Joseph ug Emma

Nagtinabangay nga madala ang Basahon ni Mormon sa kalibotan

Si Emma Hale nga naglingkod dapit sa suba duol sa iyang balay.

Si Emma Hale nagtubo sa dako nga pamilya sa Pennsylvania, dili layo sa New York, diin nagpuyo si Joseph Smith. Si Emma ug ang iyang pamilya mituo sa Dios. Si Emma ganahan nga mobasa, mokanta, mangabayo, ug magbugsay sa suba duol sa ilang balay.

Mga Santos, 1:31–32

Si Joseph Smith ug ang iyang amahan nga miagi dapit sa panimalay ni Emma Hale. Si Emma nga namintana ug nakakita ni Joseph.

Dihang nag-21 na si Emma, si Joseph Smith ug ang iyang papa miadto aron motrabaho sa usa sa mga silingan ni Emma. Ang papa ni Emma midapit nila sa pag-estar sa ilang balay.

Joseph Smith—Kasaysayan 1:56–57; Mga Santos, 1:31–32

Si Joseph Smith ug Emma nga nag-istoryahanay sa gawas sa panimalay ni Emma. Ang mga ginikanan ni Emma naa sa may pultahan.

Si Joseph ug Emma nagkailhanay. Ganahan sila nga magkuyog. Apan ang mga ginikanan ni Emma dili ganahan ni Joseph. Wala sila motuo nga nakakita siya og usa ka anghel.

Mga Santos, 1:32–33

Si Emma ug Joseph Smith nga nagsakay og karwahe nga giguyod og kabayo.

Mga usa ka tuig ang milabay, mihangyo si Joseph kang Emma nga makigminyo niya. Nagkahigugmaay si Joseph ug Emma. Naminyo sila ug didto namuyo sa New York kauban sa mga ginikanan ni Joseph.

Joseph Smith—Kasaysayan 1:57–58; Mga Santos, 1:34–35

Si Emma ug Joseph nga nagsakay og karwahe nga giguyod og kabayo padulong sa kakahoyan.

Upat ka tuig ang milabay sukad si Moroni misulti ni Joseph mahitungod sa bulawang mga palid. Dihang panahon na, giadto ni Emma ug Joseph ang bungtod diin gitago ang mga palid.

Joseph Smith—Kasaysayan 1:59; Mga Santos, 1:36–37

Gihatag ni Moroni ang bulawang mga palid ngadto ni Joseph Smith.

Ang anghel nga si Moroni nakigkita ni Joseph didto sa bungtod ug gihatag kaniya ang mga palid. Giingnan niya si Joseph nga kon buhaton niya ang labing maayo sa pag-amping sa mga palid, luwas ra kini.

Joseph Smith—Kasaysayan 1:59; Mga Santos, 1:37–38

Si Joseph Smith nga nagdala sa bulawang mga palid. Usa ka tawo ang migukod niya ug misulay sa pag-ilog sa mga palid.

Ang mga tawo nakadungog nga anaa ni Joseph ang bulawang mga palid, ug ang pipila nila misulay sa pagkawat sa mga palid gikan kaniya. Si Joseph kinahanglan nga mangita og mga dapit nga katagoan niini. Samtang nagdala si Joseph sa mga palid gikan sa gitagoan niini sa kakahoyan, pipila ka tawo ang mihasmag kaniya. Napatumba niya sila ug midagan ngadto sa balay sa iyang mga ginikanan.

Joseph Smith—Kasaysayan 1:60; Mga Santos, 1:38, 40–41

Gidala ni Joseph ang bulawang mga palid sa panimalay ug gipahikap ang iyang pamilya sa mga palid.

Dihang gidala ni Joseph sa panimalay ang mga palid, gitabangan siya sa iyang igsoong babaye sa pagpahimutang ini sa lamesa. Si Joseph gisultihan ni Moroni nga dili tugotan si bisan kinsa nga makakita sa mga palid, apan ang iyang pamilya makabatyag sa mga palid samtang nakaputos kini og panapton.

Mga Santos, 1:41

Si Emma ug Joseph nga namalhin ngadto sa bag-ong panimalay.

Gusto sa Dios nga hubaron ni Joseph ang bulawang mga palid aron mabasa kini sa mga tawo. Apan ang mga tawo sa New York padayong misulay sa pagkawat sa mga palid. Padayon si Joseph sa pagtago sa mga palid aron magpabilin kining luwas. Mao nga si Joseph ug Emma namalhin sa usa ka panimalay nga duol sa mga ginikanan ni Emma. Nanghinaot sila nga mahubad nila ang mga palid nga malinawon.

Joseph Smith—Kasaysayan 1:61–62; Mga Santos, 1:43, 45–46

Si Joseph Smith nga mihalok ni Emma sa agtang. Siya nagtabang niya sa paghubad gikan sa bulawang mga palid.

Gisugdan ni Joseph ang paghubad sa mga palid. Migamit siya og espesyal nga mga gamit nga giandam sa Dios aron itabang kaniya. Dihang naghubad si Joseph, gisulat ni Emma ang unsay iyang gisulti. Sulod sa daghang oras nagtrabaho sila. Nahingangha si Emma. Nasayod siya nga ang iyang bana naghubad pinaagi sa gahom sa Dios.

Joseph Smith—Kasaysayan 1:35; Mga Santos, 1:49