Ang Milagrosong Misyon ni Propeta Joseph Smith

Enero 2019

Ang Milagrosong Misyon ni Propeta Joseph Smith

Ni Presidente Dallin H. Oaks

Unang Magtatambag sa Unang Kapangulohan

Gikan sa usa ka pakigpulong, “Joseph Smith: The Prophet and the Man,” gihatag sa Mission Leadership Seminar niadtong Hunyo 25, 2018.

Si Joseph Smith nakahimo og mas daghan kay sa nahimo ni bisan kinsa nga mortal nga tawo sa mubo nga panahon. Ang bugtong posible nga pagpasabut mao ang langitnong tabang.

Mipili ko nga maghisgot ni Joseph Smith, ang Propeta ug ang tawo. Sa paghisgot mahitungod kaniya, manghinaut ko nga makatampo sa inyong pagsabut sa talagsaon ug milagrosong mga katumanan sa nagpasi-ugda nga propeta niini nga dispensayon.

Ang relasyon sa kahibalo ug pagpamatuod ni Joseph Smith ngadto sa misyonaryo nga buhat importante. Nasayud kitang tanan nga pipila sa mga investigator midawat sa nag-unang mga doktrina sa ebanghelyo apan dili lang gayud makadawat sa kamatuoran nga ang usa ka 14 anyos gibisitahan sa Amahan ug sa Anak ug nga siya mihubad sa Basahon ni Mormon ug nahimong propeta nga atong nailhan. Ang mga tawo kinsa dili makatuo ni Propeta Joseph Smith kinahanglang makat-on gikan niini nga pagtulun-an ni Presidente Russell M. Nelson:

“Ang misyon ni Joseph sa pagka-mortal gi-orden nang daan. Ang iyang madawaton ug lunsay nga hunahuna bukas sa instruksyon sa Ginoo. Apan, pinaagi sa mga sumbanan sa kalibutan, ingon og si Joseph dili gayud makahimo. Ug ang iyang buluhaton isip Propeta niining katapusang dispensasyon imposible kaayo. Kini nga ehemplo nagpakita og baruganan nga sa kanunay tinuod kon sa unsa nga paagi naglihok ang Ginoo: Iyang gamiton ang imposible!”¹

Importante kaayo nga ang atong mga misyonaryo adunay pagpamatuod sa balaan nga tawag ug sa milagrosong buhat ni Propeta Joseph Smith.

Ako 65 anyos nga estudyante sa kinabuhi ni Joseph Smith. Natawo ko niadtong 1932, sa dihang ang Simbahan lapas lang og gamay sa 100 ka tuig. Nagtuo ko nga ako usa ka matinud-anong Santos sa Ulahing mga Adlaw niining ikaduhang siglo. Wala namo mahimamat si Joseph Smith, apan gibati namo nga kami nakaila kaniya, ug kami nahigugma kaniya pinaagi sa unsay iyang gipadayag ug gitudlo. Mga saksi kami sa kamatuoran sa balaknong panagna nga “minilyon ang makaila ni ‘Brother Joseph.’”²

I. Joseph Smith, ang Propeta

Nakahibalo kitang tanan nga si Joseph Smith mao ang unang propeta niini nga dispensasyon, ang instrumento sa Ginoo sa Pagpahiuli. Apan unsa ang gipahiuli sa Ginoo pinaagi niini nga propeta? Dili tanang mga Santos sa Ulahing mga Adlaw (ug pipila ka dili mga miyembro) ang nakahibalo sa makapahayag ug daghang mga gidugang nga gidasig sa Ginoo ni Propeta Joseph nga mahimo ngadto sa doktrina sa Kristiyano. Ania ang mubo nga lista:

