Lesson 203: Paghahanda ng Missionary

Kasigasigan sa Gawaing Misyonero

Paghahanda na Maging Masigasig na Missionary

Ibinigay sa atin ni Jesucristo ang perpektong halimbawa ng pagiging masigasig na dapat nating sikaping tularan kapag naglingkod tayo sa iba. Ang lesson na ito ay makatutulong sa mga estudyante na hingin ang tulong ng Panginoon para maging mas masigasig sa kanilang buhay at sa kanilang paghahanda na maglingkod bilang Kanyang mga missionary.

Mga Posibleng Aktibidad sa Pag-aaral

Ikaapat na palapag, pinakadulong pinto

Maaari mong simulan ang lesson sa pamamagitan ng pagtulong sa mga estudyante na pagnilayan ang kahalagahan ng kasigasigan sa gawaing misyonero. Maaari mong ipakita ang sumusunod na larawan at ibahagi ang salaysay sa ibaba. O maaari mong ipanood ang video na “Ikaapat na Palapag, Pinakadulong Pinto,” na makikita sa ChurchofJesusChrist.org, mula sa time code na 14:17 hanggang 17:27. Maaari mong i-pause ang video sa time code na 16:03 para pag-isipan ng mga estudyante kung paano sila maaaring tumugon sa puntong ito. Pagkatapos ay ipanood ang natitirang bahagi ng video.

Ibinahagi ni Elder Dieter F. Uchtdorf ng Korum ng Labindalawang Apostol ang sumusunod na karanasan ng mga missionary sa Europa na nahikayat na ibahagi ang ebanghelyo sa mga residente ng gusali ng apartment na may apat na palapag.

Nagsimula sila sa unang palapag at kumatok sa bawat pinto, at inilahad ang nakapagliligtas na mensahe nila tungkol kay Jesucristo at sa Panunumbalik ng Kanyang Simbahan.

Walang gustong makinig sa kanila sa unang palapag. …

… Kumatok sila sa bawat pinto sa ikalawang palapag.

Muli, walang gustong makinig.

Gayon din sa ikatlong palapag. (Dieter F. Uchtdorf, “Ikaapat na Palapag, Pinakadulong Pinto,” Liahona, Nob. 2016, 17)

• Ano kaya ang mga iniisip ng mga missionary na ito sa puntong ito?

Nagpatuloy si Elder Uchtdorf:

Gayon din sa ikaapat—hanggang sa kumatok sila sa pinakadulong pinto ng ikaapat na palapag.

Nang bumukas ang pintong iyon, isang batang babae ang ngumiti sa kanila at pinaghintay sila habang kausap nito ang kanyang ina. …

… Itinuro ng mga missionary ang kanilang mensahe at binigyan ng isang aklat ang ina para basahin—ang Aklat ni Mormon.

Nang makaalis na sila, nagpasiya ang ina na babasahin niya ang kahit ilang pahina lang nito.

Tinapos niya ang buong aklat sa loob ng ilang araw.

Hindi nagtagal, ang mabait na pamilyang ito na iisa ang magulang ay nabinyagan. (Dieter F. Uchtdorf, “Ikaapat na Palapag, Pinakadulong Pinto,” Liahona, Nob. 2016, 17–18)

• Anong mga katangiang tulad ng kay Cristo ang natukoy ninyo sa mga missionary na ito?

Mga katangiang tulad ng kay Cristo sa mga missionary

Maaari mong atasan ang kalahati ng klase na basahin ang mga talata sa ibaba sa bahagi 4 ng Doktrina at mga Tipan at ang kalahati ng klase na basahin ang mga talata sa bahagi 75. Pagkatapos magbasa, maaaring ibahagi ng mga estudyante ang kanilang mga sagot sa mga tanong sa ibaba sa isang taong nagbasa ng ibang reperensya.

Bilang alternatibo, maaari mong anyayahan ang mga magkapartner na pag-aralan ang bahaging “Kasigasigan,” kabilang ang mga ideya sa “Pag-aaral ng Banal na Kasulatan,“ sa pahina 151–52 ng Mangaral ng Aking Ebanghelyo: Gabay sa Pagbabahagi ng Ebanghelyo ni Jesucristo (2023).

Basahin ang Doktrina at mga Tipan 4:2–6; 75:2–5, 29, at hanapin ang mga salita at parirala na ginamit ng Panginoon upang ilarawan ang mga taong nagnanais na maglingkod sa Kanya, kabilang ang Kanyang mga missionary.

