Lesona 202: Fiomanana ho misiônera

Fitaovana enti-manova fo ny Bokin’i Môrmôna

Mampiasa ny Bokin’i Môrmôna mba hiomanana hizara ny filazantsara

Ny Bokin’i Môrmôna dia fanomezana nomen’ Andriamanitra antsika mba hanangonana an’i Isiraely amin’ny andro farany ho any amin’i Jesoa Kristy. Mba hampiasan’ny mpianatra io fanomezam-pahasoavana io mba hanampiana amin’ny fanangonana ny hafa dia zava-dehibe ny handraisan’izy ireo fijoroana ho vavolombelona manokana avy amin’ Andriamanitra fa marina izany. Ity lesona ity dia afaka manampy ny mpianatra hahatsapa ny maha-zava-dehibe ny tokony hanatanjahan’izy ireo ny fijoroana ho vavolombelona ananan’izy ireo momba ny Bokin’i Môrmôna eo am-piomanan’izy ireo hizara ny filazantsaran’ny Mpamonjy.

Ireo sahanasa fianarana azo atao

Fitaovana iray hanangonana an’i Isiraely

Hevero ny hanao lisitra eny amin’ny solaitrabe na hampiseho fitaovana isan-karazany izay fantatry ny mpianatrao. Ohatra sasantsasany ny tantanana (marteau), fanodinan-drindra (tournevis), borosy nify, agrafeuse, sy ny sisa. Asao ny mpianatra hiresaka momba ny asan’ireo fitaovana amin’ny alalan’ny fampiasana fanontaniana tahaka ireto manaraka ireto.

• Oviana ny fotoana farany nampiasanao ny iray amin’ireo fitaovana ireo? Ahoana no nampiasanao azy?

• Ahoana no ahafahan’ny fitaovana hafa manao asa mitovy amin’izany?

  Mba hanampiana ireo mpianatra hahatakatra fa ny fitaovana sasany dia tsara kokoa amin’ny fanatanterahana asa sasantsasany, dia angataho ny mpianatra iray mba hanao asa toy ny fanakambanana taratasy sasantsasany amin’ny alalan’ny fampiasana fanodinan-drindra na borosy nify.

  Ampio ny mpianatra hahatakatra fa ireo fitaovana ireo dia manatanteraka asa voafaritra manokana. Torak’izany koa, Andriamanitra dia nanome fitaovana mba hanatanterahana ireo ampahany manokana amin’ny asany, ny iray amin’izany dia ny fanangonana ny olona ho ao amin’i Jesoa Kristy.

• Inona avy ireo fitaovana sasantsasany izay nomen’ny Ray any An-danitra sy i Jesoa Kristy mba hanangonana ny olona ho eo amin’Izy ireo?

Azon’ny mpianatra atao ny mamaky ity fanambarana manaraka ity mba hanamafisana ny valintenin’izy ireo amin’ilay fanontaniana teo aloha na hahitana valiny fanampiny.

Nampianatra ny Loholona Shayne M. Bowen ao amin’ny Fitopololahy hoe:

Manangona farany an’i Isiraely isika ary manao izany miaraka amin’ny Bokin’i Môrmôna, boky iray izay tena fitaovana mahery vaika eo amin’ny fiovam-po, miaraka amin’ny Fanahin’ny Tompo. (Shayne M. Bowen, “Ny anjara asan’ny Bokin’i Môrmôna amin’ny fiovam-po,” Liahona, nôv. 2018, 83)

• Nahoana araka ny eritreritrao no mety ho fitaovana mahery vaika eo amin’ny fiovam-po sy fanangonana olona hanatona an’i Jesoa Kristy ny Bokin’i Môrmôna?

Henoy tsara rehefa mamaly ny mpianatra, ary raha ilaina dia asao izy ireo hizara ny antony mahatonga azy ireo hahatsapa toy izany.

ChurchofJesusChrist.org

Asao ny mpianatra hamaky ny Môrônia 10:3–5 sy ity teny nambara manaraka ity. Angataho izy ireo hitady fomba manan-danja iray ahafahantsika miomana hizara ny Bokin’i Môrmôna amin’ny hafa.

Nampianatra izao ny Filoha Henry B. Eyring ao amin’ny Fiadidiana Voalohany:

Mba hahafantarantsika fa marina ny Bokin’i Môrmôna, dia tsy maintsy mamaky izany isika ary manao ilay safidy hita ao amin’i Môrônia hoe: mivavaha mba hahafantarana raha marina izany. Rehefa vitantsika izany, dia afaka mijoro ho vavolombelona amin’ny alalan’ny zavatra niainana manokana amin’ny namantsika isika fa afaka manao izany safidy izany izy ireo ary mahafantatra izany fahamarinana izany. (Henry B. Eyring, “A Voice of Warning,” Ensign, Nov. 1998, 34)

• Inona no nianaranao avy amin’ny teny nambaran’ny Filoha Eyring sy ny Môrônia 10:3–5?

