1829

Isubli dagiti Anghel ti Priesthood

Bileg nga agaramid iti trabaho ti Dios

Kabayatan ti panagipatarus da Joseph ken Oliver kadagiti pinanid a balitok, naammuanda a kayat ni Jesus a mabuniagan ti tunggal maysa. Intedna pay daytoy a bileg kadagiti tao a mangbuniag iti dadduma. Saan pay a nabuniagan ni Joseph. Kayatna a maammuan iti ad-adu pay maipapan iti panagbuniag.

Joseph Smith—Pakasaritaan 1:68; Saints, 1:65–66

Pinampanunot da Joseph ken Oliver no siasino ti addaan bileg a mangbuniag kadagiti tao ita. Inkeddengda ti agsaludsod iti Dios. Napanda iti kakaywan ket nagparintumengda a nagkararag.

Joseph Smith—Pakasaritaan 1:68; Saints, 1:66

Bayat ti panagkararagda, nagparang ti maysa nga anghel. Kinunana nga isu ni Juan Bautista, a nangbuniag ken ni Jesucristo iti nabayagen a panawen. Intedna kada Joseph ken Oliver ti Aaronic Priesthood. Ti priesthood ti bileg ti Dios. Mausar daytoy a mangbendision kadagiti annak ti Dios.

Doktrina ken Katulagan 13; Joseph Smith—Pakasaritaan. 1:69, 72; Saints, 1:66–67

Kinuna ni Juan Bautista a ti tao nga addaan iti Aaronic Priesthood ket mabalinna nga isuro dagiti tao nga agbabawi ken mangbuniag kadakuada. Imbaga ni Juan kada Joseph ken Oliver nga agpabuniagda. Napanda iti maysa a karayan ket nagbinnuniagda. Idi lumung-awda manipud iti danum, napnuanda iti Espiritu Santo. Nakaragragsakda!

Joseph Smith—Pakasaritaan 1:70–73

Iti agangay, dimteng ti dadduma pay nga anghel. Tallo kadagiti Apostol ni Jesus—da Pedro, Santiago, ken Juan—ti nangted kada Joseph ken Oliver iti Melchizedek Priesthood. Ita mabalin nga ited da Joseph ken Oliver ti sagut ti Espiritu Santo. Nagbalin pay nga Apostol da Joseph ken Oliver. Mabalinda nga idauluan ti Simbaan ken agbalin a naisangsangayan a saksi ni Jesucristo.

Doktrina ken Katulagan 27:12; Saints, 1:84