• Ano ang inaasahan ng Tagapagligtas sa mga nagnanais na maglingkod sa Kanya bilang full-time missionary? Bakit?

• Paano makatutulong sa atin ang mga katangian at paggawa na ito sa mahihirap na sitwasyong maaari nating kaharapin?

Sa mga katotohanang ibinabahagi ng mga estudyante, maaari nilang matukoy na inaasahan ng Panginoon na masigasig na gagawa ang Kanyang mga missionary sa pagbabahagi ng Kanyang ebanghelyo.

Ano ang kasigasigan?

Isulat sa pisara ang sumusunod na pahiwatig, at anyayahan ang mga estudyante na isulat kung paano nila ito kukumpletuhin.

Ang kasigasigan ay …

Kung kailangan ng mga estudyante ng tulong sa pagbibigay-kahulugan sa kasigasigan, maaari mong ibahagi na ang isang posibleng kahulugan ay “patuloy at taimtim na pagsisikap” (Mangaral ng Aking Ebanghelyo: Gabay sa Pagbabahagi ng Ebanghelyo ni Jesucristo [2023], 151).

• Ano ang ilang sitwasyon na maaaring kaharapin ninyo o ng iba pang kaedad ninyo na nangangailangan ng kasigasigan?

Maaari mong ilista sa pisara ang mga sagot ng mga estudyante. Pagkatapos pagsama-samahin ang ilang ideya mula sa mga estudyante, bigyan sila ng pagkakataong pag-isipan nang mas mabuti kung paano nila ipinapakita ang kasigasigan sa kanilang buhay.

Ang isang paraan para magawa ito ay ipakita ang sumusunod na pagsusuri sa sarili at bigyan ng oras ang mga estudyante para pag-isipan kung paano sila tutugon. Maaari mong ipaliwanag sa mga estudyante na habang ginagawa nila ang pagsusuri sa sarili na ito, matutulungan sila ng Espiritu Santo na matukoy kung ano ang maayos na ginagawa nila at kung paano sila maaaring mas humusay pa. Maaaring makinabang ang mga estudyante sa pagsusulat sa kanilang study journal ng mga naisip nila. (Paalala: Maaari mong piliing ipakitang muli ang mga pahayag na ito sa pagtatapos ng lesson.)

Tahimik na pagnilayan kung gaano ka nailalarawan nang mabuti ng mga sumusunod na pahayag:

• Nagsusumikap ako hanggang sa matagumpay na matapos ang isang gawain, kahit na mahirap ito.

• Nagtatrabaho ako nang mahusay kahit na hindi ako palaging sinusubaybayan.

• Makakaasa ang mga tao sa akin at sa aking pagsisikap na matapos ang isang gawain.

• Natutuwa ako kapag nagsisikap ako.

Maaari mong ipakita ang mga sumusunod na tagubilin at anyayahan ang mga estudyante na magtulungan sa maliliit na grupo para tapusin ang aktibidad. Kapag natapos na ng mga grupo ang aktibidad, anyayahan sila na ibahagi sa iba pang grupo ang natutuhan nila.

1. Maghanap ng scripture reference mula sa banal na kasulatan o pahayag ng propeta na nagpapakita ng kahalagahan ng pagiging masigasig.

2. Talakayin kung paano naging halimbawa si Jesucristo ng pagiging masigasig.

3. Magbahagi ng isang karanasan nang mapagpala kayo o ang isang taong kilala ninyo dahil sa pagiging masigasig.

4. Talakayin kung bakit sa palagay ninyo ay mahalagang maging masigasig ang mga missionary.

5. Talakayin ang iba pang aspeto sa inyong buhay kung saan maaaring maging mahalaga ang pagiging masigasig.

Makakatulong ang Espiritu Santo na maitimo nang malalim ang mga katotohanan sa puso ng mga estudyante at maihanda sila na ipamuhay ang mga katotohanang iyon. Ang isang paraan na matutulungan mo ang mga estudyante na anyayahan ang Espiritu Santo ay magbigay ng mga pagkakataon para makita nila kung paano nagpakita ng kasigasigan ang Tagapagligtas at ang iba. Para sa mga halimbawa ng kung paano nagpakita ng kasigasigan ang Tagapagligtas, maaaring basahin ng mga estudyante ang Doktrina at mga Tipan 19:16–19 o Lucas 22:39–44. Para sa halimbawa ng iba pang tao na nagpapakita ng kasigasigan, maaaring ipanood ang “Preparation of Gordon B. Hinckley: Forget Yourself and Go to Work” (2:03), na makikita sa ChurchofJesusChrist.org.

