Lesson 202: Paghahanda ng Missionary

Ang Aklat ni Mormon ay Kasangkapan sa Pagbabalik-loob

Paggamit ng Aklat ni Mormon upang Maghandang Ibahagi ang Ebanghelyo

Ang Aklat ni Mormon ay kaloob na ibinigay sa atin ng Diyos upang tipunin kay Jesucristo ang Israel sa mga huling araw. Upang magamit ng mga estudyante ang kaloob na ito para makatulong sa pagtitipon ng iba, mahalagang matanggap nila ang sarili nilang patotoo mula sa Diyos na totoo ito. Ang lesson na ito ay makatutulong sa mga estudyante na madama ang kahalagahan ng pagpapalakas ng kanilang mga patotoo tungkol sa Aklat ni Mormon bilang paghahanda na ibahagi ang ebanghelyo ng Tagapagligtas.

Mga Posibleng Aktibidad sa Pag-aaral

Isang kasangkapan upang tipunin ang Israel

Maaaring maglista sa pisara o magpakita ng iba’t ibang kasangkapan na pamilyar sa iyong mga estudyante. Ang ilang halimbawa ay martilyo, screwdriver, toothbrush, stapler, at iba pa. Anyayahan ang mga estudyante na pag-usapan ang mga pakinabang ng mga kasangkapan gamit ang mga tanong na tulad ng sumusunod.

• Kailan ninyo huling ginamit ang isa sa mga kasangkapang ito? Paano ninyo ito ginamit?

• Ano ang mangyayari kung gagamitin ang ilan sa iba pang kasangkapan sa gayon ding paggamit?

  Upang matulungan ang mga estudyante na maunawaan na mas maayos na magagawa ng ilang partikular na kasangkapan ang ilang partikular na gawain, maaaring hilingin sa isang estudyante na gawin ang isang bagay tulad ng pag-stapler ng ilang papel gamit ang screwdriver o toothbrush.

  Tulungan ang mga estudyante na maunawaan na may mga partikular na gamit ang mga kasangkapang ito. Gayundin, naglaan ang Diyos ng mga kasangkapan upang maisakatuparan ang mga partikular na bahagi ng Kanyang gawain, at isa na rito ang pagtitipon ng mga tao kay Jesucristo.

• Ano ang ilang kasangkapan na inilaan ng Ama sa Langit at ni Jesucristo para tipunin ang mga tao sa Kanila?

Maaaring basahin ng mga estudyante ang sumusunod na pahayag para kumpirmahin ang kanilang mga sagot sa naunang tanong o para makakita ng mga karagdagang sagot.

Itinuro ni Elder Shayne M. Bowen ng Pitumpu:

Tinitipon natin ang Israel sa huling pagkakataon at ginagawa ito sa tulong ng Aklat ni Mormon—isang aklat na, kapag sinamahan ng Espiritu ng Panginoon, ay siyang pinakamabisang kasangkapan sa pagbabalik-loob. (Shayne M. Bowen, “Ang Papel na Ginagampanan ng Aklat ni Mormon sa Pagbabalik-loob,” Liahona, Nob. 2018, 83)

• Sa inyong palagay, bakit maaaring maging napakabisang kasangkapan ang Aklat ni Mormon sa pagbabalik-loob at pagtitipon ng mga tao kay Jesucristo?

Makinig nang mabuti habang sumasagot ang mga estudyante, at kung naaangkop, anyayahan silang ibahagi kung bakit ganoon ang nadarama nila.

Kung makatutulong sa mga estudyante na makakita ng halimbawa ng kung paano naging kasangkapan ang Aklat ni Mormon sa pagdadala ng isang tao palapit sa Diyos, maaaring ipanood ang “A Book of Mormon Story” (5:15), na makikita sa ChurchofJesusChrist.org.

Anyayahan ang mga estudyante na basahin ang Moroni 10:3–5 at ang sumusunod na pahayag. Sabihin sa kanila na maghanap ng mahalagang paraan kung paano tayo makapaghahanda na ibahagi ang Aklat ni Mormon sa iba.

Itinuro ni Pangulong Henry B. Eyring ng Unang Panguluhan:

Para malaman natin kung totoo ang Aklat ni Mormon, dapat natin itong basahin at gawin natin ang pasiyang matatagpuan sa Moroni: manalangin para malaman kung ito ay totoo. Kapag nagawa na natin iyan, makapagpapatotoo tayo sa ating mga kaibigan mula sa sarili nating karanasan na magagawa nila ang pasiyang iyan at malalaman ang katotohanang iyon. (Henry B. Eyring, “A Voice of Warning,” Ensign, Nob. 1998, 34)

• Ano ang natutuhan ninyo mula sa pahayag ni Pangulong Eyring at sa Moroni 10:3–5?

