« មេរៀនទី ២០០—ស្រឡាញ់ ចែកចាយ និងអញ្ជើញ ៖ ការប្រមូលអ្នកដទៃមកឯព្រះយេស៊ូវគ្រីស្ទ » សៀវភៅសិក្សាព្រះគម្ពីរគោលលទ្ធិ និងសេចក្ដីសញ្ញា សម្រាប់គ្រូបង្រៀនថ្នាក់សិក្ខាសាលា ( ឆ្នាំ ២០២៥ )
« ស្រឡាញ់ ចែកចាយ និងអញ្ជើញ » សៀវភៅសិក្សាព្រះគម្ពីរគោលលទ្ធិ និងសេចក្ដីសញ្ញា សម្រាប់គ្រូបង្រៀនថ្នាក់សិក្ខាសាលា
មេរៀនទី ២០០ ៖ ការរៀបចំខ្លួនធ្វើជាអ្នកផ្សព្វផ្សាយសាសនា
ស្រឡាញ់ ចែកចាយ និងអញ្ជើញ
ការប្រមូលអ្នកដទៃមកឯព្រះយេស៊ូវគ្រីស្ទ
ក្នុងនាមជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ វាគឺជាការទទួលខុសត្រូវនៃសេចក្តីសញ្ញារបស់យើងក្នុងការចែកចាយដំណឹងល្អរបស់ព្រះអង្គសង្គ្រោះ « ដល់អស់ចុងផែនដី » ( គោលលទ្ធិ និងសេចក្តីសញ្ញា ១:២៣ ) ។ យើងអាចចូលរួមក្នុងកិច្ចការដ៏អស្ចារ្យនេះដោយការស្រឡាញ់អ្នកដទៃ ការចែកចាយសារលិខិតនៃព្រះយេស៊ូវគ្រីស្ទ និងការអញ្ជើញពួកគេឲ្យចូលរួមជាមួយយើងក្នុងការមករកព្រះអង្គសង្គ្រោះ ។ មេរៀននេះអាចជួយសិស្សបង្កើតផែនការមួយដើម្បីផ្សព្វផ្សាយដំណឹងល្អនៃព្រះយេស៊ូវគ្រីស្ទ ដោយប្រើគោលការណ៍នៃសេចក្តីស្រឡាញ់ ចែកចាយ និងអញ្ជើញ ។
សកម្មភាពរៀនសូត្រដែលអាចមាន
កុំលាក់បាំងពន្លឺនៃដំណឹងល្អរបស់អ្នកឡើយ
ដើម្បីចាប់ផ្តើមថ្នាក់ សូមបង្ហាញសិស្សនូវរូបភាពសត្វមួយក្បាលដែលលាក់បាំងខ្លួនបានយ៉ាងល្អ ។ សូមអញ្ជើញសិស្សឲ្យចែកចាយពីមូលហេតុដែលការលាក់បាំងខ្លួនបែបនេះមានប្រយោជន៍ដល់សត្វនេះ ។
-
តើមនុស្សម្នាក់អាចចង់លាក់បាំងខ្លួនក្នុងស្ថានភាពបែបណា ?
អែលឌើរ ឃ្វីនថិន អិល ឃុក ក្នុងកូរ៉ុមនៃពួកសាវកដប់ពីរនាក់បានចែកចាយអ្វីមួយដែលយើងមិនចង់លាក់បាំងអំពីខ្លួនរបស់យើង ៖
ផ្នែកសំខាន់មួយនៃកិច្ចការផ្សព្វផ្សាយសាសនានេះគឺសម្រាប់សមាជិកម្នាក់ៗដើម្បីធ្វើជាគំរូនៃពន្លឺដ៏ចែងចាំងនៅគ្រប់ទីកន្លែងដែលយើងរស់នៅ ។ យើងមិនអាចលាក់បាំងបានទេ ។ …
ព្រះអម្ចាស់រំពឹងថាអស់អ្នកដែលបានទទួលយកដំណឹងល្អរបស់ទ្រង់នឹងខិតខំជាបន្ទាន់ ដើម្បីធ្វើជាគំរូដ៏ចែងចាំង ដែលនឹងជួយអ្នកដទៃឲ្យមករកព្រះ ។ ការណ៍នេះអនុញ្ញាតឲ្យបងប្អូនប្រុសស្រីរបស់យើងនៅទូទាំងផែនដីរីករាយនឹងពរជ័យ និងពិធីបរិសុទ្ធដ៏អស្ចារ្យនៃដំណឹងល្អដែលបានស្ដារឡើងវិញរបស់ព្រះយេស៊ូវគ្រីស្ទ ហើយ ប្រមូលផ្តុំគ្នាទៅផ្ទះដោយសុវត្ថិភាព ។ ( ឃ្វីនថិន អិល ឃុក « ប្រមូលផ្តុំគ្នាទៅផ្ទះដោយសុវត្ថិភាព » លីអាហូណា ខែឧសភា ឆ្នាំ២០២៣ ទំព័រ២៣ )
-
តើអ្វីដែលមានអត្ថន័យចំពោះអ្នកមកពីសារលិខិតរបស់ អែលឌើរ ឃុក ?
