Talanoa ki he Fakaakeaké: Ko Sitelisi ʻEni

Naʻe fefaʻuhi ʻa Sitelisi mo ha maʻunimā ʻe he ponokalafí ʻi he konga lahi ʻo ʻene moʻuí, ka naʻe faifai peá ne maʻu ha ʻamanaki lelei ʻo fakafou ʻi he Fakalelei ʻa Kalaisí ʻi heʻene kumi tokoni mei heʻene pīsopé.

Ngaohi ʻi Hono Tataú

Ko ha ʻofefine au ʻo e ʻOtuá ʻoku ou fakaakeake mei he maʻunimā fakasekisualé. Naʻe hoko hoku maʻunimaá ko e aʻusia faingataʻa, ʻikai ha ʻamanaki lelei mo ongoʻi tuenoa taha ʻi heʻeku moʻuí. Naʻá ku ongoʻi ʻo hangē naʻá ku fihia ʻi ha luo loloto. Ko e meʻa pē ne u lava ʻo fanongo ki aí ko e vanavanaiki hoku leʻó ʻi heʻeku ui tokoní. Ko e lōngonoá pē ne fakafetaulakiʻi ʻaki aú—lōngonoa mei hoku ngaahi kaungāmeʻá, fāmilí, pea hangē ne kau ai mo e ʻEikí. Naʻá ku ongoʻi tuenoa ʻaupito ʻo ʻikai ha fakatuʻamelie ʻe tokoniʻi au ʻe ha taha ke u hao mei he faingataʻá ni.

Naʻe lahi e ngaahi founga ne uesia ai ʻe he maʻunimā fakasekisualé ʻeku moʻuí. Koeʻuhí ko e ola ʻo ʻeku ongoʻi mā ʻi heʻeku maʻunimaá, naʻá ku ongoʻi naʻe ʻikai ʻofa ha taha ʻiate au pea naʻe ʻikai haʻaku taumuʻa pe mahuʻinga ʻi he moʻuí ni. Neongo ʻeku feinga ʻi he mālohi taha ne u lavá, ka naʻe ʻi ai maʻu pē ha kakai lelei mo angatonu ange ʻiate au. Naʻá ku ongoʻi ʻa e fakaʻau ke mate moʻoni hoku laumālié mei loto ki tuʻa. ʻI he kotoa ʻo ʻeku moʻuí, naʻá ku fefaʻuhi mo ha meʻa faingataʻa ʻaupito, ne u malimali fakangalingali maʻu pē koeʻuhí ke ʻoua naʻa ʻilo mai ʻe ha taha ʻa e mamahi moʻoní. Ka naʻe ʻikai ke u fiefia; naʻe mālō pē ʻeku moʻuí. Ne u feinga maʻu pē ke ikunaʻi hono maʻunimā aú ʻiate au pē, ʻo u feinga ke fakaʻehiʻehi kae ʻikai feinga ke fakaakeake.

Naʻá ku fakakaukau ke u sio ki heʻeku pīsopé, pea naʻá ne fakafeʻiloaki au ki he Addiction Recovery Program. Naʻá ne ʻomi kiate au ʻa e fakahinohino ʻo e Addiction Recovery Program mo fokotuʻu mai ke u ʻalu ki he ngaahi fakatahá. Naʻá ku tekeʻi ʻa e fakakaukaú ni, he naʻá ku fuʻu ilifia ke fehangahangai mo e kakai kehé neongo kapau ne nau fefaʻuhi mo e ngaahi meʻa tatau naʻá ku faí. Naʻá ku fakakaukau ke u ngāueʻi ʻiate au pē ʻa e ngaahi sitepú pea hokohoko atu ʻeku sio fakauike ki heʻeku pīsopé. Naʻe ngāue ʻa Sētane ʻi he ʻaho mo e pō ke taʻofi ʻeku fakalakalaká, ka naʻá ku ʻiloʻi naʻe ngata pē hono ivi tākiekiná ʻi he matapā ʻo e falelotú ʻi he taimi kotoa pē naʻá ku fakataha ai mo ʻeku pīsopé.

