд намайг ухаантай биш гэдгийг харуулж байна.”	Өсөж хөгжих сэтгэлгээ “Аврагчийн ачаар би алдаанаасаа суралцаж, сайжирч чадна.”
Хэвшмэл сэтгэлгээ “Би шинэ зүйл туршиж үзэх дургүй, учир нь би бүтэлгүйтэх магадлалтай.”	Өсөж хөгжих сэтгэлгээ “Есүс Христ миний өсөж хөгжихийн тулд гаргасан хичээл зүтгэлд сэтгэл хангалуун байдгийг мэдсэнээрээ би шинэ зүйлийг туршиж, сорилт бэрхшээлийг даван туулж чадна.”
Хэвшмэл сэтгэлгээ “Би юм сурч чадахгүй.”	Өсөж хөгжих сэтгэлгээ “Хэрвээ би ямар нэг зүйл сурахыг хүсвэл Их Эзэний тусламжтайгаар сурч чадна.”
Хэвшмэл сэтгэлгээ “Би сэтгэлээр унасан үедээ бууж өгдөг.”	Өсөж хөгжих сэтгэлгээ “Хүнд хэцүүг даван туулах нь намайг өсөн дэвжиж, Есүс Христтэй илүү адил болоход тусалдаг.”

Сорилт бэрхшээлийг өсөж хөгжих, хэвшмэл сэтгэлгээ хоёрын чухам алинаар нь харж байгаагаа бодоход суралцагчдыг урь. Тус болох үнэнийг олж мэдэхийн тулд үргэлжлүүлэн судалж, өсөж хөгжих сэтгэлгээг хөгжүүлэхэд туслах Ариун Сүнснээс төрөх сэтгэгдэлд анхаарлаа хандуулахад тэднийг урь.

Өсөж хөгжих сэтгэлгээг хөгжүүлэхэд бидэнд туслах мөнхийн үнэнүүд

Ням гаргийн ангийн ерөнхий ерөнхийлөгчийн зөвлөлийн гишүүн асан Дэвин Ж.Дуррант ах Есүс Христийн шавь нар яагаад өсөх сэтгэлгээг хөгжүүлэх ёстойг ийн тайлбарласан.

Дэвин Ж.Дуррант ах

Тэнгэрлэг Эцэг бидний хайраар дүүрэн эцгийн хувьд биднийг агуу зүйлсэд, түүний дотор эцэст нь өргөмжлөлд хүрч чадна гэдэгт итгэдэг учраас бэлгүүдээ хөгжүүлж, өөрсдөө сайжрахыг эрэлхийлээсэй гэж хүсдэг. Тэр бол өсөж хөгжих сэтгэлгээтэй эцэг юм. Хэрэв бид Түүнтэй адил болохыг хүсвэл яг тийм сэтгэлгээг хөгжүүлж, Түүний хүсэн хүлээсэн бүх арга замаар өсөж хөгжиж сурах хэрэгтэй. (Devin G. Durrant, “Helping Children and Youth Develop a Growth Mind-Set,” Ensign, Feb. 2020)

• Өсөж хөгжих сэтгэлгээ таны амьдралд хэрхэн нөлөөлж болох талаар ойлгоход энэ мэдэгдэл хэрхэн тусалж байна вэ?

• Өсөж хөгжих сэтгэлгээг хөгжүүлэхэд юу тусална гэж та бодож байна вэ?

Шаардлагатай бол Тэнгэрлэг Эцэг, Есүс Христ хоёрын талаарх үнэнийг ойлгож, тогтоох нь суралцагчдад саад бэрхшээлтэй тулгарах үед, тэр дундаа боловсролд нь бэрхшээл тулгарах үед өсөж хөгжих сэтгэлгээг хөгжүүлэхэд тусална гэдгийг тайлбарла.

Эдгээр үнэний заримыг судраас олоход суралцагчдыг урь. Та тэднийг өөрсдийн мэдэх судруудыг олж тогтооход эсвэл дараах шүлгүүдээс суралцахад урьж болно.