ដើម្បីជួយរៀបចំចិត្ត និងគំនិតរបស់សិស្សសម្រាប់មេរៀននេះ អ្នកអាចអញ្ជើញពួកគេឲ្យចែកចាយរឿងរបស់សមាជិកគ្រួសារ ឬមិត្តភក្តិដែលបានចូលរួមសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ពួកគេក៏អាចចែកចាយដំណើររឿងការប្រែចិត្តជឿរបស់ពួកគេផ្ទាល់ផងដែរ ។ ប្រសិនបើសិស្សជាច្រើនមានដំណើររឿងដែលត្រូវចែកចាយ នោះអ្នកអាចអញ្ជើញពួកគេឲ្យចែកចាយជាមួយដៃគូ ឬជាក្រុមតូចៗ ។
សូមអញ្ជើញសិស្សឲ្យកត់ត្រានៅក្នុងសៀវភៅកំណត់ហេតុការសិក្សារបស់ពួកគេនូវវិធីដែលពួកគេអាចនឹង « លាក់បាំង » និងរបៀបដែលការខិតខំផ្សព្វផ្សាយសាសនាផ្ទាល់ខ្លួនរបស់ពួកគេអាចជា « គំរូនៃពន្លឺដ៏ចែងចាំង » ។
សូមលើកទឹកចិត្តសិស្សឲ្យយាងអញ្ជើញព្រះវិញ្ញាណដោយការអធិស្ឋាន ដើម្បីជួយពួកគេឲ្យដឹងពីរបៀបដែលពួកគេអាចចែកចាយពន្លឺនៃដំណឹងល្អរបស់ព្រះអង្គសង្គ្រោះដោយបើកចំហ ។
ការបង្គាប់ឲ្យធ្វើជាអ្នកផ្សព្វផ្សាយសាសនារបស់ព្រះអង្គសង្គ្រោះ
សូមពិចារណាចែកចាយសេចក្ដីថ្លែងការណ៍ខាងក្រោមដោយអែលឌើរ ឃ្វីនថិន អិល ឃុក ។ សូមអញ្ជើញសិស្សឲ្យរកមើលការប្រឹក្សាអំពីរបៀបចែកចាយដំណឹងល្អរបស់ព្រះយេស៊ូវគ្រីស្ទប្រកបដោយប្រសិទ្ធភាព ។
អែលឌើរ ឃុក បានបង្រៀន ៖
ព្រះអង្គសង្គ្រោះអញ្ជើញយើងដោយព្រះទ័យមេត្តា ឲ្យធ្វើជាព្រះសូរសៀង និងជាព្រះហស្ដរបស់ទ្រង់ ។ សេចក្ដីស្រឡាញ់របស់ព្រះអង្គសង្គ្រោះនឹងជាពន្លឺនាំផ្លូវរបស់យើង ។ ព្រះអង្គសង្រ្គោះបានបង្រៀនពួកសិស្សរបស់ទ្រង់ថា « ដូច្នេះ ចូរទៅបញ្ចុះបញ្ចូលឲ្យមានសិស្សនៅគ្រប់ទាំងសាសន៍ » [ ម៉ាថាយ ២៨:១៩ ] ។ …
ដើម្បីធ្វើឲ្យការបង្គាប់របស់ព្រះអង្គសង្គ្រោះឲ្យចែកចាយដំណឹងល្អក្លាយទៅជាផ្នែកមួយនៃខ្លួនយើង នោះយើងត្រូវ … ស្រឡាញ់ អ្នកជិតខាងរបស់យើង ចែកចាយ ដំណឹងល្អដែលបានស្ដារឡើងវិញរបស់ព្រះយេស៊ូវគ្រីស្ទ ហើយ អញ្ជើញ មនុស្សទាំងអស់ឲ្យមកហើយមើល ។ ( ឃ្វីនថិន អិល ឃុក « ការប្រែចិត្តជឿតាមព្រះហឫទ័យរបស់ព្រះ » លីអាហូណា ខែឧសភា ឆ្នាំ២០២២ ទំព័រ៥៦ )
-
តើអ្នកនឹងពន្យល់អំពីសារលិខិតរបស់អែលឌើរ ឃុក ដោយរបៀបណា ?