Ang kinaiyahan sa Amahan, sa Anak, ug sa Espiritu Santo.
Ang may kalabutan nga mga katuyoan niining tulo ka sakop sa Dios nga Kapangulohan ug ang Ilang relasyon ngadto sa mortal nga mga binuhat.
Ang kinaiyahan sa Pagkapukan sa tawo.
Ang katuyoan sa mortal nga kinabuhi sa pagpadayon sa plano sa Amahan alang sa Iyang mga anak sa pagkab-ot sa ilang mahangturong kapalaran.
Ang tahas sa Pag-ula ni Jesukristo sa pagsiguro sa pagka-imortal ug paghatag sa oportunidad alang sa kinabuhing dayon.
Ang tahas sa yutan-on ug mahangturong kaminyoon sa plano sa Amahan.
Ang importante nga tahas sa priesthood ug sa mga ordinansa sa plano sa Amahan.
Ang importante nga tahas sa mga templo ug sa puli [proxy] nga mga ordinansa sa plano sa Amahan.
Ang kahibalo nga ang Dios nagtinguha sa pagluwas sa Iyang tanang mga anak ug nga ang matag tawo kinsa nakapuyo niini nga yuta—bisan kon nakahibalo ni Jesukristo o wala—adunay kapabilidad sa pagkab-ot sa labing taas nga langit human dinhi.
Ang relasyon sa tulo ka tinubdan sa kamatuoran mahitungod sa tawo ug sa uniberso: ang siyensya, ang mga kasulatan, ug ang nagpadayon nga pagpadayag.

Si bisan kinsa nga magtuon bisan sa gamay nga bahin niini nga lista—tumutuo man og dili tumutuo—kinahanglang modawat nga si Joseph Smith nagbarug nga tinubdan sa halapad kaayo nga sapa sa madasigon ug bag-o ug bililhon nga relihiyoso nga mga ideya. Sama sa atong mabasa sa Isangyaw ang Akong Ebanghelyo, ang kahingpitan sa ebanghelyo gipahiuli nganhi sa yuta pinaagi ni Joseph Smith.³

Tingali makabantay mo nga ang akong lista wala maghisgot sa pagpagawas ni Joseph sa Basahon ni Mormon, usa ka bag-ong volume sa kasulatan nga, dayag lang, ang tinubdan sa daghan niadtong bag-ong relihiyoso nga mga ideya. Kana nga basahon angayan nga espesyal nga hisgutan. Ang ulohan niini nagpahayag sa labing importante nga katuyoan: “Lain nga Tugon ni Jesukristo.” Apan labaw pa nianang sukaranang tahas, aduna pay daghan. Aniay gisulti sa usa ka labing inila nga eskolar mahitungod sa basahon:

“Ang Basahon ni Mormon nagsugyot og bag-ong katuyoan alang sa America: mahimong kayutaan sa pagkamatarung kay sa gingharian sa kalingkawasan. Batok sa nagkadaghan nga bahandi ug pagkadili makiangayon, ang Basahon ni Mormon nagdapig sa kawsa sa kabus. … Batok sa republican nga gobyerno, nagsugyot kini og matarung nga pagmando sa mga maghuhukom ug mga hari ubos sa balaod sa Dios. Batok sa relihiyon nga Biblia lang ang gituohan ug wala magtuo og milagro, ang Basahon ni Mormon nagmatuod sa padayon nga pagpadayag, mga milagro, ug pagpadayag ngadto sa tanang mga nasud. Batok sa pagduha-duha, nagpasiugda kini og pagtuo; batok sa nasyonalismo, sa kinatibuk-ang Israel. Nakita niini ang katalagman sa nasud kon ang gugma sa katigayunan, pagsupak sa pagpadayag, ug ang pagkasibilisado sa Hentil mopatigbabaw sa pagkamatarung, pagpadayag, ug Israel.”⁴

Ang mas importante mao ang gisulti ni Presidente Nelson karong bag-o mahitungod sa Basahon ni Mormon: kini “mao ang instrumento diin ang gisaad nga pagpundok sa Israel matuman.”⁵

Sama sa atong mabasa sa Isangyaw ang Akong Ebanghelyo, si Propeta Joseph Smith miingon nga ang Basahon ni Mormon mao “ang tukurang bato sa atong relihiyon.”⁶