Rehefa mizara ny zavatra nianarany ny mpianatra dia mety hahita fahamarinana tahaka izao manaraka izao izy ireo: Ny fahazoana ny fijoroana ho vavolombelona ananantsika manokana momba ny Bokin’i Môrmôna dia manome fahafahana antsika hanampy ny hafa hianatra ny fahamarinan’izany.

Mba hanampiana ny mpianatra handinika ny zavatra niainany manokana mahakasika io fahamarinana io dia azonao atao ny manasa azy ireo hanombantombana amim-pahanginana ny valintenin’izy ireo amin’ireto teny ambara manaraka ireto.

Amin’ny fampiasana mari-drefy iray ka hatramin’ny dimy, ka ny iray dia “tsy marina amiko” ary ny dimy dia “tena marina amiko,” dia omeo salanisa ireto teny ambara manaraka ireto:

• Afaka manazava amin’ny namana iray ny atao hoe Bokin’i Môrmôna sy ny fomba ahafahan’izany mitondra ny olona hanatona an’i Kristy aho.

• Mandalina ny Bokin’i Môrmôna amin’ny fomba izay mampitombo ny fiovam-poko manokana ho an’i Jesoa Kristy aho.

• Efa niaina zavatra izay mamela ahy hijoro ho vavolombelona amin’ny hafa aho fa marina ny Bokin’i Môrmôna.

Hevero ny hanasa ny mpianatra hikatsaka ny fitaoman’ny fanahy mikasika ny fomba hanasana ny herin’ Andriamanitra ho eo amin’ny fiainan’izy ireo sy ny fiainan’ny hafa amin’ny alalan’ny Bokin’i Môrmôna.

Manome lanja ny fanomezan’ Andriamanitra ny Bokin’i Môrmôna

Tao anatin’ny fanambarana nomena an’i Joseph Smith, ny Tompo dia nanantitrantitra ny maha-zava-dehibe ny Bokin’i Môrmôna tamin’ny alalan’ny fizarana ny zavatra tsapany rehefa misy olona manamaivana izany.

Vakio ny Fotopampianarana sy Fanekempihavanana 84:54–57, ary eritrereto ny fomba mety hiantefan’ireoo andininy ireo amin’ireo mpikamban’ny Fiangonan’ny Tompo izay miomana hizara ny filazantsarany.

• Inona no hitanao fa miantefa amin’ireo izay maniry ny hizara ny filazantsaran’ny Mpamonjy?

• Inona avy ireo fomba sasantsasany mety hanehoantsika ny maha-zava-dehibe ny Bokin’i Môrmôna eo amin’ny fiainantsika?

Fahalalana manokana sy fijoroana ho vavolombelona momba ny Bokin’i Môrmôna

Ity rafi-tantara manaraka ity, na ny iray hafa noforoninao, dia afaka manampy ny mpianatra hilaza ny zavatra nianarany sy tsapany nandritra ny lesona. Hevero ny hamaky ilay rafi-tantara miaraka amin’ny iray kilasy ary omeo fotoana ny mpianatra hieritreretana ny zavatra azon’izy ireo zaraina amin’i Annie.

Vao avy nanatrika ny kilasy fiomanana ho misiônera i Annie. Nangataka ireo mpampianatra izay misiônera vao avy niverina vao haingana izy mba hanome sosokevitra mikasika ny fiomanana hizara ny filazantsara. Samy nanoro hevitra azy ireo mpampianatra mba hanamafy orina ny fahalalany sy ny fijoroana ho vavolombelona ananany momba ny Bokin’i Môrmôna. Tamin’ireo fomba rehetra azon’izy ireo natao hamaliana izany dia tsy ny fandalinana ny Bokin’i Môrmôna no valinteny nandrasan’i Annie.

Asao ny mpianatra hivezivezy eran’ny efitrano ary hilaza amin’ny mpianatra roa farafahakeliny ny zavatra azon’izy ireo zaraina amin’i Annie.

Diniho ny fomba hamoronana fahafahana ho an’ny Fanahy Masina mba hijoro ho vavolombelona momba ny Bokin’i Môrmôna amin’ny mpianatrao. Azonao atao ny manasa mpianatra manolo-tena hizara amin’ny iray kilasy ireo andinin-tsoratra masina ao amin’ny Bokin’i Môrmôna tiany indrindra na ny zavatra niainan’izy ireo tamin’ny fahazoana fijoroana ho vavolombelona momba ny Bokin’i Môrmôna. Azonao atao ny mizara andinin-tsoratra masina iray izay nanampy anao hahafantatra bebe kokoa ny Mpamonjy. Omeo fotoana hiomanana ny mpianatra. Raha maro amin’ireo mpianatra no te hizara dia asao izy ireo hanao izany ao anaty vondrona kely mba hananan’ny rehetra fahafahana.

Fampiharana

Hevero ny hanasa ny mpianatra hamaly amim-pahanginana ireto fanontaniana manaraka ireto ao amin’ny diary fandalinany.

• Inona no azonao atao mba hampitomboana ny fifandraisanao amin’i Jesoa Kristy amin’ny alalan’ny Bokin’i Môrmôna?

  Azonao atao ny manolotra safidy vitsivitsy, toy ireto manaraka ireto: mamaky ny Bokin’i Môrmôna iray manontolo ao anatin’ny vanim-potoana iray, mitady andinin-tsoratra masina hozaraina amin’ny hafa, na mangataka amin’ny Ray any An-danitra mba hahazo fijoroana ho vavolombelona amin’ny alalan’ny Fanahy Masina fa marina ilay boky.

  ChurchofJesusChrist.org

• Manomana anao hizara ny Bokin’i Môrmôna, eo amin’ny fiainana isan’andro na amin’ny maha-misiônera amin’ny fotoana feno anao, amin’ny fomba ahoana, ny fanaovana ny zavatra nosoratanao?

Mety hanampy ny mizara ny fijoroanao ho vavolombelona mikasika ny fomba nanampian’ny Bokin’i Môrmôna anao hanakaiky kokoa an’i Jesoa Kristy.

Loharanom-pitaovana fanampiny

Ahoana no tokony hizarako ny Bokin’i Môrmôna ary nahoana?

Nilaza izao ny Loholona Ronald A. Rasband ao amin’ny Kôlejin’ny Apôstôly Roambinifolo:

Manasa anareo aho, anio, mba hanome ny Bokin’i Môrmôna amin’ireo namanao sy ny olona ao amin’ny fianakavianao, ireo mpiara-miasa aminao, ny mpanazatra anao amin’ny baolina kitra, na ilay mpivarotra vokatry ny tany eny an-tsena. Mila ny tenin’ny Tompo izay hita ao amin’io boky io izy ireo. Mila valim-panontaniana mahakasika ny fiainana andavanandro sy ny fiainana mandrakizay izay ho avy izy ireo. Mila mahafantatra ny lalan’ny fanekempihavanana izay misokatra eo anoloany sy ny fitivan’ny Tompo tsy mandao izy ireo. Ao amin’ny Bokin’i Môrmôna avokoa izany.

Rehefa manolotra azy ireo ny Bokin’i Môrmôna ianareo dia manokatra ny sainy sy ny fony amin’ny tenin’ Andriamanitra. Tsy voatery mivatsy tahadika vita pirinty miaraka aminareo ianareo. Azonareo zaraina tsotra izao avy amin’ny findainareo avy amin’ny fizarana hoe Ny Ssoratra masina ao amin’ny application Bibliothèque de l’Évangile izany.

Eritrereto ireo rehetra izay mety hotahin’ny filazantsara eo amin’ny fiainany, dia handefaso tahadikan’ny Bokin’i Môrmôna avy amin’ny findainao izy ireo avy eo. Aza hadinoana ny mizara ihany koa ny fijoroana ho vavolombelona anananao sy ny fomba nitahian’ilay boky ny fiainanao. (Ronald A. Rasband, “Anio,” Liahona, nôv. 2022, 27)

Ahoana no ahafahan’ny Bokin’i Môrmôna mitarika antsika ho any amin’i Jesoa Kristy?

Ny Loholona Ulisses Soares ao amin’ny Kôlejin’ny Apôstôly Roambinifolo dia nizara izao:

Nandalina tsikelikely ny Bokin’i Môrmôna aho rehefa nahavita ny leson’ny seminera nomena ahy isan-kerinandro. Tsaroako, toy ny vao omaly, fa nisy fahatsapana hafanana nanomboka nivelatra tato amin’ny fanahiko sy nameno ny foko, nanazava ny fahatakarako ary nanomboka tena nankafiziko kokoa hatrany, araka ny voasoritr’i Almà tamin’izy nitory ny tenin’ Andriamanitra tamin’ny vahoakany. Niova ho fahalalana izay niorim-paka tao am-poko izany fahatsapana izany taty aoriana dia lasa fototry ny fijoroana ho vavolombelona ananako momba ireo tranga sy fampianarana manan-danja ao anatin’io boky masina io.

Tamin’ny alalan’ireo sy tamin’ny alalan’ireo traikefa manokana sarobidy hafa no nahatonga ny Bokin’i Môrmôna ho lasa tena vato ifaharana izay manohana ny finoako an’i Jesoa Kristy sy ny fijoroana ho vavolombelona ananako momba ny fotopampianaran’ny filazantsarany. Izy io dia lasa iray amin’ireo andry izay mijoro ho vavolombelona amiko mikasika ilay sorona fanavotana masina nataon’i Kristy. Lasa ampinga ho ahy mandritra ny androm-piainako izany hiarovana amin’ireo fikasan’ny fahavalo hampalemy ny finoako sy hampidirana tsy finoana ato an-tsaiko ary manome herim-po ahafahako manambara amim-pasahiana ny fijoroana ho vavolombelona ananako momba ilay Mpamonjy an’izao tontolo izao. (Ulisses Soares, “Ny fivoahan’ny Bokin’i Môrmôna,” Liahona, mey 2020, 34)

Sahanasa fianarana fanampiny

Manampy ny hafa hanatona an’i Jesoa Kristy amin’ny alalan’ny Bokin’i Môrmôna

Mety ho hitan’ny mpianatra fa sarotra ny mizara ny filazantsara amin’ny hafa. Azon’ny mpianatra atao ny mitantara ireo fotoana nizaran’izy ireo ny Bokin’i Môrmôna tamin’ny olona iray izay voatahy tamin’ny alalan’ny famakiana izany.

Azon’ny mpianatra atao ny mifanakalo hevitra momba ny antony mahatonga ny fizarana ny Bokin’i Môrmôna ho fomba tsara hifanakalozana hevitra momba ny filazantsara amin’ny olona iray.

Azonao atao ny mampiseho fomba samihafa hizarana ny Bokin’i Môrmôna amin’ny fomba elektrônika. Azon’izy ireo atao izany ao amin’ny application Médiathèque de l’Évangile amin’ny alalan’ny fanokafana ny faritra misy ny soratra masina sy ny fanindriana ny “Hizara” na “Hizara Izao” eo amin’ny tampon’ny pejy. Na afaka mizara ny application Bokin’i Môrmôna izy ireo. Samy manolotra maimaim-poana ny Bokin’i Môrmôna amin’ny fiteny mihoatra ny 100 ireo safidy ireo. Ity tranonkala manaraka ity dia ahitana torolalana momba ny fisintonana ilay application ary ahitana horonan-tsary mba hanampiana ny mpianatra hahafantatra ny fomba hizarana izany:

Zarao ny Application Book of Mormon

Lalaovy an-tsehatra ny fizarana ny Bokin’i Môrmôna

Mety hanampy ny fanomezana fahafahana ireo mpianatra hizara ny Bokin’i Môrmôna ao anatin’ny karazana toerana toy ny an’ny misiônera. Azon’ny mpianatra atao ny milalao an-tsehatra mandeha tsiroaroa. Ny mpinamana tsirairay dia afaka mifandimby manao izao manaraka izao toy ny hoe miresaka amin’ny namana iray avy amin’ny antokom-pinoana hafa izy ireo:

• Hazavao ny atao hoe Bokin’i Môrmôna.

• Asao ny namanao hamaky izany.

• Lazao amin’ilay namanao ny antony anirianao ny mba hamakiany izany.

Mety hanampy ny mpianatra ny mamaky sy manaraka ireo sosokevitra amin’ny fizarana ny Bokin’i Môrmôna hita ao amin’ny “Tari-dalana enti-mampianatra” ao amin’ny pejy 42 ao amin’ny Torio ny Filazantsarako: Torolalana ho an’ny asa fanompoan’ny misiônera (2023).

Teny fanolorana ny Bokin’i Môrmôna “Mitoetra araka ny fitsipiny”

Asao ny mpianatra hamaky ny andiam-pehezanteny fahaenina ao amin’ny teny fanolorana ny Bokin’i Môrmôna. Izany dia afaka manampy azy ireo hahita fomba iray manan-danja hanasana ireo fitahian’ny Bokin’i Môrmôna ho eo amin’ny fiainan’izy ireo. Angataho izy ireo mba hitady ilay fampanantenana nomena. Mety hanampy ireto fanontaniana ifanakalozan-kevitra manaraka ireto:

• Ankoatra ny famakiana ny Bokin’i Môrmôna dia inona no tokony hataontsika mba hanatonana bebe kokoa an’ Andriamanitra?

• Oviana ianao no nanao zavatra izay nianaranao avy tamin’ny Bokin’i Môrmôna?

­