សូមជួយសិស្សឲ្យស្វែងរកសេចក្តីពិតដូចនេះ ៖ យើងជួយក្នុងការងារផ្សព្វផ្សាយសាសនារបស់ព្រះអង្គសង្គ្រោះ ដោយការស្រឡាញ់អ្នកជិតខាងរបស់យើង ចែកចាយដំណឹងល្អរបស់ទ្រង់ និងអញ្ជើញអ្នកដទៃឲ្យមករកទ្រង់ ។
អ្នកអាចសរសេរពាក្យ ស្រឡាញ់ ចែកចាយ និង អញ្ជើញ នៅខាងលើនៃជួរឈរបីនៅលើក្ដារខៀន ។ នៅពេលសិស្សចែកចាយចម្លើយរបស់ពួកគេចំពោះសំណួរខាងក្រោមនេះ សូមអញ្ជើញពួកគេឲ្យចាប់ផ្តើមបញ្ជីនៅក្នុងជួរឈរនីមួយៗនូវគំនិតសម្រាប់របៀបនាំអ្នកដទៃមករកព្រះអង្គសង្គ្រោះ តាមរយៈការស្រឡាញ់ ការចែកចាយ និងការអញ្ជើញ ។
-
តើរបៀបដ៏មានប្រសិទ្ធភាពអ្វីខ្លះដែលអ្នកបានឃើញអ្នកដទៃចែកចាយដំណឹងល្អរបស់ព្រះយេស៊ូវគ្រីស្ទ ?
-
តើបងប្អូនមានបទពិសោធន៍អ្វីខ្លះនៅក្នុងការចែកចាយដំណឹងល្អរបស់ព្រះអង្គសង្រ្គោះជាមួយអ្នកដទៃ ?
ស្រឡាញ់ ចែកចាយ និងអញ្ជើញ ។
របៀបមួយដើម្បីជួយសិស្សឲ្យយល់កាន់តែច្បាស់អំពីគោលការណ៍នៃសេចក្ដីស្រឡាញ់ ចែកចាយ និងអញ្ជើញគឺផ្តល់ឲ្យពួកគេនូវច្បាប់ចម្លងនៃសំណៅចែកដែលមានចំណងជើងថា « ស្រឡាញ់ ចែកចាយ អញ្ជើញ » ។ សូមឲ្យសិស្សបង្កើតក្រុមសិក្សាតូចៗដើម្បីសិក្សាឯកសារនៅក្រោម « ក្ដីស្រឡាញ់ » ។ ពួកគេអាចបង្កើតក្រុមថ្មីដើម្បីសិក្សា « ចែកចាយ » ហើយបន្ទាប់មកក្រុមថ្មីដើម្បីសិក្សា « អញ្ជើញ » ។
ជាជម្រើស សិស្សអាចសិក្សាវគ្គបទគម្ពីរនៅក្នុងគំនិត « ការសិក្សាព្រះគម្ពីរ » នៅទំព័រ២២៣ នៃ ប្រកាសដំណឹងល្អរបស់យើង ( ឆ្នាំ ២០២៣ ) ។
សូមពិចារណាអំពីការបង្ហាញសំណួរខាងក្រោមនេះនៅលើក្ដារខៀន ដើម្បីឲ្យសិស្សពិភាក្សាជាមួយក្រុមរបស់ពួកគេនៅពេលពួកគេសិក្សា ។
-
តើការយល់ដឹងអ្វីខ្លះដែលអ្នកទទួលបានអំពីការចែកចាយដំណឹងល្អ ?