Mga pagpapala sa pagiging masigasig

Ipaalala sa mga estudyante ang salaysay ni Elder Dieter F. Uchtdorf tungkol sa dalawang missionary sa Europa na kumatok sa pinakahuling pintuan sa ikaapat na palapag. Ipaliwanag na napagpala si Elder Uchtdorf ng kanilang masigasig na pagsisikap. Maaari mong ipakita ang sumusunod na larawan ng mga missionary at ng pamilyang nakatira sa apartment sa pinakahuling pinto sa ikaapat na palapag. Ipaliwanag na isa sa dalawang batang babae ay si Harriet, ang asawa ni Elder Uchtdorf.

Ibinahagi ni Elder Dieter F. Uchtdorf ang kanyang damdamin tungkol sa dalawang missionary na ito:

Madalas akong magpasalamat para sa dalawang missionary na hindi tumigil sa unang palapag! Madalas akong magpasalamat para sa kanilang pananampalataya at pagsisikap. Madalas akong magpasalamat na nagpatuloy sila—maging hanggang sa ikaapat na palapag, sa pinakadulong pinto. (Dieter F. Uchtdorf, “Ikaapat na Palapag, Pinakadulong Pinto,” Liahona, Nob. 2016, 18)

• Kung may ibabahagi sa ating klase ang mga missionary na iyon tungkol sa pagiging masigasig, ano ang naiisip ninyo na sasabihin nila?

Pagiging masigasig sa aking buhay

Maaari mong ipakita ang mga pahayag tungkol sa pagiging masigasig sa personal na buhay na pinagnilayan ng mga estudyante sa unang bahagi ng lesson. Maaaring madama ng mga estudyante na hinihikayat sila ng Espiritu na mas magtuon sa isang pahayag kaysa sa iba. Anyayahan ang mga estudyante na isipin ang pahayag na iyan habang isinusulat nila sa kanilang study journal ang kanilang mga sagot sa mga sumusunod na tanong.

• Ano ang mga pagbabagong magagawa ko para maging mas masigasig?

• Paano ako mas ihahanda ng pagiging masigasig para maibahagi ang ebanghelyo ni Jesucristo bilang full-time missionary at sa aking buhay sa araw-araw?

• Paano ako tutulungan ng pagiging masigasig na maging higit na katulad ng Tagapagligtas?

Habang isinusulat ng mga estudyante ang kanilang mga sagot, hikayatin silang huwag mag-atubiling magplanong magsagawa ng isang bagay na susubok sa kanila at mangangailangan ng palagiang pagsisikap at pagsusumigasig.

Karagdagang Resources

Bakit kailangan ng masigasig na pagsisikap sa gawaing misyonero?

Ipinaliwanag ni Elder Jeffrey R. Holland ng Korum ng Labindalawang Apostol:

Sinumang gumagawa ng anumang uri ng gawaing misyonero ay magkakaroon ng pagkakataong magtanong, Bakit napakahirap nito? Bakit hindi ito dumadali? Bakit hindi maaaring maging mas mabilis ang ating tagumpay? Bakit kakaunti ang sumasali sa Simbahan? … Bakit hindi na lang magtipon ang mga tao sa bautismuhan? Bakit hindi na lamang pulmonya ang panganib sa gawaing misyonero dahil sa pagkabasa nang buong araw at buong gabi sa bautismuhan?

Magkakaroon kayo ng pagkakataon na itanong ang mga iyon. Pinag-isipan ko nang mabuti ang tungkol dito. Personal kong opinyon ito. Naniniwala ako na hindi madali ang gawaing misyonero dahil pinaghihirapan ang kaligtasan. Hindi kailanman naging madali ang kaligtasan. Tayo ang Simbahan ni Jesucristo, ito ang katotohanan, at Siya ang ating Dakilang Walang Hanggang Pinuno. Paano natin mapaniniwalaang magiging madali para sa atin ito samantalang hindi ito kailanman naging madali para sa Kanya? Palagay ko ay kailangang danasin ng mga missionary at lider ng misyon kahit ilang sandali man lamang ang Getsemani. Kailangang dumanas ng hirap at pasakit ang mga missionary at pinuno ng misyon tulad ng dinanas ng Tagapagligtas patungo sa Kalbaryo. (Jeffrey R. Holland, “Missionary Work and the Atonement,” Ensign, Mar. 2001, 14–15)

Paano ako magiging matagumpay na missionary?

