Tala o le Toe Foi i le Olamau: Feiloai ia Sidreis

Sa feagai Sidreis ma se vaisu ponokalafi i le tele o lona olaga, ae sa iu ina ia maua le faamoemoe e ala i le Togiola a Keriso a o ia sailia se fesoasoani mai le epikopo.

Na Faia i Lona Faatusa

O au o se afafine o le Atua ua toe malosi atoatoa mai se vaisu faalefusua’i. O la’u vaisu o se aafiaga aupito pogisa, aupito leai se faamoemoe, ma aupito tuulafoaiina i lo’u olaga. Sa ou lagonaina na pei ua ou pa’ulia i totonu o se lua loloto. Na o le pau le mea sa mafai ona ou lagona o lo’u lava siuleo a o ou taufonō mo se fesoasoani. Sa na o le sāō le mea sa ma fetaiai—sāō mai a’u uo, aiga, ma foliga mai o le Alii foi. Sa ou matuai lagonaina lo’u tuua toatasi ma le leai o se faamoemoe faapea o le a mafai ona aapa ifo se tasi e toso a’e a’u i luga.

Sa faalavefau le vaisu i tulaga feusuaiga i lo’u olaga i le tele o le mau ala. I se taunuuga o le maaasiasi sa ou lagonaina ona o la’u vaisu, sa ou lagonaina ai ua leai se tasi sa alofa ia te au ma ua leai so’u faamoemoega po o se taua i lenei olaga. Tusa lava pe ou te taumafai malosi i le mea ou te mafaia, o le a i ai pea lava tagata e sili atu ona lelei, sili atu ona amiotonu nai lo a’u. Sa ou lagonaina le matuai mamae o lo’u agaga mai totonu i fafo. Mo le umi e mafai ona ou manatuaina, sa ou tautevateva i le olaga, ma tuu pea se ’ata’ata faapipii i o’u foliga ina ia le iloa e se tasi lo’u mafatiaga moni. Ae sa ou le fiafia; sa na ona tau lava ina ou ola. Sa ou taumafai lava e faatoilalo la’u vaisu i la’u lava ala, i le na ona taumafai lea e taofia nai lo le taumafai malosi mo le toe foi i le olamau.

Sa tonu ia te au e vaai lo’u epikopo, ma sa ia folasia mai ia te au le Addiction Recovery Program. Na ia tuu mai ia te au le taiala o le Addiction Recovery Program ma fautua mai ou te alu i fonotaga. Sa ou faaseloa le manatu, ona sa ou matua fefe lava e faafesagai ma isi tagata tusa pe o la foi sa tauivi i latou ma mea lava ia sa ou faia. Sa tonu ia te au ou te galue lava a’u ia i laasaga ma faaauau pea ona vaai lo’u epikopo i vaiaso taitasi. Sa galue Satani i le ao ma le po e taofiofi a’u i lalo, ae sa ou iloaina sa tuua o ia i le faitotoa o le falelotu i taimi uma ou te feiloai ai ma le epikopo.

Na umi se taimi, ae a o o’u galue i le Laasaga 1, sa faamaluluina lo’u loto ma na amata ona ou iloa ai e leai se auala e mafai ai ona ou faia na o a’u lenei mea. Sa ou manaomia le malosi e ala mai i nisi e toatele e mafai ai ona faatoilalo la’u vaisu. Sa ou iloaina sa sili atu le malosi o Satani pe a na o a’u, ma e ui ina sa maoae lo’u epikopo, ae sa leai se auala e mafai ai ona tumau pea le avea na o ia lava ma o’u lagolago e faavavau. Sa manaomia ona ou sueina ma faatumauina la’u lava polokalama lagolago, o lea sa tonu ai ia te au e auai atu i la’u uluai fonotaga.

Ou te manatuaina lelei lava le po o la’u uluai fonotaga. Sa ou fefe i tilotilo mai tamaitai o le vaega lagolago ia te au ma ni mata tautuua’i ma iloa ai oka so’u leaga. Sa ou matuai fefe foi ne’i ou vaai i nisi e iloaina au. Ua ou iloa nei sa galue le fili e taofi au i lena tulaga faalemafaufau o le fefe. Sa matuā ou fefe lava a’o ou agai atu i le fonotaga. Ae ina ua ou taunuu, sa i ai lo’u epikopo iina e faasino atu a’u i le faitotoa.