Habang ibinabahagi ng mga estudyante ang natutuhan nila, maaari nilang matukoy ang katotohanang tulad ng sumusunod: Ang pagkakaroon ng sarili nating patotoo sa Aklat ni Mormon ay nagbibigay sa atin ng kakayahan na tulungan ang iba na malaman ang katotohanan nito.

Para matulungan ang mga estudyante na isipin ang sarili nilang mga karanasan sa katotohanang ito, maaari mo silang anyayahan na tahimik na suriin ang kanilang mga sagot sa mga sumusunod na pahayag.

Gamit ang isang scale na isa hanggang lima, kung saan ang isa ay “hindi totoo para sa akin” at ang lima ay “napakatotoo para sa akin,” i-rate ang mga sumusunod na pahayag:

• Maipapaliwanag ko sa isang kaibigan kung ano ang Aklat ni Mormon at kung paano nito mailalapit ang mga tao kay Cristo.

• Pinag-aaralan ko ang Aklat ni Mormon sa paraang pinapalalim ang aking personal na pagbabalik-loob kay Jesucristo.

• May mga karanasan ako na nagbibigay-daan sa akin na patotohanan sa iba na ang Aklat ni Mormon ay totoo.

Maaaring anyayahan ang mga estudyante na humingi ng inspirasyon sa kung paano aanyayahan ang kapangyarihan ng Diyos sa kanilang buhay at sa buhay ng iba sa pamamagitan ng Aklat ni Mormon.

Pagpapahalaga sa kaloob ng Diyos na Aklat ni Mormon

Sa isang paghahayag na ibinigay kay Joseph Smith, binigyang-diin ng Panginoon ang kahalagahan ng Aklat ni Mormon sa pamamagitan ng pagbabahagi ng nadarama niya kapag ipinagwawalang-bahala ito ng mga tao.

Basahin ang Doktrina at mga Tipan 84:54–57, at isipin kung paano maaaring maiangkop ang mga talatang ito sa mga miyembro ng Simbahan ng Panginoon na naghahanda na ibahagi ang Kanyang ebanghelyo.

• Ano ang natuklasan ninyo na maaaring maiangkop sa mga nagnanais na ibahagi ang ebanghelyo ng Tagapagligtas?

• Ano ang ilang paraan na maipapakita natin kung gaano kahalaga ang Aklat ni Mormon sa ating buhay?

Personal na kaalaman at patotoo sa Aklat ni Mormon

Ang sumusunod na sitwasyon, o ibang sitwasyon na gagawin mo, ay makatutulong sa mga estudyante na ipahayag ang natutuhan at nadama nila sa lesson. Maaaring basahin ang sitwasyon bilang klase at bigyan ng oras ang mga estudyante upang pag-isipan ang maaaring ibahagi nila kay Annie.

Kadadalo lang ni Annie sa isang klase para sa paghahanda ng missionary. Humingi siya ng mga mungkahi sa mga titser na returned missionary tungkol sa paghahanda na ibahagi ang ebanghelyo. Pinayuhan siya ng parehong titser na palakasin ang kanyang kaalaman at patotoo tungkol sa Aklat ni Mormon. Sa dinami-rami ng maaari nilang isagot, hindi ang pag-aaral ng Aklat ni Mormon ang inaasahang sagot ni Annie.

Anyayahan ang mga estudyante na lumibot sa loob ng silid at sabihin sa kahit dalawang iba pang estudyante kung ano ang maaari nilang ibahagi kay Annie.

Isipin kung paano gumawa ng pagkakataon para magpatotoo ang Espiritu Santo tungkol sa Aklat ni Mormon sa iyong mga estudyante. Maaari mong anyayahan ang mga boluntaryo na ibahagi sa klase ang kanilang mga paboritong passage sa Aklat ni Mormon o ang mga karanasan nila sa pagkakaroon ng patotoo tungkol sa Aklat ni Mormon. Maaari kang magbahagi ng isang passage na nakatulong sa iyo na mas makilala ang Tagapagligtas. Bigyan ng oras ang mga estudyante para maghanda. Kung maraming estudyante ang gustong magbahagi, anyayahan silang gawin ito sa maliliit na grupo para magkaroon ng pagkakataon ang lahat.

