“Lesona 200—Mitia, mizara, ary manasa: Manangona ny hafa hanatona an’i Jesoa Kristy,” Boky torolalana ho an’ny mpampianatra seminera: Fotopampianarana sy Fanekempihavanana (2025)
“Mitia, mizara, ary manasa,” Boky torolalana ho an’ny mpampianatra seminera: Fotopampianarana sy Fanekempihavanana
Lesona 200: Fiomanana ho misiônera
Mitia, mizara, ary manasa
Manangona ny hafa hanatona an’i Jesoa Kristy
Amin’ny maha-mpikamban’ Ny Fiangonan’i Jesoa Kristy ho an’ny Olomasin’ny Andro Farany antsika dia andraikitsika ara-panekempihavanana ny mizara ny filazantsaran’ny Mpamonjy “hatrany am-paran’izao tontolo izao” (Fotopampianarana sy Fanekempihavanana 1:23). Afaka mandray anjara amin’io asa mahatalanjona io isika amin’ny alalan’ny fitiavana ny hafa sy ny fizarana ny hafatr’i Jesoa Kristy ary ny fanasana azy ireo hiaraka amintsika amin’ny alalan’ny fanatonana ny Mpamonjy. Ity lesona ity dia afaka manampy ireo mpianatra hanao drafitra hanaparitahana ny filazantsaran’i Jesoa Kristy amin’ny alalan’ny fampiasana ireo fitsipiky ny mitia, mizara, ary manasa.
Ireo sahanasa fianarana azo atao
Aza afenina ny fahazavan’ny filazantsaranao
Hanombohana ny fampianarana, dia asehoy amin’ny mpianatra ny sarin’ny biby iray izay miafina tsara. Asao ny mpianatra hizara hoe nahoana no mahasoa ilay biby ny miafina toy izany.
-
Amin’ny toe-javatra manao ahoana avy no mety hahatonga ny olona iray haniry ny hafenina?
Ny Loholona Quentin L. Cook ao amin’ny Kôlejin’ny Apôstôly Roambinifolo dia nizara zavatra izay tsy tiantsika hafenina momba ny tenantsika:
Ny ampahany manan-danja amin’ity ezaka fitoriana ity dia ny hahatonga ny mpikambana tsirairay ho ohatry ny fahazavan’ny fanilo na aiza na aiza toerana onenantsika. Tsy afaka ny hiafinafina isika. …
… Ny Tompo dia manantena ireo izay nandray ny filazantsarany mba hiezaka faingana ny ho tonga ohatry ny fanilo mpanazava izay hanampy ny hafa hanatona an’ Andriamanitra. Izany no ahafahan’ireo rahalahintsika sy anabavintsika maneran-tany hianoka ireo fitahian’ny lanitra sy ôrdônansin’ny filazantsaran’i Jesoa Kristy naverina tamin’ny laoniny sy ho tafangona soa aman-tsara ao an-tokantrano. (Quentin L. Cook, “Tafangona soa aman-tsara ao an-tokantrano,” Liahona, mey 2023, 23)
-
Inona ny zavatra nanaitra anao indrindra tamin’ny hafatry ny Loholona Cook?
Mba hanomanana ny fo sy ny sain’ny mpianatra ho amin’ity lesona ity dia azonao atao ny manasa azy ireo hizara ny tantaran’ny olona iray ao amin’ny fianakaviana na namana iray izay niditra tao amin’ Ny Fiangonan’i Jesoa Kristy ho an’ny Olomasin’ny Andro Farany. Mety hizara ny tantaran’ny fiovam-pony manokana ihany koa izy ireo. Raha toa ka manana tantara hozaraina ny mpianatra maromaro dia azonao atao ny manasa azy ireo hizara izany amin’ny mpianatra miara-miasa aminy na ao anaty vondrona kely.
Asao ny mpianatra mba hirakitra ao amin’ny diary fandalinany ny fomba mety hahatonga azy ireo “hiafinafina” sy ny fomba ahafahan’ny ezaka ataon’izy ireo manokana amin’ny asa fitoriana ho “ohatry ny fahazavan’ny fanilo.”
Amporisiho ny mpianatra hanasa ombam-bavaka ny Fanahy mba hanampy azy ireo hamantatra ny fomba ahafahan’izy ireo mizara malalaka ny fahazavan’ny filazantsaran’ny Mpamonjy.
Ny andraikitry ny misiôneran’ny Mpamonjy
Asehoy ity teny manaraka nambaran’ny Loholona Quentin L. Cook ity. Asao ny mpianatra hitady torohevitra momba ny fomba hizarana amim-pahombiazana ny filazantsaran’i Jesoa Kristy.
