“Te u faʻu fēfē ha palani ke taʻofi hono mamataʻi ʻo e ponokalafí?” Tokoni Maʻaku (2021)
“Te u faʻu fēfē ha palani ke taʻofi hono mamataʻi ʻo e ponokalafí?” Tokoni Maʻaku
Te u faʻu fēfē ha palani ke taʻofi hono mamataʻi ʻo e ponokalafí?
Naʻe akoʻi ʻe Palesiteni M. Lāsolo Pālati ʻo pehē, “ʻOku faingataʻa ki ha niʻihi hono fakafaikehekeheʻi e taumuʻá mo e palaní kae ʻoua ke nau toki ʻiloʻi ko e taumuʻá ko ha ikuʻanga pe ko ha ngataʻanga, ka ko e palaní ʻa e hala te ke aʻusia ai e meʻa ko iá.”1 ʻOku fie maʻu ʻa e palani fakaleleí ki hono fokotuʻu ha taumuʻa ke taʻofi hono mamataʻi ʻo e ponokalafí pea fakatomalá.
Ko Hono Tali ʻo e Ngaahi Fakafeʻātungiá mo e Faingataʻá
ʻI hoʻo kamata ke liliu ho ʻulungāngá, mahalo te ke aʻusia ha ngaahi fakafeʻātungia mo e faingataʻa. Ka ʻi hoʻo aʻusia ʻa e ngaahi fakafeʻātungiá, te ke lava ʻo ako pea hoko ʻo mālohi ange. Ko e meʻa mahuʻinga tahá ke ʻoua naʻá ke foʻi ʻiate koe pē mo hoʻo ngaahi palaní koeʻuhí pē ko haʻo fehalaaki pe ʻikai hoko ho ngaahi ʻamanakí.
Kapau ʻokú ke ongoʻi taʻepauʻia ʻi hono fakakaukauʻi ha palani ʻe lelei maʻaú, te ke lava ʻo kole tokoni ki he ʻEikí, te Ne tataki koe ki he kakai te nau lava ʻo tokoniʻi koe ke palani mo fai ha ngaahi liliú.
Fai ha Ngāue
-
Fakakaukau ke talanoa mo e fāmilí, ngaahi kaungāmeʻá, ko ha kulupu tokoni, ko ha mataotao ʻi he moʻui lelei fakaeʻatamaí, kau mataotao fakafaitoʻó, mo ha niʻihi kehe te nau lava ʻo tokoni.
-
Fekumi ki ha ʻū tohi tokoni pē kiate kita pe ko ha fakamatala ʻi he ngaahi tefito ʻokú ke lolotonga moʻua aí.
-
Ako e ngaahi sīpinga ʻo e kakai ʻi he folofolá kuo nau ikunaʻi ʻa e ngaahi ʻahiʻahí. Ko e hā te ke lava ʻo ako meiate kinautolú?
-
Fakakaukau ki he meʻa te ke lava ʻo fai ke fakaleleiʻi ʻaki e ngaahi vā fetuʻutaki kuo maumaú. ʻI he vā fetuʻutaki ʻoku leleí, ʻoku ʻikai fie maʻu ʻa e ngaahi hoá ke mamataʻi ʻa e ponokalafí. Ko e hā ha meʻa te ke lava ʻo fai ke fakafoki mai e loto-falala kuo molé?