14 ka Paagi aron Mahibalik ang Imong Emosyonal nga Kahimsog

Ni Heather J. Johnson

Ang tagsulat nagpuyo sa Idaho, USA.

Kon gibati ka og emosyonal nga kakapoy, adunay mga paagi nga kanunay nga magmalampuson.

Ang kinabuhi sigurado gayud nga usahay makapahuyang sa atong emosyon, apan kon kita mapaningkamuton sa kaugalingon sa emosyonal nga paagi, masulbad nato ang atong emosyonal nga mga panginahanglan ug makasugakod sa inadlaw adlaw nga maayo ug dili maayo nga mga sirkumstansya. Wala kini magpasabut nga kita dili na gayud magkinahanglan og tabang. Hinoon, ang pagkamapaningkamuton sa kaugalingon sa emosyonal nga paagi mao ang pagkahibalo nga kita makasugakod sa emosyonal nga mga hagit sa atong kaugalingon ug pagkahibalo kanus-a kita magkinahanglan og tabang ug suporta gikan sa uban.

Samtang magkat-on kita unsaon sa pagbati ug pagtubag sa mga emosyon sa himsog nga paagi, kita mas makaserbisyo ug mas andam nga moserbisyo sa gingharian sa Dios. Pipila sa mosunod nga ideya makatabang samtang ikaw maningkamot nga mahimong mapaningkamuton sa kaugalingon sa emosyonal nga paagi.*

Buhata ang mga sukaranan: pag-ampo, pagtuon sa kasulatan, tambong sa simbahan, ug serbisyo. Tutok sa pagpasalamat.
Atimana ang imong kaugalingon sa pisikal nga paagi. Siguroha nga nagkaon ka og sakto, dunay igong katulog, ug nag-ehersisyo. Ang atong pisikal nga kahimsog nag-impluwensya sa atong emosyonal nga kahimsog.
Paghimo og journal. Kabahin aron mahimong mapaningkamuton sa kaugalingon sa emosyonal nga paagi mao ang pagkahibalo sa imong mga emosyon. Ang paghimo og journal usa ka maayong paagi sa pagdumala sa mga pagbati.
Isulti ang tinuod nimong mga gibati uban sa mga higala o pamilya. Ang paghisgot sa imong pagbati ngadto sa laing tawo usa ka maayong paagi nga makatabang nga ang imong emosyonal nga kahimsog mabalanse.
Pag-ampo alang sa panabang imbis sa mga dinalian nga kasulbaran. Ikonsiderar ang pag-usab sa mga pulong sama sa “Palihug, Langitnong Amahan, balansiha ang akong mga emosyon” “Palihug, Langitnong Amahan, ipakita nako unsay akong kinahanglan nga makat-unan ug buhaton sa akong kaugalingon aron mabalanse ang akong mga emosyon.”
Timbang-timbanga ang imong pagbalanse sa kinabuhi. Susiha ang panahon ug enerhiya nga imong gigamit sa pamilya, kaugalingon, serbisyo, trabaho, ug lingaw-lingaw. Kon ang usa ka bahin magkinahanglan og mas daghang panahon ug enerhiya gikan sa uban, magsugod nga ikaw makulangan sa katulog, enerhiya, ug focus. Kini nagpasabut nga panahon na nga timbang-timbangon na ang imong mga prayoridad.
Ayaw paglangay-langay. Ang paglangay-langay mosangpot ngadto sa depresyon. Bahin-bahina ang dagko nga mga buluhaton ngadto sa gagmay nga mga buluhaton. Sugdi, magpahinumdom sa imong kaugalingon, “Ang buhaton nako karon mao ra ang ______” o “buhaton ra nako kini sa pipila ka minuto ug dayon mopahulay ko kon gusto nako.”
Hunahunaa nga nagmalampuson ka. Ang pagkabalaka mahimong paagi nga sa hunahuna napakyas. Imbis nga hunahunaon kon unsay nasayop o kanunay nga nabalaka mahitungod sa “unsa kaha,” sa hunahuna kanunay bansaya ang positibo nga mga sangputanan ug paghimo og mga plano sa pagkab-ot niini. Kon wala masunod ang mga butang sama sa imong gilauman, hunahunaa ang imong kaugalingon nga nagkat-on gikan sa kapakyasan ug mopadayon.
Tutuki unsay imong gibuhat nga sakto, ug likaye ang pagtandi sa imong kaugalingon ngadto sa uban. Ang mga tawo nga dako kaayo og gilauman sa ilang kaugalingon ingon og molapas sa ilang mga kahuyang ug mga kapakyasan. Dayon, imbis molambo, mobati sila nga wala nay paglaum. Paghimo og lista sa imong mga hiyas, mga talento, mga kasinatian, ug mga abilidad. Planoha unsaon nimo sa paggamit ang imong mga kalig-on nga magmamugnaon niining semanaha.
Ayaw kabalak-i ang dili nimo makontrolar. Ang nangagi, ang kabubut-on sa uban, ang klima, ang imong mga limitasyon, o ang personalidad sa ubang mga tawo dili nimo makontrol. Tutuki ang mga butang nga imong mahimo, sama sa imong kinaiya, sa imong bahin sa relasyon, sa imong mga pagpili karon, ug sa imong kinaiya.
Dawata ang kamatuoran sa pipila ka makalaay nga mga naandan. Dili tanan sa kinabuhi nga makahuluganon kaayo ug makadasig. Likaye ang pagdrama-drama, ayaw pasobrahi ang mga butang, o ang panagbangi sa pagsulbad sa kalaay. Hinoon, pasalamati ug tagamtama ang maayong mga butang nga anaa sa imong palibut, ug pangita og mga paagi nga molambo ug moserbisyo.
Ayaw palab-ani ang imong kasuko. Ang mga tawo sa kasagaran mobati og kasuko kon sila mopili sa pagtan-aw sa uban nga (1) nanghulga, (2) dili makiangayon, o (3) dili matinahuron. Hinoon, tan-awa kon makahunahuna ka ba og mas maayong pagpasabut sa ilang kinaiya. Pananglitan, tingali sila gikapoy, wala makahibalo, walay kasiguroan, o naghunahuna nga sila matinabangon. Paghimo og pagpili nga dili sugnuran ang kasuko.
Batuki ang kalagmitan nga mobasol o mopakaulaw sa uban o sa imong kaugalingon. Hinoon, sulbara kon unsa ang problema ug pangayo og tabang sa ubang tawo nga motabang nga moayo niini, bisan kinsa ang nasayop.
Paminaw sa Espiritu, dili ang pagkanegatibo. Kon ikaw adunay mga hunahuna nga mopakaulaw, mobiay-biay, masuko, magbagulbol, manaway, o motawag sa mga tawo og bati, kini dili gikan sa Ginoo. Hununga kini. Kanta og usa ka himno, pagsag-ulo og kasulatan, o pag-ampo sa pagdapit sa pagbalik sa Espiritu.