Lesson 201: Paghahanda ng Missionary

Pagpili na Magmisyon

Mga Pagpapala ng Paglilingkod Bilang Missionary

Ang isang paraan kung paano pinagpapala ng Ama sa Langit ang Kanyang mga anak ay sa pamamagitan ng gawaing misyonero. Pinagpapala Niya ang mga missionary sa kanilang paglilingkod at pagtuturo sa mga tao sa kanilang komunidad at sa buong mundo. Pinagpapala rin Niya ang mga tumatanggap ng mensahe ng ebanghelyo at paglilingkod na ibinibigay ng mga missionary. Ang lesson na ito ay makatutulong sa mga estudyante na makadama ng hangaring paglingkuran ang Panginoon bilang Kanyang mga missionary.

Mga Posibleng Aktibidad sa Pag-aaral

Ang ating responsibilidad na maglingkod bilang mga missionary

Maaari mong ipaliwanag na sa lesson na ito tungkol sa gawaing misyonero, makikipagtulungan ang mga estudyante sa isang kompanyon. Ang isang paraan upang makabuo ng mga magkompanyon ay ang paghahanda ng basket na may mga halimbawang mission assignment na nakasulat sa mga piraso ng papel. Maaaring kabilang dito ang mga lugar kung saan maaaring naka-assign ang mga missionary na magturo, tulad ng Guatemala o Hungary. Maaari din nilang isama ang mga posibleng gawain ng service mission, tulad ng mga temple ordinance worker o sa isang lokal na food bank. Tiyaking may dalawang kopya ng bawat assignment sa basket. Sabihin sa bawat estudyante na bumunot ng isang piraso ng papel mula sa basket at pagkatapos ay umupo sa tabi ng kaklase na nakabunot ng parehong assignment.

Bigyan ang bawat magkompanyon ng kopya ng sumusunod na pahayag at ipakita ang tatlong tagubilin na kasunod nito.

Muling ipinagtibay ni Pangulong Russell M. Nelson ang tawag ng Panginoon na maglingkod bilang mga missionary:

Ngayon, muli kong pinagtitibay nang husto na hinihiling ng Panginoon sa bawat karapat-dapat at may kakayahang binatilyo na maghanda para sa at maglingkod sa misyon. Para sa mga lalaking Banal sa mga Huling araw, ang paglilingkod sa misyon ay isang responsibilidad ng priesthood. Kayong mga kalalakihan ay inireserba para sa panahong ito na nagaganap ang ipinangakong pagtitipon ng Israel. Kapag naglilingkod kayo sa misyon, may ginagampanan kayong malaking papel sa walang-katulad na panahong ito!

Para sa inyo na bata pa at may kakayahang mga sister, ang misyon ay isa ring maganda, ngunit opsyonal, na oportunidad. Mahal namin ang mga sister missionary at buong-puso namin silang tinatanggap. Ang iniaambag ninyo sa gawaing ito ay kahanga-hanga! Ipagdasal na malaman kung nais ng Panginoon na magmisyon kayo, at sasagot ang Espiritu Santo sa inyong puso’t isipan. (Russell M. Nelson, “Pangangaral ng Ebanghelyo ng Kapayapaan,” Liahona, Mayo 2022, 6)

1. Basahin ang pahayag kasama ang inyong kompanyon.

2. Talakayin kung ano ang tumimo sa inyo mula sa pahayag.

3. Maghandang ibahagi sa klase ang inyong mga ideya.

Anyayahan ang ilang magkompanyon na ibahagi ang kanilang mga ideya sa klase. Kung may mga tanong ang mga estudyante tungkol sa pahayag, maaari mo silang tulungan na hanapin ang mga sagot o talakayin ang kanilang mga tanong sa Panginoon, sa kanilang mga magulang, o sa mga lider ng Simbahan. Tiyaking nauunawaan ng mga estudyante ang mga inaasahan ng Panginoon sa mga binatilyo at dalagita tungkol sa paglilingkod bilang missionary.

Personal na pagninilay

Ipakita ang sumusunod na pahayag at mga tanong at anyayahan ang mga estudyante na pagnilayan ang kanilang personal na nadarama tungkol sa paglilingkod bilang missionary. Ang pagbibigay ng oras sa mga estudyante na pag-isipan at sagutin ang mga tanong ay maaaring mag-anyaya sa Espiritu Santo at maghanda sa kanilang isipan at puso na maging inspirado habang nag-aaral sila.

