1828–1829

Tulongan ni Martin Harris ni Joseph

Panagsursuro nga agtalek iti Apo

Maysa nga aldaw, bayat ti panagnaed da Joseph ken Emma idiay Pennsylvania, immay simmarungkar kadakuada ti maysa a gayyem nga agnagan iti Martin Harris. Agtagikua ni Martin iti dakkel a talon iti New York. Ammona maipapan iti trabaho ni Joseph kadagiti pinanid a balitok. Tinulonganna idi ni Joseph, ket ita kayatna a maammuan no adda pay maaramidna a makatulong.

Saints, 1:49

Nagyaman da Joseph ken Emma Smith. Impagarup ti adu a tattao nga agul-ulbod ni Joseph. Nasayaat no adda gayyem a kas ken ni Martin a mamati a pudno dagiti pinanid a balitok.

Saints, 1:49

Kabayatan ti panagipatarus ni Joseph kadagiti pinanid, ni Martin ti nagisurat iti no ania ti kinunana. Naragsak ni Martin a tumultulong iti Apo iti daytoy naindaklan nga aramid.

Saints, 1:50

Saan a naragsak ti asawa ni Martin a ni Lucy. Saanna a patien a talaga nga addaan kadagiti pinanid a balitok ni Joseph. Impagarupna nga al-allilawen ni Joseph ni Martin. Kayatna nga agsubli ni Martin idiay New York ket isardengna ti panangtulong ken ni Joseph.

Saints, 1:49–50

Ngem intuloy ni Martin ti nakipagtrabaho ken ni Joseph. Napanunotna a no mabasa ni Lucy ti ar-aramidenda, mamati met isuna. Dinamagna ken ni Joseph no mabalinna nga alaen dagiti panid nga impatarusda idiay New York tapno ipakitana iti asawana. Kinuna ni Joseph nga agkararag ken agsaludsod iti Dios.

Saints, 1:50–51

Imbaga ti Apo ken ni Joseph a dina ipalubos nga alaen ni Martin dagiti panid. Indawat ni Martin ken ni Joseph nga agkararag manen. Nagkararag ni Joseph ket nakaawat iti isu met la a sungbat. Ngem talaga a kayat ni Martin nga ipakita iti asawana dagiti panid, ket kayat ni Joseph a tulongan ti gayyemna. Nagkararag ni Joseph iti maikatlo a gundaway. Daytoy a gundaway imbaga ti Dios ken ni Joseph a mabalinna nga ikeddeng no ania ti aramidenna.

Saints, 1:51

Imbaga ni Joseph ken ni Martin a mabalinna nga itugot dagiti panid iti New York, ngem mabalinna nga ipakita laeng dagitoy iti sumagmamano a miembro ti pamilia. Ket nasken nga isublina dagiti panid kalpasan ti dua a lawas. Immanamong ni Martin ket pimmanaw nga intugotna dagiti panid.

Saints, 1:51

Idi nakapanawen ni Martin, naipasngay ti maysa a maladaga kada Joseph ken Emma. Ngem natay ti maladaga, ken nagsakit ni Emma. Nagladingit unay da Emma ken Joseph.

Saints, 1:51–52

Nagdanag ni Joseph maipapan ken ni Emma. Nagdanag pay maipapan ken ni Martin. Napalabas ti dua a lawas, ken saan pay a nakasubli ni Martin. Nagdanag met ni Emma.

Saints, 1:52

Imbaga ni Emma ken ni Joseph a mapan idiay New York tapno sapulenna ni Martin. Naam-ammo ni Joseph ni Martin iti pagtaengan dagiti dadakkelna. Idi dinamag ni Joseph ken ni Martin ti maipapan kadagiti panid, nagladingit unay ni Martin. Kinunana a napukaw dagiti panid. Sinapulna iti amin a lugar ngem saanna a makita dagitoy.

Saints, 1:52–53

Nagladingit unay ni Joseph ken nagbuteng daytoy. Ammona a nagbiddut a nangipalubos nga alaen ni Martin dagiti panid. Nagawid ken imbagana ken ni Emma no ania ti napasamak. Immay ni anghel Moroni ket imbabawina dagiti pinanid a balitok. Kinunana a no napakumbaba ken agbabawi ni Joseph, mabalinna nga isubli dagiti pinanid ket agipatarus manen.

Doktrina ken Katulagan 3:5–11; 10:1–3; Saints, 1:53–54

Iti uneg ti adu a lawas, pinanunot ni Joseph maipapan iti biddut nga inaramidna. Nagkararag ken nagdawat iti Apo iti pammakawan. Pinakawan isuna ti Dios. Imbagana ken ni Joseph a dagiti panid ket tinakaw dagiti tao a mangpadpadas a mangpasardeng iti trabaho ti Dios. Ngem awan ti makapasardeng iti trabaho ti Dios. Adda plano ti Dios tapno agtultuloy ti trabahona.

Doktrina ken Katulagan 3:1–10; Saints, 1:54–55

Insubli ni Moroni dagiti pinanid ken ni Joseph. Imbaga ti Dios kada Joseph ken Martin a no napakumbaba ken agtalekda Kenkuana, mabalinda nga ituloy ti tumulong iti trabahona iti adu a wagas. Mabalinda ti tumulong a mangisangbay iti Libro ni Mormon iti lubong. Matulongan daytoy a libro dagiti tao nga agbabawi ken mamati ken ni Jesucristo.

Doktrina ken Katulagan 3:16–20; 5:21–35; Saints, 1:56–57