-
តើព្រះអង្គសង្គ្រោះបានបង្ហាញពីគោលការណ៍នៅក្នុងការប្រាស្រ័យទាក់ទងរបស់ទ្រង់ជាមួយអ្នកដទៃយ៉ាងដូចម្ដេច ?
-
តើមានរបៀបមួយចំនួនអ្វីខ្លះដែលក្មេងជំទង់អាចធ្វើតាមគោលការណ៍នេះ នៅពេលពួកគេព្យាយាមចែកចាយដំណឹងល្អរបស់ព្រះអង្គសង្គ្រោះ ?
ស្រឡាញ់ ចែកចាយ អញ្ជើញ
ស្រឡាញ់
យ៉ូហាន ១៣:៣៤–៣៥; ម៉ូសាយ ១៨:២០–២២; គោលលទ្ធិ និងសេចក្តីសញ្ញា ១២:៧–៩; ១២១:៤១–៤២
អែលឌើរ ហ្គែរី អ៊ី ស្ទីវ៉ែនសុន ក្នុងកូរ៉ុមនៃពួកសាវកដប់ពីរនាក់បានបង្រៀន ៖
នៅពេលណាដែលយើងបង្ហាញសេចក្ដីស្រឡាញ់ដូចព្រះគ្រីស្ទទៅកាន់អ្នកជិតខាងរបស់យើង នោះយើងផ្សព្វផ្សាយដំណឹងល្អហើយ—សូម្បីតែយើងមិនបាននិយាយពាក្យមួយម៉ាត់ក្ដី ។
សេចក្ដីស្រឡាញ់សម្រាប់មនុស្សដទៃទៀត គឺជាការបង្ហាញមតិដ៏ពូកែអំពីបទបញ្ញត្តិធំទីពីរ ដែលឲ្យស្រឡាញ់អ្នកជិតខាងយើង ។ វាបង្ហាញពីដំណើរការដែលព្រះវិញ្ញាណបរិសុទ្ធសម្រិតសម្រាំងព្រលឹងរបស់យើង ។ តាមរយៈការបង្ហាញនូវសេចក្ដីស្រឡាញ់របស់ព្រះគ្រីស្ទចំពោះមនុស្សផ្សេងទៀត យើងអាចបណ្ដាលឲ្យអស់អ្នកដែលឃើញកិច្ចការល្អរបស់យើង « សរសើរតម្កើងដល់ព្រះវរបិតានៃ [ យើង ] រាល់គ្នាដែលគង់នៅស្ថានសួគ៌ » [ ម៉ាថាយ ៥:១៦ ] ។ ( ហ្គែរី អ៊ី ស្ទីវ៉ែនសុន « ស្រឡាញ់ ចែកចាយ អញ្ជើញ » លីអាហូណា ខែឧសភា ឆ្នាំ២០២២ ទំព័រ៨៥ )
ចែកចាយ
នីហ្វៃទី២ ២:៦–៨; ម៉ូសាយ ២៨:១–៣; អាលម៉ា ៣១:៥; គោលលទ្ធិ និងសេចក្តីសញ្ញា ៦០:២
អែលឌើរ ឌៀថើរ អេហ្វ អុជដូហ្វ ក្នុងកូរ៉ុមនៃពួកសាវកដប់ពីរនាក់បានបង្រៀន ៖
បើមនុស្សម្នាក់សួរអំពីថ្ងៃចុងសប្ដាហ៍របស់បងប្អូន ចូរកុំស្ទាក់ស្ទើរក្នុងការនិយាយអំពីអ្វីដែលបងប្អូនមានបទពិសោធន៍នៅព្រះវិហារ ។ សូមប្រាប់អំពីកុមារតូចៗដែលឈរនៅខាងលើវេទិកាពីមុខក្រុមជំនុំ ហើយច្រៀងចម្រៀងដោយក្លៀវក្លាអំពីរបៀបដែលពួកគេព្យាយាមប្រែក្លាយដូចជាព្រះយេស៊ូវ ។ និយាយអំពីក្រុមយុវវ័យដែលចំណាយពេលជួយដល់មនុស្សជរាដែលនៅផ្ទះ ដើម្បីប្រមូលព័ត៌មានប្រវត្តិផ្ទាល់ខ្លួន ។ …