Nampianatra ny Loholona Cook hoe:
Manasa antsika amim-panajana ny Mpamonjy mba ho feony sy tanany. Ny fitiavan’ny Mpamonjy no ho fahazavana mitarika antsika. Nampianatra ireo mpianany ny Mpamonjy hoe: “Koa mandehana hianareo, dia ataovy mpianatra ny firenena rehetra.” [Matio 28:19]. …
Raha tiana ho lasa ampahany mandrafitra ny maha-isika antsika ilay didin’ny Mpamonjy hizara ny filazantsara, … dia mila mba ho lasa miova fo hanaraka ny sitrapon’ Andriamanitra isika, mila mitia ireo namantsika isika, mizara ny filazantsaran’i Jesoa Kristy naverina tamin’ny laoniny, ary manasa ny rehetra ho avy ka hahita. (Quentin L. Cook, “Fiovam-po hanaraka ny sitrapon’ Andriamanitra,” Liahona, mey 2022, 56)
-
Ahoana no hanazavanao ny hafatry ny Loholona Cook amin’ny teninao manokana?
Ampio ny mpianatra hamantatra fahamarinana iray toy izao: Manampy amin’ny asa fitoriana ataon’ny Mpamonjy isika amin’ny alalan’ny fitiavana ny mpiara-belona amintsika, ny fizarana ny filazantsarany, ary ny fanasana ny hafa hanatona Azy.
Azonao atao ny manoratra ny teny hoe mitia, mizara, ary manasa eny an-tampon’ireo tsanganana telo eny amin’ny solaitrabe. Rehefa mizara ny valintenin’izy ireo amin’ireto fanontaniana manaraka ireto ny mpianatra, dia asao izy ireo hanomboka hitanisa ao amin’ny tsanganana tsirairay ireo hevitra mikasika ny fomba hitondrana ny hafa ho eo amin’ny Mpamonjy amin’ny alalan’ny fitiavana sy ny fizarana ary ny fanasana.
-
Inona avy ireo fomba mahomby sasantsasany izay hitanao nentin’ny hafa nizara ny filazantsaran’i Jesoa Kristy?
-
Inona no traikefa azonao tamin’ny fizarana ny filazantsaran’ny Mpamonjy tamin’ny hafa?
Mitia, mizara, ary manasa
Fomba iray hanampiana ny mpianatra hahatakatra bebe kokoa ny fitsipiky ny mitia, mizara, ary manasa ny fanomezana azy ireo ny tahadikan’ilay taratasy zaraina mitondra ny lohateny hoe “Mitia, mizara, manasa.” Asao ireo mpianatra mba hanorina vondrona fandalinana kely mba handalinana ny zavatra hita eo ambanin’ny hoe “Mitia.” Afaka manorina vondrona vaovao izy ireo mba handalinana ny hoe “Mizara” ary avy eo vondrona vaovao handalinana ny hoe “Manasa.”
Raha tsy izany, dia azon’ny mpianatra atao ny mandalina ireo andinin-tsoratra masina ao amin’ny hevitra ho an’ny “Fandalinana ny soratra masina” ao amin’ny pejy 223 ao amin’ny Torio ny filazantsarako (2023).
Hevero ny hampiseho eny amin’ny solaitrabe ireto fanontaniana manaraka ireto mba hodinihin’ny mpianatra miaraka ao amin’ny vondrona misy azy rehefa mandalina izy ireo.
-
Inona no hevi-baovao azonao momba ny fizarana ny filazantsara?
-
Ahoana no fomba nanehoan’ny Mpamonjy ilay fitsipika tao anatin’ny fifandraisany tamin’ny hafa?
-
Inona avy ireo fomba mety hahafahan’ny zatovo manao zavatra mifanaraka amin’ilay fitsipika rehefa miezaka mizara ny filazantsaran’ny Mpamonjy izy ireo?
Mitia, mizara, manasa
Mitia
Jaona 13:34–35; Môzià 18:20–22; Fotopampianarana sy Fanekempihavanana 12:7–9; 121:41–42
Nampianatra izao ny Loholona Gary E. Stevenson ao amin’ny Kôlejin’ny Apôstôly Roambinifolo:
Isaky ny maneho fitiavana tahaka ny an’i Kristy amin’ny namantsika isika dia mitory ny filazantsara, na dia tsy miloaka teny iray akory aza.