Itinuro ni Pangulong Russell M. Nelson:

Mahal na mga kaibigang kabataan, bawat isa sa inyo ay mahalaga sa Panginoon. Inireserba na Niya kayo sa panahong ito para tumulong na tipunin ang Israel. Ang desisyon ninyong magmisyon, proselyting man ito o service mission, ay magpapala sa inyo at sa maraming iba pa. (Russell M. Nelson, “Pangangaral ng Ebanghelyo ng Kapayapaan,” Liahona, Mayo 2022, 6–7)

Pag-isipan at isulat sa inyong study journal ang inyong mga sagot sa mga sumusunod na tanong:

• Aling mga bahagi ng pahayag na ito ang pinakamakabuluhan sa iyo? Bakit?

• Ano ang itinuro ni Pangulong Nelson na maaaring makaapekto sa iyong hangaring magmisyon?

Anyayahan ang ilang boluntaryo na ibahagi ang kanilang mga sagot. Habang nagbabahagi ang mga estudyante, maaaring ipahayag ng ilan ang sumusunod na katotohanan sa sarili nilang mga salita: Pagpapalain tayo ng Panginoon at ang marami pang iba kapag pinili nating maglingkod bilang Kanyang mga missionary. Maaari mong isulat sa pisara ang katotohanang ito. Hikayatin ang mga estudyante na humingi ng tulong sa Espiritu Santo upang malaman kung paano nais ng Ama sa Langit na ipamuhay nila ang katotohanang ito.

Kung sa palagay mo ay makikinabang ang mga estudyante na matutuhan ang iba pa tungkol sa service mission, maaari mong gamitin ang materyal na makukuha sa “Mga Karagdagang Aktibidad sa Pag-aaral.”

Mga pagpapala ng paglilingkod bilang missionary

Ang sumusunod na aktibidad ay makatutulong sa mga estudyante na mas maunawaan ang mga pagpapalang maibibigay ng Panginoon sa kanila at sa iba kapag pinili nilang magmisyon.

Bilang magkompanyon, saliksikin ang mga banal na kasulatan, mensahe sa pangkalahatang kumperensya, himno, o Gospel Library, at hanapin ang mga sumusunod:

1. Mga pagpapalang maibibigay ng Panginoon sa iba sa pamamagitan ng ating mga pagsisikap bilang missionary.

2. Mga pagpapalang maibibigay sa atin ng Panginoon sa pagmimisyon.

Kung sa palagay mo ay kailangan ng mga estudyante ng mas tiyak na patnubay, maaari mong bigyan ang bawat magkompanyon ng handout na may pamagat na “Mga Pagpapala ng Paglilingkod bilang Missionary.”

Mga Pagpapala ng Paglilingkod Bilang Missionary

Pag-aralan ang mga sumusunod na scripture passage at pahayag. Sa iyong pag-aaral, hanapin ang sumusunod:

1. Mga pagpapalang maibibigay ng Panginoon sa iba sa pamamagitan ng ating mga pagsisikap bilang missionary.

2. Mga pagpapalang maibibigay sa atin ng Panginoon sa pagmimisyon.

• Doktrina at mga Tipan 4:1–4

• Doktrina at mga Tipan 15:6

• Doktrina at mga Tipan 18:14–16

• Doktrina at mga Tipan 31:3–8

• Doktrina at mga Tipan 50:22

Itinuro ni Pangulong Russell M. Nelson:

Mga kapatid, ang ebanghelyo ni Jesucristo ay kailangan ngayon nang higit kailanman. Ang pagtatalo ay lumalabag sa lahat ng kinakatawan at itinuro ng Tagapagligtas. Mahal ko ang Panginoong Jesucristo at pinatototohanan ko na ang Kanyang ebanghelyo ang tanging pangmatagalang solusyon para sa kapayapaan. Ang Kanyang ebanghelyo ay isang ebanghelyo ng kapayapaan [tingnan sa Doktrina at mga Tipan 27:16]. …

Lahat ng missionary ay nagtuturo at nagpapatotoo tungkol sa Tagapagligtas. Kailangan ngayon ang liwanag ni Jesucristo nang higit kailanman dahil sa espirituwal na kadiliman sa mundo. Lahat ay nararapat na magkaroon ng pagkakataong malaman ang tungkol sa ipinanumbaik na ebanghelyo ni Jesucristo. Bawat tao ay nararapat na malaman kung saan siya makasusumpong ng pag-asa at kapayapaan na “hindi maabot ng pag-iisip” [Filipos 4:7]. (Russell M. Nelson, “Pangangaral ng Ebanghelyo ng Kapayapaan,” Liahona, Mayo 2022, 6–7)

Itinuro ni Elder Marcus B. Nash ng Pitumpu:

Ang pagbabahagi ng ebanghelyo ay nagdudulot ng kagalakan at pag-asa sa mga kaluluwa ng nagbibigay at tumatanggap. Tunay ngang, “anong laki ng inyong kagalakan” [Doktrina at mga Tipan 18:15] kapag ibinabahagi ninyo ang ebanghelyo! Ang pagbabahagi ng ebanghelyo ay nagdaragdag sa taglay na kagalakan at pag-asa. …