Kadaghanan sa mga dili Santos sa Ulahing mga Adlaw wala makahibalo sa dakong nasalmot ni Joseph Smith ngadto sa relihiyusong panabot. Sa usa ka talagsaon nga tibuok nasud nga pagtuon, si Gary Lawrence ang tig-analisar og opinyon nakakaplag nga hapit katunga sa mga tawo nga iyang gitun-an nagtuo nga ang mga Santos sa Ulahing mga Adlaw lahi ug misteryoso ug adunay “katingad-an nga mga pagtuo.”⁷ Sa dihang nangutana siya sa mga tig-interbyu, “Unsa ang labing importante nga pangangkon sa Mormonismo?” usa lang sa pito ang makahulagway sa bisan unsa nga duol sa ideya sa pagpahiuli o pagtukod pag-usab sa orihinal nga pagtuo sa Kristiyano. Susama usab, sa lain nga survey sa tibuok nasud nangutana sa mga tigtubag sa paghulagway sa ilang impresyon sa atong relihiyon, walay usa ka tawo ang misugyot sa ideya sa orihinal o pagpahiuli sa Kristiyanismo.⁸

Kini nga mga nakaplagan nagpahinumdom nato nga kita kinahanglan dili magdahum nga ang atong mga misyonaryo adunay daghang kahibalo mahitungod sa atong pagtuo. Kadtong ilang gitudloan tingali nakadungog na sa pulong Mormon, apan ang mga misyonaryo kinahanglang dili magdahum nga ang kadaghanan aduna sa labing unang pagsabut sa sukaranan nga mga baruganan sa atong pagtuo.

II. Joseph Smith, ang Tawo

Ania ang pipila sa akong personal nga mga hunahuna mahitungod sa talagsaong kinabuhi ni Joseph Smith.⁹ Ang Joseph Smith nga akong nahibaloan sa akong personal nga pagsiksik, kadaghanan didto sa Illinois, USA, mao ang tawo nga nagpasiugda og panimuyo—batan-on, emosyonal, banggiitan, ug gimahal pag-ayo ug maduolan sa iyang katawhan nga kanunay nga motawag kaniya nga “Brother Joseph.” Ang iyang pagkabatan-on nakapalig-on sa iyang mapanagnaon nga pagpangalagad. Siya 14 anyos sa panahon sa Unang Panan-awon, 21 sa dihang nadawat niya ang bulawan nga mga palid, ug 23 lang sa dihang nahuman niya paghubad ang Basahon ni Mormon (wala kaabut og 60 ka adlaw tingtrabaho).

Sobra sa katunga sa mga pagpadayag sa atong Doktrina ug mga Pakigsaad gihatag pinaagi niini nga propeta samtang nag-edad siya og 25 o mas bata pa. Siya 26 anyos sa dihang naorganisar ang Unang Kapangulohan ug labaw lang sa 33 anyos sa dihang mieskapo gikan sa pagkapriso didto sa Missouri ug misugod pag-usab sa pagpangulo sa mga Santos. Siya 38 anyos ug tunga sa dihang gipatay siya.

Atol sa iyang mubo nga kinabuhi, si Joseph Smith adunay mas daghan nga mortal nga mga kasakit. Sa dihang siya mga pito ka tuig, nag-antus siya sa grabing kasakit sa operasyon sa bitiis. Tungod sa kakabus sa iyang pamilya, wala kaayo siyay pormal nga edukasyon ug isip batan-on napugos sa pagtrabaho og taas nga mga oras aron makatabang sa pagbutang og pagkaon diha sa lamesa sa pamilya. Giataki siya sa pisikal nga paagi sa makadaghang higayon. Taliwala sa pagpaningkamot sa pagtuman sa bug-at nga mga responsibilidad sa iyang sagradong tawag, kinahanglan siyang motrabaho isip mag-uuma o negosyante aron makasangkap og panginabuhian alang sa iyang pamilya. Gibuhat niya kini nga walay talagsaong espiritwal nga mga gasa nga mipaluyo kaniya sa iyang propetikanhong tawag. Gisultihan siya sa Ginoo nga “sa temporal nga mga paghago ikaw dili makabaton og kusog, kay kini dili imong balaan nga tawag” (Doktrina ug mga Pakigsaad 24:9).

