Pagsabot sa imong paggamit sa pornograpiya

“Pagsabot sa imong paggamit sa pornograpiya,” Tabang alang Kanako (2021)

“Pagsabot sa imong paggamit sa pornograpiya,” Tabang alang Kanako

Pagsabot sa imong paggamit sa pornograpiya

Mahimong mobati nga nabug-atan kaayo ug makahahadlok nga malambigit sa pornograpiya. Usa sa makatabang nga unang lakang mao ang pagsabot sa kagrabehon sa imong paggamit sa pornograpiya ug giunsa niini pag-apektar nimo. Kon ikaw adunay mas maayong pagsabot sa imong nahimutangan diha sa han-ay sa paggamit og pornograpiya, ikaw adunay mas maayo nga kahigayonan sa pagbuntog niini.

Si Presidente Dallin H. Oaks nagtudlo nga adunay upat ka nagkalain-lain nga ang-ang sa pagkalambigit sa pornograpiya¹:

Sulagmang nabantang: “Mituo ko nga ang tanan sulagmang nabantang ngadto sa pornograpiya. Walay sala niini kon atong talikdan ug dili kini paday[o]non.”
Panagsa nga mga paggamit: “Ang kakuyaw sa bisan unsang tinuyo nga paggamit og pornograpiya, dili igsapayan kon permi o panagsa kaayo, mao nga kini kanunayng nagdapit sa mas kanunayng pagpabantang, nga dili kapugngan nga mas magsige og hunahuna sa sekswal nga mga pagbati ug pamatasan.”
Naghin[o]bra nga paggamit: “Ang tinuyo nga pagbalik-balik og gamit sa pornograpiya makapahimo niini nga naandang gawi [habit]. … Uban sa kanunayng paggamit, ang mga indibidwal makasinati og dugang kahinam nga makabaton sa sama nga mga reaksyon aron matagbaw.”
Dili na kapugngan ang paggamit (pagkaadik): “Nagumon na ang usa ka tawo kon makamugna na kini og ‘dependency’ (usa ka medikal nga termino nga gigamit sa paggamit sa mga drugas, alkohol, grabing pagpanugal, ubp.) mahisama ngadto sa usa ka ‘dili kapugngan nga panginahanglan’ nga ‘nagkinahanglan og prayoridad sa hapit tanang butang sa kinabuhi.’”²

Daghang tawo kinsa nakigbisog sa pornograpiya mahimong motawag sa ilang kaugalingon nga naadik. Kini nga tawag mahimong makadaot kaayo ug makalipat kon dili kini tinuod. Unsa gayod ang ipasabot sa pagkaadik ngadto sa usa ka butang? Ang pagkaadik nagpasabot sa mga kinaiya nga ang mga tawo mibati nga napugos nga mosubli bisan kon ang mga sangpotanan negatibo. Ang mao nga mga kinaiya kasagaran mosangpot ngadto sa lain nga mga problema, sama sa:

Mga problema sa mga pakigrelasyon.
Panarbaho, akademiko, o uban pang may kalabotan nga mga problema.
Usa ka tinguha nga magpalain o motago.
Pagpangita og mas grabe ug mas daghan nga grapikong mga matang sa pornograpiya aron sa pagtagbaw sa imong panginahanglan alang sa dugang nga pampagana.
Dili na makahimo sa mga butang nga sekswal.
Pagbati og kaulaw ug ubos nga bili sa kaugalingon.

Ania ang pipila ka pangutana nga tingali imong ipangutana samtang imong ikonsiderar kon ikaw naadik ba sa pornograpiya.

Kamakanunayon: Kapila ko kasagaran motan-aw og pornograpiya?

Mas kanunay ang pagtan-aw sa pornograpiya sa indibidwal, mas magkagrabe ang problema. Ang panagsa nga pagtan-aw sa pornograpiya kasagaran nagpaila og dili kaayo grabe nga problema ug gamay ra ang kalagmitan nga maadik, bisan kon ang binuhatan dili gihapon angay ug makadaot.

