Pagpangita og Propesyonal sa Kahimsog sa Pangisip Kinsa Angay alang Kanimo

Ni Kevin Theriot, PhD

LDS Family Services

Adunay daghang mga opsyon ug mga pangutana nga ikonsiderar kon magpili sa pagpangayo og tabang nga imong gikinahanglan.

Kon wala pa ikaw sukad makapili og tigsangkap sa kahimsog sa pangisip kaniadto, ikaw dili makahibalo unsaon sa pagpangita sa angay alang kanimo alang sa imong piho nga sirkumstansya. Ania ang pipila ka butang nga ikonsiderar samtang magsugod ka sa pagpangita sa tawo nga angay alang kanimo.

Unsa nga matang sa tigsangkap sa kahimsog sa pangisip ang imong gikinahanglan?

Ang mga propesyonal sa kahimsog sa pangisip modayagnos ug motambal sa mga kondisyon sa kahimsog sa pangisip. Ang kadaghanan adunay dili moubos sa master’s degree o mas labaw pa nga edukasyon, pagbansay, ug mga kredensyal. Siguroha nga ang propesyonal nga imong gipili makahatag sa serbisyo sa kahimsog sa pangisip.

Gilista sa ubos ang pipila sa labing komon nga matang sa mga tigsangkap. Ang pipila nag-espesyalista sa tino nga mga bahin sama sa depresyon, pag-abuso sa tambal, o therapy sa pamilya. Ibutang sa hunahuna nga kon pila ang ilang pangayo o unsay ilang edukasyon dili mao ang labing maayo nga timailhan kon unsa sila ka kwalipikado o makatabang.

Psychiatrist

Ang usa ka psychiatrist mao ang usa ka medical doctor (MD o DO) kinsa nag-espesyalista sa pagresita og mga tambal aron tambalan ang mga kondisyon sa kahimsog sa pangisip. Sila mahimo nga dugang nga mag-espesyalista sa pagtambal sa mga grupo sa pasyente sama sa bata, batan-on, hamtong, o tigulang nga mga pasyente.

Psychologist

Ang usa ka psychologist gibansay sa pagdumala sa mga hunahuna, mga emosyon, ug mga kinaiya. Kasagaran, ang usa ka psychologist adunay doctoral degree (PhD, PsyD, EdD).

Psychiatric-mental health nurse

Ang usa ka psychiatric-mental health nurse mao ang usa ka rehistrado nga nurse nga nabansay sa pagresita og tambal nga itambal sa mga kondisyon sa kahimsog sa pangisip.

Lisensyado nga clinical social worker

Ang usa ka clinical social worker adunay pagbansay ug kasinatian ilabi na sa pagtambal sa mga kondisyon sa kahimsog sa pangisip. Kasagaran, ang usa ka social worker naghupot og degree sa master of social work (MSW).

Mga propesyonal nga magtatambag

Ang usa ka propesyonal nga magtatambag adunay pagbansay ug kasinatian sa pagtambal sa mga kondisyon sa kahimsog sa pangisip. Kasagaran, ang usa ka propesyonal nga magtatambag adunay degree sa master of science (MS).

Unsay imong ikonsiderar kon magpili sa lain-laing mga matang sa mga tigsangkap sa kahimsog sa pangisip?

Ang imong kondisyon. Kadaghanan sa mga propesyonal sa kahimsog sa pangisip kwalipikado sa pagtambal sa kadaghanan nga madayagnos nga mga kondisyon, apan mahimo kang mopili og usa kinsa nag-espesyalista sa imong piho nga problema.
Bisan man kon ikaw magkinahanglan og pagpatambal, pagtambag, o niining duha. Daghan sa mga isyu sa kahimsog sa pangisip adunay biological, psychological, sosyal, ug espiritwal nga bahin. Isip resulta, ikaw magkinahanglan nga makigkita og mas labaw pa sa usa ka tigsangkap sa kahimsog sa panglawas. Pananglitan, ikaw kinahanglan nga makigkita og usa ka psychiatrist nga moresita og tambal ug laing tigsangkap sa kahimsog sa pangisip alang sa pagpakigtambag.

Unsaon nimo pagpangita og tigsangkap sa kahimsog sa pangisip?

Ikaw adunay daghang mga opsyon:

Pangayo sa imong primary care doctor sa lista sa mga tigsangkap nga iyang irekomend.
Pangayo og referral o rekomendasyon gikan sa kasaligan nga higala, sakop sa pamilya, lider sa Simbahan, doktor, o sa LDS Family Services (kon adunay opisina sa inyong dapit).
Kontaka ang lokal o nasyonal nga organisasyon sa kahimsog sa pangisip (sa telepono o sa online).
Pangitaa sa internet ang propesyonal nga mga asosasyon nga adunay mga listahan sa mga tigsangkap sa kahimsog sa pangisip sa imong dapit.

Unsa nga mga pangutana ang imong ipangutana kon magpili og tigsangkap sa kahimsog sa pangisip?

Ikonsiderar ang paghisgot niini nga mga isyu:

Aktibo ba sila nga miyembro sa Simbahan? Kon dili, sila ba adunay moral nga mga hiyas sama kanimo?
Unsa ang ilang edukasyon, pagbansay, ug mga tuig sa kasinatian?
Unsa nga bahin ang ilang giespesyalista?
Unsa nga mga insurance provider ang ilang gidala?
Unsa ang oras sa ilang opisina, bayranan, ug gitas-on sa sesyon?

Kon magpili og tigsangkap sa kahimsog sa pangisip, ayaw pagduha-duha sa pagpangutana og daghang mga pangutana. Ipangutana kini nga mga pangutana sa dili pa mohimo sa imong unang appointment. Daghang mga tigsangkap adunay website nga naghisgot sa daghang mga hilisgutan nga gihisgutan sa ibabaw. Ang pagpangita sa sakto nga pagkatakdo importante aron maestablisar ang relasyon sa pagsalig ug pag-angkon sa labing maayo sa pagpatambal. Samtang magmainampoon ka sa pagkonsiderar sa imong mga opsyon, ikaw tudloan sa sakto nga direksyon.