Sa espirituhanong mga butang, si Joseph Smith walay ehemplo nga diin iyang makat-unan unsaon nga mahimong usa ka propeta ug usa ka lider. Siya nagsalig lang sa walay kasinatian nga mga kauban. Siya ug sila nakigbisog ug nakat-on pagdungan. Si Joseph dali kaayong nakaangkon og kahibalo ug kahingkod. Dili malalis nga siya adunay talagsaong mga gasa. Sumala sa atong panultihon karon, “dali siyang makat-on.” Miingon siya nga siya gitudloan sa langitnong mga mensahero ug pinaagi sa ubang mga pagpadayag gikan sa Dios, ug ako mituo kaniya.

Usa sa iyang personal nga mga gasa makita pinaagi sa gugma ug pagkamaunungon sa mga tawo nga misunod kaniya. Sa dihang si Joseph mihagit sa iyang mga sumusunod sa pagbuntog sa ilang mortal nga mga kahuyang, wala niya ipataas ang iyang kaugalingon nga labaw kanila, ug sila nahigugma kaniya tungod niini. Sa usa ka wali nga gisangyaw ni Joseph kapin lang sa usa ka bulan sa wala pa siya patya, siya mipahayag, “Wala gayud ako moingon kaninyo nga perpekto ako; apan walay sayop sa mga padayag nga akong gipanudlo.”¹⁰ Si Joseph Smith adunay “pagkagaan og buot” (Joseph Smith—Kasaysayan 1:28) nga maoy nakapahigugma sa tanan kinsa nakaila kaniya. Usa ka kaila miingon, “Ang gugma sa mga santos alang kaniya dili ikasulti.”¹¹ Ang pagpakig-uban sa iyang mga higala makapalipay ni Joseph, kinsa nakakita sa pagtukod sa katilingban ug komunidad nga usa ka dakong katuyoan sa ebanghelyo.

Nakaobserbar ko kausa: “Sa iyang tibuok kinabuhi si Joseph Smith nagpuyo sa bag-ong panimuyo, diin ang mga tawo kinahanglang ipakita ang ilang kalig-on batok sa kinaiyahan ug usahay batok sa usag usa. Dako siya nga tawo, kusgan ug aktibo sa pisikal. Ganahan siya og panagsangka sa mga sport, lakip sa binirahay sa tukon—usa ka pagsulay sa kusog (tan-awa sa History of the Church, 5:302). Ang atong mga arkibo [archive] naglakip sa daghang mga handumanan sa iyang pagpakiglayog [wrestling] uban sa mga higala ug mga kaila. Sa usa ka adlaw sa Igpapahulay, siya ug si Brigham Young misangyaw ngadto sa mga Santos didto sa Ramus, Illinois, mga usa ka adlaw nga biyahe gikan sa Nauvoo. Pagka-Lunes, sa wala pa mobiya sa Ramus, si Joseph misulay sa iyang kaisug sa wrestling batok sa usa ka tawo nga gihulagway nga ‘ang maldito sa Ramus’ (tan-awa sa Joseph Smith Journal, 13 Marso 1843, girekord ni Willard Richards, Joseph Smith Collection, LDS Church Archives). Gilabay siya ni Joseph. Malipayon ko nga sa kasamtangan nga iskedyul sa atong komperensya kini wala maghatag sa lokal nga mga miyembro sa oportunidad sa pagtesting sa nagbisita nga mga kadagkoan niining paagiha.”¹²

Pipila ka mga tawo mao ang mga puntarya sa daghang pag-ataki sa ilang misyon o sa ilang handumanan kay ni Joseph Smith. Giimbestigar nako ang pipila niini nga mga pasangil pinaagi sa personal nga pagsiksik sa orihinal nga mga rekord sa Illinois, diin nagpuyo si Joseph sa katapusang lima ka tuig sa iyang kinabuhi. Usa sa maong mga pasangil miabut sa dihang si Joseph Smith, nga mao ang mayor, ug ang Konseho sa Siyudad sa Nauvoo nanglupig sa Nauvoo Expositor, usa ka oposisyon nga pamantalaan. Kini nga pagpanglupig nagtutok sa mga kagubot batok sa Simbahan ug direktang misangpot sa pagpatay ni Joseph.