Naʻe kiʻi fuofuoloa, ka ʻi heʻeku ngāue ʻi he Sitepu 1, naʻe fakamolū hoku lotó pea kamata ke u fakatokangaʻi naʻe ʻikai ha founga te u lava ai ʻo fakahoko toko taha ʻeni. Naʻá ku fie maʻu ha poupou lahi ke u lava ʻo ikunaʻi ʻaki hoku maʻunimaá. Naʻá ku fakatokangaʻi naʻe mālohi ange ʻa e ivi ʻo Sētané ʻi he taimi naʻá ku toko taha aí, pea neongo naʻe tokoni lahi ʻeku pīsopé, ka he ʻikai ke ne kei tokoniʻi toko taha ai pē au ʻi he toenga ʻo ʻeku moʻuí. Naʻe fie maʻu ke u kumi mo tauhi ʻeku founga tokoni pē ʻaʻakú, ko ia ne u fakakaukau leva ke u ʻalu ki heʻeku ʻuluaki fakatahá.

ʻOku ou manatuʻi lelei ʻa e pō naʻe fai ai ʻeku fuofua fakatahá. Naʻá ku manavasiʻi naʻa sio mai e kakai fefine ʻi he kulupu tokoní kiate au ʻaki ha loto-fakamaau mo nau ʻiloʻi ko ha tokotaha kovi au. Naʻá ku manavasiʻi foki naʻá ku sio ki he niʻihi kehe ʻoku nau ʻiloʻi aú. ʻOku ou ʻiloʻi he taimí ni naʻe ngāue ʻa e filí ke tauhi au ʻi he faʻahinga fakakaukau manavasiʻi ko iá. Naʻá ku fuʻu ilifia ʻaupito ʻi heʻeku fononga atu ki aí. Ka ʻi heʻeku aʻu atú, naʻe ʻi ai ʻeku pīsopé ke tataki au ʻi he matapaá.

Ko e taimi naʻá ku fuofua hū atu aí, ko ha fefine pē ʻe toko taha naʻe ʻi aí. Naʻá ne talitali loto-māfana au pea naʻe kiʻi holo hifo ai ʻeku ongoʻi ilifiá. Ka neongo ia, ʻi he tokolahi ange ʻa e kakai fefine ne hū maí, naʻá ku ongoʻi ne foki mai ʻeku ilifiá. Ne u tangutu fakahanoku ʻi hoku seá pea ʻikai ke u fesiofaki mo ha taha. Ne kamata ke u fifili pe ko e hā koā ʻeku meʻa ʻoku fai aí.

ʻI he kamata ʻa e fakatahá, naʻá ku ongoʻi ʻa e hū mai ʻa e Laumālié ki he lokí ʻo Ne ʻākilotoa au ʻaki ha maama faifakamoʻui fakaʻofoʻofa. Ne kamata ke tafe noa pē hoku loʻimatá, pea ne u ongoʻi e fanafana mai ʻeku Tamai Hēvaní kiate au ʻokú Ne ʻofa ʻiate au pea ʻoku ou ʻi he feituʻu totonu. ʻI he vahevahe ʻa e fefine takitaha, ne fetongi māmālie ʻeku ngaahi ongoʻi lōmekiná ʻaki ʻa e ngaahi ongoʻi fakapapau—ʻo fakapapauʻi mai naʻe ʻikai ke u tuenoa, pea ʻoku ʻikai ko e tokotaha kovi mo fakalielia au ne fakaʻau ke u tui kuó u hoko ki aí. Naʻe teʻeki ʻaupito ke u mafakakaukaua kuo ʻi ai ha niʻihi kehe tatau mo aú, ka ko ʻeni kuó u ʻi ha loki ne fonu ai ha ngaahi ʻofefine fakaʻofoʻofa ʻa e ʻOtuá, ʻa ia ne nau fehangahangai mo e ngaahi faingataʻa tatau mo aú. Naʻá ku mavahe mei he fakataha ʻi he pō ko iá mo ha ongoʻi taau, ʻofeina, fakaivia, mo ha loto-fakapapau lahi ange ʻi he meʻa ne u ongoʻi ʻi he kotoa ʻo ʻeku moʻuí.