• Исаиа 41:10, 13

• Алма 26:12

• Сургаал ба Гэрээнүүд 24:8

• Сургаал ба Гэрээнүүд 84:88

Суралцагчдад үнэнийг олж мэдэх хангалттай цаг гаргаж өгсний дараа, олж мэдсэн зүйлээ ангийнхантайгаа хуваалцахад тэднийг урь. Мөн тэд олсон үнэнээ самбар дээр бичиж болно. Бурханы хүчээр бид бүх зүйлийг хийж чадна гэсэнтэй төстэй үнэнийг тэд олж мэдэж болно.

• Тэнгэрлэг Эцэг, Есүс Христ хоёрын талаарх эдгээр үнэнийг санах нь танд сурч боловсрохдоо өсөж хөгжих сэтгэлгээтэй болоход хэрхэн тусалж чадах вэ?

• Бурханд итгэх итгэлээ ашиглан сорилт бэрхшээлдээ өсөж хөгжих сэтгэлгээгээр ханддаг хүмүүсийн ямар жишээ байдаг вэ?

  Өмнөх асуултын талаар ярилцахдаа та Нифайн амьдралаас жишээ авахад суралцагчдыг урьж болно. Мөн та Лемен, Лемүел хоёрын хэвшмэл сэтгэлгээг харуулсан жишээг үзэхийг суралцагчдаас хүсэж болно.

  Эдгээр жишээ нь: Гуулин ялтаснуудыг олж авахаар Иерусалим руу буц гэсэн зарлигийн хариу (1 Нифай 3:4–7-г үзнэ үү); гуулин ялтаснуудыг авах оролдлого (1 Нифай 3:24–31; 4:1–6-г үзнэ үү); Лихайг амьдралын модны тухай үзэгдлээ хуваалцсаны дараах ах нарын үйлдэл (1 Нифай 10:17–19; 11:1–6; 15:1–3, 8–9-ийг үзнэ үү); Нифай нумаа хугалсан нь (1 Нифай 16:18–23, 30–32-ыг үзнэ үү); мөн Нифайд усан онгоц барихыг зарлиглав (1 Нифай 17:7–11, 17–18-ыг үзнэ үү).

• Их Эзэн танд өсөж хөгжих сэтгэлгээтэй болж, боловсролд тань тулгарсан саад бэрхшээлийг даван туулахад хэрхэн тусалж чадна гэж та бодож байна вэ мөн Их Эзэн танд хэрхэн тусалсан бэ?

Өөрийнхөө амьдралд тохиолдсон жишээг хуваалц.

Мөн та “Нэмэлт суралцах үйл ажиллагаа” хэсэгт байгаа видеоны аль нэгийг үзүүлж болно.

Миний өсөж хөгжих сэтгэлгээ

Боловсрол олж авахад болон суралцахад тулгарч байгаа зарим саад бэрхшээлд өсөж хөгжих сэтгэлгээ хэрхэн тусалж болох тухай бодоход суралцагчдыг урь. Тэд эдгээр саад бэрхшээлийг судлах тэмдэглэлдээ бичиж болно. Тэд уншихад бэрх, хүнд хичээл эсвэл боловсролын боломж хомс байдлыг дурдаж болно. Дараа нь дараахын дагуу үйлдэхэд тэднийг урь.

Боловсрол олж авах, суралцах явцад гарч болзошгүй хоёр юм уу гурван бэрхшээлийг сонго. Саад бэрхшээл бүр дээр Аврагчийн таныг амжилттай байхад туслах чадварт итгэх итгэлээ харуулсан өсөж хөгжих сэтгэлгээний мэдэгдэл бич.

Бичсэн мэдэгдлээ хуваалцахад суралцагчдыг урь. Тэд дэргэдэх суралцагчтайгаа эсвэл өрөөгөөр явж бусадтай хуваалцаж болно.

Суралцагчдыг хуваалцсаны дараа, бодож олсон мэдэгдлээ дагах арга замыг тодорхойлоход тэднийг урамшуул. Өнөөдрийн ярилцсан үнэнүүдээ гэрчил. Боловсрол олж авахад тулгардаг саад бэрхшээлийг өсөж хөгжих сэтгэлгээгээр даван туулахыг хичээхэд суралцагчдыг урамшуул.