Ang unang mga tigsaysay [historian] nga Santos sa Ulahing mga Adlaw, lakip ni Elder B. H. Roberts, miuyon nga kini nga aksyon dili legal. Apan sa akong pagsiksik niini nga hilisgutan isip usa ka batan-ong propesor sa abogasya, nasurprisa ko nga nakakita og legal nga basehan alang niini nga aksyon sa balaod sa Illinois sa 1844. Dihay daghang mga pagpanglupig sa mga pamantalaan sa bag-ong panimuyo panahon sa wala pa ang Gubat Sibil. Ang garantiya sa kagawasan sa pamantalaan sa Batakang Balaod sa Estados Unidos wala gipahayag nga magamit sa mga aksyon sa siyudad ug mga gobyerno sa estado hangtud 1931, ug dayon sa upat ngadto sa lima lamang nga pagsalig sa pag-usab sa batakang balaod sa Korte Suprema sa Estados Unidos nga gisagop niadtong 1868.¹³ Ang tawo kinahanglang mohukom ni Joseph Smith base sa mga balaod ug mga sirkumstansya sa iyang panahon, dili sa ato.

Isip mga estudyante sa Unibersidad sa Chicago, ang tigsulat nga si Marvin S. Hill ug ako naintriga sa gamay nga kasayuran nga lima ka tawo gihusay sa Illinois tungod sa pagpatay kang Joseph Smith. Sulod sa labaw sa 10 ka tuig among gihalungkat ang mga librarya ug mga arkibo sa tibuok nasud aron sa pagpangita sa matag tipik sa impormasyon mahitungod sa 1845 nga husay ug kadtong naapil niini. Ang among basahon nagribyu sa mga pulong ug mga aksyon sa mga lumulupyo sa Illinois kinsa personal nga nakaila ni Joseph Smith—ang pipila nga nahigugma kaniya ug mirisgo sa ilang kinabuhi alang kaniya, ug ang uban nga nasilag kaniya ug nagplano sa pagpatay kaniya. Walay nakita sa among nadiskobrehan sa orihinal nga mga rekord sa korte o sa pagpamatuod sa taas nga husay ang bisan unsa nga nagpakita nga pagpakaulaw sa tawo nga gipatay.¹⁴

Ang pagkatan-aw sa mga rekord sa korte sa Illinois misangpot ngadto sa laing wala matandog nga bahin kaniadto sa pagsiksik ni Joseph Smith. Si Joseph I. Bentley, kaniadto usa ka estudyante sa abogasiya sa Chicago, ug ako nakadiskobre og daghang mga rekord sa mga kalihokan sa negosyo ni Joseph Smith. Kaming duha ang tagsulat sa 1976 Brigham Young University Law Review nga artikulo niini nga hilisgutan.¹⁵ Ang 1840 gisundan sa usa ka panahon sa tibuok nasud nga kaguliyang sa panalapi ug depresyon. Ang ekonomikanhong mga kondisyon sa mga estado sa utlanan sa kayutaan sama sa Illinois makadaot. Pananglitan, ang mga tagsulat ni Abraham Lincoln mihulagway sa iyang pinansyal nga mga kaulawan niini nga dekada, sa dihang ang mga negosyo risgo kaayo, daghang mga obligasyon wala mabayri, ug mga kiha-kiha komon kaayo.¹⁶

Ang mga kaaway ni Joseph Smith mipasangil niya nga nanglimbong sa halin sa nagkadaiyang mga kayutaan, nga kasagaran gipahigayon alang sa Simbahan. Ang sunod-sunod nga pagdungog sa korte nga miabut og hapit usa ka dekada nagsusi niini nga mga pasangil sa makuti nga mga detalye. Sa katapusan, niadtong 1852, human sa taas nga exodo sa mga Santos gikan sa Illinois (mao nga walay posible nga politikanhon o ubang hinungdanan alang ni bisan kinsa nga mopabor sa mga Santos o sa ilang lider), ang usa ka federal nga maghuhukom mitapos sa iyang husay uban sa pamahayag nga walay nakita nga pagpanglimbong o ubang moral nga kasaypanan ni Joseph Smith.¹⁷

Ang mga eskolar nga nakahibalo mahitungod sa mga isyu sa publiko niining panahona misulat mahitungod sa kampanya ni Joseph Smith alang saPagkapresidente sa U.S.:

“Samtang wala siyay seryoso nga kahigayunan sa pagdaog sa 1844 nga tibuok nasud nga piniliay, midagan siya isip ikatulo nga grupo nga kandidato kinsa seryoso kaayo mahitungod sa pag-awhag og legal nga reforma sa Estados Unidos. Naglaum siya ug nagtrabaho sa pagpalambo sa pampublikong opinyon sa dagkong mga isyu lakip sa pagkaulipon, kagawasan sa relihiyon, mga prisohan, ug pampublikong mga yuta. Siya ug si Robert F. Kennedy nagpabilin nga bugtong duha ka Amerikano nga gipatay samtang sila mga kandidato alang sa buhatan sa pagkapresidente sa Estados Unidos.”¹⁸

Ang kinaiya ni Joseph Smith tingali labing nasabtan sa mga tawo kinsa nakaila kaniya pag-ayo ug nagbarug nga labing suod kaniya diha sa pagpangulo sa Simbahan. Gidayeg nila siya ug mipaluyo kaniya isip usa ka propeta. “Ang iyang igsoong si Hyrum mipili nga mamatay diha sa iyang kiliran. Si John Taylor, nga uban usab kaniya sa dihang gipatay siya, miingon: ‘Mopamatuod ko sa atubangan sa Dios, mga anghel, ug mga tawo, nga siya usa ka maayo, dungganan, mahiyason nga tawo … —nga walay ikasaway sa iyang pangpribado ug pangpubliko nga kinaiya—ug nga siya nagpakabuhi ug namatay isip usa ka tawo sa Dios’ (The Gospel Kingdom [1987], 355; tan-awa usab sa D&P 135:3). Si Brigham Young mideklarar: ‘Nagtuo ko nga walay tawo nga nagpuyo sa yuta nga mas nakaila ni [Joseph Smith] kay kanako; ug maisugon akong mosulti nga, gawas ni Jesukristo, walay mas maayo nga tawo nga nakapuyo sukad o karon nagpuyo dinhi sa yuta’ [“Remarks,” Deseret News, Ago. 27, 1862, 65].”¹⁹

III. Joseph Smith ug ang Balaod

Ingon nga makita gikan sa mga ehemplo nga gisulti na nako, ang akong dugay nga tinguha sa legal nga kasaysayan naglakip sa espesyal nga tinguha sa mga pakigsulti ug buhat ni Joseph Smith uban sa legal nga sistema sa Amerikano sa iyang panahon. Ang mga tigsaysay tradisyunal nga mipahayag nga si Joseph Smith usa ka partido sa dili molabaw sa 40 ka legal nga mga aksyon. Karon, uban sa kaayohan isip resulta sa trabaho nga gihimo sa The Joseph Smith Papers, nasayud kita nga ang gidaghanon labaw pa sa 220. Kining legal nga aksyon nagsugod “gikan sa yanong koleksyon sa mga kaso ngadto sa komplikado nga [husay] nga naglakip sa kalibutanong legal nga mga teyoriya. … Si Joseph adunay pipila ka abogado sa … pagdala ug pagpanalipod sa [maong] mga aksyon … sa sibil ug kriminal nga mga butang.”²⁰

Naghunahuna sa talagsaong bahandi sa kahibalo nga anaa kanato mahitungod sa kinabuhi sa Propeta, ang eskolar nga Santos sa Ulahing mga Adlaw nga si Jeffrey N. Walker misulat: “Dili ikalimud, si Joseph Smith personal, aktibo, ug makanunayon nga miapil sa legal nga sistema sa Amerikano. Sa pagbaliwala niining importante nga mga kalihokan mao ang dako nga pagwal kon giunsa niya paggahin ang iyang panahon ug kusog, sa malaamon ug sa epektibong paagi—gani si Daniel H. Wells, usa ka abogado mismo, maghuhukom, ug attorney general, kinsa nakaila kaayo sa Smith, namahayag: ‘Nakaila ko sa mga tawo kinsa mitrabaho og balaod sa akong tibuok kinabuhi. Si Joseph Smith mao ang labing bantugang abogado nga akong nailhan sukad sa akong kinabuhi’ [sumala sa nakutlo sa The Journal of Jesse Nathaniel Smith: Six Decades in the Early West: Diaries and Papers of a Mormon Pioneer, 1834–1906 (1953), 456].”²¹

