1825–1828

Da Joseph ken Emma

Agtitinnulong a mangisangbay iti lubong ti Libro ni Mormon

Dimmakkel ni Emma Hale iti maysa a dakkel a pamilia idiay Pennsylvania, saan nga adayo iti New York, a nagnaedan ni Joseph Smith. Namati ni Emma ken ti pamiliana iti Dios. Kaay-ayo ni Emma ti agbasa, agkanta, agsakay iti kabalio, ken aggaud iti bilog iti karayan iti asideg ti pagtaenganna.

Saints, 1:31–32

Idi agtawen ni Emma iti 21, immay nagtrabaho ni Joseph Smith ken ti amana iti maysa kadagiti kaarruba ni Emma. Inawis ida ti ama ni Emma nga agyan iti pagtaenganna.

Joseph Smith—Pakasaritaan 1:56–57; Saints, 1:31–32

Naginnammo da Joseph ken Emma iti tunggal maysa. Nagustuanda ti agkadua. Ngem saan a nagustuan dagiti nagannak ni Emma ni Joseph. Saanda a patien a nakakita isuna iti maysa nga anghel.

Saints, 1:32–33

Agarup makatawen kalpasanna, kiniddaw ni Joseph ken ni Emma a makikallaysa kenkuana. Naginnayat da Emma ken Joseph iti tunggal maysa. Nagkallaysada ket napanda nakipagnaed kadagiti nagannak ni Joseph idiay New York.

Joseph Smith—Pakasaritaan 1:57–58; Saints, 1:34–35

Uppat a tawen ti napalabas manipud idi imbaga ni Moroni ken ni Joseph ti maipapan kadagiti pinanid a balitok. Idi orasen daytoy, napan da Emma ken Joseph iti turod a nakailemmengan dagiti pinanid.

Joseph Smith—Pakasaritaan 1:59; Saints, 1:36–37

Naam-ammo ni anghel Moroni ni Joseph iti turod ket intedna kenkuana dagiti pinanid. Imbagana ken ni Joseph a no aramidenna ti amin a kabaelanna a mangasikaso kadagiti pinanid, natalgedto dagitoy.

Joseph Smith—Pakasaritaan 1:59; Saints, 1:37–38

Nangngeg dagiti tao nga adda ken ni Joseph dagiti pinanid a balitok, ket sumagmamano kadakuada ti nangpadas a mangtakaw kadagiti pinanid kenkuana. Nasken a mangbirok ni Joseph kadagiti lugar a pangilemmenganna kadagitoy. Bayat ti panangbagkat ni Joseph kadagiti pinanid manipud iti maysa a lugar a pagilemmengan iti kakaywan, dinarup ti sumagmamano a lallaki. Pinatumbana ida ket nagtaray a napan iti pagtaengan dagiti dadakkelna.

Joseph Smith—Pakasaritaan 1:60; Saints, 1:38, 40–41

Idi inyawid ni Joseph dagiti pinanid iti pagtaenganda, tinulongan ti kabsatna a babai a nangikabil kadagitoy iti lamisaan. Imbaga ni Moroni ken ni Joseph a dina ipalubos a makita ti asino man dagiti pinanid, ngem marikna ti pamiliana dagiti pinanid bayat ti pannakabalkotda iti lupot.

Saints, 1:41

Kayat ti Dios nga ipatarus ni Joseph dagiti pinanid a balitok tapno mabasa dagiti tao dagitoy. Ngem intuloy dagiti tao iti New York a nangpadpadas a takawen dagiti pinanid. Nasken nga ltuloy ni Joseph nga ilemmeng dagiti pinanid tapno agtalinaed a natalged dagitoy. Isu nga immakar da Joseph ken Emma iti pagtaengan nga asideg kadagiti nagannak ni Emma. Ninamnamada a makaipatarusda a sitatalna kadagiti pinanid.

Joseph Smith—Pakasaritaan 1: 61–62; Saints, 1:43, 45–46

Rinugian ni Joseph ti panangipatarus kadagiti pinanid a balitok. Inusarna dagiti naisangsangayan a ramit nga insagana ti Dios a mangtulong kenkuana. Bayat ti panagipatarus ni Joseph, nagisurat ni Emma iti no ania ti kinunana. Inoras a nagtinnulongda a nagtrabaho. Nasdaaw ni Emma. Ammona nga agipatpatarus ti asawana babaen ti bileg ti Dios.

Joseph Smith—Pakasaritaan 1:35; Saints, 1:49