តាមវិធីណាក៏ដោយដែលវាងាយស្រួលសម្រាប់បងប្អូន សូមចែកចាយជាមួយនឹងមនុស្សអំពីមូលហេតុដែលព្រះយេស៊ូវគ្រីស្ទ និងសាសនាចក្ររបស់ទ្រង់សំខាន់ចំពោះបងប្អូន ។ ( ឌៀថើរ អេហ្វ អុជដូហ្វ « Missionary Work: Sharing What Is in Your Heart » Liahona ខែឧសភា ឆ្នាំ២០១៩ ទំព័រ១៧ )
អញ្ជើញ
យ៉ូហាន ១:៣៥–៤៦; ៤:២៨–៣០, ៣៩–៤១; អាលម៉ា ៥:៦២; មរ៉ូណៃ ១០:៣–៥
អែលឌើរ ហ្គែរី អ៊ី ស្ទីវ៉ែនសុន ក្នុងកូរ៉ុមនៃពួកសាវកដប់ពីរនាក់បានបង្រៀន ៖
មានការអញ្ជើញរាប់រយ ដែលយើងអាចអញ្ជើញទៅអ្នកដទៃទៀតបាន ។ យើងអាចអញ្ជើញមនុស្សផ្សេងទៀតឲ្យ « មក ហើយមើល » ពិធីសាក្រាម៉ង់ សកម្មភាពវួដ វីដេអូតាមអនឡាញ ដែលពន្យល់អំពីដំណឹងល្អរបស់ព្រះយេស៊ូវគ្រីស្ទ ។ « មក ហើយមើល » អាចជាការអញ្ជើញឲ្យអានព្រះគម្ពីរមរមន ឬមកមើលព្រះវិហារបរិសុទ្ធ អំឡុងពេលពិធីសម្ពោធ ពីមុនពិធីឧទ្ទិសឆ្លង ។ ជួនកាល ការអញ្ជើញនោះជាអ្វីមួយដែលយើងអញ្ជើញនៅខាងក្នុង—ជាការអញ្ជើញដល់ខ្លួនយើង ដែលផ្ដល់ការយល់ដឹង និងទស្សនវិស័យដល់ខ្លួនយើង អំពីឱកាសទាំងឡាយដែលនៅជុំវិញខ្លួនយើង ដើម្បីធ្វើសកម្មភាពតាម ។ ( ហ្គែរី អ៊ី ស្ទីវ៉ែនសុន « ស្រឡាញ់ ចែកចាយ អញ្ជើញ » លីអាហូណា ខែឧសភា ឆ្នាំ២០២២ ទំព័រ៨៦ )
របៀបដ៏មានប្រសិទ្ធភាពដើម្បីស្រឡាញ់ ចែកចាយ និងអញ្ជើញ
សូមជួយសិស្សឲ្យបង្កើតគំនិតបន្ថែមអំពីរបៀបចែកចាយដំណឹងល្អ ដោយប្រើគោលការណ៍នៃស្រឡាញ់ ចែកចាយ និងអញ្ជើញ ។ សូមរួមបញ្ចូលគំនិតរបស់ពួកគេនៅលើក្តារខៀន ក្រោមជួរឈរដែលត្រូវគ្នា ។ ធនធានមួយចំនួនខាងក្រោមនេះអាចជួយបង្កើតគំនិតបាន ៖
-
អត្ថបទ—« 20 Easy Ways to ‘Love, Share, Invite’ Your Neighbors » នៅលើគេហទំព័រ newsroom.ChurchofJesusChrist.org
-
វីដេអូ—« Simple Ways to Love, Share, and Invite » ( ២:៤៥ ) ដែលមាននៅលើគេហទំព័រ ChurchofJesusChrist.org
Simple Ways to Love Share and Invite
The Savior set the example of loving, sharing, and inviting. Find ideas and inspiration for howyou can follow that example at share.churchofjesuschrist.org.
