Lesson 199: Paghahanda ng Missionary

Pagbabahagi ng Ebanghelyo Dahil sa Pagmamahal na Tulad ng kay Cristo

Pagmamahal sa Diyos at sa Kapwa

Maraming dahilan kung bakit maaari nating piliing ibahagi ang ebanghelyo ni Jesucristo sa iba. Tumitindi ang hangarin nating ibahagi ang ebanghelyo habang natututuhan nating mahalin ang Diyos at ang mga tao sa paligid natin. Ang lesson na ito ay makatutulong sa mga estudyante na maunawaan kung paano sila mahihikayat ng kanilang pagmamahal sa Ama sa Langit, kay Jesucristo, at sa ibang tao na ibahagi ang ebanghelyo.

Mga Posibleng Aktibidad sa Pag-aaral

Motibasyon na maglingkod

Maaari kang magpakita ng mga larawan ng mga kabataang naglilingkod sa iba’t ibang sitwasyon. Sabihin sa mga estudyante na magbahagi ng maraming posibleng dahilan kung bakit kaya pinili ng mga kabataan sa bawat larawan na maglingkod. (Maaaring kabilang sa mga posibleng dahilan ang tungkulin, pagmamahal, mga inaasahan ng mga magulang, pag-uusig ng budhi, o pakikisalamuha sa iba.)

• Bagama’t maraming dahilan upang paglingkuran ang iba, aling mga dahilan ang pinakamalamang na makatutulong sa atin na maging katulad ng Tagapagligtas? Bakit?

Pagkatapos ay maaari kang magpakita ng larawan ng isang tao na nagbabahagi ng ebanghelyo habang inaanyayahan mo ang mga estudyante na talakayin ang mga sumusunod na tanong:

• Ano ang ilang dahilan kung bakit maaaring piliin ng isang tao na ibahagi ang ebanghelyo sa isang kaibigan o piliing maglingkod bilang full-time missionary?

• Aling mga dahilan ang pinakamalamang na makatutulong sa kanila na maging epektibo sa pagdadala sa iba sa Diyos?

Maaari mong bigyan ng oras ang mga estudyante na pagnilayan at isulat ang kanilang nadarama sa kanilang study journal tungkol sa sumusunod:

• Ano ang nadarama mo tungkol sa pagbabahagi ng ebanghelyo sa iba? Bakit ganoon ang nadarama mo?

• Gusto mo bang maglingkod bilang full-time missionary? Kung oo, ano ang humikayat sa iyo?

Sabihin sa mga estudyante na hingin ang patnubay ng Espiritu Santo sa oras ng lesson habang iniisip nila ang kanilang mga hangarin na ibahagi ang ebanghelyo ni Jesucristo.

Ang mga hangarin ng Diyos

Maaari mong ipaliwanag sa mga estudyante na kapag alam natin kung ano ang naghikayat sa Ama sa Langit at kay Jesucristo na paglingkuran tayo, mas matutularan natin ang Kanilang mga halimbawa.

Upang matulungan ang mga estudyante na maunawaan ito, maaari mong ipakita ang mga sumusunod na reperensya. Sabihin sa bawat estudyante na pumili ng isa o dalawang passage na babasahin at pagninilayan.

Basahin ang isa o dalawa sa mga sumusunod na passage, at alamin ang itinuturo ng mga ito tungkol sa Ama sa Langit at kay Jesucristo:

• Juan 3:16–17

• Juan 15:12–13

• 2 Nephi 26:24

• Doktrina at mga Tipan 18:10–13

• Doktrina at mga Tipan 34:1–3

• Doktrina at mga Tipan 95:1

• Doktrina at mga Tipan 138:1–4

Sabihin sa mga estudyante na lumibot sa silid-aralan at ibahagi sa mga kaklase na pumili ng ibang passage ang natutuhan nila tungkol sa Ama sa Langit at kay Jesucristo.

Kapag tapos nang magbahagi ang mga estudyante, hilingin sa mga boluntaryo na ibuod ang natutuhan nila tungkol sa Ama sa Langit at kay Jesucristo.

Tulungan ang mga estudyante na matukoy na ang Ama sa Langit at si Jesucristo ay nahikayat ng pagmamahal na maglingkod.

Maaaring kailanganin ng mga estudyante ng oras na pag-isipan ang mga sumusunod na tanong bago nila madamang handa na silang sumagot nang malakas. Maaari mo silang bigyan ng oras upang isulat ang kanilang mga sagot sa kanilang study journal bago hilingin sa mga boluntaryo na magbahagi.

• Anong mga karanasan ang nakatulong sa iyo na madama ang pagmamahal ng Ama sa Langit at ni Jesucristo para sa iyo?

