“Unang Panan-awon ni Joseph Smith,” Mga Istorya sa Doktrina ug mga Pakigsaad (2024)

“Unang Panan-awon ni Joseph Smith,” Mga Istorya sa Doktrina ug mga Pakigsaad

1817–1820

3:23

Unang Panan-awon ni Joseph Smith

Usa ka tubag sa mapaubsanong pag-ampo

Si Joseph Smith nga naminaw sa mga tawo nga nagsangyaw bahin sa ilang naglahi-lahi nga relihiyosong gituohan.

Sa dapit nga gipuy-an sa pamilya ni Joseph Smith, dunay daghang simbahan nga nagtudlo bahin ni Jesukristo. Tanan sila nagtudlo og lain-laing mga butang bahin Kaniya. Dili segurado si Joseph kinsa ang husto. Nasayod siya nga nagkinahanglan siya sa Manluluwas, apan wala siya mahibalo asa nga simbahan ang apilan.

Joseph Smith—Kasaysayan 1:5–6; Mga Santos, 1:9

Si Joseph Smith nga nagtrabaho sa ilang uma.

Dugay na si Joseph nga naghunahuna bahin niini. Gusto niyang mapasaylo sa iyang mga sala. Mibisita na siya og daghang simbahan, apan sa gihapon mibati siya og kalibog.

Joseph Smith—Kasaysayan 1:8–10; Mga Santos, 1:9–12

Si Joseph Smith nga nagbasa sa Biblia nga nagkandila.

Usa ka adlaw, gibasa niya ang Santiago 1:5 sa Biblia. Nag-ingon kini nga kon kita nagkinahanglan og kaalam, kita makapangayo sa Dios. Nasayod si Joseph sa iyang kasingkasing nga mao kini ang kinahanglan niyang buhaton.

Joseph Smith—Kasaysayan 1:11–13

Si Joseph Smith nga naglakaw padulong sa kakahoyan duol sa iyang balay aron mag-ampo.

Sa usa ka matahom nga adlaw sa tingpamulak sa tuig 1820, miadto si Joseph sa kakahoyan duol sa iyang balay. Gusto siyang maanaa sa dapit diin mag-inusara siya aron mag-ampo sa Langitnong Amahan.

Joseph Smith—Kasaysayan 1:14–15

Si Joseph Smith nga nag-ampo didto sa kakahoyan.

Miluhod si Joseph ug nagsugod sa pag-ampo. Dihang gihimo niya kini, mibati siya og usa ka daotang gahom nga nagpugong kaniya. Gibati niya ang kangitngit nga mipalibot kaniya. Sama og dunay tawo nga nagsulay sa pagpahunong kaniya sa pagpakigsulti sa Dios. Gigamit ni Joseph ang tanan niyang kusog sa paghangyo sa Dios nga luwason siya.

Joseph Smith—Kasaysayan 1:15–16

Ang Langitnong Amahan ug si Jesukristo nagpakita kang Joseph Smith. Miluhod siya sa ilang atubangan.

Sa kalit, nakakita si Joseph og matahom nga sanag nga kahayag nga nagpaubos gikan sa langit. Nahanaw ang kangitngit, ug mibati siya og kalinaw. Diha sa kahayag, nakita ni Joseph ang Langitnong Amahan ug si Jesukristo nga nagbarog sa hangin. Gilitok sa Langitnong Amahan ang ngalan ni Joseph. Dayon mitudlo Siya ngadto ni Jesus ug miingon, “Mao kini ang Akong Hinigugmang Anak. Paminaw Kaniya!”

Joseph Smith—Kasaysayan 1:16–17

Si Jesus miingon kang Joseph Smith nga ang iyang mga sala napasaylo na.

Misulti si Jesus kang Joseph nga ang iyang mga sala gipasaylo na. Nangutana si Joseph kang Jesus kon asa nga simbahan siya moapil. Miingon si Jesus nga kinahanglan wala siyay apilan sa bisan hain niini.

Joseph Smith—Kasaysayan 1:18–19; Mga Santos, 1:16

Si Joseph Smith nga nagluhod didto sa sagradong kakahoyan, naminaw sa Manluluwas.

Miingon si Jesus nga ang importanteng mga kamatuoran mahitungod sa Iyang ebanghelyo nawala. Miingon Siya nga magpadala Siya og mga anghel aron itudlo kini nga mga kamatuoran ngadto ni Joseph, aron mapakigbahin ngadto sa kalibotan.

Mga Santos, 1:16–17

Si Joseph Smith nga naglakaw pagawas sa kakahoyan padulong sa balay.

Pagkahuman sa panan-awon, napuno si Joseph sa gugma ug kalipay. Wala na siya maglibog. Nasayod siya nga gihigugma siya sa Dios. Bisan og ang pipila ka tawo nasuko kaniya sa pag-ingon nga nakakita siya sa Langitnong Amahan ug ni Jesukristo, nasayod si Joseph nga kini tinuod.

Joseph Smith—Kasaysayan 1:20–26; Mga Santos, 1:16