Kapag pinili nating hindi ibahagi ang liwanag ng ebanghelyo, napupunta tayo sa kadiliman, kung saan madali tayong matukso. Higit pa riyan, ang kabaligtaran nito ay totoo: kapag pinili nating ibahagi ang liwanag ng ebanghelyo, mas ganap na nalalapit tayo sa liwanag na iyon at sa proteksyong ibinibigay nito laban sa tukso. Napakalaking pagpapala ito sa mundo ngayon! (Marcus B. Nash, “Itaas Ninyo ang Inyong Ilawan,” Liahona, Nob. 2021, 71–72)

Kapag natapos nang mag-aral ang mga estudyante, anyayahan ang bawat magkompanyon na magsulat sa paligid ng katotohanan sa pisara ng kahit isang pagpapala ng gawaing misyonero. Pagkatapos maisulat ang maraming pagpapala, maaari kang magtanong ng tulad ng sumusunod upang mabigyan ng pagkakataon ang mga estudyante na ibahagi o patotohanan ang natutuhan nila:

• Aling mga pagpapala sa pisara ang natanggap ninyo o ng ibang kakilala ninyo sa pamamagitan ng gawaing misyonero?

• Ano ang isang banal na kasulatan o pahayag na nabasa ninyo ang nakatulong sa pagpapatindi ng hangarin ninyong maglingkod sa Panginoon bilang missionary?

• Sa palagay ninyo, paano makaiimpluwensya ang gawaing misyonero sa inyong ugnayan sa Panginoon? Bakit?

Maaari mong ibahagi ang mga naging karanasan mo o ang iyong patotoo tungkol sa gawaing misyonero. Maaari mo ring ipanood ang video na “Value of a Full-Time Mission” (5:22), na makikita sa ChurchofJesusChrist.org, at anyayahan ang mga estudyante na maghanap ng mga dahilan kung bakit pipiliin ng isang tao na magmisyon.

Maaari mong sabihin sa mga estudyante na balikan ang pahayag ni Pangulong Nelson mula sa simula ng lesson. Anyayahan ang mga binatilyo na patuloy na manalangin na dagdagan ng Panginoon ang kanilang hangarin at kakayahang maglingkod sa full-time mission. Sabihin sa mga dalagita na manalangin upang malaman kung nais ng Panginoon na maglingkod sila sa full-time mission.

Karagdagang Resources

Paano ako pagpapalain ng Diyos sa pagmimisyon?

Ibinahagi ni Elder Marcos A. Aidukaitis ng Pitumpu:

Kabilang sa maraming saganang pagpapalang ibinigay Niya sa akin sa paglilingkod sa Kanya bilang full-time missionary ay ang mas malaking pananampalataya kay Jesucristo at sa Kanyang Pagbabayad-sala at mas matibay na kaalaman at patotoo sa Kanyang mga turo, upang hindi ako madaling matangay ng “bawat hangin ng aral” (Efeso 4:14). Nawala ang takot ko sa pagtuturo. Naragdagan ang kakayahan kong harapin ang mga hamon nang may magandang pananaw. Sa pag-obserba sa mga indibiduwal at pamilyang nakilala o tinuruan ko bilang missionary, nalaman ko na ang mga turo ng Diyos ay totoo nang sabihin Niya na ang kasalanan ay hindi nagdudulot ng tunay na kaligayahan at ang pagsunod sa mga kautusan ng Diyos ay tumutulong sa atin na umunlad kapwa sa temporal at sa espirituwal (tingnan sa Mosias 2:41; Alma 41:10). At natutuhan ko mismo sa aking sarili na ang Diyos ay isang Diyos ng mga himala (tingnan sa Mormon 9).

Lahat ng bagay na ito ay nakatulong sa paghahanda ko sa buhay kalaunan, kabilang na ang posibleng pag-aasawa at pagiging magulang, paglilingkod sa Simbahan, at pagtatrabaho at pamumuhay sa komunidad. …

Ganap na hinubog ng misyon ang aking buhay. Nalaman ko na sulit ang pagsisikap na magtiwala sa Diyos, magtiwala sa Kanyang karunungan at awa at sa Kanyang mga pangako. Siya ang ating Ama, at walang anumang pag-aalinlangan na nais Niya ang pinakamabuti para sa atin. (Marcos A. Aidukaitis, “Pasiglahin ang Iyong Puso at Magalak,” Liahona, Mayo 2022, 42–43)

Bakit mahalagang responsibilidad ang pagmimisyon?

