“E faapefea ona ou maua sē e tomai faapitoa i le soifua maloloina faalemafaufau ua tatau mo a’u?” Fesoasoani mo A’i (2021)

“E faapefea ona ou maua sē e tomai faapitoa i le soifua maloloina faalemafaufau ua tatau mo a’u?” Fesoasoani mo A’u

E faapefea ona ou maua sē e tomai faapitoa i le soifua maloloina faalemafaufau ua tatau mo a’u?

E mafai ona taufaafefe le sailia o se fomai faapitoa e faatoilaloina ponokalafi. E mafai ona fesoasoani faamatalaga nei ia te oe e filifili ai se fomai faapitoa i le soifua maloloina faalemafaufau e tatau mo oe.

O fomai faapitoa o le soifua maloloina faalemafaufau ua agavaa e suesueina ma togafitia tulaga o le maloloina faalemafaufau. O le toatele ua i ai e le itiiti ifo se tikeri po o aoaoga e sili atu ona maualuluga, o aoaoga faamasani, ma faamaoniga o tomai. Ia mautinoa o le fomai/polofesa e te filifilia, ua laiseneina e tuuina atu auaunaga o le soifua maloloina faalemafaufau. Ia manatua o le aofaiga o lo latou totogi faapolofesa po o le tele o le aotauina ua latou maua e le o le faailoga aupito sili lea o le tele o le agavaa po o le fesoasoani latou te mafaia.

O le a le ituaiga paaga tausima’i o le soifua maloloina faalemafaufau ou te manaomia?

O se tulaga lelei e amata ai atonu o le fuafuaina lelei o le ituaiga o fomai o le soifua maloloina faalemafaufau e sili ona talafeagai ma ou manaoga ma isi tulaga uma.

O fomai polofesa e tele ina faapitoa i matātā patino e pei o le atuatuvale, faaaogaina sese o vailaau, po o togafitiga faaleaiga. O nisi nei o ituaiga o fomai sili ona taatele.

Foma’i Loto
Fomai Faalemafaufau
Tausi soifua o le soifua maloloina faalemafaufau
Tagata faigaluega faafomai o agafesootai ua laiseneina
Fomai mo mafutaga ulugalii ma aiga
Faufautua faapolofesa

Ina ia aoao atili e uiga i nei fomai polofesa, tagai i le “Sueina o se Tagata Polofesa o le Soifua Maloloina Faalemafaufau e Fetaui mo Oe.”¹

O le a le mea e tatau ona ou mafaufau i ai pe a filifili mai i ituaiga eseese o fomai o le soifua maloloina faalemafaufau?

Mafuaaga o le sailia o fautuaga. O le toatele o fomai polofesa o le soifua maloloina faalemafaufau e agavaa e togafitia le tele o luitau o le maloloina faalemafaufau, ae atonu e te manao e filifili se tasi e faapitoa i le faatoilaloina o ponokalafi po o se isi itu o saofaga tonu lava i lou faaaogaina o ponokalafi.
O le ituaiga o togafitiga e manaomia. O le toatele o i latou e faaaogaina ponokalafi, atonu e i ai faafitauli e faatatau i o latou o aafiaga totino faaletagata, mafaufau, agafesootai, ma faaleagaga. O se taunuuga la, e te ono manaomia ona vaai le silia ma le tasi le fomai o le soifua maloloina faalemafaufau. Mo se faataitaiga, e te ono manaomia ona vaai se fomai e tuuina mai ai se talavai ma se isi fomai o le soifua maloloina faalemafaufau mo le fautuaga.
Lau paketi. E tatau ona e filifilia se fomai polofesa e te gafataulima ona totogi. Afai e mafai ona e faia, vaavaai se fomai e taliaina lau inisiua. E taua lou mafaia ona faaauau togafitiga mo le aofaiga o le taimi e te manaomia e aunoa ma ni lave tautupe soona faaalu.

E mafai faapefea ona ou iloa le fomai sili o le maloloina faalemafaufau mo a’u?

Mafaufau e talanoaina fesili nei ma ni tagata po o fomai o le maloloina faalemafaufau ua e fuafuaina:

O a aoaoga ma aoaoga faamasani ua latou maua? E fia ni tausaga o lo latou poto masani?
Pe ua faapitoa i latou i le togafitia o tagata o loo sailia se fesoasoani i le faatoilaloina o le faaaogaina o ponokalafi?
O a kamupani inisiua o latou galulue faatasi?
O a o latou itula o le ofisa, tau ma totogi, ma le umi o le taimi o siaki ma vaaiga a fomai?
O le a le mamao o lo latou ofisa mai lau galuega po o le fale?
Pe o latou taliaina ni ma’i fou?
Pe latou te faia ni togafitiga mo tagata taitasi, togafitiga mo ulugalii, pe o mea uma ia? O le fea o se ituaiga po o ni ituaiga o togafitiga e te lagona e sili ona aoga mo le tulaga o i ai lou soifua?
O a mea o manaomia e lou toalua? Mata e aoga foi mo latou pe a feiloai ma lenei fomai polofesa?

E alagatatau ona faia fesili e pei o nei pe a mautonu pe o se fomai tatau lea mo oe. E mafai ona e fai atu fesili nei ao lei faatonuina sou uluai taimi faatulagaina. Ia mataitu lau uluai tali faalelagona pe a e talanoa i le fomai. Ia faatuatuaina oe lava ma lau faamasinoga. Mafaufau pe foliga mai e fetaui o ia ma oe, o ou manaoga, ma ou uiga patino.

O le mea mulimuli, ia e lototele. A o e sailia le taitaiga ma le malosi o le Alii, e mafai ona ta’ita’i atu oe i laasaga agai i le faamaloloina e tatau mo oe.