1828–1829 он

Их Эзэн Оливер Каудериг илгээв

Бурхан бидэнтэй хэрхэн ярьдгийг сурах нь

Иосеф, Эмма хоёр Мормоны Номыг орчуулсаар байв. Энэ ажил хүнд байсан ба тэд бас ферм дээрээ ажиллах хэрэгтэй байлаа. Иосеф Тэнгэрлэг Эцэгээс Мормоны Номыг орчуулахад туслах хэн нэгнийг илгээхийг гуйн залбирав.

Гэгээнтнүүд, 1:56, 58

Алс хол Нью Йоркод сургуулийн залуу багш Оливер Каудери Иосеф Смитийн эцэг эхийнд амьдардаг байв. Оливер Иосефын дүү нарт хичээл заадаг байжээ.

Гэгээнтнүүд, 1:58–59

Оливер Иосефын тухай болон алтан ялтаснуудын талаар олж сонсжээ. Тэр энэ тухай сонирхов. Тэрээр Иосефын эцэг эхтэй ярилцлаа. Тэд Иосеф Бурханы ажлыг хийж байгааг Оливерт хэлэв.

Гэгээнтнүүд, 1:59

Оливерын сониуч зан улам нэмэгдсэн ажээ. Иосефын эцэг эх Оливерт залбирч, энэ нь Бурханы ажил мөн эсэхийг өөрөө олж мэдэх хэрэгтэй гэж хэлсэн юм. Тиймээс нэг шөнө Оливер хамаг зүрх сэтгэлээсээ залбирлаа. Бурхан түүний оюун ухаанд амар амгаланг өгчээ. Оливер Иосеф Смитийг Бурханы үйлчлэгч гэдгийг мэдэж авлаа. Тэр Иосефт туслах хэрэгтэй гэж мэдэрчээ.

(Гэгээнтнүүд, 1:60)

Хичээлийн жил дуусахад Оливер Иосеф, Эмма хоёртой уулзахаар явав. Иосеф, Оливер хоёр алтан ялтаснууд болон Бурханы ажлын талаар шөнөжин ярилцжээ.

(Гэгээнтнүүд, 1:60)

Оливер Иосефыг орчуулж байх үед бичье гэж хэлэв. Тэр Есүсийн тухай сурч байгаа зүйлдээ дуртай байлаа. Түүнд асуултууд байсан ба тэр илүү бат бөх итгэлтэй болохыг хүсжээ.

(Гэгээнтнүүд, 1:61)

Их Эзэн бошиглогч Иосефоор дамжуулан Оливерт захиас өгчээ. Тэр Оливерт залбирсан тэр шөнөө сана гэж хэлэв. Бурхан түүнд амар амгаланг өгчээ. Энэ залбирлыг нь Бурхан л мэдэж байв. Оливерын итгэл улам хүчтэй болсон аж. Тэрээр Иосефт тусалсаар байсан бөгөөд Бурхан бидэнтэй хэрхэн ярьдаг талаар Их Эзэн түүнд олон зүйлийг заасан юм.

Сургаал ба Гэрээнүүд 6:14–24; 8:1–3; 9:7–9; Гэгээнтнүүд, 1:62–64