Ny fitiavana ny hafa no fanehoana am-bava an’ilay didy lehibe faharoa hoe tia ny namantsika. Izany dia mampiseho ny dingan’ny fanadiovan’ny Fanahy Masina miasa ao anatin’ny fanahintsika. Amin’ny alalan’ny fanehoana ny fitiavan’i Kristy ny hafa, dia mety hahatonga an’ireo izay mahita ny asa tsara ataontsika “hankalaza ny Rain[tsika] Izay any an-danitra” isika [Matio 5:16]. (Gary E. Stevenson, “Mitia, mizara, manasa,” Liahona, mey 2022, 85)
Mizara
2 Nefia 2:6–8; Môzià 28:1–3; Almà 31:5; Fotopampianarana sy Fanekempihavanana 60:2
Nampianatra izao ny Loholona Dieter F. Uchtdorf ao amin’ny Kôlejin’ny Apôstôly Roambinifolo:
Raha misy olona manontany anareo momba ny faran’ny herinandronao dia aza mihambahamba miresaka momba ny zavatra niainanao tany am-mpiangonana. Tantarao ny momba ireo zaza madinika izay mijoro eo anoloan’ny daholobe ka mihira amin’ny fo ny amin’ny fiezahan’izy ireo ho toa an’i Jesoa. Resaho ny momba ireo andian-jatovo izay mandany fotoana manampy ireo beantitra any amin’ny trano fikakarakarana ny beantitra mba hanambatra ny tantaram-pianan’izy ireo. …
Na inona na inona fomba tsotra sy mandeha ho azy aminao dia zarao amin’ny hafa ny antony mampanan-danja an’i Jesoa Kristy sy ny Fiangonany aminao. (Dieter F. Uchtdorf, “Asa fitoriana: Mizara ny zavatra tena inoana sy tsapanao,” Liahona, mey 2019, 17)
Manasa
Jaona 1:35–46; 4:28–30, 39–41; Almà 5:62; Môrônia 10:3–5
Nampianatra izao ny Loholona Gary E. Stevenson ao amin’ny Kôlejin’ny Apôstôly Roambinifolo:
Misy fanasana an-jatony azontsika atolotra ny hafa. Afaka manasa ny hafa isika mba “ho avy ka hahita” ny fivoriana fanasan’ny Tompo, ny fiaraha-mientan’ny paroasy, ny horonan-tsary an-jotra izay manazava ny filazantsaran’i Jesoa Kristy. Ny “ho avy ka hahita” dia mety ho fanasana hamaky ny Bokin’i Môrmôna na hitsidika tempoly vaovao mandritra ny varavarana misokatra alohan’ny fanokanana izany. Indraindray, ny fanasana dia zavatra ataontsika ao anatintsika, fanasana ho an’ny tenantsika, manome antsika fahatsapana sy fahitana ireo fahafahana azo araraotina manodidina antsika, mba handraisantsika andraikitra eo anatrehan’izany. (Gary E. Stevenson, “Mitia, mizara, manasa,” Liahona, mey 2022, 86)
Fomba mahomby hitiavana sy hizarana ary hanasana
Ampio ireo mpianatra hieritreritra hevitra fanampiny mikasika ny fomba hizarana ny filazantsara amin’ny alalan’ny fitsipiky ny mitia, mizara, ary manasa. Ampidiro eny amin’ny solaitrabe eo ambanin’ny tsanganana mifanaraka amin’izany ny hevitr’izy ireo. Ny loharano manaraka dia mety hanampy amin’ny famoronana hevitra:
-
Lahatsoratra: “20 Easy Ways to ‘Love, Share, Invite’ Your Neighbors,” newsroom.ChurchofJesusChrist.org
-
ChurchofJesusChrist.org
-
ChurchofJesusChrist.org
Ampiharo ny zavatra izay nianaranao
Hevero ny hizara fotoana iray izay nanampianao olona iray tamin’ny alalan’ny fampiasana ny fitsipiky ny mitia, mizara, ary manasa. Na azonao atao ny mizara fotoana iray izay nitahian’ny olona iray ny fiainanao tamin’ny fampiasana ireo fitsipika ireo.
Asao ny mpianatra hanaraka izay bitsika rehetra tsapany androany mba hamoronana drafitra hizarana ny filazantsara. Ny drafitr’izy ireo dia mety hahitana ny fampiharana ny iray na maromaro amin’ireo hevitra voatanisa eny amin’ny solaitrabe. Mba hitondrana fanampiana eo amin’ny antsipirian’ny drafitr’izy ireo dia azonao atao ny mampiseho ireto torolalana sy tari-kevitra manaraka ireto ho an’ny mpianatra mba hofenoina ao anatin’ny diary fandalinany.
Misafidiana iray na maromaro amin’ireto tari-kevitra manaraka ireto mba hofenoina ao amin’ny diary fandalinanao:
-
Haneho fitiavana amin’ny olona iray aho amin’ny alalan’ny .
-
Hizara ny zavatra fantatro na tsapako mikasika ny filazantsaran’ny Mpamonjy aho amin’ny alalan’ny .
-
Hanasa an’i (anaran’olona) aho mba .
Ho an’ny (ireo) tari-kevitra nofidinao dia fenoy ao anatin’ny diary fandalinanao ireto manaraka ireto:
-
Ny dingana manaraka hataoko hanatanterahana ny drafitro dia ny .
-
Hiezaka aho hanao izany alohan’ny (daty).
Mety ho kivy ny mpianatra sasany raha toa ka tsy voaray tsara ny ezaka tamin-kitsim-po nataony amin’ny fizarana ny filazantsara. Ampio ireo mpianatra hahatakatra fa tian’ny Tompo ireo ezaka ataon’izy ireo, na dia toa tsy mahomby aza izany amin’izao fotoana izao. Asao izy ireo hanohy hanao asa amim-pinoana na inona na inona vokatra eo no ho eo.