Нэмэлт эх сурвалж

Суралцахад саад болох зүйлтэй нүүр тулгарах үедээ юуг санах нь надад тустай байх вэ?

Далын ахлагч Карлос А.Годой ийн тайлбарласан.

Ахлагч Карлос А.Годой

Энэхүү мөнх бус амьдрал нь сурч боловсрох, өсөж хөгжих цаг үе боловч заримдаа амаргүй байдаг. Та нар хичээлээсээ олж мэдсэн шигээ өөрийнхөө өсөлт хөгжилд өөрийгөө чамлаж, сэтгэлээр унаж болох ч үүнийг хийж чадна гэдгийг би чамд батлан хэлмээр байна. Мэдээж, төлөөс байх ч энэ нь гарцаагүй боломжтой юм. Боломжтой байгаагийн гол шалтгаан нь зовлон тохиолдсон үед Аврагч Есүс Христ, Түүний ач ивээл бидэнд эх сурвалж болдогт оршино. (Carlos A. Godoy, “Enter to Learn; Go Forth to Fight!” [Brigham Young University devotional, March 12, 2019], 3, speeches.byu.edu)

Би суралцахуйдаа хэрхэн өсөж хөгжих сэтгэлгээтэй болох вэ?

Далын ахлагч Кларк Г.Гилбэрт ийн заасан.

Ахлагч Кларк Г.Гилбэрт

Боловсрол эзэмших хэцүү бөгөөд золиос шаарддаг гэдгийг би мэднэ. Би та нарыг хэчнээн их шаргуу ажиллаж байгааг, даалгавраа хийж дуусгах, шинэ зүйл сурч мэдэх, амьдралдаа шаардлагатай бусад үүрэг даалгавраа биелүүлэхийн тулд хүнд хэцүү олон өдөртэй золгож байгааг мэднэ. Хичээсээр байгтун. Үргэлжлүүлэн тэвчээртэй бай. Мөн тэвчээрээс ач ивээлд хандахад бэлэн бай. Их Эзэнийг оролцуул. Түүнээс тусламж хүсэн залбир. Тэрээр хичээл зүтгэлийг тань ерөөх болно. (Clark G. Gilbert, “From Grit to Grace” [BYU–Pathway Worldwide devotional, Sept. 25, 2018], byupathway.org)

Би яагаад тэр даруй амжилт олж чадахгүй байж магадгүй вэ?

Ахлагч Линн Г.Роббинс Далын гишүүнээр үйлчилж байхдаа ийн тайлбарласан.

Ахлагч Линн Г.Роббинс

Нифайн гуйвшгүй итгэл нэг удаагийн бүтэлгүйтлээс дараагийнх руу нь явж, эцэс сүүлд нь гуулин ялтаснуудыг олж авах хүртэл нь тусалсан. Мосе 10 удаа оролдсоны эцэст израилчуудыг Египетээс амжилттай гаргасан.

Бид Нифай, Мосе хоёр хоёулаа Их Эзэний зараалд байсан юм бол Их Эзэн яагаад хөндлөнгөөс оролцолгүй, анхны оролдлогоороо амжилт олоход нь туслаагүй юм бол? Тэрээр амжилтад хүрэх оролдлого нь бүтэлгүйтэж, олон саад бэрхшээлтэй учрахыг яагаад тэдэнд болон бидэнд зөвшөөрдөг юм бэ? хэмээн асууж боддог байж болох юм. Энэхүү асуултын олон чухал хариултын заримаас дурдъя.

• Нэгдүгээрт, Их Эзэн “эдгээр бүх зүйл [бидэнд] туршлага суулгах болно, мөн [бидний] сайн сайхны төлөө байх болно” [Сургаал ба Гэрээнүүд 122:7] гэдгийг мэддэг.

• Хоёрдугаарт, “сайн сайхны үнэ цэнийг мэдэж болохын тулд [бидэнд] гашууныг амсуулдаг” [Мосе 6:55].

