“Ang Una nga Panan-awon ni Joseph Smith,” Mga Sugilanon sa Doktrina kag mga Kasugtanan (2024)

“Ang Una nga Panan-awon ni Joseph Smith,” Mga Sugilanon sa Doktrina kag mga Kasugtanan

1817–1820

3:23

Ang Una nga Panan-awon ni Joseph Smith

Sabat sa mapainubuson nga pangamuyo

Nagapamati si Joseph Smith sa mga tawo nga nagawali parte sa lainlain nila nga mga ginapatihan sa relihiyon.

Sa lugar nga ginaistaran sang pamilya ni Joseph Smith, kadamo sang mga simbahan nga nagatudlo parte kay Jesucristo. Lainlain ang ginatudlo nila tanan parte sa Iya. Indi sigurado si Joseph kon sin-o sa ila ang insakto. Kabalo sia nga kinahanglan niya ang Manluluwas, pero indi sia kabalo kon diin nga simbahan maentra.

Joseph Smith—Kasaysayan 1:5–6; Saints, 1:9

Si Joseph Smith nga nagatrabaho sa ila uma.

Malawig ini nga ginhunahuna ni Joseph. Gusto niya nga mapatawad sa iya mga sala. Madamo sia nga simbahan nga ginbisitahan, pero nagalibog gihapon ang iya ulo.

Joseph Smith—Kasaysayan 1:8–10; Saints, 1:9–12

Si Joseph Smith nga nagabasa sang Biblia sa siga sang kandila.

Isa ka adlaw, nabasa ni Joseph ang Santiago 1:5 sa Biblia. Siling diri nga kon kinahanglan naton sang kaalam, pwede kita mamangkot sa Dios. Kabalo si Joseph sa iya tagipusuon nga amo ini ang kinahanglan niya himuon.

Joseph Smith—Kasaysayan 1:11–13

Si Joseph Smith nga nagalakat pakadto sa kakahuyan malapit sa ila balay para mangamuyo.

Sang aga sang matahum nga adlaw sang tigpamulak sang 1820, nagkadto si Joseph sa kakahuyan sa unhan sang ila balay. Gusto niya magkadto sa lugar nga pwede sia mag-isahanon para mangamuyo sa Amay nga Langitnon.

Joseph Smith—Kasaysayan 1:14–15

Si Joseph Smith nga nagapangamuyo sa kakahuyan.

Nagluhod si Joseph kag nagsugod sa pagpangamuyo. Sang ginhimo niya ini, nabatyagan niya ang malain nga gahum nga nagdakop sa iya. Nakabatyag sia sang kadulom sa palibot niya. Daw may tawo nga gusto magpauntat sa iya nga mag-istorya sa Dios. Gingamit ni Joseph ang tanan niya nga kusog para mangayo sang bulig sa Dios nga luwason sia.

Joseph Smith—Kasaysayan 1:15–16

Ang Amay nga Langitnon kag si Jesucristo nagpakita kay Joseph Smith. Nagaluhod sia sa atubang nila.

Gulpi lang, nakakita si Joseph sang matahum nga kasanag nga nagapanaog halin sa langit. Nadula ang kadulom, kag nakabatyag sia sang kalinong. Sa kasanag, nakita ni Joseph ang Amay nga Langitnon kag si Jesucristo nga nagatindog sa hangin. Ginlawag sang Amay nga Langitnon ang ngalan ni Joseph. Dayon gintudlo Niya si Jesus kag nagsiling, “Ini ang Akon Hinigugma nga Anak. Pamatii Sia!”

Joseph Smith—Kasaysayan 1:16–17

Ginhambal ni Jesus kay Joseph Smith nga napatawad na ang iya mga sala.

Ginhambal ni Jesus kay Joseph nga napatawad na ang iya mga sala. Ginpamangkot ni Joseph si Jesus kon diin nga simbahan ang iya updan. Siling ni Jesus nga waay sia sang dapat entrahan sa ila.

Joseph Smith—Kasaysayan 1:18–19; Saints, 1:16

Si Joseph Smith nga nagaluhod sa kakahuyan, nagapamati sa Manluluwas.

Hambal ni Jesus nga ang importante nga mga kamatuoran parte sa Iya ebanghelyo nadula na. Siling Niya nga mapadala Sia sang mga anghel para itudlo ining mga kamatuoran kay Joseph, para ipakigbahin sa kalibutan.

Saints, 1:16–17

Si Joseph Smith nga nagalakat papuli halin sa kakahuyan.

Sang matapos ang panan-awon, napuno si Joseph sang pagpalangga kag kalipay. Wala na sia ginaligban. Kabalo sia nga palangga sia sang Dios. Bisan pa nga ginkontra sia sang mga tawo kay ginahambal niya nga nakita niya ang Amay nga Langitnon kag si Jesucristo, kabalo sia nga matuod ini.

Joseph Smith—Kasaysayan 1:20–26; Saints, 1:16