Tulo ka mga tagsulat nga Santos sa Ulahing mga Adlaw mi-summarize sa mosunod: “Sa iyang pag-apil-apil sa legal nga sistema, si Smith daling nakat-on sa mga lagda sa dula ug legal nga migamit niadto nga mga lagda sa iyang hingpit nga kaayohan pinasubay sa balaod, naningkamot sa hingpit nga paggamit sa bag-ong mga oportunidad ug mga panalipod nga gihatag sa bag-ong mga balaod sa nasud. Ang iyang legal nga mga pagpili ug batasan naklaro nga siya nakahibalo og maayo mahitungod sa legal nga mga butang ug nga siya mihimo og dayag nga mga lakang sa paghimo og matag angay nga paggamit subay sa balaod, bisan kon nagkuha man siya og katungod sa sinulat sa Basahon ni Mormon ubos sa federal nga balaod, nagpahigayon og mga kaminyoon ubos sa balaod sa Ohio, naghimo sa mga ordinansa sa siyudad sa Nauvoo, nanawagan sa hingpit nga panalipod sa relihiyoso nga kagawasan, naghimo sa epektibong paggamit sa bag-ong mga balaod nga nagdumala sa pagbaligya sa federal nga yuta, nagbarug [sa] katungod sa habeas corpus, nangayo og tukma nga lugar, o nanghangyo nga maapil [coverage] ubos sa bag-ong gisagop nga federal bankruptcy law. Sa iyang libre nga oras, nagtuon siya sa mga basahon sa balaod. Nakahibalo siya sa sakto nga pinulongan sa Batakang Balaod ug sa piho nga pinulongan sa mga balaod sa estado. Walay pagduha-duha nahibalo kaayo siya sa daghang legal nga kalamboan sa estado ug sa federal sa iyang tibuok kinabuhi.”²²

Ang importante, kadtong tulo ka tagsulat midugang niini nga pamahayag: “Isip sinumbong, wala gayud siya makombikto sa bisan unsa nga kriminal nga sala. Kon gihatagan siya og makiangayon nga husay, makita siya nga usa ka matarung ug matinuoron nga lumulupyo.”²³

Ang detalyado nga mga summary sa husay sa Propeta gipili ug gianalisar sa basahon nga akong gikutlo nagdepende sa trabaho sa daghang mga estudyante sa J. Reuben Clark Law School kinsa mikuha sa mga kurso sa hilisgutan ug mihimo sa detalyado nga trabaho nga misangpot ngadto sa basahon niining tulo ka tagsulat. Nadani ako sa ilang paghulagway sa mga opinyon niining mga estudyante sa abogasya:

“Ang mga estudyante sa abogasya kinsa migamit sa miaging mga pamahayag niini nga basahon isip ilang textbook kanunay nga miabut sa opinyon nga si Joseph responsable, may tulubagon, maunungon, madaginuton, maloloy-on, mabinantayon, metikuluso, masunuron sa balaod, mapailubon, positibo, mapaningkamuton, intelehente, maalamon, usa ka maayong maghuhukom sa kinaiya, ug gani makinaadmanon sa legal nga paagi (sa paggamit sa pipila sa ilang pulong), ilabi na sa pagpanalipod sa relihiyoso ug sibil nga mga katungod sa uban o sa paghimo sa mga katungdanan nga gisalig kaniya. … Si Joseph Smith wala gayud mawad-i og pagtuo sa Batakang Balaod ug naningkamot pag-ayo ubos sa panabang niini, bisan og siya kanunay nga napakyas, nahigawad, ug mabinantayon sa mga tawo nga nagpatuman niini.”²⁴

IV. Panapos

Sa iyang kinabuhi, Si Joseph Smith nakahimo og mas daghan kay sa nahimo ni bisan kinsa nga mortal nga tawo sa mubo nga panahon. Ang bugtong posible nga pagpasabut mao ang langitnong tabang. Ganahan ko niini nga summary:

