Aisea e tupu ai pea lea mea?

Atonu e te iloa ua e pa’ulia ma ua le mafaamatalaina lou toefoi pea lava pea i ponokalafi. Atonu na e taumafaia ni fōfō eseese. Atonu foi na e maua se suiga lelei mo se taimi, ae ua e toefoi lava i ponokalafi.

O le faamaoni ia te oe lava atoa ma isi tagata e uiga i lou faaaogaaga o ponokalafi, o le a fesoasoani ia te oe e te agaigai ai i luma i lau malaga ia e suia. O se tasi o auala e faia ai lenei mea o lou mafaufau ma le toto’a i ou faama’itega. O se faama’itega o se mea e faaosofia ai se manao po o se naunauga mo oe e saili atu i ponokalafi. Mo se faataitaiga, o nisi tagata e faaosofia e matamata i ponokalafi pe a uma ona i ai ni aafiaga latou te lagonaina ai le tuliesea, le taua, pe le alofagia.

Faaaoga ni nai minute e mafaufau ai ma tusi i lalo faama’itega atonu na taitaiina atu ai oe e saili ia ponokalafi i taimi ua tuanai. E mafai ona e faaopoopo i lau lisi a o e maua nisi manatu. O nisi faataitaiga o faama’itega e aofia ai le:

Faama’itega mai le loto:

• Ita

• Faanoanoa po o le lotofaavauvau

• Lagonaina o le lealofagiaina

• Popolega

• Nofonofovale

• Atuatuvale

• Tuuatoatasi

• Manatu maualalo ia te oe lava po o le lagona le vavaeese mai le Atua

• Popolega i le mavae ai o faigata po o le manatuaina o sauaga na tutupu i le tuanai

Faama’itega mai i fafo:

• Faigata i se mafutaga

• Faafitauli tautupe

• Faafitauli faaleaiga

• Taimi faapitoa o le aso po o le po

• Suiga e lei faamoemoeina o le olaga

• Faaaogaaga po o le faatautala o fualaau faasaina

• Vaaia faafuasei o se faaosofia faalefeusua’i

• Uo po o le siosiomaga faaleaganuu

A e lagona loa ua e sauni, iloilo faama’itega taitasi na e tusia i lalo. E mafai ona e faafesoota’ia lenei faama’ite i se mea patino i le tuanai lea na e liliu atu ai i ponokalafi mo se lagolelei po o se faasalaveiga? Pe o mafai ona e iloa ni mamanu i lau amio i taimi ua tuanai? Afai ua e i ai i se tulaga faapena, o le a se mea o le a ese ona e faia? Mo se faataitaiga, nai lo le liliu atu i ponokalafi, pe o i ai se uo faatuatuaina, tagata o le aiga, po o se faufautua e mafai ona e faafesoota’ia? E mafai ona e talanoa ia te ia e uiga i ou lagona, pe tau lava foi ina fai se talanoaga puupuu. O isi manatu e aofia ai gaoioiga faaletino, faalogologo i musika, tusitusi i se apitalaaga pe faitau se tusi, pe tuu atu se auauanga mo se isi tagata.

O lenei faagasologa e mafai ona avea o se laasaga e agai atu i le faasaolotoga o oe lava mai amioga na maitauina ai oe i taimi ua tuanai. I le taimi ua tuanai, atonu e te lei mafaufau po o anafea ma pe aisea foi na e liliu atu ai i ponokalafi. Atonu na e ta’uamiotonuina lau amio pe tuua’ia foi isi tagata, nofoaga, po o ni mea. Ae o le taimi nei ua mafai ona e amata tauaveina le tiutetauave o au faatinoga, e ui atonu e te manaomia ona faailoa mea tiga, faamaasiasi, pe faigata na tutupu. O le faamaoni ia te oe lava ma isi tagata e uiga i lou faaaogaaga o ponokalafi o le a tatala ai foi lou loto e talia le fesoasoani mai lou Tama o i le Lagi ma le Faaola ma o le a saunia ai oe e maua malamaamaaga ia o le a taitai atu ai oe i le salamo ma le faamalologa.

Faia Faatinoga

• Iloilo nisi o ou mafaufauga e uiga ia te oe lava. O fea o nei mafaufauga e ogatusa ma upumoni o le talalelei? O fea o nei mafaufauga e ono matua le tonu lava?

• Talanoa i amioga maloloina tauafineaitane ma lou toalua, matua, po o se tagata lagolago talafeagai. E mafai foi ona aoga le talanoa ma se fomai polofesa o le soifua maloloina faalemafaufau pe faafomai o le e iloa ou uiga tausili.

• Afai ua e faaipoipo, talanoa ma lou toalua i ona aafiaga ona o se taunuuga o lou faaaogaaga o ponokalafi. E mafai ona taua ma aoga mo oulua ma lou toalua le fefaasoaai o o oulua lagona.