ʻI heʻeku hokohoko atu he taimí ni ke ʻalu ki he ngaahi fakatahá, ʻoku ou mavahe mo ha ʻamanaki lelei foʻou ʻoku ʻikai ke u tuenoa ʻi heʻeku fonongá. Kuó u fetaulaki mo ha kakai lelei tokolahi ʻi he halá ni, ʻa ia kuo nau hokohoko atu ke langaki moʻui kiate au.

ʻOku ou fakamālō lahi taha ki heʻeku Tamai Hēvaní mo Sīsū Kalaisi. Naʻá ku ʻofa maʻu pē ʻi hoku Fakamoʻuí, ka naʻe lahi fau ʻeku ongoʻi maá ʻo ʻikai ai ke u tui ne u taau ke kolea ʻEne ʻaloʻofá. Naʻe ʻikai ke u teitei ʻiloʻi e founga ke fakafalala fakataautaha ai ki Hono mālohí ke fakamoʻui aú. Ko e meʻa pē ne fie maʻu ke u faí ko e tui, kapau te u kole mo falala kiate Ia, te Ne ʻi ai. Pea naʻá Ne ʻi ai. Naʻá Ne ʻomi ha ngaahi founga kiate au ke ikunaʻi e maʻunimaá ʻo fakafou ʻi he ngaahi tefitoʻi moʻoni ʻo e ongoongoleleí naʻe akoʻi ʻi he ngaahi sitepu ʻo e Addiction Recovery Program. Koeʻuhí ko e founga ko ʻení, pea mo hoku Fakamoʻuí ʻi hoku tafaʻakí ʻo tāpuekina au ʻaki ʻa e mālohí mo e loto-toʻá, naʻe ʻikai ai ke u toe lava ʻo fakaʻikaiʻi ʻa Hono toʻukupú. Naʻá ku kamata ʻaki ʻeku tala moʻoni naʻe ʻikai haʻaku mālohi ke ikunaʻi ʻa e maʻunimaá ʻiate au pē. Naʻá ku falala ki he ʻOtuá pea kamata leva ʻeku fakaakeaké.

Ne u toki lavaʻi ha taʻu ʻe taha mo e konga ʻo ʻeku fakaakeake mei he maʻunimaá. ʻOku ou fakafetaʻi lahi ki heʻeku Tamai Hēvaní ʻi Heʻene kātekina aú, pea mo hono oʻi, mo faitokonia au ke u maʻu ha mahino lahi angé. Naʻe ʻi ai ha taimi naʻá ku fefaʻuhi fakaʻaho ai mo hono maʻunimā aú, ka kuo faifai pea fakatauʻatāinaʻi au mei he ngaahi haʻi ʻo e ngaahi fakaʻaiʻai mo e fefaʻuhi fakaʻaho ko iá. Naʻá ku ʻilo ko hoku maʻunimā fakasekisualé ko ha fakaʻilonga pē ia ʻo ha meʻa fakataautaha ʻoku fakamamahi lahi ange—ʻa hono ʻikai fakatokangaʻi hoku mahuʻinga fakatāutahá. ʻOku ou ʻiloʻi he taimí ni ko ha ʻofefine fakaʻofoʻofa au ʻo e ʻOtuá. ʻOku ʻikai ke u toe sio ki he sioʻatá mo fakakaukau ʻoku ou palakū mo taʻemahuʻinga. ʻOku ʻikai ke u toe mā mei hoku ʻīmisi totonú, he kuo ngaohi au ʻi Hono tataú, pea ʻoku taʻefakangatangata ai hoku mahuʻingá.

Ko e talanoá ni ʻoku ʻuluaki maʻu ia mei he uepisaiti Addiction Recovery Program.