Ina ua ou faatoa savali atu i totonu, sa na o le toatasi le uso sa i ai iina. Sa matuai mafanafana lona faafeiloai mai o a’u ma sa tau tuuitiitia ai lo’u fefe. Peitai, ao faasolo ina toatele tamaitai na ulu mai i totonu, sa ou toe lagonaina le toe foi mai o lo’u fefe. Sa ou faamimigi i lo’u nofoa ma ou te lei autilo sa’o atu i se isi. Sa ou tau mafaufau po o le a la’u mea sa fai iina.

A o amata le fonotaga, sa ou lagonaina le ulufale mai o le Agaga i le potu ma siomia ai a’u i se malamalama faamalolo matagofie. Sa vave ona tafe ifo loimata i o’u foliga, ma sa ou lagonaina le musumusu mai o lo’u Tama Faalelagi ia te au e alofa o Ia ia te au, ma ua ou i ai i le nofoaga sa’o. I le faagasolo ai o tamaitai taitasi sa faasoa mai, sa faasolosolo malie ona suia o’u lagona lofituina o le maasiasi i lagona lofituina o le faamaoniga—faamaoniga sa le na o a’u, ma e le o a’u o le tagata ma’i ma le leaga sa ou ola ae ma talitonu sa ou avea ai. Sa matua leai se taimi i lo’u olaga i tua atu o le taimi lea na ou mafaufauina faapea e i ai foi nisi e pei o au, a o lea ua ou i ai i totonu o se potu e tumu i afafine lalelei o le Atua o e o loo feagai foi ma luitau lava e tasi pei o au. Sa ou tuua le fono i lena po ma le lagona o le sili atu ona taliaina, alofagia, faamanaina, ma tuuto atu nai lo le mea sa ou lagonaina i lo’u olaga atoa.

O le taimi nei a o faaauau pea ona ou auai i fonotaga, ou te tuua lava ma le faamoemoe faafouina faapea ua le na o a’u i la’u faigamalaga. Ua ou feiloai atu i le mau tagata lelei i luga o lenei ala o e o loo faaauau pea lo latou siiaeina o a’u.

E matua sili ona ou faafetai i lo’u Tama Faalelagi ma Iesu Keriso. Sa ou alofa pea lava i lo’u Faaola, ae sa matuai tele naua lo’u maasiasi o lea sa ou le talitonu ai sa ou agavaa lava e valaau atu mo Lona alofa tunoa. Sa matua ou le’i iloaina pe faapefea ona ou faalagolago au lava ia i Lona mana e laveai ai au. Na pau le mea sa ao ona ou faia o le talitonu lea afai ou te aapa atu ma faatuatuaina o Ia, o le a i ai o Ia iina. Ma sa i ai o Ia. Sa Ia tuutuu ifo se apefa’i e 12-faasitepu ia te au i le faatusa o mataupu faavae o le talalelei o loo aoaoina i laasaga o le Polokalama o le Toe Foi i le Olamau Mai Vaisu. Faatasi ai ma lea apefa’i, ma lo’u Faaola i o’u tafatafa na faamanuiaina ai au i le malosi ma le lototoa, sa le mafai ai ona ou toe faafitia Lona aao faaloaloa mai. Sa amata ona ou ioeina e leai so’u malosi e faatoilalo ai la’u vaisu e a’u lava ia. Sa ou faatuatuaina le Atua ma amata ona ou a’e atu i le toe foi i le olamau.

Faatoa ou pasia lata mai nei le tausaga ma le afa o le manino o lo’u mafaufau. Ou te matua faafetai lava i lo’u Tama Faalelagi mo le galue ma le onosai faatasi ma a’u, tapueina a’u, ma fesoasoani mai ia ou maua le manino ma le malamalama. Sa i ai se taimi sa ou tauivi ai ma lo’u vaisu i aso taitasi, ae o lea ua i’u ina faasaolotoina au mai noanoataga o na faama’itega ma tauiviga o aso taitasi. Sa ou aoaoina o lo’u vaisu faalefeusua’i, ua na o se auga lea o se mala tele faaletagata—o le le iloaina lea o lo’u lava taua. Ua ou iloa nei o a’u o se afafine lalelei o le Atua. Ua ou le toe tilotilo i le faaata ma mafaufau ou te auleaga ma leai se aoga. Ua ou le toe matamuli nei i o’u lava foliga, aua sa faia au i Lona faatusa, ma ua avea ai au o se tasi e le gata mai lona taua.

Ua aumaia tonu lenei tala mai le Addiction Recovery Program website.