“Ginbuligan ni Martin Harris si Joseph,” Mga Sugilanon sa Doktrina kag mga Kasugtanan (2024)

“Ginbuligan ni Martin Harris si Joseph,” Mga Sugilanon sa Doktrina kag mga Kasugtanan

1828–1829

4:39

Ginbuligan ni Martin Harris si Joseph

Pagtuon nga magsalig sa Ginuo

Gintamyaw ni Martin Harris kag sang iya asawa si Joseph kag Emma Smith.

Isa ka adlaw, sang nagaistar pa si Joseph kag Emma sa Pennsylvania, ginbisitahan sila sang amigo nila nga si Martin Harris. May malapad nga uma si Martin sa New York. Nabal-an niya ang parte sa buluhaton ni Joseph sa bulawan nga mga lamina. Nabuligan na niya si Joseph sadto, kag karon gusto niya mabal-an kon may mabulig pa sia.

Saints, 1:49

Close-up nga drowing kay Martin Harris. Nagatindog sia sa kusina sang puluy-an ni Joseph kag Emma Smith.

Dako ang pagpasalamat ni Joseph kag Emma. Abi sang madamo nga mga tawo nagabinutig si Joseph. Maayo lang kay may amigo sia nga pareho kay Martin nga nagapati nga matuod ang bulawan nga mga lamina.

Saints, 1:49

Si Joseph kag Emma Smith nga nagatindog sa sulod sang ila puluy-an upod si Martin Harris. Ginauyatan ni Joseph kag Martin ang mga pahina sang manuskrito.

Samtang gina-translate ni Joseph ang mga lamina; ginasulat ni Martin ang iya ginahambal. Malipayon si Martin sa pagbulig sa Ginuo sa sining dako nga buluhaton.

Saints, 1:50

Si Martin kag Lucy Harris nga nagabaisay sa atubang sang ila karosa sang kabayo.

Wala nalipay ang asawa ni Martin nga si Lucy. Wala sia nagapati nga may ara matuod si Joseph sang bulawan nga mga lamina. Ang pensar niya ginainto lang ni Joseph si Martin. Gusto niya nga magbalik na si Martin sa New York kag indi na magbulig kay Joseph.

Saints, 1:49–50

Si Joseph Smith nga nagauyat sang isa ka pahina sang manuskrito. Si Martin Harris nga nagaayo kay Joseph nga hulmon ang manuskrito para ipakita sa iya asawa.

Pero padayon nga nagbulig si Martin kay Joseph. Ang ginapamensar niya nga kon mabasa ni Lucy ang ila ginaobra, mapati man sia. Ginlisensya niya kay Joseph kon pwede niya dalhon sa New York ang mga pahina nga ila gin-translate para ipakita sa iya asawa. Siling ni Joseph nga pangamuyoan niya anay kag ipamangkot sa Dios.

Saints, 1:50–51

Si Joseph Smith nga nagapangamuyo para pamangkuton ang Dios kon pwede hulmon ni Martin Harris ang manuskrito.

Ginhambalan sang Ginuo si Joseph nga indi pag-ipadala kay Martin ang mga pahina. Ginpangabay ni Martin si Joseph nga magpangamuyo liwat. Nagpangamuyo si Joseph kag amo gihapon ang sabat sa iya. Pero gusto gid ni Martin nga ipakita sa iya asawa ang mga pahina, kag gusto man ni Joseph nga buligan ang iya amigo. Nangamuyo sa ikatatlo nga beses si Joseph. Sini nga tiyempo nagsiling ang Dios kay Joseph nga sia na ang bahala kon ano ang iya himuon.

Saints, 1:51

Si Martin Harris nga nagauyat sang mga pahina sang manuskrito. Si Joseph Smith nga daw nabalaka sa likod.

Siling ni Joseph kay Martin nga pwede niya dalhon ang mga pahina sa New York, pero ipakita niya ini sa pila lang ka miyembro sang pamilya. Kag kinahanglan niya ibalik ang mga pahina sa sulod sang duha ka semana. Nagsugot si Martin kag naglakat nga dala ang mga pahina.

Saints, 1:51

Si Joseph Smith nga nagaluhod sa lulubngan sang napatay niya nga bata.

Sang wala na si Martin, nabata ang isa ka lapsag sa ila ni Joseph kag Emma. Pero napatay ang bata, kag nagmasakit si Emma. Grabe ang pagpangasubo ni Emma kag Joseph.

Saints, 1:51–52

Nabalaka si Joseph kay Emma. Nabalaka man sia kay Martin. Duha ka semana na ang nagligad, pero wala pa makabalik si Martin. Nabalaka man si Emma.

Saints, 1:52

Si Martin Harris nagapungko sa lamisa, nga nagaistorya kay Joseph Smith kag sa iya mga ginikanan.

Ginhambalan ni Emma si Joseph nga magkadto sa New York kag pangitaon si Martin. Nagkit-anay si Martin kag Joseph sa balay sang iya mga ginikanan. Sang ginpamangkot ni Joseph si Martin parte sa mga pahina, nasubuan gid si Martin. Siling niya nga nadula ang mga pahina. Bisan diin na niya ini ginpangita pero indi gid niya makita.

Saints, 1:52–53

Si Emma Smith nga ginahakos si Joseph Smith.

Nasubuan gid katama si Joseph kag nakulbaan. Kabalo sia nga sala niya nga ginpadala niya ang mga pahina kay Martin. Nagpauli sia nga ginsugid kay Emma ang natabo. Nag-abot si anghel Moroni kag ginbawi ang bulawan nga mga lamina. Siling niya nga kon magpaubos si Joseph kag maghinulsol, ibalik sa iya ang mga lamina kag maka-translate na liwat.

Doktrina kag mga Kasugtanan 3:5–11; 10:1–3; Saints, 1:53–54

Si Joseph Smith nga nagaluhod sa kilid sang iya katre, nga nagapangayo sang kapatawaran sa Dios.

Pila ka semana, ginpanumdom ni Joseph ang sala niya nga nahimo. Nangamuyo sia kag nangayo sang kapatawaran. Ginpatawad sia sang Dios. Ginhambalan Niya si Joseph nga ang mga pahina ginkawat sang mga tawo nga gusto punggan ang buluhaton sang Dios. Pero wala sang makapugong sa buluhaton sang Dios. May plano ang Dios para magpadayon ang Iya buluhaton.

Doktrina kag mga Kasugtanan 3:1–10; Saints, 1:54–55

Si Joseph kag Emma Smith nga nagaistorya kay Martin Harris. Si Joseph nga ginakamusta ang kamot ni Martin Harris.

Ginbalik ni Moroni ang mga lamina kay Joseph. Ginhambalan sang Dios si Joseph kag Martin nga kon magpaubos sila kag magsalig sa Iya, makapadayon sila sa pagbulig sa Iya buluhaton sa madamo nga paagi. Makabulig sila sa pagdala sang Libro ni Mormon sa kalibutan. Ini nga libro makabulig sa mga tawo sa bisan diin nga maghinulsol kag magpati kay Jesucristo.

Doktrina kag mga Kasugtanan 3:16–20; 5:21–35; Saints, 1:56–57