Unsaon nako sa pagpangita og usa ka propesyonal sa kahimsog sa pangisip nga angay alang kanako?

Mahimong makahadlok ang pagkuha og propesyonal nga tabang sa pagbuntog og pornograpiya. Ang mosunod nga impormasyon makatabang nimo nga makapili og propesyonal sa kahimsog sa pangisip nga angay alang kanimo.

Ang mga propesyonal sa kahimsog sa pangisip kwalipikado nga modayagnos ug motambal sa mga kondisyon sa kahimsog sa pangisip. Ang kadaghanan adunay labing menos usa ka propesyonal nga degree o mas labaw pa nga edukasyon, pagbansay, ug mga kredensyal. Siguroha nga ang propesyonal nga imong gipili adunay lisensiya nga makahatag sa mga serbisyo sa kahimsog sa pangisip. Ibutang sa hunahuna nga kon pila ang bayad o unsay edukasyon nga nadawat sa mga propesyonal dili maoy labing maayo nga timailhan kon unsa sila ka kwalipikado o makatabang.

Unsa nga matang sa tigsangkap sa kahimsog sa pangisip ang akong gikinahanglan?

Ang maayo nga punto sa pagsugod mao ang pagtino sa matang sa propesyonal sa kahimsog sa pangisip nga labing haom sa imong mga panginahanglan ug mga sirkumstansiya.

Ang mga propesyonal sa kasagaran espesyalista sa piho nga mga bahin, sama sa depresyon, pag-abuso sa tambal, o therapy sa pamilya. Ang mosunod mao ang pipila sa labing komon nga mga matang sa mga tigsangkap:

• Psychiatrist

• Psychologist

• Nars alang sa Psychiatric nga kahimsog sa pangisip [mental health nurse]

• Lisensyado nga clinical social worker

• Therapist sa Kaminyoon ug sa Pamilya

• Propesyonal nga magtatambag

Aron makakat-on og dugang kabahin sa matag usa niini nga mga propesyonal, tan-awa sa “Finding a Mental Health Professional Who’s Right for You [Pagpangita og Propesyonal sa Kahimsog sa Pangisip nga Angay alang Kanimo].”¹

Unsay angay nakong ikonsiderar kon magpili sa lain-laing matang sa mga tigsangkap sa kahimsog sa pangisip?

• Hinungdan sa pagpangayo og tambag. Kadaghanan sa mga propesyonal sa kahimsog sa pangisip kwalipikado sa pagtambal sa kadaghanan sa mga hagit sa kahimsog sa pangisip, apan mahimo ka nga mopili sa usa nga nag-espesyalista sa pagbuntog sa pornograpiya o sa lain nga bahin nga direktang nakatampo sa imong paggamit og pornograpiya.

• Ang matang sa pagtambal nga gikinahanglan. Daghan nga tiggamit og pornograpiya ang tingali adunay mga isyu kabahin sa ilang biyolohikal, sikolohikal, sosyal ug espirituwal nga mga impluwensiya. Isip resulta, ikaw magkinahanglan nga makigkita og mas labaw pa sa usa ka tigsangkap sa kahimsog sa pangisip. Pananglitan, ikaw kinahanglan nga makigkita og usa ka psychiatrist nga moresita og tambal ug laing tigsangkap sa kahimsog sa pangisip alang sa pagpakigtambag.

• Imong badyet. Kinahanglan nga mopili ka og propesyonal nga kaya nimong bayaran. Kon makaya nimo, pangita og tigsangkap nga modawat sa imong insurance. Importante nga makapadayon ka sa imong pagpatambal sa gitakdang panahon nga imong gikinahanglan nga dili ka maglisod sa pinansyal.

Unsaon nako sa pag-ila sa labing maayo nga tigsangkap sa kahimsog sa pangisip alang nako?

Ikonsiderar ang paghisgot niini nga mga pangutana uban sa potensiyal nga mga tigsangkap sa kahimsog sa pangisip:

• Unsa nga edukasyon ug pagbansay ang ilang nadawat? Pila na ka tuig ang ilang kasinatian?

• Nag-espesyalista ba sila sa pagtambal sa mga indibidwal nga nangayo og tabang sa pagbuntog sa paggamit og pornograpiya?

• Unsa nga mga insurance provider ang ilang gidawat?

• Unsa ang mga oras sa ilang opisina, mga bayranan, ug gitas-on sa mga sesyon?

• Unsa kalayo ang ilang opisina gikan sa imong trabaho o panimalay?

• Modawat ba sila og bag-o nga mga pasyente?

• Nagtanyag ba sila og indibidwal nga pagtambal, magtiayon nga pagtambal, o ang duha? Asa nga matang o mga matang sa pagtambal ang imong gibati nga labing maayo alang sa imong sitwasyon?

• Unsa ang mga panginahanglan sa imong kapikas? Makabenepisyo ba usab sila gikan sa pagpakigkita niini nga propesyonal?

Angay lang nga mangutana og sama niini aron sa pagtino kon ang tigsangkap sa kahimsog sa pangisip angay ba alang kanimo. Mahimo nimong ipangutana kini nga mga pangutana sa dili ka pa mohimo sa imong unang appointment. Hatagi og atensiyon ang imong emosyonal nga tubag sa sinugdanan kon ikaw makig-istorya sa propesyonal. Salig sa imong kaugalingon ug sa imong paghukom. Ikonsiderar kon siya ba mora og maayo nga haom alang nimo, sa imong mga panginahanglan, ug sa imong personalidad.

Sa kataposan, pagmaisogon. Samtang ikaw magtinguha sa giya ug kalig-on sa Ginoo, magiyahan ka sa paghimo sa mga lakang padulong sa pagkaayo nga angay alang nimo.

Mubo nga sulat

1. Kevin Theriot, “Pagpangita og Propesyonal sa Kahimsog sa Pangisip Kinsa angay Kanimo,” Liahona, Ene. 2019.