Ipamuhay

Maaari mong anyayahan ang mga estudyante na tahimik na sagutin ang sumusunod na tanong sa kanilang study journal.

• Ano ang magagawa mo para mapalalim ang iyong ugnayan kay Jesucristo sa pamamagitan ng Aklat ni Mormon?

  Maaari kang magmungkahi ng ilang opsiyon, tulad ng sumusunod: pagbabasa ng buong Aklat ni Mormon sa isang partikular na yugto ng panahon, paghahanap ng mga talatang maibabahagi sa iba, o paghingi ng patotoo sa Ama sa Langit sa pamamagitan ng Espiritu Santo na ang aklat ay totoo.

  Maaari mo ring ipanood ang video na “The Book of Mormon” (2:10), na makikita sa ChurchofJesusChrist.org. Sa video na ito, ibinahagi nina Elder Jeffrey R. Holland at Quentin L. Cook ng Korum ng Labindalawang Apostol kung paano sila inanyayahan ng kanilang mission president na kilalanin si Cristo sa pamamagitan ng Aklat ni Mormon. Maaaring piliin ng mga estudyante na sundin ang paanyayang iyon.

• Paano kayo maihahanda ng pagsasagawa ng isinulat ninyo upang maibahagi ang Aklat ni Mormon sa buhay sa araw-araw o bilang full-time missionary?

Maaaring makatulong na ibahagi ang iyong patotoo tungkol sa kung paano ka tinulungan ng Aklat ni Mormon na mapalapit kay Jesucristo.

Karagdagang Resources

Paano at bakit ko dapat ibahagi ang Aklat ni Mormon?

Ibinahagi ni Elder Ronald A. Rasband ng Korum ng Labindalawang Apostol:

Inaanyayahan ko kayo, sa araw na ito, na magbigay ng Aklat ni Mormon sa inyong mga kaibigan at kapamilya, sa inyong mga kasamahan sa trabaho, sa inyong soccer coach, o sa tindero sa inyong palengke. Kailangan nila ang mga salita ng Panginoon na matatagpuan sa aklat na ito. Kailangan nila ng mga sagot sa mga tanong tungkol sa pang-araw-araw na buhay at tungkol sa buhay na walang hanggan na darating. Kailangan nilang malaman ang landas ng tipan na nakalatag sa kanilang harapan at ang matibay na pagmamahal ng Panginoon para sa kanila. Naritong lahat iyon sa Aklat ni Mormon.

Kapag inabutan ninyo sila ng Aklat ni Mormon, binubuksan ninyo ang kanilang puso’t isipan sa salita ng Diyos. Hindi ninyo kailangang magdala ng nakalimbag na mga kopya ng aklat. Madali ninyo itong maibabahagi mula sa inyong mobile phone sa bahaging mga banal na kasulatan ng Gospel Library app.

Isipin ang lahat ng taong maaaring mapagpala ng ebanghelyo sa kanilang buhay, at pagkatapos ay padalhan sila ng kopya ng Aklat ni Mormon mula sa inyong cell phone. Tandaang isama ang inyong patotoo at kung paano napagpala ng aklat na ito ang inyong buhay. (Ronald A. Rasband, “Sa Araw na Ito,” Liahona, Nob. 2022, 27)

Paano tayo maaakay ng Aklat ni Mormon papunta kay Jesucristo?

Ibinahagi ni Elder Ulisses Soares ng Korum ng Labindalawang Apostol:

Pinag-aralan ko ang Aklat ni Mormon, paunti-unti, habang kinukumpleto ko ang lingguhang mga takdang aralin sa seminary. Naaalala ko, na parang kahapon lamang, na isang magiliw na pakiramdam ang unti-unti kong nadama sa aking kaluluwa at pumuspos sa puso ko, na nililiwanagan ang aking pang-unawa, at nagiging mas lalong nakalulugod, tulad ng inilarawan ni Alma sa kanyang pangangaral ng salita ng Diyos sa kanyang mga tao. Kalaunan ang damdaming iyan ay naging kaalamang nag-ugat sa aking puso at naging pundasyon ng aking patotoo tungkol sa mahahalagang kaganapan at turong matatagpuan sa sagradong aklat na ito.