• Paano makaiimpluwensya ang pag-unawa sa kung bakit tayo pinaglilingkuran ng Ama sa Langit at ni Jesucristo sa hangarin mong ibahagi sa iba ang ebanghelyo?

Ang pagmamahal ay makapaghihikayat sa atin na ibahagi ang ebanghelyo

Ginagamit sa bahaging ito ng lesson ang mga turo ng Tagapagligtas sa Juan 21 upang tulungan ang mga estudyante na makita na mahihikayat tayo ng pagmamahal na ibahagi ang ebanghelyo.

Ang isang alternatibong paraan upang maisakatuparan ito ay ang pag-aanyaya sa mga magkakapartner na pag-aralan ang bahaging “Pag-ibig sa Kapwa-tao at Pagmamahal,” kabilang ang mga ideya sa “Pag-aaral ng Banal na Kasulatan” sa pahina 145 ng Mangaral ng Aking Ebanghelyo: Gabay sa Pagbabahagi ng Ebanghelyo ni Jesucristo (2023), at alamin kung paano tayo mahihikayat ng pagmamahal na ibahagi ang ebanghelyo.

Hindi nagtagal matapos Ipako sa Krus si Jesucristo, nangisda ang ilan sa Kanyang mga disipulo. Habang nangingisda sila, inanyayahan sila ng isang lalaking nasa dalampasigan na ihagis ang kanilang mga lambat sa kanang bahagi ng kanilang mga bangka. Matapos gawin ito at makahuli ng maraming isda, napagtanto ng mga disipulo na ang lalaki ay ang nabuhay na mag-uling Tagapagligtas. Nang dumating sila sa pampang, pinaglingkuran sila ni Jesus sa pamamagitan ng pagpapakain at pagtuturo sa kanila.

Maaari mong anyayahan ang mga estudyante na hanapin ang paulit-ulit na paanyaya ng Tagapagligtas kay Pedro sa pamamagitan ng sama-samang pagbabasa ng Juan 21:15–17 o panonood ng video na “Feed My Sheep” (5:47), na makikita sa ChurchofJesusChrist.org, mula sa time code na 2:46 hanggang 4:29. (Maaaring makatulong na malaman ng mga estudyante na ang mga salitang mga ito sa talata 15 ay maaaring tumukoy sa lahat ng isdang nahuli ng mga disipulo.)

Feed My Sheep

Jesus shows Himself to His disciples and implores Peter to feed His sheep. John 21:1–22

• Ano ang natutuhan ninyo sa paraan kung paano ninais ni Jesus na ipakita ni Pedro ang kanyang pagmamahal?

Basahin ang sumusunod na pahayag ni Propetang Joseph Smith (1805–44), at alamin kung ano ang idinaragdag nito sa inyong pag-unawa sa mga paanyaya ni Jesus sa Juan 21.

Mapagmahal ang isa sa mga pangunahing katangian ng Diyos, at dapat itong ipakita ng mga taong naghahangad na maging mga anak ng Diyos. Ang isang taong puspos ng pag-ibig ng Diyos, ay hindi kuntentong pamilya lamang niya ang mapagpala, kundi ang buong mundo, sabik na mapagpala ang buong sangkatauhan. (Mga Turo ng mga Pangulo ng Simbahan: Joseph Smith [2007], 387)

• Ano ang pinakamahalaga para sa inyo sa pahayag ni Joseph Smith?

• Ano ang natutuhan ninyo mula sa Juan 21 at sa pahayag ni Joseph Smith na maaaring maghikayat sa inyo na ibahagi ang ebanghelyo o magmisyon?

• Ano sa palagay ninyo ang mga epektibong paraan upang mapalalim ang ating pagmamahal sa Diyos? Upang mapalalim ang pagmamahal natin sa ibang tao?

Pagdaig sa pag-aatubiling ibahagi ang ebanghelyo

Maaaring bumuo ng mga grupo ang mga estudyante upang gawin ang sumusunod na aktibidad. Maaaring makatulong na bigyan ng papel ang bawat grupo.

1. Bilang grupo, gumawa ng sitwasyon kung saan nag-aatubili ang isang binatilyo na maglingkod bilang full-time missionary o magbahagi ng ebanghelyo sa isang kaibigan. Pumili ng isang magsusulat ng sitwasyon sa isang papel. Tiyaking isama ang mga dahilan kung bakit nag-aatubili ang taong nasa sitwasyon.

   Narito ang isang halimbawa ng sitwasyong maaaring gawin ng mga grupo: “Nakinig kamakailan si Antonio ng mensahe sa kumperensya na nanghikayat sa mas maraming kabataan na maghandang maglingkod bilang mga missionary para sa Panginoon. Alam niya na ito ang dapat niyang gawin. Gayunman, nahihirapan siyang makipag-usap sa mga taong hindi niya kilala, at pakiramdam niya ay hindi sapat ang kanyang kaalaman sa mga banal na kasulatan upang turuan ang ibang tao. Nag-aalala siya na hindi siya magiging epektibong missionary.”