Itinuro ni Pangulong Ezra Taft Benson (1899–1994):

Ang isa sa pinakamagagandang sikreto ng gawaing misyonero ay pagtatrabaho. Kung [nagtatrabaho] ang missionary, mapapasakanya ang Espiritu; kung mapapasakanya ang Espiritu, magtuturo siya sa pamamagitan ng Espiritu; at kung magtuturo siya sa pamamagitan ng Espiritu, maaantig Niya ang mga puso ng mga tao at magagalak siya. … [Magtrabaho, magtrabaho, magtrabaho]—walang makakahalili dito na mas makasisiya, lalo na sa gawaing misyonero. (Mga Turo ng mga Pangulo ng Simbahan: Ezra Taft Benson [2014], 332)

Ano ang ibig sabihin ng maging masigasig na missionary?

Ibinahagi ni Brother Craig B. Ballard ang payo na ibinigay ng kanyang ama na si Pangulong M. Russell Ballard ng Korum ng Labindalawang Apostol, noong siya ay isang batang missionary:

Patuloy na sundin ang mga patakaran, maging masigasig at patuloy na magsikap. Kung maaari ninyong iulat sa Panginoon sa inyong mga panalangin bawat gabi bago kayo matulog na ginawa ninyo ang lahat upang maging masunurin at masigasig at masikap, madarama ninyo ang Kanyang pagmamahal at pagtanggap sa inyong mga pagsisikap. Kapag ginawa ninyo iyan araw-araw para sa kabuuan ng inyong misyon, makikilala at mamahalin ninyo ang inyong Tagapagligtas na hindi pa ninyo kailanman nagawa. (M. Russell Ballard, sa Craig B. Ballard, “What President M. Russell Ballard Taught His Son about Being a ‘Diligent Missionary,’” Church News, Abr. 21, 2021, thechurchnews.com)

Mga Karagdagang Aktibidad sa Pag-aaral

Mga kuwento tungkol sa missionary

Upang matulungan ang mga estudyante na makita kung paano naapektuhan ng pagiging masigasig at matiyaga ang mga missionary sa buong mundo, maaari mong ibahagi ang ilan sa mga sumusunod na kuwento. Maaaring matukoy ng mga estudyante kung paano pinagpala ng pagiging maasigasig at matiyaga ang mga missionary habang isinasagawa nila ang gawain ng Panginoon.

• Ang pagiging masigasig ni Elizabeth McCune ay nakatulong sa desisyon ng Unang Panguluhan noong Marso 11, 1898, na tumawag ng mga sister missionary. Basahin ang “I Could Have Gone into Every House“ (Ago. 24, 2018, history.ChurchofJesusChrist.org), o panoorin ang “This Grand Opportunity: Elizabeth McCune and the First Sister Missionaries.”

• Ibinahagi ni Elder Ulisses Soares ng Korum ng Labindalawang Apostol kung paano nanatiling masigasig ang isang missionary sa gawaing misyonero kahit nalaman niyang pumanaw na ang kanyang kapatid na babae (tingnan sa Ulisses Soares, “Magtiwala sa Diyos nang Walang Pag-aalinlangan,” Liahona, Mayo 2017, 35). Maaari mong ipakita ang sipi mula sa “Magtiwala sa Diyos nang Walang Pag-aalinlangan.”

• Ibinahagi ni Brother M. Joseph Brough, na naglingkod sa Young Men General Presidency, ang natutuhan ng kanyang anak na babae tungkol sa pagiging masigasig at mahihirap na bagay (tingnan sa M. Joseph Brough, “Itaas Mo ang Iyong Ulo at Magsaya,” Liahona, Nob. 2018, 14). Maaari mong panoorin ang sipi mula sa “Itaas Mo ang Iyong Ulo at Magsaya.”

Video

Upang matulungan ang mga estudyante na maunawaan kung paano makatutulong sa kanila ang mga hamon sa buhay ng missionary na maghanda para sa mga hamon sa hinaharap, maaaring ipanood ang “Learning to Face Adversity” (2:37). Ibinahagi nina Elder Jeffrey R. Holland at Quentin L. Cook ng Korum ng Labindalawang Apostol ang kanilang mga saloobin tungkol sa paksang ito.