-
វីដេអូ—« 2021 Broadcast: Principles of Love, Share, and Invite » ចាប់ពីនាទីទី ០:០០ ដល់ ១:៣៥ ដែលមាននៅលើគេហទំព័រ ChurchofJesusChrist.org
2021 Broadcast: Principles of Love, Share, and Invite
Ward and stake leaders are invited to a special worldwide broadcast focused on sharing the gospel through the principles of love, share, and invite.
អនុវត្តតាមអ្វីដែលអ្នកបានរៀនរួចមកហើយ
សូមពិចារណាចែកចាយពេលមួយដែលអ្នកបានជួយនរណាម្នាក់ដោយប្រើគោលការណ៍នៃសេចក្ដីស្រឡាញ់ ការចែកចាយ និងការអញ្ជើញ ។ ឬអ្នកអាចចែកចាយពីពេលវេលាដែលនៅពេលនរណាម្នាក់បានផ្ដល់ពរដល់ជីវិតរបស់អ្នកដោយប្រើគោលការណ៍ទាំងនេះ ។
សូមអញ្ជើញសិស្សឲ្យធ្វើតាមការបំផុសគំនិតណាមួយដែលពួកគេមាននៅថ្ងៃនេះ ដើម្បីបង្កើតផែនការមួយដើម្បីចែកចាយដំណឹងល្អ ។ ផែនការរបស់ពួកគេអាចរួមបញ្ចូលការអនុវត្តគំនិតមួយ ឬច្រើនដែលមានរាយបញ្ជីនៅលើក្តារខៀន ។ ដើម្បីជួយលម្អិតអំពីផែនការរបស់ពួកគេ អ្នកអាចដាក់បង្ហាញការណែនាំ និងការបំផុសខាងក្រោមសម្រាប់សិស្សដើម្បីបំពេញនៅក្នុងសៀវភៅកំណត់ហេតុការសិក្សារបស់ពួកគេ ។
សូមជ្រើសរើសការបំផុសមួយ ឬច្រើនដូចខាងក្រោមនេះ ដើម្បីបំពេញនៅក្នុងសៀវភៅកំណត់ហេតុការសិក្សារបស់អ្នក ៖
-
ខ្ញុំនឹងបង្ហាញសេចក្ដីស្រឡាញ់ចំពោះមនុស្សម្នាក់ដោយ ។
-
ខ្ញុំនឹងចែកចាយអ្វីដែលខ្ញុំដឹង ឬទទួលអារម្មណ៍អំពីដំណឹងល្អរបស់ព្រះអង្គសង្គ្រោះដោយ ។
-
ខ្ញុំនឹងអញ្ជើញ ( ឈ្មោះមនុស្សម្នាក់ ) ឲ្យ ។
ចំពោះការបំផុសគំនិតដែលអ្នកបានជ្រើសរើសឆ្លើយ សូមបំពេញឃ្លាដូចខាងក្រោមក្នុងសៀវភៅកំណត់ហេតុការសិក្សារបស់អ្នក ៖
-
ជំហានបន្ទាប់ដែលខ្ញុំនឹងធ្វើដើម្បីបញ្ចប់ផែនការរបស់ខ្ញុំគឺ ។
-
ខ្ញុំនឹងព្យាយាមធ្វើកិច្ចការនេះត្រឹម ( កាលបរិច្ឆេទ) ។
សិស្សខ្លះអាចមានអារម្មណ៍បាក់ទឹកចិត្ត ប្រសិនបើការខិតខំដោយស្មោះដើម្បីចែកចាយដំណឹងល្អមិនត្រូវបានទទួលយកយ៉ាងល្អនោះ ។ សូមជួយសិស្សយល់ថា ព្រះអម្ចាស់ស្រឡាញ់ការខិតខំដែលពួកគេកំពុងធ្វើ ទោះបីជាវាហាក់ដូចជាមិនបានទទួលជោគជ័យនៅពេលនេះក៏ដោយ ។ សូមអញ្ជើញពួកគេឲ្យបន្តធ្វើដោយសេចក្ដីជំនឿដោយមិនគិតពីលទ្ធផលភ្លាមៗ ។