   Pagkatapos isulat ng mga grupo ang mga sitwasyong ginawa nila, maaari mong hilingin sa kanila na makipagpalitan ng mga sitwasyon sa ibang grupo bago gawin ang susunod na hakbang.

2. Gamit ang natutuhan at nadama ninyo ngayon, sabihin sa isang tagasulat na isulat ang ibabahagi ng inyong grupo upang matulungan ang taong nasa sitwasyon. Magsama ng mga mungkahi sa kung ano ang magagawa ng tao para madagdagan ang kanyang pagmamahal sa Tagapagligtas at sa kanyang kapwa. Maaari ninyong isama ang isang bagay tungkol sa kung paano makatutulong ang pagdama ng pagmamahal ng Tagapagligtas para mapatindi ang hangarin ng taong ito na maglingkod.

Maaari mong anyayahan ang mga grupo na ibahagi sa klase kung paano sila tumugon sa sitwasyon ng ibang grupo.

Upang tapusin ang lesson, maaari mong bigyan ng oras ang mga estudyante na isulat sa kanilang study journal kung paano makatutulong sa kanila ang pagmamahal sa Diyos at sa kapwa na madaig ang anumang pag-aatubili na maaari nilang madama tungkol sa pagbabahagi ng ebanghelyo ni Jesucristo.

Karagdagang Resources

Ano ang makatutulong sa akin na madaig ang takot na ibahagi ang ebanghelyo?

Ipinaliwanag ni Elder L. Tom Perry (1922–2015) ng Korum ng Labindalawang Apostol:

May ilang miyembro na tila nais ilihim ang pagiging miyembro nila sa Simbahan. May mga dahilan sila. Halimbawa, maaaring naniniwala sila na hindi nila tungkuling ibahagi ang kanilang mga paniniwala. Marahil natatakot silang magkamali o matanong sa isang bagay na hindi nila masasagot. Kung ganito ang iniisip ninyo, may ipapayo ako sa inyo. Alalahanin lamang ang sinabi ni Juan: “Walang takot sa pagibig: kundi ang sakdal na pagibig ay nagpapalayas ng takot” (1 Juan 4:18). Kung mamahalin lang natin ang Diyos at ang ating kapwa, pinangakuan tayo na madaraig natin ang ating takot. …

Ipinapangako ko na kung tutugon kayo sa paanyayang ibahagi ang inyong mga paniniwala at damdamin tungkol sa ipinanumbalik na ebanghelyo ni Jesucristo, laging sasainyo ang diwa ng pag-ibig at katapangan, dahil “ang sakdal na pagibig ay nagpapalayas ng takot” (1 Juan 4:18). (L. Tom Perry, “Ang Sakdal na Pag-ibig ay Nagpapalayas ng Takot,” Liahona, Nob. 2011, 43, 44)

Ano ang kaugnayan ng pagmamahal sa pagbabahagi ng ebanghelyo ni Jesucristo?

Itinuro ni Pangulong Dallin H. Oaks ng Unang Panguluhan:

Dahil sa patotoo natin sa katotohanan at kahalagahan ng ipinanumbalik na ebanghelyo, nauunawaan natin ang kahalagahan ng ibinigay sa atin. Dahil sa pagmamahal natin sa Diyos at sa ating kapwa, natatamo natin ang ating hangaring ibahagi ang dakilang kaloob na iyon sa lahat. …

Ang pinakamahuhusay na missionary, miyembro at full-time ay laging kumikilos dahil sa pagmamahal. (Dallin H. Oaks, “Sharing the Gospel,” Ensign, Nob. 2001, 7, 8)

Itinuro ni Elder Quentin L. Cook ng Korum ng Labindalawang Apostol:

Malaking Pagmamahal para sa mga Anak ng Ating Ama

Itinuro ni Elder Cook ang ginagampanan ng pag-ibig sa kapwa-tao sa pagbabahagi ng ebanghelyo, gawain sa templo at family history, at nakasentro sa tahanan na pagtuturo ng ebanghelyo.

Pagdating sa pagtitipon ng Israel, kailangan nating … lumayo sa mga pakiramdam na ito ay responsibilidad lamang o pagkakonsensya tungo sa damdamin ng pagmamahal at pakikibahagi sa banal na pagsasamahan sa pagbabahagi ng mensahe, paglilingkod, at misyon sa mundo ng Tagapagligtas.

