Դաս 201. Միսիոներական նախապատրաստություն

Ընտրել միսիա ծառայելը

Միսիոներական ծառայության օրհնությունները

Եղանակներից մեկը, որով Երկնային Հայրը օրհնում է Իր զավակներին՝ միսիոներական աշխատանքն է: Նա օրհնում է միսիոներներին, երբ նրանք ծառայում և ուսուցանում են մարդկանց իրենց համայնքներում և ամբողջ աշխարհում: Նա նաև օրհնում է նրանց, ովքեր ընդունում են ավետարանի ուղերձը և ստանում են միսիոներների առաջարկած ծառայությունը: Այս դասը կօգնի ուսանողներին ցանկանալ ծառայել Տիրոջը՝ որպես Նրա միսիոներներ:

Հնարավոր ուսումնական վարժություններ

Որպես միսիոներներ ծառայելու մեր պարտականությունը

Ուսանողներին բացատրեք, որ այս դասի ընթացքում, որը վերաբերում է միսիոներական աշխատանքին, իրենք պետք է աշխատեն զուգընկերոջ հետ: Զուգընկերակցություններ ստեղծելու համար պատրաստեք մի զամբյուղ, որտեղ կլինեն թերթիկների վրա գրված միսիայի առաջադրանքների օրինակներ: Այնտեղ կարող են գրված լինել վայրեր, որտեղ միսիոներները կնշանակվեն ուսուցանելու համար, օրինակ՝ Գվատեմալա կամ Հունգարիա։ Դրանք կարող են ներառել նաև հնարավոր ծառայողական միսիայի առաջադրանքներ, օրինակ՝ որպես տաճարային արարողությունների աշխատողներ կամ սննդի բարեգործական հիմնադրամի աշխատողներ։ Համոզվեք, որ զամբյուղում յուրաքանչյուր առաջադրանքի երկու օրինակ կա: Յուրաքանչյուր ուսանողի առաջարկեք զամբյուղից վերցնել մեկ թուղթ, այնուհետև նստել այն դասընկերոջ կողքին, որը վերցրել է նույն առաջադրանքով թուղթը:

Զուգընկերներից յուրաքանչյուրին տվեք հետևյալ ուղերձի օրինակը և ցուցադրեք դրան հաջորդող երեք հրահանգները:

Նախագահ Ռասսել Մ. Նելսոնը վերահաստատել է որպես միսիոներներ ծառայելու Տիրոջ կոչը.

Ես այսօր վճռականորեն վերահաստատում եմ, որ Տերը խնդրել է յուրաքանչյուր արժանավոր, ընդունակ երիտասարդի պատրաստվել և միսիա ծառայել: Վերջին Օրերի Սրբերի երիտասարդ տղաների համար միսիոներական ծառայությունը քահանայության պարտականություն է: Երիտասարդ տղաներ, ձեզ պահել են այս ժամանակի համար, երբ տեղի է ունենում Իսրայելի խոստացված հավաքումը: Երբ դուք միսիա եք ծառայում, դուք առանցքային դեր եք խաղում այս աննախադեպ իրադարձության մեջ:

Երիտասարդ և ընդունակ քույրեր, ձեզ համար միսիան նույնպես հզոր, բայց կամավոր հնարավորություն է: Մենք սիրում ենք քույր միսիոներներին և ամբողջ սրտով ողջունում ենք նրանց: Այն, ինչ դուք ներդնում եք այս աշխատանքում, փառահեղ է: Աղոթեք, որ իմանաք՝ արդյո՞ք Տերը ցանկանում է, որ դուք միսիա ծառայեք, և Սուրբ Հոգին կպատասխանի ձեր սրտին և մտքին: (Ռասսել Մ․ Նելսոն, «Քարոզենք խաղաղության ավետարանը», Լիահոնա, մայիս 2022, 6)

1. Կարդացեք ուղերձը ձեր զուգընկերոջ հետ:

2. Ի՞նչը տպավորեց ձեզ այս ուղերձից:

3. Պատրաստվեք դասարանի հետ կիսվել ձեր գաղափարներով։

Զուգընկերներից մի քանիսին առաջարկեք դասարանի հետ կիսվել իրենց գաղափարներով: Եթե ​​ուսանողները հարցեր ունենան այդ ուղերձի վերաբերյալ, օգնեք նրանց գտնել պատասխանները կամ առաջարկեք քննարկել հարցերը Տիրոջ, իրենց ծնողների կամ Եկեղեցու ղեկավարների հետ: Համոզվեք, որ ուսանողները հասկանում են միսիոներական ծառայության վերաբերյալ Տիրոջ ակնկալիքները երիտասարդ տղամարդկանցից և կանանցից:

Անձնական մտորումներ

Ցուցադրեք հետևյալ ուղերձը և հարցերը և ուսանողներին առաջարկեք խորհել միսիոներական ծառայության վերաբերյալ իրենց անձնական զգացմունքների մասին: Ուսանողներին հարցերի շուրջ խորհելու և դրանց պատասխանելու համար ժամանակ տրամադրելը կարող է հրավիրել Սուրբ Հոգուն և նախապատրաստել նրանց միտքն ու սրտերը ոգեշնչված ուսումնասիրության համար:

Նախագահ Ռասսել Մ. Նելսոնն ուսուցանել է․

Սիրելի երիտասարդ ընկերներ, դուք բոլորդ շատ կարևոր եք Տիրոջ համար: Մինչ այս պահը Նա ձեզ պահել է պահեստազորում, որպեսզի օգնեք հավաքել Իսրայելը: Միսիա ծառայելու ձեր որոշումը, լինի դա քարոզիչ, թե ծառայողական միսիա, կօրհնի ձեզ և շատերին: (Ռասսել Մ․ Նելսոն, «Քարոզենք խաղաղության ավետարանը», Լիահոնա, մայիս 2022, 6–7)

Խորհեք հետևյալ հարցերի շուրջ և ձեր պատասխանները գրեք օրագրում.

• Այդ ուղերձի ո՞ր մասերն են առավել կարևոր ձեզ համար: Ինչո՞ւ։

• Ի՞նչ է ուսուցանել նախագահ Նելսոնը, որը կարող է ազդել միսիա ծառայելու ձեր ցանկության վրա:

Մի քանի պատրաստակամ ուսանողի առաջարկեք կիսվել իրենց պատասխաններով: Երբ ուսանողները կիսվեն, մի քանի ուսանող կարող են արտահայտել հետևյալ ճշմարտությունն իրենց բառերով. Տերը կօրհնի մեզ և շատ ուրիշների, եթե մենք որոշենք ծառայել որպես Իր միսիոներներ: Այդ ճշմարտությունը գրեք գրատախտակին: Ուսանողներին խրախուսեք օգնություն խնդրել Սուրբ Հոգուց՝ իմանալու, թե ինչպես Երկնային Հայրը կցանկանար, որ իրենք կիրառեն այդ ճշմարտությունն իրենց կյանքում:

Եթե ​​կարծում եք, որ ուսանողների համար օգտակար կլինի ավելին իմանալ ծառայողական միսիաների մասին, օգտվեք «Օժանդակ ուսումնական վարժություններ» բաժնում ներկայացված նյութերից։

Միսիոներական ծառայության օրհնությունները

Հետևյալ վարժությունը կօգնի ուսանողներին ավելի լավ հասկանալ այն օրհնությունները, որոնք Տերը կարող է տալ իրենց և ուրիշներին, երբ իրենք որոշեն միսիա ծառայել:

Զուգընկերներով սուրբ գրություններում, գերագույն համաժողովի ելույթներում, օրհներգերում կամ Gospel Library հավելվածում փնտրեք հետևյալը.

1. Օրհնություններ, որոնք Տերը կարող է տալ մարդկանց մեր միսիոներական ջանքերի միջոցով:

2. Օրհնություններ, որոնք Տերը կարող է տալ մեզ՝ միսիա ծառայելու համար:

Եթե ​​կարծում եք, որ ուսանողները որոշակի ուղղորդման կարիք ունեն, յուրաքանչյուր զույգին տրամադրեք «Միսիոներական ծառայության օրհնությունները» վերնագրով աշխատաթերթը:

Միսիոներական ծառայության օրհնությունները

Ուսումնասիրեք սուրբ գրությունների հետևյալ հատվածներն ու արտահայտությունները։ Ուսումնասիրելիս փնտրեք հետևյալը.

