Pamilya ni Joseph Smith

Usa ka pamilya nga adunay pagtuo

Si Joseph Smith ug ang iyang pamilya nga nagtinabangay sa pagtrabaho sa ilang uma.

Natawo si Joseph Smith pagka-Disyembre 23, 1805, sa amihanang sidlakan sa Estados Unidos. Ang iyang papa ginganlan usab og Joseph. Ang ngalan sa iyang mama si Lucy. Duna siyay daghang igsoon. Ang pamilya ni Joseph mga mag-uuma. Mituo sila sa Dios ug naghigugmaay.

Joseph Smith—Kasaysayan 1:3–4

Si Joseph Smith sa batan-on pa. Ang iyang wala nga bitiis giputos og bendahe. Ang iyang mama nabalaka mahitungod kaniya.

Sa gamay pa si Joseph, nagkasakit siya nga maoy hinungdan sa problema sa iyang bitiis. Gisakitan kaayo siya. Ang pamilya ni Joseph misulay sa pagtabang nga mas momaayo ang iyang pamati, apan ang iyang bitiis sakit gihapon kaayo. Ang mga doktor naningkamot nga moarang-arang ang iyang bitiis, apan wala magsilbi.

Mga Santos, 1:7

Si Joseph Smith sa higdaanan. Ang igsoon niyang lalaki miluhod sa kilid sa higdaanan. Ang iyang mama nakigsulti sa iyang doktor nga naa sa luyo.

Miingon ang mga doktor nga kinahanglan nilang putlon ang bitiis ni Joseph aron maluwas ang iyang kinabuhi. Apan wala mosugot ang iyang mama nga ila kining buhaton. Nangutana siya kon duna bay laing paagi nga matabangan si Joseph. Ang mga doktor mihukom hinoon sa pagtangtang sa usa ka bahin sa bukog sa iyang bitiis. Nasayod si Joseph nga sakit kini, apan duna siyay pagtuo nga tabangan siya sa Dios.

Mga Santos, 1:7

Ang mga doktor ni Joseph Smith mitanyag kaniya og alkohol atol sa pag-opera sa iyang bitiis. Mibalibad si Joseph. Gigunitan siya sa iyang papa.

Ang mga doktor gustong mopainom ni Joseph og alkohol aron dili mamatikdan ang sakit. Apan mibalibad si Joseph. Gusto lang niya nga gunitan siya sa iyang papa.

Mga Santos, 1:7

Ang mama ni Joseph Smith mibiya sa kwarto samtang ang doktor nag-andam na sa pag-opera.

Mihangyo si Joseph nga pagawason ang iyang mama. Dili siya gusto nga makit-an siya sa iyang mama nga anaa sa grabe nga kasakit samtang gisamaran sa mga doktor ang iyang bitiis.

Usa ka doktor nga mihimo sa pag-opera sa bitiis ni Joseph Smith. Gigunitan siya sa iyang papa aron sa pagtanyag og suporta.

Ang papa ni Joseph migunit kaniya samtang ang mga doktor mitangtang sa nangadaot nga bahin sa bukog sa iyang bitiis. Labihan ang kasakit niini, apan gitabangan sa Dios si Joseph nga magmaisogon. Human sa pipila ka tuig, miarang-arang na ang bitiis ni Joseph, apan sakit gihapon kining ilakaw.

Mga Santos, 1:6–7

Si Joseph Smith ug ang iyang pamilya sa New York. Ang ilang trabaho mao ang pagkuha og duga sa kahoy nga maple.

Dihang nidako na si Joseph, mibalhin ang iyang pamilya ngadto sa estado sa New York. Kabos ang pamilya ni Joseph. Naningkamot sila nga makakuha og igong pagkaon alang sa ilang pamilya. Si Joseph buotan nga bata. Malipayon siya ug ganahang mokatawa ug maglingaw-lingaw.

Mga Santos, 1:5–9

Pamilya ni Joseph Smith nga malinawong nanglingkod sa kan-anan.

Ang pamilya ni Joseph nahigugma ni Jesukristo. Mag-ampo sila ug mag-uban sa pagbasa sa Biblia. Apan ang mga ginikanan ni Joseph dili kaseguro unsa nga simbahan sila magpasakop. Usa ka gabii, ang inahan ni Joseph, si Lucy, nag-ampo ug giingnan ang Ginoo nga gusto siyang makakita sa tinuod nga Simbahan ni Jesukristo. Gitubag sa Dios ang iyang pag-ampo ug misaad nga siya makakita.

Mga Santos, 1:10–11