“Lesona 203: Fahazotoana amin’ny asa fitoriana: Miomana mba ho lasa misiônera mazoto,” Fotopampianarana sy Fanekempihavanana: Boky torolalana ho an’ny mpampianatra seminera (2025)
“Fahazotoana amin’ny asa fitoriana,” Fotopampianarana sy Fanekempihavanana: Boky torolalana ho an’ny mpampianatra seminera
Lesona 203: Fiomanana ho misiônera
Fahazotoana amin’ny asa fitoriana
Miomana mba ho lasa misiônera mazoto
I Jesoa Kristy dia nanome antsika ohatra tonga lafatra amin’ny fahazotoana izay tokony hiezahantsika halaina tahaka rehefa manompo ny hafa isika. Ity lesona ity dia afaka manampy ireo mpianatra hikatsaka ny fanampian’ny Tompo mba ho lasa hazoto kokoa eo amin’ny fiainan’izy ireo sy amin’ny fiomanan’izy ireo ho lasa misiônerany.
Ireo sahanasa fianarana azo atao
Rihana fahatelo, varavarana farany
Hevero ny hanomboka ny lesona amin’ny alalan’ny fanampiana ny mpianatra hisaintsaina ny maha-zava-dehibe ny fahazotoana amin’ny asa fitoriana. Azonao atao ny mampiseho ity sary manaraka ity ary mizara ny tantara etsy ambany. Na azonao atao ny mampiseho ny horonan-tsary “Rihana fahatelo, varavarana farany,” izay hita ao amin’ny ChurchofJesusChrist.org, manomboka eo amin’ny mari-potoana 14:17 hatramin’ny 17:27. Azonao atao ny mampiato ilay horonan-tsary eo amin’ny mari-potoana 16:03 mba hijeren’ny mpianatra ny mety ho nataon’izy ireo tamin’io fotoana io. Asehoy avy eo ny ambin’ilay horonan-tsary.
Ny Loholona Dieter F. Uchtdorf ao amin’ny Kôlejin’ny Apôstôly Roambinifolo dia nizara ity zavatra manaraka izay niainan’ireo misiônera tany Eorôpa ity izay nahatsapa ho notaomim-panahy hizara ny filazantsara tamin’ireo mponina tao amin’ny trano iray misy rihana telo.
Nanomboka tao ambany rihana izy ireo ary nandondona ny varavarana tsirairay, namelabelatra ny hafatry ny famonjena momba an’i Jesoa Kristy sy ny Famerenana ny Fiangonany tamin’ny laoniny.
Tsy nisy nihaino azy ireo tao ambany rihana. …
… Nandondòna ny varavarana rehetra teo amin’ny rihana voalohany izy ireo.
Tsy nisy olona nihaino indray tao.
Toy izany koa ny tao amin’ny rihana faharoa. (Dieter F. Uchtdorf, “Rihana fahatelo, varavarana farany,” Liahona, nôv. 2016, 17)
-
Inona no eritreritra mety ho nananan’ireo misiônera ireo tamin’io fotoana io?
Notohizan’ny Loholona Uchtdorf hoe:
[Dia toy izany koa] ny rihana fahatelo, mandra-pandondonan’izy ireo ilay varavarana farany tao amin’ny rihana fahatelo.
Rehefa nisokatra izany varavarana izany dia nisy zatovovavy iray nitsiky tamin’izy ireo ary nangataka azy ireo mba hiandry fa hiresaka amin’ny reniny izy. …
… Natolotr’ireo misiônera ny hafatr’izy ireo ary nanolotra boky iray ho an’ilay reny izy ireo mba ho vakina, dia ny Bokin’i Môrmôna izany.
Rehefa lasa izy ireo dia nanapa-kevitra ilay reny fa hamaky na dia pejy vitsivitsy fotsiny aza farafahakeliny.
Vitany tao anatin’ny andro vitsivitsy ilay boky manontolo.
Tsy ela taorian’izay dia niditra tao amin’ny ranon’ny batisa ity fianakaviana mahafinaritra maty ray ity. (Dieter F. Uchtdorf, “Rihana fahatelo, varavarana farany,” Liahona, nôv. 2016, 17–18)
-
Inona avy ireo toetra tahaka ny an’i Kristy hitanao ao amin’ireo misiônera ireo?