1. Օրհնություններ, որոնք Տերը կարող է տալ մարդկանց մեր միսիոներական ջանքերի միջոցով:

2. Օրհնություններ, որոնք Տերը կարող է տալ մեզ՝ միսիա ծառայելու համար:

• Վարդապետություն և Ուխտեր 4․1–4

• Վարդապետություն և Ուխտեր 15․6

• Վարդապետություն և Ուխտեր 18.14–16

• Վարդապետություն և Ուխտեր 31․3–8

• Վարդապետություն և Ուխտեր 50․22

Նախագահ Ռասսել Մ. Նելսոնն ուսուցանել է․

Եղբայրներ և քույրեր, Հիսուս Քրիստոսի ավետարանը երբեք ավելի անհրաժեշտ չի եղել, քան այսօր։ Հակառակությունը խախտում է այն ամենը, ինչը Փրկիչը պաշտպանել և ուսուցանել է: Ես սիրում եմ Տեր Հիսուս Քրիստոսին և վկայում եմ, որ Նրա ավետարանը խաղաղության միակ մնայուն լուծումն է: Նրա ավետարանը խաղաղության ավետարան է [տես Վարդապետություն և Ուխտեր 27.16]: …

Բոլոր միսիոներներն ուսուցանում և վկայում են Փրկչի մասին: Աշխարհում տիրող հոգևոր խավարը Հիսուս Քրիստոսի լույսի կարիքն ավելի է մեծացնում: Յուրաքանչյուր ոք արժանի է իմանալու Հիսուս Քրիստոսի վերականգնված ավետարանի մասին: Յուրաքանչյուր ոք արժանի է իմանալու, թե որտեղ կարող է գտնել այն խաղաղությունը, որը «[վեր է] ամեն հասկացողությունից» [Փիլիպպեցիներին 4․7]։ (Ռասսել Մ․ Նելսոն, «Քարոզենք խաղաղության ավետարանը», Լիահոնա, մայիս 2022, 6–7)

Յոթանասունից երեց Մարկուս Բ. Նաշն ուսուցանել է․

Ավետարանով կիսվելն ուրախություն և հույս է առաջացնում ինչպես տվողի, այնպես էլ ստացողի հոգում: Իսկապես, «որքան մեծ կլինի ձեր ուրախությունը», [Վարդապետություն և Ուխտեր 18․15], երբ կիսվեք ավետարանով։ Ավետարանով կիսվելն ավելացնում է գոյություն ունեցող ուրախությունը և գոյություն ունեցող հույսը։ …

Երբ մենք բարձր չենք պահում ավետարանի լույսը, մենք տեղափոխվում ենք ստվերների տակ, որտեղ ենթարկվում ենք գայթակղությունների: Կարևոր է իմանալ, որ հակառակն անելը նույնպես ճիշտ է. բարձր պահելով ավետարանի լույսը, մենք ավելի շատ ենք մոտենում այդ լույսին և պաշտպանվում ենք գայթակղությունից: Դա մեծ օրհնություն է այսօրվա աշխարհում: (Մարկուս Բ. Նաշ, «Բարձր պահեք ձեր լույսը», Լիահոնա, նոյ. 2021, 71–72)

Երբ ուսանողներն ավարտեն ուսումնասիրությունը, յուրաքանչյուր զույգին առաջարկեք գրատախտակին գրված ճշմարտության շուրջը գրել միսիոներական աշխատանքի առնվազն մեկ օրհնություն։ Օրհնությունները գրելուց հետո, կարող եք տալ հետևյալ հարցերը, որպեսզի ուսանողներին հնարավորություն տաք կիսվելու կամ վկայելու իրենց սովորածի մասին.

• Գրատախտակին գրված ո՞ր օրհնություններն եք ստացել դուք կամ ձեր ծանոթները միսիոներական աշխատանքի միջոցով:

• Ձեր կարդացած ո՞ր սուրբ գրությունը կամ ուղերձն է օգնել է ձեզ մեծացնել Տիրոջը որպես միսիոներ ծառայելու ձեր ցանկությունը:

• Ըստ ձեզ, ինչպե՞ս կարող է միսիոներական աշխատանքն ազդել Տիրոջ հետ ձեր հարաբերությունների վրա: Ինչո՞ւ։

Կարող եք կիսվել ձեր ունեցած փորձառություններով կամ միսիոներական աշխատանքի վերաբերյալ ձեր վկայությամբ: Կարող եք նաև ցուցադրել «Value of a Full-Time Mission» (5:22) տեսանյութը, որը հասանելի է ChurchofJesusChrist.org կայքում և ուսանողներին առաջարկել փնտրել, թե ինչ պատճառներով է մարդը որոշում միսիա ծառայել:

Value of a Full-Time Mission

Ուսանողներին առաջարկեք վերհիշել դասի սկզբում ներկայացված նախագահ Նելսոնի ուղերձը: Երիտասարդ տղամարդկանց առաջարկեք շարունակաբար աղոթել, որ Տերը մեծացնի լիաժամկետ միսիա ծառայելու իրենց ցանկությունն ու կարողությունը: Երիտասարդ կանանց առաջարկեք աղոթել, որպեսզի իմանան, թե արդյոք Տերը կցանկանար, որ իրենք լիաժամկետ միսիա ծառայեն:

Լրացուցիչ նյութեր

Ինչպե՞ս կարող է Աստված օրհնել ինձ՝ միսիա ծառայելու համար:

Յոթանասունից երեց Մարկոս Ա. Այդուկայտիսը կիսվել է․

Բարձրացրու սիրտդ և ցնծա

Ես՝ որպես լիաժամկետ միսիոներ, Աստծուն ծառայելու համար ստացա բազմաթիվ օրհնություններ՝ ավելի մեծ հավատք Հիսուս Քրիստոսի և Նրա քավության հանդեպ, Նրա ուսմունքների մասին ավելի խորքային գիտելիքներ ու վկայություն, ուստի, ես հեշտությամբ չեմ տատանվի «ամեն վարդապետության քամուց» (Եփեսացիներին 4․14)։ Չկար այլևս ուսուցանելու վախը: Դժվարություններին լավատեսությամբ նայելու իմ ունակությունը մեծացավ: Նայելով այն մարդկանց և ընտանիքներին, որոնց ես հանդիպել կամ ուսուցանել եմ որպես միսիոներ, ես հասկացել եմ, որ Աստծո ուսմունքները ճշմարիտ են։ Նա ասում է, որ մեղքը չի բերում երջանկություն, այլ որ Աստծո պատվիրաններին հնազանդվելով ենք մենք բարգավաճում՝ թե նյութապես, թե հոգևորապես (տես Մոսիա 2․41, Ալմա 41․10)։ Եվ ես հասկացա, որ Աստված հրաշքների Աստված է (Մորմոն 9)։

Այս բոլոր բաները մեծ դեր ունեցան, պատրաստելով ինձ չափահաս կյանքին, ներառյալ հնարավոր ամուսնությանն ու ծնող լինելուն, եկեղեցու ծառայությանը, ինչպես նաև մասնագիտական և հասարակական կյանքին։ …

Իմ միսիան ձևավորեց իմ ամբողջ կյանքը: Ես իմացա, որ արժե ջանքեր գործադրել՝ վստահելու Աստծուն, վստահելու Նրա իմաստությանն ու ողորմությանը, Նրա խոստումներին: Ի վերջո, Նա մեր Հայրն է, և, անկասկած, ցանկանում է լավագույնը մեզ համար: (Մարկոս Ա. Այդուկայտիս, «Բարձրացրու սիրտդ և ցնծա», Լիահոնա, մայիս 2022, 42–43)

Ինչո՞ւ է միսիա ծառայելը կարևոր պարտականություն համարվում:

Տասներկու Առաքյալների Քվորումից երեց Դեյվիդ Ա. Բեդնարն ուսուցանել է․

Ավետարանը քարոզելը քահանայության ժամանակավոր պարտականություն չէ: Այն պարզապես մի գործ չէ, որով մենք զբաղվում ենք սահմանված ժամանակի ընթացքում, կամ էլ՝ հանձնարարություն, որը մենք պետք է կատարենք՝ որպես Հիսուս Քրիստոսի Վերջին Օրերի Սրբերի Եկեղեցու անդամներ: Ավելի շուտ միսիոներական աշխատանքը հոգևոր ինքնության և ժառանգության դրսևորում է: Մենք նախակարգված էինք նախամահկանացու գոյության ժամանակ և ծնվել ենք մահկանացու կյանքում՝ կատարելու այն ուխտը և խոստումը, որն Աստված կապել էր Աբրահամի հետ: Մենք այստեղ ենք, երկրի վրա՝ այս ժամանակաընթացքում մեծարելու քահանայությունը և քարոզելու ավետարանը: Ահա թե ով ենք մենք և դրա համար էլ այստեղ ենք՝ այսօր և միշտ: (Դեյվիդ Ա. Բեդնար, «Becoming a Missionary», Լիահոնա, նոյ. 2005, 47)

