Ang Katapusang Pulong
Ang Sakrament ug ang Pagkahimong Mas Mahisama kang Kristo
Ni Elder D. Todd Christofferson
Sa Korum sa Napulog Duha ka mga Apostoles
Gikan sa usa ka pakigpulong sa Oktubre 2017 nga kinatibuk-ang komperensya.
Ang simbolismo sa sakrament sa Panihapon sa Ginoo nindot nga pamalandungan. Ang tinapay ug tubig nagrepresentar sa Iyang unod ug dugo kinsa mao ang Tinapay sa Kinabuhi ug ang Buhi nga Tubig (tan-awa sa Juan 4:10), nga sa malumong paagi nagpahinumdom kanato sa Iyang gibayad aron sa pagtubos kanato. Samtang gipikas-pikas ang tinapay, atong hinumduman ang nasamdan nga unod sa Manluluwas. Sa pag-inom nato sa tubig, maghunahuna kita sa dugo nga Iyang gipaagas didto sa Getsemani ug didto sa krus ug sa makapabalaang gahum niini (tan-awa sa Moises 6:60).
Apan ang pasumbingay nga mokaon sa Iyang unod ug moinom sa Iyang dugo dunay dugang nga kahulugan, ug mao kana ang pagsabut og maayo sa mga hiyas ug kinaiya ni Kristo… . Sa pag-ambit nato sa tinapay ug tubig sa sakrament kada semana, mas maayo nga atong ikonsiderar kon unsa kahingpit natong ilakip ang Iyang kinaiya ug ang sunbanan sa Iyang walay sala nga kinabuhi sa atong kinabuhi ug pagkatawo. Dili unta maula ni Jesus ang mga sala sa uban gawas kon Siya Mismo walay sala. Kay ang kaangayan dili man makaangkon Kaniya, makatanyag Siya sa Iyang kaugalingon alang kanato aron matagbaw ang kaangayan ug dayon mapadangat ang kalooy. …
Ang pag-ambit sa unod sa Manluluwas ug pag-inom sa Iyang dugo nagpasabut nga isalikway sa atong kinabuhi ang bisan unsa nga wala mahiangay sa Kristohanong kinaiya ug sa paghimo sa Iyang mga hiyas nga atong kaugalingon. Kini ang mas dako nga kahulugan sa paghinulsol: dili lamang mopahilayo sa nangaging sala apan usab “mobalik sa iyang kasingkasing ug kabubut-on ngadto sa Dios” aron sa pagpadayon (tan-awa sa Giya ngadto sa mga Kasulatan, “Hinulsol, Paghinulsol”). Ang Dios mopakita kanato sa atong mga sayop ug mga kapakyasan, apan motabang usab Siya nga atong mahimo ang kahuyang ngadto sa kalig-on (tan-awa sa Ether 12:27). Kon sinsero kitang mangutana, “Unsa pa may akong kulang? (Mateo 19:20) Dili Niya kita pasagdan nga motagna, apan diha sa gugma motubag Siya alang sa atong kalipay. Ug mohatag Siya kanato og paglaum.