“Iyang gihubad ug gimantala ang Basahon ni Mormon didto sa New York; miorganisar sa Simbahan didto sa New York, ug dayon mibalhin ngadto sa Ohio, Missouri, ug Illinois; naghimo og mga siyudad, lakip sa Kirtland, Far West, ug Nauvoo; mitawag ug mibansay og gatusan ka mga lider sa simbahan; nagtuon og Hebreohanon ug sa Biblia; mitukod sa Relief Society sa Nauvoo; mipadagan og mga negosyo, nga siya ra ug adunay mga kauban; mipalambo og real estate ug mitukod og mga templo; misulat ug mimantala og mga artikulo og mga editoryal; adunay dako nga pamilya ug adunay daghan kaayo nga mga higala; ug nagserbisyo sa pipila ka sibiko nga mga katungdanan, lakip sa commander-in-chief sa dako nga pundok sa kasundalohan, ingon man usab isip mayor ug labaw nga maghuhukom sa siyudad sa Nauvoo. Namulong siya kanunay sa sinemana nga mga tulumanon sa pagsimba, pagpahinungod, ug kanunay sa tanan nga mga haya, nakadani siya og liboan ka mga sumusunod, nag-aghat sa daghang mga kinabig nga mobalhin ngadto sa Estados Unidos.”²⁵

Sa usa ka kinatibuk-ang komperensya nga mensahe nga gihatag sobra na sa 20 ka tuig ang milabay, miingon ko niini:

“Sama sa ubang matinud-anong mga Santos sa Ulahing mga Adlaw, akong natukod ang akong kinabuhi sa pagpamatuod ug misyon ni Propeta Joseph Smith. Sa akong tanang nabasahan ug orihinal nga pagsik-sik, wala gayud ako mahigawad gikan sa akong pagpamatuod sa iyang mapanagnaon nga tawag ug sa ebanghelyo ug sa pagpahiuli sa priesthood nga gipasiugdahan sa Ginoo pinaagi kaniya. Ligdong akong mohatag sa pagpamatuod nga gipadayag ni Joseph Smith sa naila na nga Wentforth letter niadtong 1842:

“‘… Ang sumbanan sa kamatuoran natukod; walay dili balaan nga kamot ang makapugong sa buhat sa paglambo; mga pagpanggukod mahimong magkakusog, ang mga manggugubot mahimong maghiusa, mga kasundaluhan magpundok, mga pasangil mahimong modaot sa kadungganan, apan ang kamatuoran sa Dios magpadayon nga maisugon, halangdon, ug gawasnon, hangtud nga kini makasulod sa matag yuta, makabisita sa matag dapit, molukop sa matag nasud, ug makasulti sa matag dunggan, hangtud ang mga katuyoan sa Dios matuman, ug ang Halangdong Jehova moingon nga ang buhat nahuman na’ (Times and Seasons, 1 Marso 1842, 709; kinutlo sa Daniel H. Ludlow, ed., Encyclopedia of Mormonism, 5 vols. [1992], 4:1754).”²⁶

Mga kaigsoonan, ako mopamatuod ni Jesukristo, ang atong Manluluwas, kinsa nagpakita uban sa Amahan ngadto sa batan-on nga propeta ug kinsa gisulti sa Amahan: “Kini mao ang Akong Hinigugmang Anak. Paminaw Kaniya!” (Joseph Smith—Kasaysayan 1:17). Ug kita nakadungog sa atong Ginoo nga si Jesukristo pinaagi sa pagpadayag sukad nianang higayuna. Kini ang Iyang Simbahan. Kita naghupot sa awtoridad sa Iyang balaan nga priesthood. Magpadayon Kita diha sa Iyang kawsa. Ako mopamatuod sa tawag ni Propeta Joseph Smith ug sa tawag sa mga propeta kinsa misunod kaniya niining importante nga buhat diin kamo nahiapil.

Edad:	Panghitabo:
14	Nakadawat sa Unang Panan-awon
21	Nakadawat sa bulawan nga mga palid
23	Nakahuman sa paghubad sa Basahon ni Mormon
25	Nakadawat sa katunga sa mga pagpadayag sa Doktrina ug mga Pakigsaad
26	Naorganisar ang Unang Kapangulohan
33	Nakaikyas gikan sa bilanggoan sa Missouri, mibalik sa pagpangulo
38	Gipatay