“Ginpadala sang Ginuo si Oliver Cowdery,” Mga Sugilanon sa Doktrina kag mga Kasugtanan (2024)

“Ginpadala sang Ginuo si Oliver Cowdery,” Mga Sugilanon sa Doktrina kag mga Kasugtanan

1828–1829

3:11

Ginpadala sang Ginuo si Oliver Cowdery

Pagtuon kon paano nagahambal sa aton ang Dios

Si Joseph kag Emma Smith nga nagaobra sa atubang sang ila gamay nga puluy-an.

Padayon si Joseph kag Emma sa pag-translate sang Libro ni Mormon. Mabudlay ang buluhaton, kag kinahanglan man nila mag-obra sa ila uma. Nangamuyo si Joseph nga padalhan sia sang Amay nga Langitnon sang tawo nga makabulig sa iya sa pag-translate sang Libro ni Mormon.

Saints, 1:56, 58

Si Oliver Cowdery nga nagabagting sang lingganay sang eskwelahan.

Malayo didto sa New York, si Oliver Cowdery, isa ka hubin nga maestro, nagaistar upod sa mga ginikanan ni Joseph Smith. Ginatudloan ni Oliver ang mga manghod ni Joseph.

Saints, 1:58–59

Si Oliver Cowdery nga nagapungko malapit sa fireplace kag nagaistorya sa mga ginikanan ni Joseph Smith.

Nakabati si Oliver parte kay Joseph kag sa bulawan nga mga lamina. Nangin interesado sia. Gin-istorya niya ang mga ginikanan ni Joseph. Ginsugiran nila si Oliver nga ginaobra ni Joseph ang buluhaton sang Dios.

Saints, 1:59

Si Oliver Cowdery nga nagaluhod sa likid sang iya katre kag nagapangamuyo para mas makabalo pa gid parte kay Joseph Smith.

Mas nangin interesado pa gid si Oliver. Ginhambalan si Oliver sang mga ginikanan ni Joseph nga dapat magpangamuyo sia kag hibaluon sa iya kaugalingon kon buluhaton gid bala ini sang Dios. Gani isa ka gab-i, nangamuyo si Oliver nga hugot sa iya tagipusuon. Ginhatagan sia sang Dios sang kalinong sa iya kaisipan. Nahibal-an ni Oliver nga si Joseph Smith isa ka alagad sang Dios. Nabatyagan niya nga dapat niya buligan si Joseph.

Saints, 1:60

Si Oliver Cowdery kag Joseph Smith nga nagapungko malapit sa fireplace. Si Emma nga nagauyat sang pila ka pahina sang manuskrito.

Sang magsira ang klase sina nga tuig, naglakat si Oliver para makigkita kay Joseph kag Emma. Nag-istoryahanay si Joseph kag Oliver hasta sa kagab-ihon parte sa bulawan nga mga lamina kag sa buluhaton sang Dios.

Saints, 1:60

Si Oliver Cowdery nga nagasulat sa isa ka pahina sang manuskrito.

Siling ni Oliver nga pwede sia magsulat samtang naga-translate si Joseph. Nanamian sia sang iya nagakatun-an parte kay Jesus. May mga pamangkot man sia kag gusto niya nga mas magbaskog sa pagtuo.

Saints, 1:61

Si Oliver Cowdery kag Joseph Smith nga nagapungko sa mga bangko malapit sa bintana.

Paagi kay Propetang Joseph, naghatag ang Ginuo sang mensahe para kay Oliver. Siling Niya kay Oliver nga panumdumon ang gab-i nga nangamuyo sia. Ginhatagan sia sang Dios sang kalinong. Ang Dios lang ang nakabalo parte sining pangamuyo. Mas nagbakod ang pagtuo ni Oliver. Padayon niya nga ginbuligan si Joseph, kag gintudloan sia sang Ginuo sang madamo nga butang parte sa kon paano nagahambal ang Dios sa aton.

Doktrina kag mga Kasugtanan 6:14–24; 8:1–3; 9:7–9; Saints, 1:62–64