Օժանդակ ուսումնական վարժություններ

Միսիայի կանչը

Ուսանողներին առաջարկեք կիսվել, թե արդյոք իրենք երբևէ տեսել են մարդու, որը բացում է միսիայի կանչի մասին նամակը:

• Ինչպիսի՞ն էր այդ փորձառությունը։

• Ի՞նչ եք հիշում միսիայի կանչի մասին նամակից, բացի այն, թե որտեղ է նշանակվել ծառայելու տվյալ անձը, և որ լեզվով պետք է խոսի:

Նշեք, որ երբեմն մենք կարող ենք անտեսել խոստացված օրհնությունները, որոնք գրված են միսիայի կանչում: Ուսանողներին տրամադրեք վերջին միսիայի կանչի նամակի օրինակը: Ուսանողներին առաջարկեք փնտրել այն օրհնությունները, որոնք Տերը Իր մարգարեի միջոցով խոստանում է նրանց, ովքեր կանչվում են ծառայելու:

Ծառայողական միսիաներ

Բացատրեք, որ արժանավոր երիտասարդ տղամարդիկ և կանայք, որոնք ֆիզիկական, հոգեկան, էմոցիոնալ կամ այլ պատճառներով չեն կարողանում ծառայել քարոզչական միսիայում, կարող են կանչվել ծառայելու որպես ծառայողական միսիայի միսիոներներ: Ծառայողական միսիայի միսիոներները կարող են ծառայել Տիրոջը՝ կատարելով բազմաթիվ հանձնարարություններ, օրինակ՝ բարեգործական կազմակերպությունների, Եկեղեցու գործառույթների և ցցի կողմից ընձեռած հնարավորությունների միջոցով: Օրինակը տեսնելու համար դիտեք «Service Missions: Elder Quade’s Story» (5:19) տեսանյութը, որը հասանելի է ChurchofJesusChrist.org կայքում։

Service Missions: Elder Quade’s Story

Ուսանողներին առաջարկեք կարդալ հետևյալը ծառայողական միսիայի միսիոներների համար նախատեսված ուղեցույցներից՝ փնտրելով գաղափարներ ծառայողական միսիաների մասին.

Առաջին Նախագահությունը տրամադրել է ծառայողական միսիայի միսիոներական նպատակ՝ ուղղորդելու ձեզ ծառայելու ձեր սուրբ կանչման մեջ.

• «Մեր նպատակն է օգնել մարդկանց գալ դեպի Քրիստոս՝ ծառայելով նրանց այնպես, ինչպես Փրկիչը կծառայեր: Մենք կամավոր ծառայում ենք բարեգործական կազմակերպություններում, Եկեղեցու գործառույթներում և համայնքի ներսում: Նրա անունով մենք կծառայենք մարդկանց, ճիշտ այնպես, ինչպես Նա ծառայեց՝ արտահայտելով Իր սիրառատ բարությունը»:

Հիշեք, որ ավելի կարևոր է, թե ինչպես եք ծառայում Փրկչին, քան որտեղ եք ծառայում կամ ինչ եք անում: Նախագահ Ռասսել Մ. Նելսոնը հայտարարել է․ «Ծառայելով ամբողջ կյանքս Եկեղեցում, ես հասկացել եմ, որ իսկապես կարևոր չէ, թե որտեղ է մարդը ծառայում։ Տիրոջը հուզում է այն, թե ինչպես է մարդը ծառայում» («Ministering with the Power and Authority of God», Լիահոնա, մայիս 2018, 68)։ Ձեր ծառայությունը Վարդապետի համար է և դուք հրավիրված եք ծառայելու Նրա պես: (Missionary Standards for Disciples of Jesus Christ—Service Missions, 1.3)

• Ի՞նչը տպավորեց ձեզ։

• Ի՞նչ գաղափարներ ձեռք բերեցիք՝ որպես միսիոներ Հիսուս Քրիստոսին ներկայացնելու վերաբերյալ:

• Ինչպե՞ս կարող են այս տեղեկություններն ընդլայնել միսիոներական աշխատանքի մեր տեսլականը:

Լրացուցիչ տեղեկությունների համար ուսանողներին առաջարկեք փնտրել մանրամասներ, որոնք հասանելի են ChurchofJesusChrist.org/service-missionary կայքում կամ Gospel Library հավելվածում: