Sama sa Manluluwas: Pagtubo sa Upat ka Importante nga mga Bahin
Wala kaayo kitay nahibaloan mahitungod kon sa unsang paagi si Jesukristo nagtubo, apan ang Lucas 2:52 naghatag nato og impormasyon.
Litrato sa babaye nga miambak gikan sa Getty Images
“Maong, kinahanglan ko nga … mobuhat og unsa?”
Naminaw ko. Tinuod, naminaw ko. Ang tigtudlo misusi sa akong kasangkapan, mipakita nako sa eksaktong paagi unsaon sa pagtang-tang sa pisi, mitan-aw gani nako direkta sa akong mga mata ug miingon, “Ako DILI motugot nga ikaw mahagbong!”
Apan nianang kritikal nga gutlo, nagbarug ako nga nagkurog ug gipaningot, samtang nagtan-aw ako sa ubos … lawom kaayo, nakahibalo ko nga kinahanglan mohimo ko sa unang lakang.
Paglukso sa pang-pang.
Karon tingali kamo wala makasulay sa akong sitwasyon, mahitungod sa paglukso sa pang-pang,naglaum nga kamo andam kaayo sa pag-ambak nga luwas ngadto sa ubos. Apan kamo tingali nakasinati na sa espirituhanong paagi. Kahibalo kamo, sa dihang nagtuon kamo sa mga kasulatan sa inyong kaugalingon ug nakadungog kamo sa mga magtutudlo nga nagpamatuod sa tinuod nga doktrina ug mga baruganan. Gibati ninyo ang Espiritu nga nagdapit ninyo sa paglihok sa mga paagi nga makatabang ninyo nga mahimong mas sama sa Manluluwas. Nadasig kamo sa paggahin niini nga lakang ug mopakita sa Ginoo kon unsa mo ka mapasaligon ngadto sa Iyang ebanghelyo.
Dayon hunahunaa, “Unsaon nako kana sa pagbuhat?”
Ug unsay ingon og klaro kaayo ug mahimo nga usa lang ka gutlo ang milabay dili na mahimo. Anaa ka diha, nagbarug sa ngilit sa usa ka espirituhanong pang-pang, dili sigurado kon kamo aduna bay sakto nga ekipo o pagpangandam sa pagsunod sa kamatuoran nga inyong nadawat.
Aron mahimong sama ni Jesukristo: Unsaon ninyo sa pagbuhat niana?
Sugod sa Sinugdanan
Ang Manluluwas nagsugod sa Iyang mortal nga kinabuhi sama sa paagi nga kamo ug ako nagsugod: isip usa ka masuso. Ug sa katapusan sama kanato, si Jesus nagsugod sa pagtubo (tan-awa sa Doktrina ug mga Pakigsaad 93:11–17). Nakat-on Siya sa paglakaw, pagsulti, ug pagkatawa. Nakat-on Siya unsaon sa pagtrabaho, pagbasa, ug pagpakig-uban sa mga tawo.
Gani, ang paagi nga ang Ginoo “mitubo” narekord sa Lucas 2:52: “Ug si Jesus mitubo sa kaalam ug sa gidak-on ug sa kahimuot kaniya sa Dios ug sa tawo.”
Kon gusto kita nga mahimong sama sa Manluluwas, makasunod kita sa Iyang ehemplo.
Mao nga atong tan-awon kini nga sundanan ug tan-awa sa atong kaugalingon sa unsa nga paagi nga mahimong sama ni Jesukristo mahimo ra!
“Mitubo sa kaalam”
Ang Dios mibuhat sa atong mga hunahuna aron adunay talagsaong kapasidad sa pagtimbang-timbang, pagproseso, ug pag-implementar sa kahibalo. Mga kamatuoran, mga hulagway, mga kahanas, mga paagi—ang gidaghanon sa impormasyon nga atong matigum hapit walay kinutuban!
Apan sama sa Manluluwas, maningkamot kita nga motubo sa kaalam, dili lang sa impormasyon. Ang kaalam mao ang paghimo sa saktong paagi sa impormasyon, makasabut sa atong mga pagpili, ug paghimo og maayong mga desisyon.
“Ang tukma nga paggamit sa kahibalo naglangkob sa kaalam,” gitudlo ni Elder James E. Talmage (1862–1933) sa Korum sa Napulog Duha ka mga Apostoles.1 Gipasabut usab niya giunsa sa Manluluwas pag-angkon og kaalam: “Nakaangkon siya og kahibalo pinaagi sa pagtuon, ug pag-angkon og kaalam pinaagi sa pag-ampo, paghunahuna, ug paningkamot.”2 Gitudlo ni Alma ngadto sa iyang anak nga si Helaman, “O, hinumdumi, akong anak nga lalaki, ug pagkat-on og kaalam diha sa imong kabatan-on; oo, pagkat-on diha sa imong kabatan-on sa paghupot sa mga sugo sa Dios” (Alma 37:35). Hunahunaa kini: Hugot nga pagtuo, pagtuon, ug ang pagkamasulundon makapalambo sa atong abilidad sa pag-angkon og kahibalo ug makapadugang sa kaalam!
“Mitubo sa gidak-on”
Si Nephi dako ug kusgan. Siya mao ang unsay gitawag sa mga kasulatan nga “dako og pamarug” (1 Nephi 2:16). Ako dili. Ang gidak-on ni Nephi gidisenyo aron makahimo sa lain-lain kaayong mga kalihokan kay sa akong gidak-on tungod kay ang Ginoo adunay lain-laing mga buluhaton alang ni Nephi. Si Nephi kinahanglang mohimo og barko, mangita og pagkaon alang sa iyang pamilya, ug motabang kanila nga mopanaw agi sa kamingawan.