Toetra tahaka ny an’i Kristy ao amin’ny misiônera
Hevero ny hanasa ny antsasaky ny mpianatra hamaky ireo andininy etsy ambany ao amin’ny Fotopampianarana sy Fanekempihavanana fizarana 4 ary ny antsasany hamaky ireo andininy ao amin’ny fizarana 75. Aorian’ny famakiana dia azon’ny mpianatra atao ny mizara ny valinteniny amin’ireo fanontaniana etsy ambany amin’ny olona iray izay mamaky ilay toko sy andininy hafa.
Raha tsy izany dia azonao atao ny manendry mpianatra hiara-hiasa handalina ny fizarana “Fahazotoana”, anisan’izany ireo hevitra hoe “Fandalinana soratra masina” ao amin’ny pejy 132–33 ao amin’ny Torio ny filazantsarako: Torolalana ho an’ny fizarana ny filazantsaran’i Jesoa Kristy (2023).
Vakio ny Fotopampianarana sy Fanekempihavanana 4:2–6; 75:2–5, 29,, ka tadiavo ireo teny sy andian-teny nampiasain’ny Tompo mba hamaritana ireo izay maniry ny hanompo Azy, anisan’izany ireo misiônerany.
-
Inona no andrasan’ny Mpamonjy amin’ireo izay maniry ny hanompo Azy amin’ny maha-misiônera amin’ny fotoana feno? Nahoana?
-
Ahoana no mety hanampian’ireo toetra sy fihetsika ireo antsika amin’ny toe-javatra sarotra izay mety hatrehintsika?
Ao anatin’ireo fahamarinana zarain’ny mpianatra dia mety hahita izy ireo fa miandrandra ireo misiônerany ny Tompo mba hiasa amim-pahazotoana amin’ny fizarana ny filazantsarany.
Inona no atao hoe fahazotoana?
Soraty eny amin’ny solaitrabe ity fiantombohana fehezan-teny manaraka ity ary asao ny mpianatra hanoratra ny fomba mety hamaranan’izy ireo izany.
Ny fahazotoana dia …
Raha mila fanampiana amin’ny famaritana ny fahazotoana ny mpianatra dia azonao atao ny mizara fa ny famaritana iray azo heverina dia ny hoe “ezaka tsy tapaka sy matotra” (Torio ny Filazantsarako: Torolalana ho an’ny fizarana ny filazantsaran’i Jesoa Kristy [2023], 132).
-
Inona avy ireo toe-javatra sasantsasany mety hatrehinao na hatrehan’ireo izay ao amin’ny sokajin-taonanao ka mitaky fahazotoana?
Azonao atao ny mitanisa ny valintenin’ny mpianatra eny amin’ny solaitrabe. Rehefa avy nanambatra hevitra vitsivitsy avy amin’ny mpianatra ianao dia omeo fahafahana izy ireo hieritreritra tsara kokoa momba ny fomba hanehoan’izy ireo fahazotoana eo amin’ny fiainan’izy ireo.
Fomba iray hanaovana izany ny fampisehoana ity fanombantombanana ny tena manokana manaraka ity ary omeo fotoana ireo mpianatra hisaintsainana amim-pahanginana ny fomba hamaliany izany. Hevero ny hanazava amin’ny mpianatra fa rehefa mahavita io fanombanan-tena io izy ireo dia afaka manampy azy ireo ny Fanahy Masina hamantatra ny zavatra ataony tsara sy ny fomba ahafahan’izy ireo mivoatra. Mety hahazo tombontsoa avy amin’ny firaketana ny eritreriny ao amin’ny diary fandalinany ny mpianatra. (Fanamarihana: Azonao atao ny misafidy ny hampiseho indray ireo fehezan-teny ireo any amin’ny faran’ny lesona.)
Eritrereto amim-pahanginana ny fomba hamaritan’ny tsirairay amin’ireto fehezan-teny manaraka ireto anao:
-
Miasa mafy aho mandra-pahavitan’ny asa iray amim-pahombiazana, na dia sarotra aza izany.
-
Miasa amim-pahombiazana aho na dia amin’ny fotoana tsy misy fanaraha-maso akaiky ataon’ny tompon’andraikitra aza.
-
Afaka miantehitra amiko sy ny ezaka ataoko hanatanterahana asa iray ny olona.
-
Mahita fifaliana aho amin’ny fanaovana ny ezaka tsara indrindra vitako.
Hevero ny hampiseho ireto torolalana manaraka ireto ary asao ny mpianatra hiasa ao anaty vondrona kely mba hamitana ilay sahanasa. Rehefa vitan’ny vondrona ilay sahanasa dia asao izy ireo hizara amin’ny vondrona hafa ny zavatra nianarany.
