Nganong kanunay man kining nahitabo?

Tingali makita nimo ang imong kaugalingon nga natanggong ug dili mapasabot ang pagsige og balik-balik sa pornograpiya. Siguro gisulayan na nimo ang nagkalain-lain nga solusyon. Tingali masinati gani nimo ang pag-uswag sa usa ka higayon, apan mabantayan na lang nimo ang imong kaugalingon nga mibalik sa pornograpiya.

Ang pagkamatinuoron sa imong kaugalingon ug sa uban kabahin sa imong paggamit og pornograpiya makatabang nimo nga mouswag sa imong panaw padulong sa kausaban. Usa sa paagi sa paghimo niini mao ang mainampingong paghunahuna sa unsay makapapukaw nimo. Ang makapahinumdom mao ang usa ka butang nga momugna og panginahanglan o tinguha aron nga ikaw mangita sa pornograpiya. Pananglitan, ang ubang tawo mahinumdom sa pagtan-aw og pornograpiya human makabaton og mga kasinatian diin sila mibati nga gibalewala, dili importante, o wala higugmaa.

Paggahin og pipila ka minuto sa paghunahuna ug pagsulat sa mga makapapukaw nga maoy hinungdan sa imong pagpangita og pornograpiya sa nangagi. Mahimo ka nga makadugang sa imong lista samtang mas daghan nga ideya ang moabot kanimo. Ang pipila ka ehemplo niini nga mga makapapukaw naglakip sa:

Mga makapapukaw gikan sa sulod:

Kasuko
Kaguol o depresyon
Pagbati nga wala higugmaa
Kaugtas
Kalaay
Kahingawa
Kamasulob-on
Ubos nga pagtan-aw sa kaugalingon o pagbati nga wala makakonektar sa Dios
Kaugtas human sa truma o paghinumdom sa nangagi nga mga higayon sa pang-abuso

Mga makapapukaw gikan sa gawas:

Kalisod sa usa ka relasyon
Pinansyal nga mga problema
Mga isyu sa pamilya
Piho nga oras sa adlaw o gabii
Wala damha nga mga kausaban sa kinabuhi
Paggamit o pag-abuso sa droga
Wala damha nga pagkabantang sa makapadani sa sekswal nga butang
Mga higala o kulural nga palibot

Kon gibati nimo nga andam na, rebyoha ang matag makapahinumdom nga imong nasulat. Imo ba nga makonektar kini nga makapapukaw ngadto sa piho nga sitwasyon sa nangagi diin midangop ka sa pornograpiya alang sa kahupayan o aron malinga? Imo ba nga maila ang bisan unsa nga mga panagsama sa imong kinaiya sa nangagi? Kon ikaw anaa na usab sa sama nga sitwasyon, unsa kaha ang lahi nimo nga buhaton? Pananglitan, imbes nga modangop sa pornograpiya, aduna bay usa ka sinaligan nga higala, sakop sa pamilya, o magtatambag nga imong makontak? Mahimo ka nga makig-istorya niya kabahin sa unsay imong gibati, o bisan mag-istorya lang mo og kadiyot. Ang uban nga ideya naglakip sa pisikal nga kalihokan, pagpaminaw sa musika, pagsulat diha sa journal o pagbasa og libro, o paghatag og serbisyo sa lain nga tawo.

Kini nga proseso mahimong usa ka lakang padulong sa pagpalingkawas sa imong kaugalingon gikan sa mga kinaiya nga mihulagway nimo sa nangagi. Sa nangagi, tingali wala nimo hunahunaa kabahin kon kanus-a ug ngano nga midangop ka sa pornograpiya. Tingali nangatarongan ka sa imong kinaiya o gibasol ang ubang mga tawo, mga lugar ug mga butang. Apan karon pwede na ka nga magsugod sa pag-angkon sa responsibilidad alang sa imong mga gibuhat, bisan kon kini nanginahanglan nga imong angkonon ang sakit kaayo, makauulaw, o lisod nga mga panghitabo. Ang pagkamatinuoron sa imong kaugalingon ug sa uban kabahin sa imong paggamit og pornograpiya makaabli usab sa imong kasingkasing sa pagdawat og tabang gikan sa imong Amahan sa Langit ug sa Manluluwas ug moandam kanimo sa pagdiskobre og mga panghunahuna nga mogiya padulong sa paghinulsol ug pagkaayo.

Lihoka

Susiha ang pipila sa imong mga gihunahuna kabahin sa imong kaugalingon. Asa niini nga mga panghunahuna ang nahisubay sa mga kamatuoran sa ebanghelyo? Asa niini nga mga panghunahuna ang tingali dili tinuod?
Hisgoti ang maayo nga sekswal nga kinaiya kauban sa imong kapikas, mga ginikanan, o haom nga tawo nga tigsuporta. Tingali makatabang usab ang pagpakig-istorya uban sa usa ka propesyonal alang sa kahimsog sa pangisip o medikal kinsa kaparehas nimo og mga gihatagan og bili.
Kon ikaw minyo, pakig-istorya sa imong kapikas kabahin sa unsa ang iyang nasinati isip resulta sa imong paggamit og pornograpiya. Mahimong importante ug mapuslanon kaayo alang nimo ug sa imong kapikas ang pagpaambit sa unsay parehas ninyo nga gibati.