Ang atong pisikal nga mga lawas aduna sa unsay atong gikinahanglan aron magpuyo ug makatagamtan sa mortal nga kinabuhi. Tungod sa balaan nga desinyo sa Dios, ang usa ka bag-ong natawo nga bata magdako ang lawas inig labay sa panahon. Dili kinahanglang nga aduna pay dugang nga mga parte sa lawas kon magka-edaran na—kadto nga mga elemento gibuhat na isip kabahin sa atong mga lawas. Wala nay gikinahanglan nga dugang buhaton! Apan aron kita makaserbisyo sa Dios ug niadtong naglibut kanato, kinahanglan nga magpadayon ang kahimsog sa atong mga lawas.
Ang atong pisikal nga mga lawas hingpit nga gidisenyo nga templo, o balay, alang sa atong mga espiritu (tan-awa sa 1 Mga Taga-Corinto 3:16–17; 6:19–20). Si Presidente Russell M. Nelson mitudlo: “Ang inyong lawas, bisan unsa ang kinaiyanhon nga gasa, usa ka talagsaong nilalang sa Dios. Mao kini ang tabernakulo sa unod—usa ka templo alang sa inyong espiritu.”3
Ang atong mga lawas tingali makasinati og grabe nga pisikal nga mga hagit, mga kakulangan, ug sakit tungod kay kita makaangkon og mortal nga kasinatian, apan ang atong Langitnong Amahan hingpit nga midesinyo sa atong mga lawas aron malampusong makatuman sa atong mga oportunidad sa kinabuhi.
“Mitubo ang kahimuot sa Dios”
Si Elder Jeffrey R. Holland sa Korum sa Napulog Duha ka mga Apostoles miingon, “ang unang dako nga kamatuoran sa tanang kahangturan mao nga ang Dios nahigugma kanato sa tibuok Niyang kasingkasing, gahum, hunahuna ug kusog.”4
Ang Dios nahigugma kaninyo. Bisan kon kamo wala mobati nga nindot ang inyong hitsura, Siya nahigugma kaninyo—uban sa inyong tanang mga kalig-on, mga kahuyang, mga pangutana, ug mga paglaum. Mao nga unsaon ninyo nga motubo ang kahimuot sa Dios”? Ipakita ninyo Kaniya nga kamo nahigugma Kaniya!
Gisultihan ni Jesus sa makausa ang Iyang mga disipulo, “Kon nahigugma kamo kanako, inyong pagatumanon ang akong mga sugo” (Juan 14:15). Ang inyong pagkamasulundon nagpakita sa inyong gugma alang sa Dios. Ang inyong pagkaandam nga mosunod sa gagmay, inadlaw-adlaw nga mga kalihokan makaandam ninyo sa pagtubag, sa Iyang mga pagdapit sa umaabut, ug makatuman sa mas dagko nga mga butang.
“Mitubo ang kahimuot uban sa tawo”
Nasurprisa! Ang pagbaton og labing daghang mga sumusunod sa social media wala magpasabut nga kamo “nahimut-an sa tawo.”
Gipakita ni Jesus ang laing paagi sa pag-impluwensya sa uban—ug kinsa Iyang gitugutan nga moimpluwensya Kaniya. Siya “nagpangadto-adto sa paghimog mga kaayohan, … kay ang Dios uban man kaniya” (Mga Buhat 10:38).
Si Presidente Henry B. Eyring, Ikaduhang Magtatambag sa Unang Kapangulohan, sa makausa miingon, “Makahinumdom gihapon ko, ingon og karon, sa mga higala nga nakaimpluwensya sa akong kinabuhi alang sa maayo sa dugay nang panahon. Wala na sila, apan ang handumanan sa ilang gugma, ehemplo, hugot nga pagtuo, ug pagpamatuod nagpabilin gihapon kanako.”5
Madugangan ninyo ang inyong impluwensya pinaagi sa pagkahimong higala nga nag-impluwensya sa mga kinabuhi alang sa maayo! Alang sa Kalig-on sa Kabatan-onan nagtudlo kaninyo unsaon sa: “Pagpakita og tinuoray nga interes sa uban; pahiyom ug ipahibalo kanila nga kamo nagpakabana kanila. Tagda ang tanan uban sa kamabination ug pagtahud, ug likayi ang paghukom ug pagpanaway niadtong naglibut kaninyo … Paghimo og espesyal nga paningkamot nga mahimong usa ka higala sa mga maulawon o nag-inusara, adunay espesyal nga mga panginahanglan, o wala mobati nga giapil.”6
Hunahunaa ang mga indibidwal nga tinuoray ninyong gidayeg ug gitahud—kadtong inyong gikahimut-an. Unsa nga mga kinaiya ang ilang napalambo nga nagpahinumdom kaninyo ni Jesukristo? Tungod kay sa kamaayo sa atong mga higala, ang atong labing suod nga Higala mao si Jesukristo, ug ang Iyang ehemplo mao ang gusto natong sundon!
Sa Iyang Kahayag, pinaagi ni Greg K. Olsen
Konektado Kining Tanan
“Ug si Jesus mitubo sa kaalam ug sa gidak-on ug sa kahimuot kaniya sa Dios ug sa tawo” (Lucas 2:52). Samtang inyong sundon ang sundanan sa pagtubo sa Manluluwas, makita ninyo ang mga elemento nga hingpit nga nagtinabangay, ug kamo mahimong mas sama Kaniya. Ang inyong hunahuna, lawas, ug espiritu magtinabangay alang sa inyong kaayohan, ug kamo makahimo sa pagpanalangin sa mga kinabuhi sa daghan pa ug sa “pagserbisyo sa [Dios] uban sa inyong tibuok kasingkasing, gahum, hunahuna ug kusog”! (Doktrina ug mga Pakigsaad 4:2).