Gidugayon: Unsa na ko kadugay nga nalambigit sa pornograpiya?

Kon ikaw wala gayod makahunong sa pagtan-aw og pornograpiya sa taas na nga panahon—sama sa pipila na ka tuig—tingali mas maglisod ka sa pagbuntog niini kay sa nalambigit ka sa pornograpiya sa mas mubo lang nga panahon. Kon ikaw nagtan-aw og pornograpiya sukad pa sa imong pagkabata, ikaw adunay kalagmitan nga mahimong maadik paglabay sa panahon.

Pagrisgo: Unsa ko kaandam nga morisgo aron ako makatan-aw og pornograpiya?

Kon ikaw andam nga morisgo sa pagtan-aw og pornograpiya, nan ang imong kinaiya tingali lisod na nga usbon. Ang pagrisgo mahimong mag-apil sa pagsulay sa pagtago sa paggamit og pornograpiya, pagpamakak ngadto sa kapikas, o pagtan-aw og pornograpiya sa trabahoan. Kini nga kinaiya mahimong mopadulong sa diborsiyo, mga problema sa pamilya, pagkataktak sa trabaho, o mga kalihokang kriminal.

Inadlaw-adlaw nga pagpakigbisog: Ang pornograpiya ba nakapahimo sa akong inadlaw-adlaw nga mga buluhaton nga mas lisod?

Kon ikaw naadik sa pornograpiya, mahimong maglisod ka sa paghimo sa imong inadlaw-adlaw nga mga buluhaton. Ang mga paghunahuna sa pornograpiya mookupar sa indibidwal ngadto sa punto nga ang pagkatulog, pagtrabaho, o uban pang buluhaton sa balay mahimong lisod. Bisan gani ang mga pakig-istoryahanay o mga kalihokan sa pamilya mahimong mahagiton. Ang pagsige og hunahuna mahimong adunay dili himsog nga impluwensiya sa mga panaghigalaay, mga relasyon sa pamilya, mga responsibilidad, ug mga kalihokan.

Pagsabot sa Imong Kinaiya

Bisan og human na nimong gikonsiderar kini nga mga pangutana, mahimong wala pa gihapon kay klaro nga pagsabot kon ikaw ba naadik sa pornograpiya. Hinoon, kon imong susihon ang imong mga linihokan, mahimong magsugod na ka nga mas makasabot sa imong paggamit og pornograpiya. Kini mahimong makatabang nimo sa pagsugod og himo og plano alang sa kausaban.

Kon imong nakita nga ang imong problema mas seryoso o kon ikaw naglisod nga mouswag, tingali magkinahanglan ka og tabang nga propesyonal. Pagkat-on pa og dugang kabahin sa pagpangita og propesyonal nga tabang pinaagi sa pagbasa sa “Unsaon nako sa pagpangita og usa ka propesyonal sa kahimsog sa pangisip nga angay alang kanako?”

Kon ikaw mogahin og oras ug paningkamot aron sa pagsabot sa imong paggamit sa pornograpiya, ikaw mihimo sa una nga lakang padulong sa kausaban sa imong kinaiya. Ang kausaban kanunay nga posible.

Lihoka

Hunahunaa ang pagsulat sa imong mga tubag sa mga pangutana dinhi niini nga artikulo. Ihulagway ang kagrabehon sa imong naandang gawi sa pornograpiya.
Ilha ang mga indibidwal o grupo nga imong kadangpan. Ang Family Services Pornography Addiction Support Groups (PASG), Sexaholics Anonymous (SA), Fortify, ug uban pang tigsuporta nga mga grupo makatabang kaayo alang sa daghang indibidwal. Ang mga kapikas mahimo usab nga makakita nga makatabang kaayo ang pagtambong og usa ka tigsuporta nga grupo. Ang uban nga mga kapanguhaan nga makatabang mahimong maglakip sa Addiction Recovery Program [Programa aron Maulian gikan sa Pagkaadik], sa Association of Latter-day Saint Counselors and Psychotherapists, Family Services, ug sa Society for the Advancement of Sexual Health.