Istorya Mahitungod sa Pagkaulian: Ila-ilaha si Sidreis

Si Sidreis nag-atubang sa pagkaadik sa pornograpiya sa taas nga panahon sa iyang kinabuhi, apan siya sa kataposan nakakita og paglaom pinaagi sa Pag-ula ni Kristo samtang nangayo siya og tabang sa iyang bishop.

Gilalang sama sa Iyang Hitsura

Ako anak nga babaye sa Dios nga nagpaayo gikan sa sekswal nga pagkaadik. Ang akong pagkaadik mao ang labing lisod, labing kawalay paglaom, ug labing masulub-on nga kasinatian sa akong kaugalingon. Gibati nako nga daw nalubong ko sa usa ka lawom nga lungag. Ang ako lang nga madungog mao ang akong kaugalingon nga echo samtang ako nanawag og tabang. Gisugat lang ko sa kahilom—kahilom gikan sa akong kahigalaan, pamilya, ug mura og sa Ginoo. Gibati nako nga hingpit nga nag-inusara uban sa pagkawalay paglaom nga naay bisan usa nga mokab-ot aron mobira kanako.

Ang sekswal nga pagkaadik mibabag sa akong kinabuhi sa daghang paagi. Isip resulta sa kaulaw nga akong gibati tungod sa akong pagkaadik, akong gibati nga walay bisan usa nga nahigugma kanako ug nga ako walay katuyoan o bili niini nga kinabuhi. Bisan kon naningkamot ko og maayo kutob sa akong mahimo, aduna gayoy mas maayo, mas matarong nga mga tawo kay kanako. Akong gibati ang akong kalag nga nalaya sa literal nga paagi gikan sa sulod pagawas. Kutob sa akong mahinumdoman, ako naglakaw latas sa kinabuhi, nga naay pinugos nga pahiyom aron walay makahibalo sa tinuod nga kasakit. Apan dili ako malipayon; nagpakabuhi lang ko. Pirme ko nga naningkamot sa pagbuntog sa akong pagkaadik sa akong pamaagi, yano nga naningkamot nga molikay kay sa naningkamot nga maulian.

Nakadesisyon ko nga makigkita sa akong bishop, ug iya ko nga gipahibalo sa Addiction Recovery Program [Programa aron Maulian gikan sa Pagkaadik]. Iyang gihatag kanako ang Addiction Recovery Program [Programa aron Maulian gikan sa Pagkaadik] nga giya ug misugyot nga motambong ko sa mga miting. Wala nako panumbalinga ang ideya, kay nahadlok kaayo ko nga moatubang sa ubang tawo bisan tuod og sila nakigbisog sa samang butang nga akong gipakigbisogan. Nakadesisyon ko nga himoon ang mga lakang sa akong kaugalingon ug nagpadayon sa pagpakigkita sa akong bishop matag semana. Si Satanas nagtrabaho adlaw ug gabii aron pugngan ko, apan akong nadiskobrehan nga nahabilin siya sa pultahan sa gambalay sa simbahan sa matag higayon nga makigkita ko sa akong bishop.

Nagdugay kini, apan samtang akong gitrabaho ang Lakang 1, ang akong kasingkasing nahumok ug nagsugod ko sa pagkaamgo nga dili kini nako mahimo nga mag-inusara. Nagkinahanglan ko og kusog nga may kauban aron mabuntog ang akong pagkaadik. Akong naamgohan nga ang kusog ni Satanas mas lig-on kon ako mag-inusara, ug bisan kon maayo kaayo ang akong bishop, dili mahimo nga siya lang ang nag-inusara nako nga tigsuporta hangtod sa hangtod. Kinahanglan ko nga mangita ug momintenar sa akong kaugalingon nga sistema sa suporta, mao nga midesisyon ko sa pagtambong sa akong una nga miting.

Klaro kaayo nako nga nahinumdoman ang gabii sa akong una nga miting. Nahadlok ko nga ang mga babaye sa akong tigsuporta nga grupo motan-aw nako nga adunay akusasyon sa ilang mga mata ug makahibalo kon unsa ko kadaotan nga tawo. Nahadlok usab ko kaayo nga makakita ko sa uban nga nakaila kanako. Akong naamgohan karon nga ang kaaway nagtrabaho aron magpadayon ko niana nga makahadlok nga panghunahuna. Nahadlok kaayo ko sa akong pagpadulong didto. Apan sa akong pag-abot, naa didto ang akong bishop aron giyahan ko paingon sa pultahan.

Sa una nako nga pagsulod, adunay usa lamang ka sister didto. Mainiton kaayo niya akong gihangop nga nawala og gamay ang akong mga kahadlok. Apan, samtang nagkadaghan ang mga babaye nga miabot, gibati nako nga mibalik ang akong kahadlok. Miuk-ok ko sa akong lingkoranan ug wala motan-aw ni bisan kinsa. Nakapangutana ko sa akong kaugalingon kon unsay akong gibuhat didto.

Sa dihang nagsugod ang miting, akong gibati ang Espiritu nga misulod sa lawak ug nagpalibot kanako uban sa maanindot nga makaayo nga kahayag. Ang mga luha nagsugod dayon sa pagdagayday sa akong nawong, ug akong gibati ang akong Langitnong Amahan nga mihunghong kanako nga Siya nahigugma kanako ug nga ako anaa sa tukmang dapit. Sa matag babaye nga nagpaambit, ang akong mga balod sa kaulaw hinay-hinay nga nailisan og mga balod sa pagpamalandong—pamalandong nga ako wala mag-inusara, nga ako dili mao ang masakiton ug imoral nga tawo nga akong gituohan nga mao ako samtang nagtubo. Wala gayod nahitabo sa akong kinabuhi nga naghunahuna ko nga adunay uban nga parehas nako, ug karon ania ko sa usa ka lawak nga puno sa matahom nga mga anak nga babaye sa Dios kinsa nag-atubang og mga hagit nga sama sa akoa. Mibiya ko sa miting nianang gabhiona nga mibati nga mas gidawat, gihigugma, nalig-on, ug mapasaligon kay sa unsay akong gibati sa tibuok nakong kinabuhi.

Karon samtang nagpadayon ko sa pagtambong sa mga miting, mobiya ko nga adunay nabag-o nga paglaom nga wala ako mag-inusara sa akong panaw. Nakahimamat ko og daghang nindot kaayo nga mga tawo subay niini nga dalan kinsa padayon nga miabag kanako.

Mapasalamaton kaayo ako sa akong Langitnong Amahan ug ni Jesukristo. Kanunay nako nga gihigugma ang akong Manluluwas, apan ang akong kaulaw dako kaayo nga wala ko motuo nga ako angayan nga motawag alang sa Iyang grasya. Wala gayod ako makahibalo unsaon sa pagsalig sa Iyang gahom sa personal nga paagi aron sa pagluwas kanako. Ang gikinahanglan lang gayod nako nga buhaton mao nga motuo nga kon ako mokab-ot ug mosalig Kaniya, Siya anaa didto. Ug Siya anaa gayod. Siya mipakanaog og 12-ka lakang nga hagdan ngari kanako diha sa panagway sa mga baroganan sa ebanghelyo nga gitudlo diha sa mga lakang sa Addiction Recovery Program [Programa aron Maulian gikan sa Pagkaadik]. Uban niini nga hagdan, ug ang akong Manluluwas sa akong kiliran nga mipanalangin nako og kalig-on ug kaisog, dili na nako mabalibaran ang Iyang nakadupa nga kamot. Nagsugod ko pinaagi sa pag-angkon nga ako walay gahom aron sa pagbuntog sa akong adiksyon nga ako ra. Misalig ko sa Dios ug misugod sa akong pagkatkat padulong sa pagkaulian.

Bag-ohay lang ko nga nakapasar sa usa ka tuig ug tunga nga pagkahimong badlongon. Mapasalamaton kaayo ko sa akong Langitnong Amahan nga mapailobong mibuhat uban kanako, mihulma nako, ug mitabang nako nga makabaton og katin-awan ug pagsabot. Adunay higayon nga nanlimbasog ko sa akong pagkaadik sa matag adlaw, apan karon nakahimo na sa kataposan nga makalingkawas gikan sa mga kadena niadtong kada adlaw nga makapahinumdom ug mga pakigbisog. Akong nakat-onan nga ang akong sekswal nga pagkaadik usa lamang sa timailhan sa usa pa ka mas dako nga personal nga trahedya—wala makaamgo sa akong kugalingong bili. Karon nakahibalo na ako nga usa ako ka matahom nga anak nga babaye sa Dios. Dili na ko motan-aw sa samin ug maghunahuna nga ako bati og nawong ug walay bili. Dili na ko mopahilayo sa akong kaugalingon nga imahe, tungod kay ako gilalang sa Iyang imahe, ug kana nakapahimo nako nga anaay walay kinutoban nga bili.

Kini nga istorya sa orihinal gikan sa Addiction Recovery Program [Programa aron Maulian gikan sa Pagkaadik] nga website.