ʻOku kei ʻofa nai ʻa e ʻOtuá ʻiate au?

ʻOku taʻe-hano-ngataʻanga ʻa e ʻofa ʻa e ʻOtuá ʻiate koé. Te Ne ʻofa ʻiate koe ʻo taʻengata.¹ Mahalo kuó ke aʻu ki ha tuʻunga ʻokú ke ongoʻi ai he ʻikai lava ha taha ʻo ʻofa moʻoni ʻiate koe kapau te nau ʻiloʻi “moʻoni” koe. Mahalo ʻokú ke ongoʻi ʻoku ʻikai totonu ke ke maʻu ha tokoni mei ha taha pea ʻoku ʻikai ke ke taau mo e ʻaloʻofa ʻa e ʻOtuá. ʻOku tokolahi mo ha kakai kehe kuo nau fefaʻuhi mo e ngaahi palopalema tatau. Ko ʻenau pōpoakí: ʻoku ʻikai ke ke tuenoa, pea ʻoku malava pē ke liliu ʻa e anga hoʻo vakai kiate koé.

ʻE lava ke faingofua ʻa e fihia ʻi he ngāue ʻaki ʻo e ponokalafí mo hono fakamaaʻi koé. Ka neongo ia, ko e foha pe ʻofefine koe ʻo e ʻOtuá, pea ʻoku taʻe fakangatangata ho mahuʻingá. He ʻikai ʻaupito ke ke mamaʻo mei he tokoni ʻa Sīsū Kalaisí mo ʻEne Fakaleleí. ʻI he taimi ʻokú ke fai ai ha fehalākí, ʻoku ʻikai ʻuhinga ia ko ha tokotaha kovi koe. Hangē ko e akonaki ʻa ʻEletā Teili G. Lenilaní, ʻoku tokanga lahi ange ʻa e ʻOtuá ki he tuʻunga te tau aʻusiá ʻi he ngaahi fehalaaki kuo tau faí.²