Sa pamamagitan ng mga ito at ng iba pang walang-katumbas na personal na mga karanasan, tunay na naging saligang bato ang Aklat ni Mormon na nagpapaibayo sa aking pananampalataya kay Jesucristo at sa aking patotoo sa doktrina ng Kanyang ebanghelyo. Naging isa ito sa mga haliging nagpapatotoo sa akin sa banal na nagbabayad-salang sakripisyo ni Cristo. Naging kalasag ito sa buong buhay ko laban sa mga pagtatangka ng kaaway na pahinain ang aking pananampalataya at udyukan akong huwag maniwala at pinalalakas nito ang loob ko na ipahayag sa mundo ang aking patotoo tungkol sa Tagapagligtas. (Ulisses Soares, “Ang Paglabas ng Aklat ni Mormon,” Liahona, Mayo 2020, 34)

Mga Karagdagang Aktibidad sa Pag-aaral

Pagtulong sa iba na lumapit kay Jesucristo sa pamamagitan ng Aklat ni Mormon

Maaaring mahirapan ang mga estudyante na ibahagi ang ebanghelyo sa iba. Maaaring makatulong na ipanood ang sumusunod na video tungkol sa isang binatilyong nagbahagi ng Aklat ni Mormon sa isang kaibigan. Bilang alternatibo, maaaring ikuwento ng mga estudyante ang mga pagkakataong ibinahagi nila ang Aklat ni Mormon sa isang taong pinagpala kalaunan dahil sa pagbabasa nito.

Maaaring talakayin ng mga estudyante kung bakit ang pagbabahagi ng Aklat ni Mormon ay magandang paraan para talakayin ang ebanghelyo sa isang tao.

Maaari mong ipakita sa mga estudyante ang iba’t ibang paraan para ibahagi ang Aklat ni Mormon sa elektronikong paraan. Magagawa nila ito sa Gospel Library app sa pamamagitan ng pagbubukas ng tab ng mga banal na kasulatan at pag-tap sa “Share” o “Share Now” sa itaas ng page. O maaari nilang i-share ang Book of Mormon app. Ibinibigay ng dalawang opsiyong ito ang Aklat ni Mormon sa mahigit 100 wika nang libre. Ang sumusunod na website ay may mga tagubilin para sa pag-download ng app at may video upang matulungan ang mga estudyante na malaman kung paano ito i-share:

I-share ang Book of Mormon App

Isadula ang pagbabahagi ng Aklat ni Mormon

Makatutulong na bigyan ng pagkakataon ang mga estudyante na ibahagi ang Aklat ni Mormon sa isang tagpo na parang mga missionary sila. Maaaring magsadula ang mga estudyante nang magkakapartner. Maaaring magsalitan ang bawat kapartner sa pagsasagawa ng sumusunod na para bang nakikipag-usap sila sa isang kaibigan na iba ang relihiyon:

• Ipaliwanag kung ano ang Aklat ni Mormon.

• Anyayahan ang inyong kaibigan na basahin ito.

• Sabihin sa inyong kaibigan kung bakit gusto ninyong basahin nila ito.

Maaaring makatulong sa mga estudyante na basahin at sundin ang mga mungkahi para sa pagbabahagi ng Aklat ni Mormon na matatagpuan sa ilalim ng “Mga Tulong sa Pagtuturo” sa pahina 42 ng Mangaral ng Aking Ebanghelyo: Gabay sa Paglilingkod ng Misyonero (2023).

Pambungad sa Aklat ni Mormon. “Pagsunod sa mga tuntunin nito”

Maaaring ipabasa sa mga estudyante ang ikaanim na talata ng pambungad sa Aklat ni Mormon. Makatutulong ito sa kanila na makakita ng mahalagang paraan para maanyayahan ang mga pagpapala ng Aklat ni Mormon sa kanilang buhay. Hilingin sa kanila na alamin ang ibinigay na pangako. Maaaring makatulong ang mga sumusunod na tanong sa talakayan:

• Bukod sa pagbabasa ng Aklat ni Mormon, ano ang kailangan nating gawin para mas mapalapit sa Diyos?

• Kailan kayo kumilos ayon sa isang bagay na natutuhan ninyo mula sa Aklat ni Mormon?

Pinatutunayan ng Aklat ni Mormon ang sarili nito

Upang matulungan ang mga estudyante na mas maunawaan ang kapangyarihan ng Aklat ni Mormon na ituon ang mga tao sa Ama sa Langit at kay Jesucristo, maaari ninyong panoorin ang sumusunod na video. Ipinapakita nito ang mga taong may iba’t ibang relihiyon sa buong mundo na nagbabasa ng isang pahina ng Aklat ni Mormon at inaalam kung paano ito nagpapatotoo tungkol sa Diyos.