• Гуравдугаарт, “тулалдаан бол ЭЗЭНийх” [1 Самуел 17:47] бөгөөд зөвхөн Түүний ач ивээлээр бид Түүний ажлыг гүйцэлдүүлж, Түүнтэй адилхан болж чадна гэдгийг баталдаг.

• Дөрөвдүгээрт, сөрөг тал болон “зовлонгийн зуухан дотроос” (Исаиа 48:10; 1 Нифай 20:10) л биш бол өөр бусдаар цэвэршүүлэгдэж чадахааргүй Христийн олон зан чанарыг олж авах, хөгжүүлэхэд бидэнд тусалдаг.

(Линн Г.Роббинс, “Дал дахин долоон удаа,” 2018 оны 4-р сарын Ерөнхий чуулган, 24)

Нэмэлт суралцах үйл ажиллагаа

Хичээлийг эхлүүлэх өөр хувилбар

Суралцах саад бэрхшээлийг өөр өөр өнцгөөс харж үнэлэхэд нь суралцагчдад туслахын тулд зам дээр том чулуу зурж эсвэл үзүүлж хичээлээ эхлүүлэх талаар бодож үз. Та дараа нь дараахтай адил асуултуудыг тавьж болно.

• Та энэ чулууг гишгүүр чулуу гэж, аль эсвэл тээг чулуу гэж харж байна уу? Яагаад?

• Энэ чулууг гишгүүр чулуу аль эсвэл тээг чулуу эсэхийг юу тодорхойлдог вэ?

Та дараа нь өсвөр үеийнхэнд суралцах үед нь тулгардаг саад бэрхшээлийн талаар ярилцаж болно. Эдгээр саад бэрхшээлийг хэрхэн гишгүүр чулуу эсвэл тээг чулуу гэж ойлгож болохыг дүгнэхэд суралцагчдыг урь.

Нэмэлт дадлага

Суралцагчдад хэвшмэл сэтгэлгээний бодол санааг өсөж хөгжих сэтгэлгээний санаагаар солих дадлага хийхэд нь туслахын тулд та дараах хүснэгтийг өгч болно. Суралцагчид хамтрагчтайгаа “Хэлэх гээд үз” баганад үг хэллэг бодож олоод бичиж болно. Дараа нь олсон зүйлээ тэд өөр суралцагчидтай хуваалцаж болно.

Ингэж хэлэхийн оронд … гэж хэл.	… гэж хэлэх гэж оролд.
Ингэж хэлэхийн оронд … гэж хэл. “Би үүнийг хийж чадахгүй.”
Ингэж хэлэхийн оронд … гэж хэл. “Би бууж өглөө.”
Ингэж хэлэхийн оронд … гэж хэл. “Би энэ хичээлд ердөө ч сайн биш.”
Ингэж хэлэхийн оронд … гэж хэл. ”Би хэзээ ч найз шигээ ухаалаг болохгүй.”
Ингэж хэлэхийн оронд … гэж хэл. “Би хичээсэн ч хийж чадсангүй.”
Ингэж хэлэхийн оронд … гэж хэл. “Естой хэцүү юм аа.”

Видеоны сонголт

Далын ахлагч Кларк Г.Гилберт цаг хугацаа өнгөрөхийн хэрээр Их Эзэн хэрхэн түүнд тусалсан талаар ийн хуваалцсан. Та byupathway.org дээрх “The Mismeasure of Man”видеог цагийн код 0:21-ээс 3:05 хүртэл үзэж болно.

Ням гаргийн ангийн ерөнхий ерөнхийлөгчийн зөвлөлийн зөвлөх асан Дэвин Г.Дуррант ах эхнэрийнх нь өсөж хөгжих сэтгэлгээ түүнд хэцүү гэж бодсон зүйлээ давахад хэрхэн тусалсан талаар хуваалцсан. Та speeches.byuh.edu дээр байгаа “Choose a Growth Mindset,” видеог цагийн код 30:54-өөс 33:08 хүртэл үзэж болно.