E mafai faapefea ona ou faia se fuafuaga e taofi ai le matamata i ponokalafi?

Na aoao mai Peresitene M. Russell Balard, “O nisi e faigata ona latou iloaina le eseesega i le va o se sini ma se fuafuaga seia oo ina latou iloaina o se sini o se taunuuga po o se mutaaga, ae o se fuafuaga o le auala lea e te taunuu ai iina.”¹ O le faatuina o se sini e taofi le matamata i ponokalafi ma ia salamo e manaomia ai le fuafuaina ma le faaeteete.

Tali Atu i Tulaga e Fai ma Faafitauli ma Faigata,

A o e amata savalia le ala o le suia ai lau amio, atonu o le a e oo i ni tulaga e fai ma faafitauli ma faigata. Ae a o e feagai ma tulaga e fai ma faafitauli, e mafai ona e aoao ma oo ina e malosi atili ai. O le ki o le, aua lava nei e fiu ia te oe lava ma au fuafuaga ona ua e faia se mea sese pe e le o ogatasi foi mea e pei ona sa e faamoemoeina.

Afai e te lagona le le mautonu e uiga i le tau faatulagaina o se fuafuaga o le a aoga mo oe, e mafai ona e fesili i le Alii mo se fesoasoani, ma o le a Ia taitai oe i tagata e mafai ona fesoasoani ia te oe e fuafua ma faia fetuunaiga.

Faia Faatinoga

• Mafaufau e feutagai ma le aiga, uo, se vaega lagolago, se polofesa o le soifua maloloina faalemafaufau, polofesa faafomai, ma isi e ono mafai ona fesoasoani ane.

• Saili ia tusi o fesoasoaniga mo oe lava po o tusiga e uiga i autu atonu o loo aafia ai oe.

• Suesue i faataitaiga o tagata i tusitusiga paia o e na manumalo i o latou tofotofoga. O a ni mea e mafai ona e aooao mai ia i latou?

• Mafaufau i mea e mafai ona e faia e toe faaleleia ai sootaga ua lepetia. I sootaga maloloina, ua faamoemoeina ia paaga e aua nei matamata i ponokalafi. O le a se mea e mafai ona e faia e toefuatai ai faatuatuaga ua aveesea?

Faamatalaga

1. M. Russell Ballard, “Toe Foi Atu ma Mauaina,” Ape. 2017 konafesi aoao.