Bilang mga miyembro, maipapakita natin ang ating pagmamahal sa Tagapagligtas at sa ating mga kapatid sa buong mundo sa pamamagitan ng pagbibigay ng mga simpleng paanyaya. (Quentin L. Cook, “Malaking Pagmamahal para sa mga Anak ng Ating Ama,” Liahona, Mayo 2019, 78)

Upang matulungan ang mga estudyante na madama ang kahalagahan ng pagmimisyon nang dahil sa pagmamahal, maaari mong ipanood ang “Face to Face with Elder Rasband, Sister Oscarson, and Brother Owen” (1:20:41) mula sa time code na 33:58 hanggang 35:43.

Face to Face with Elder Rasband, Sister Oscarson and Brother Owen

This worldwide broadcast that featured a discussion with Elder Ronald A. Rasband of the Quorum of the Twelve Apostles; Sister Bonnie L. Oscarson, general Young Women president; and Brother Stephen W. Owen, general Young Men president.

Mga Karagdagang Aktibidad sa Pag-aaral

Alternatibong simula: Ang mabuting Samaritano

Maaari mong simulan ang klase sa pagpapabasa o pagpapasadula sa mga estudyante ng kuwento tungkol sa mabuting Samaritano, na matatagpuan sa Lucas 10:30–37. Maaari mong talakayin kung ano ang maaaring dahilan ng pari o saserdote, Levita, at ng Samaritano para gawin ang ginawa nila. Maaari mong talakayin kung paano nahikayat ng pagmamahal sa Diyos at sa kapwa ang Samaritano kaya niya ginawa iyon. Pagkatapos ay maaaring pagnilayan ng mga estudyante ang kanilang sariling hangarin sa paglilingkod sa iba.

Tumulong nang may pagmamahal

Maaari mong ipanood ang “Tumulong nang may Reach Out with Love” (8:31) at anyayahan ang mga estudyante na tukuyin ang mga dahilan ni Guillermo sa pagtulong kay Steve matapos hilingin sa kanya ng obispo na bisitahin si Steve. Hikayatin ang mga estudyante na pag-ugnayin ang karanasan ni Guillermo at ang hangarin nilang ibahagi ang ebanghelyo sa iba.

Reach Out With Love

When a young man is tasked with inviting his neighbor and peer to church, he learns it takes more than one try to have success.

Pagdaig sa mga panggagambala upang makapagmisyon

Upang matulungan ang mga estudyante na matukoy ang mga panggagambala na maaaring makahadlang sa isang tao na magmisyon, maaari mong ibahagi ang sumusunod na pahayag ni Elder Marcos A. Aidukaitis ng Pitumpu:

Pasiglahin ang Iyong Puso at Magalak

Itinuro ni Elder Aidukaitis sa mga kabataan na sila ay saganang pagpapalain ng Diyos habang dinaraig nila ang kanilang mga takot at pag-aalinlangan at naglilingkod sa Kanya bilang mga full-time missionary.

Bagaman maraming paraan na makatutulong sa pagtitipon, gusto kong pagtuunan ang isang ito: paglilingkod bilang full-time missionary. Para sa marami sa inyo, ibig sabihin nito ay pagiging teaching missionary. Para sa marami pang iba, ibig sabihin nito ay pagiging service missionary. Ngunit tinatangka ng mundo na gambalain ang isipan ng mga kabataan para hindi nila pagtuunan ang pinakasagradong responsibilidad na ito dahil sa takot at kawalan ng katatagan.

Ang iba pang mga paggambalang ito ay maaaring may kinalaman sa pandemya, pag-alis sa magandang trabaho, paghinto sa pag-aaral, o pagkagusto sa isang tao. Bawat isa ay magkakaroon ng kani-kanyang mga hamon. Ang gayong mga paggambala ay maaaring dumating sa eksaktong panahon na magsisimula na ang paglilingkod sa Panginoon, at ang mga pagpili na tila malinaw na gagawin kalaunan ay hindi palaging madali sa sandaling iyon. (Marcos A. Aidukaitis, “Pasiglahin ang Iyong Puso at Magalak,” Liahona, Mayo 2022, 41)

Sabihin sa mga estudyante na maglista ng mga karaniwang panggagambala na maaaring makahadlang sa pagmimisyon. Pagkatapos ay maaaring magbahagi ng mga ideya ang mga estudyante kung paano madaraig ang mga panggagambalang ito.

Alternatibong paraan ng pagtuturo ng salaysay sa Juan 21

Maaari mong ipanood ang video na “Ang Unang Dakilang Utos” (19:48) mula sa time code na 6:52 hanggang 11:26. Sa video, iniuugnay ni Elder Jeffrey R. Holland ng Korum ng Labindalawang Apostol sa kanyang sariling mga salita ang salaysay tungkol sa paanyaya ni Jesus kay Pedro na pakainin ang Kanyang mga tupa.

Ang Unang Dakilang Utos

Dapat tayong mamuhay bilang matatapat na disipulo para ipamalas ang ating pagmamahal sa Panginoon.