-
Mitadiava andinin-tsoratra masina na tenin’ny mpaminany izay maneho ny maha-zava-dehibe ny fahazotoana.
-
Ifanakalozy hevitra ny mahatonga an’i Jesoa Kristy ho ohatra maneho io fahazotoana io.
-
Mizarà zavatra niainana iray izay nitahiana anao na ny olona iray fantatrao tamin’ny alalan’ny fahazotoana.
-
Ifanakalozy hevitra ny antony hieritreretanao fa zava-dehibe ho an’ny misiônera ny maneho fahazotoana.
-
Ifanakalozy hevitra ireo sehatra hafa eo amin’ny fiainanao izay maha-zava-dehibe ny fahazotoana.
Afaka manampy ireo fahamarinana hilentika lalina ao am-pon’ny mpianatra ny Fanahy Masina ary manomana ny mpianatra hampihatra ireo fahamarinana ireo. Fomba iray ahafahanao manampy ny mpianatra hanasa ny Fanahy Masina ny manome fahafahana azy ireo hahita ny fomba nanehoan’ny Mpamonjy sy ny hafa fahazotoana. Mba hahitana ohatra amin’ny fomba nanehoan’ny Mpamonjy fahazotoana dia azon’ny mpianatra atao ny mamaky ny Fotopampianarana sy Fanekempihavanana 19:16–19 na ny Lioka 22:39–44. ChurchofJesusChrist.org
Fitahiana avy amin’ny fahazotoana
Ampahatsiahivo ny mpianatra ny tantara notantarain’ny Loholona Dieter F. Uchtdorf momba ireo misiônera roa tany Eorôpa izay nandondona ny varavarana farany tany amin’ny rihana fahatelo. Hazavao fa lasa fitahiana ho an’ny Loholona Uchtdorf ny ezaka tamim-pahazotoana nataon’izy ireo. Hevero ny hampiseho ity sary manaraka ity izay mampiseho ireo misiônera sy ilay fianakaviana nipetraka tao amin’ilay trano tao amin’ilay varavarana farany tao amin’ny rihana fahatelo. Hazavao fa ny iray amin’ireo ankizivavy roa ireo dia i Harriet, vadin’ny Loholona Uchtdorf.
Nizara ny zavatra tsapany momba ireo misiônera roa ireo ny Loholona Dieter F. Uchtdorf:
Impiry aho no nanandratra ny foko tamim-pankasitrahana noho ireto misiônera anankiroa ireto izay tsy nijanona tao ambany rihana fotsiny! Impiry aho no velom-pankasitrahana noho ny finoana sy ny asan’izy ireo. Impiry aho no nanome fisaorana fa nanohy nandeha izy ireo, na dia hatrany amin’ny rihana fahatelo, varavarana farany aza. (Dieter F. Uchtdorf, “Rihana fahatelo, varavarana farany,” Liahona, nôv. 2016, 18)
-
Raha afaka mizara zavatra momba ny fahazotoana amin’ny kilasintsika ireo misiônera ireo dia inona no eritreretinao fa holazain’izy ireo?
Ny fahazotoana eo amin’ny fiainako
Hevero ny hampiseho ireo fanambarana mikasika ny fahazotoan’ny tena manokana izay nosaintsainin’ireo mpianatra tany am-piandohan’ny lesona. Mety ho nahatsapa ho notaomin’ny Fanahy ny mpianatra mba hifantoka amin’ny fehezan-teny iray mihoatra noho ny hafa. Asao ireo mpianatra hieritreritra izany fanambarana izany rehefa manoratra ny valinteniny amin’ireto fanontaniana manaraka ireto ao amin’ny diary fandalinany.
-
Inona avy ireo fanovana azoko atao mba ho lasa mazoto kokoa?
-
Noho ny fahazotoana dia fomba ahoana no maha voaomana tsara kokoa ahy hizara ny filazantsaran’i Jesoa Kristy amin’ny maha-misiônera manompo amin’ny fotoana feno sy eo amin’ny fiainako andavanandro?
-
Ahoana no fomba hanampian’ny fahazotoana ahy ho lasa hitovy kokoa amin’ny Mpamonjy?
Rehefa mirakitra ny valinteniny ny mpianatra dia amporisiho izy ireo tsy hisalasala hanao drafitra mba hanao zavatra izay hampivelatra azy ireo sy hitaky asa mafy sy fahazotoana tsy tapaka.