Itinuro ni Elder David A. Bednar ng Korum ng Labindalawang Apostol:

Ang pangangaral ng ebanghelyo ay hindi pansamantalang obligasyon ng priesthood. Hindi lang ito basta isang aktibidad na panandalian lang nating sinasalihan o assignment na kailangan nating kumpletuhin bilang mga miyembro ng Ang Simbahan ni Jesucristo ng mga Banal sa mga Huling Araw. Sa halip, ang gawaing misyonero ay pagpapamalas ng ating espirituwal na identidad at pamana. Tayo’y inordena noon pa sa buhay bago ang buhay sa lupa at isinilang sa mortalidad para tuparin ang tipan at pangako ng Diyos na ginawa kay Abraham. Narito tayo ngayon sa lupa para gampanang mabuti ang ating tungkulin sa priesthood at ipangaral ang ebanghelyo. Iyan tayo, at iyan ang dahilan kung bakit narito tayo—ngayon at sa tuwina. (David A. Bednar, “Pagiging Misyonero,” Liahona, Nob. 2005, 47)

Mga Karagdagang Aktibidad sa Pag-aaral

Tawag na magmisyon o mission call

Sabihin sa mga estudyante na ibahagi kung nakakita na sila ng isang tao na nagbukas ng liham tungkol sa mission call.

• Ano ang pakiramdam na maranasan iyon?

• Ano ang naaalala mo mula sa liham tungkol sa mission call bukod pa kung saan naka-assign ang tao at ang wikang gagamitin niya?

Ipaliwanag na kung minsan ay maaaring makaligtaan natin ang mga ipinangakong pagpapalang nakasaad sa mission call. Bigyan ang mga estudyante ng kopya ng isang kamakailang liham tungkol sa mission call. Sabihin sa kanila na hanapin ang mga pagpapalang ipinapangako ng Panginoon sa mga tinawag na maglingkod sa pamamagitan ng Kanyang propeta.

Mga service mission

Ipaliwanag na ang mga karapat-dapat na binatilyo at dalagitang hindi maaari sa proselyting mission dahil sa mga pisikal, mental, emosyonal, o iba pang dahilan ay maaaring tawagin sa isang service mission. Maraming service missionary ang maaaring maglingkod sa Panginoon sa maraming tungkulin, kabilang ang mga organisasyong pangkawanggawa, sa pamamagitan ng mga operasyon ng Simbahan, at sa mga pagkakataong ibinigay ng stake. Upang makakita ng halimbawa, maaari ninyong panoorin ang “Service Missions: Elder Quade’s Story” (5:19), na makikita sa ChurchofJesusChrist.org.

Anyayahan ang mga estudyante na basahin ang sumusunod mula sa mga tuntunin na ibinigay para sa mga service missionary, at maghanap ng mga kabatiran tungkol sa mga service mission:

Ibinigay ng Unang Panguluhan ang layunin ng service missionary upang magabayan ka sa iyong sagradong tawag na maglingkod:

• “Ang ating layunin ay tulungan ang iba na lumapit kay Cristo sa pamamagitan ng paglilingkod sa kanila na tulad ng gagawin ng Tagapagligtas. Tayo ay boluntaryong naglilingkod sa mga organisasyong pangkawanggawa, sa mga gawain sa Simbahan, at sa komunidad. Tayo ay maglilingkod sa Kanyang pangalan sa bawat isa, tulad ng ginawa Niya, na nagpapahayag ng Kanyang mapagmahal na kabaitan.”

Tandaan na ang paraan ng paglilingkod mo sa Tagapagligtas ay mas mahalaga kaysa kung saan ka naglilingkod o kung ano ang ginagawa mo. Ipinahayag ni Pangulong Russell M. Nelson: “Sa buong buhay na paglilingkod sa Simbahan, nalaman ko na talagang hindi mahalaga kung saan tayo naglilingkod. Ang mahalaga sa Panginoon ay kung paano tayo naglilingkod” (“Paglilingkod nang may Kapangyarihan at Awtoridad ng Diyos,” Liahona, Mayo 2018, 68). Ang iyong paglilingkod ay para sa Panginoon, at ikaw ay inaanyayahang maglingkod na tulad Niya! (Mga Pamantayan ng Missionary para sa mga Disipulo ni Jesucristo—Mga Service Mission, 1.3)

• Ano ang nakaantig sa inyo?

• Ano ang mga nalaman ninyo tungkol sa pagkatawan kay Jesucristo bilang isang missionary?

• Paano mapalalawak ng impormasyong ito ang ating pananaw sa gawaing misyonero?

Para sa karagdagang impormasyon, maaari mong anyayahan ang mga estudyante na hanapin ang mga detalye na makikita sa ChurchofJesusChrist.org/service-missionary o sa Gospel Library app.